Mäkwe ñäkäi ño Bibliabätä ye köböire käi rabai juto mäbätä o käi rabai krene mäbätä. Mä raba ñäkä Bibliabätä ye nuainne ño ne kwe rabadre bare kwin mäi ye ani mike gare jai.

Biblia kwitani ni ne näire kukweibiti ie tö ngwan raba yebätä mäkwe ñäkä. Mätä ñäke Bibliabätä aune tä tikani kukwe ñan nüke gare mäi aune kukwe kirabiti ngwane, ñäkä Bibliabätä käi ñan rabai juto mäbätä. Ye medenbätä, Biblia tä kwitani kukwe nuärebiti aune raba mate mä brukwäte yebätä mäkwe ñäkä. Ne madakäre, ye tädre kwitani metre aune tö ngwan raba ie. a

Tecnología mrä yebiti mäkwe nuain. Nengwane, Biblia ñan tä sribebare täräre aibe, ñakare aune tä formato electrónico arato. Mä raba ñäke internete o mä raba descargare jai computadora, tableta o teléfono yete. Biblia ruärebätä bersikulo ye arabe tä kwitani kukwe madabiti ye mika raba ñärärä o bersikulo ye keta raba texto mada Bibliakwebätä. Mäkwe ñäkädrebätä ngwane mä tö kukwe nuai ngwane, tärä arato audiore. Nitre ruäre tä niken sribi kokwäre, tä niken karote nitre kwati ngätäite, tätre dän bätäte o sribi mada nuainne känti ja töi mikadre krubäte ribe ñaka ngwane, töta nemen kukwe nuai. ¿Mäkwe nuaindre ño abokän rabadre bäri kwin mä kräke? ¿Ñobätä mä ñan nuainne?

Kukwe mada känä bäri. Kukwe ruäre ja tötikakäre Bibliabätä raba mä dimike ja tötike bäri kwin Bibliabätä. Ñodre, kä kädekateta Bibliabätä ye tä ükaninte mapabätä aune kä kädekateta ye raba kwen mäi aune mä raba kukwe nakaninkä ye bämike ja töite. Ne madakäre, kukwe ruäre tä mikani tärä nebätä aune sección “Kukwe Bibliabätä drieta” tä Internete jw.org ye käkwe mä dimikai kukwe Bibliabätä ye mike nüke gare bäri kwin jai.

Mäkwe kukwe jene jene nuain. Ñäkädre Bibliabätä kena nememe mrä ye raba tuin krubäre mäi ngwane, mä raba ja töi mike ñäke meden tuin kwin mäi ye ererebätä. Mä tö kukwe mikai gare bäri jai ni iti kädrieta Bibliabätä yebätä ngwane, mä raba ñäke ni kädrieta ye ererebätä. Recuadro “ Biblia mike gare jai nitre kädrietabätä yebiti” ye raba mä dimike mä tö ja tötikai ni itibätä ngwane. Arato mä raba ñäke kukwe jene jene ye ererebätä o jirere jatäri. ¿Ñobätä mä ñan kukwe ne erere nuainne?