Biblia ye ñan tärä mada ye erere. Yete ni ni sribekä ara tä kukwe niere nie mäträkäre nibätä (2 Timoteo 3:16). Kukwe nieta kwe ye raba mä töi mike kukwe nuainne. Biblia ara tä niere: “Ngöbö Kukwei abko nire amne dite” (Hebreos 4:12). Tärä ne raba mä dimike nüne bäri kwin kukwe ketebu känti: mäträre mäbätä köbö kwatire kwatire kräke aune mä dimike Ngöbö mike gare kwin jai aune käbämikata kwe ye (1 Timoteo 4:8; Santiago 4:8).

Tä mäträre köbö kwatire kräke. Biblia tä mäträre kukwe jeñe nikwe yebätä aune kukwe keta kabrebätä.

• Nita ja kete ni madabe yebätä (Efesios 4:31, 32; 5:22, 25, 28, 33).

• Ni tädre kwin ja ngrabarebiti aune ja töibiti yebätä (Salmo 37:8; Proverbios 17:22).

• Ja mika gure aune kukwe mada yebätä (1 Corintios 6:9, 10).

• Ngwian yebätä (Proverbios 10:4; 28:19; Efesios 4:28). a

Nitre bati ja mäkäninte Asia yei namani gare kukwe Bibliabätä ye kwin krubäte. Tä nemen bare nitre tä ja mäkete bitin bäsi jökräbätä erere, ñaka namani nuäre kräke nünankäre jabe aune blitakäre kwin jabe. Akwa kukwebätä ñäkä nämäne kwetre Bibliabätä ye jatanintre mike täte. ¿Ye köböire dre namani bare? Vicent tä niere: “Ti nämä ñäke Bibliabätä ye käkwe ti dimikaba ja tuin ja tare yebiti kukwe nämä nemen nun kisete yebe. Nunta kukwe ye mike täte ye nun dimikanina nüne kä jutobiti”. Muko kwe Annalou tä kukwe ye era niere: “Kukwe kwin bämikani Bibliabätä bätä nunkwe ñäkäba ye käkwe nun dimikanina krubäte. Nengwane tita nüne kä jutobiti aune kukwe mikani nuaindre nunkwe jai ja känenkäre yebätä kätä juto tibätä”.

Tä ni dimike Ngöbö mike gare jai. Vicent kukwe miri gare jabätä, akwa tä kukwe mada ne niere: “Ñäkä Bibliabätä ye köböire ja ruin bäri känime Jehová ken tie”. Kukwe nieta nete ne tä kukwe ütiäte mike gare: Biblia raba mä dimike Ngöbö mike gare kwin jai. Mäkwe ñäkäibätä ye köböire ñan kukwe kwin aibe rabai mäkwe, ñakare aune mä rabai ja kete bäri kwin ben. Aune Kukwe kwe yebätä kukwe kwin käbämikata kwe ja känenkäre nie yete ni rabai nüne kwin kä jutobiti ye rabai gare mäi (1 Timoteo 6:19). Kukwe ye tärä mada ñaka raba käbämike nie.

Mäkwe ñäkä Bibliabätä kömikai aune mäkwe nuaindi käre ngwane, mä arato raba nüne kwin aune Ngöbö rabai gare bäri kwin mäi. Akwa mäkwe ñäkäibätä ngwane, kukwe keta kabre mä jatai ngwentari jai raba ruin nunye. Ye raba bare mäbätä ngwane, mäkwe ni etíope sribikä gobranbe käkwe nünanbare kä 2 mil nikanina ta yete ye ngwan törö jai. Niara nämäne ñäke täräbätä ye nämäne nüke gare ie ya, ye Felipe, ni ja tötikaka Jesube ye käkwe ngwanintari ie. Niarakwe niebare: “¿Kukwe ne dirikä ñakare tie, se rükadre gare ño tie?”. b Ye bitikäre, Felipe, ni dirikä kwin, ye tuanimetre kwe ja jie ngwen (Hechos 8:30, 31, 34). Erere arato, mä tö Biblia mikai nüke gare bäri kwin jai ngwane, nunta mä nübaire formulario tä jw.org yete kukwe tike o kä bäri känime tä mikani tärä nebätä yekänti kukwe tike. Arato mä raba blite ni testiko Jehovakwe nünanka mä käite yebe o mä raba niken Ju Ja Ükarakrö yete. Nunta mä nübaire ne kwe mäkwe Biblia känändre matare kwati jai aune tuenmetre ja mike nüne kwin.