Ti därebare paddington, Londres (Inglaterra ). Yete ni kwati krubäte tä nüne. Ti nämä nüne ti meye ben aune ti eteba nimä ben. Ti rün abokän dö ñain krubäte yebätä ruäre ngwane ñaka nämä gwi.

Ti nämä chi ngwane, oradre ño ye ti meye nämä driere tie deu. Biblia chi nämä tikwe, tärä salmo yebe nämä bätä ti nämä musika ngö mike kantakäre jai. Bati tikwe ñäkäba täräbätä ngwane, kukwe nämä tikani yete käkwe ti töi mikaba niä, nie nämä: “Batibe kä ñaka jetebe”. Kukwe ye ñaka nämä ti mike ja düke deu; ti nämä töbike kukwe ja känenkäre yebätä. Ti nämä ne niere jai: “Kukwe ne ñan aibe tä ni kräke. ¿Tita dre nuainne nete?”. ¡Ti ñan tö rababa krütai!

Ja mäkätä ño chokabe ye ti tö rababa mikai gare jai. Yebätä ti jababa blite ni krütanina yebe aune ti janama dobobiti ja ketamuko kwelate tikwe yebe. Arato ti nämä ja ükekrö bentre pelikula kä jürä mikakäre nibätä ye tuakäre. Kukwe jökrä ye nämä nun mike tiboñöre aune bätärabe ja nämä nemen ruin kwin nunye.

Kä nämä 10 tibiti ngwane ti rababara näin ji blobiti. Ti rababara sö duin aune ye aibe ti jataba nuainne. Ye bitikäre ti jataba droga duin. Kä nämä 11 tibiti ngwane tikwe dö kwaka ñaba, bänä ñan nämä nemen kwin tie, akwa ti tö nämä ja tuai dröbare. Ti nämä musika tarere aune ti tö nämä bailadi, aune kä nämä nemente tie ye ngwane ti nämä niken fiestabätä. Ti nämä ngitie deu aune kä jämi ngwen dekä ngwane ti nämä nüketa, ne kwe ñaka ti gadre. Käre, ti nämä nainte yebätä ti ñan nämä nementa kwelate. Ti nämä niken kwelate, kä nämä nemente chi tie ngwane, ti nämä dö ñain käre kwelate.

Kwela nämä krüte ngwane, nota tikwe nämäne käme krubäte. Ñongwane ti ja ngwain kwin ye ñaka nämäne gare ti meye ie, yebätä rababa ulire aune rubun tikrä. Nunkwe ñäkäba jai, biti tikwe kämikakaba gwi. Kä ruäre te tikwe nünanba tony ben, niara ye ja kukwe muko tikwe. Niara ye nämä gore, droga rürübäine aune niara ni nuainkä tare yebätä käikitaka nämä. Yebiti ti rababa murore aune kä nämä 16 tibiti ngwane monso rababa kena tikwe.

Ni meyere nämä monso ngübare kaibe ye käite ti nämä nüne arato, yete nitre testiko Jehovakwe rababa gare tie. Nitre ni mada dimikaka ye köböire ti rababa nüne yete. Meri nibu testiko nämä nüke käre meritre bati meyere tuinbiti. Bati ti rikaba blite siba bentre bämikakäre ietre niaratre nämä dre niere ye ngwarbe. Akwa metrere, kukwe ngwantari nämä tikwe ye mikaba gare jökrä kwetre tie töi jämebiti aune Bibliabiti. Niaratre töi jäme aune blite bä nuäre ye rababa tuin kwin tie yebätä tikwe ja tötika bibliabätä kä ngäbitiba ietre.

Kä braibe te dre rababa gare tie Bibliabätä ye käkwe ti töi kwitaba. Ti nämä chi ye ngwane gata ye jürä nämä nemen tibätä, akwa Jesús nämäne dre niere ni krütanina gaikröta yebätä ye rababa gare tie (Juan 5:28, 29). Arato Ngöbö töita tibätä rababa gare tie (1 Pedro 5:7). Kukwe tä tikani Jeremías 29:11 ye mataba ti brukwäte. Yete nieta: “Ñobätä ñan aune ti töita ño mun kräke ye gare kwin tie, nieta Jehovakwe. Ti tö mun tuai nüne jäme aune ñaka ja tare nike. Kukwe kwin rabadre ja känenkäre munkwe aune munkwe tö ngwandre kukwe kwin ie ye ie ti tö”. Nikwe nünain Kä Bä Nuäre te kärekäre Kä Tibienbätä ye jataba era ti kräke (Salmo 37:29).

Nitre testiko Jehovakwe nämä ti tarere krubäte. Kena ti janama gätäbätä ngwane nitre testiko abokän tä ja tarere aune ja ngwen kwin ye jutuaba tie. Nitre yete jökrä ja ngwen bä nuäre (Juan 13:34, 35). ¡Ja ngwan nämä ño iglesiate tibe ye erere nitre ne ñaka nämä ja ngwen! Ti nämä ja ngwen ño yebätä nitre testiko ñaka ñäkäba tie. Kä diankaba kwetre jai tikrä aune ti tareba kwetre, töi nämä tibätä aune ti dimikaba kwetre. Ti nämä ja mräkätre kwati ngätäite rababa ruin tie.

Tikwe ja tötikaba Bibliabätä ngwane tikwe ja töi kwitadre Ngöböta ribere erere ye rükaba gare tie. Sö dua tuadremetre ye ñaka rababa nuäre ti kräke. Ne arato, musika ruäre kukwe nua nämä tikwe ye nämä ti töi mike droga duabätä rükaba gare tie, yebätä ti jataba musika mada kukwe nuin. Ti ñaka rababa näin fiestabätä, yete ti raba dö ñainta nämä gare tie. Aune tikwe ja ketamuko mada känänba, nitre ye raba ti dimike ja töi kwite (Proverbios 13:20).

Kä ye näire, Tony nämä ja tötike arato Bibliabätä nitre testiko Jehovakwe ben. Batire batire kukwe ngwantari nämä kwe jai ye erere mika nämä gare ie Bibliabiti, yebätä kukwe metre jataba nüke gare ie. Ja töi kwitaba krubäte kwe: Nitre ni nuainkä tare yebätä kä mikakaba kwe aune ñaka rababara gore jankunu aune droga duin. Akwa, nünandre Jehová töita ño erere rükaba gare nunye, yebätä nunkwe kukwe ükateba metre jabe ne kwe monso nunkwe käkwe nünandre kwin. Kä 1982 yete nunkwe ja mäkäteba.

Törö tie, ti nämä kukwe känene täräkwata La Atalaya aune ¡Despertad! a yebätä, nitre kwati käkwe ja töi kwitanina tä tikani yete, ye erere ti töi nämä nuainne. Kukwe mika nämä gare bätätre ye nämä ti dimike krubäte; ye köböire ti ñaka nämä di nekä. Käre ti nämä kärere Jehovai, ñaka rabadre nainte ti käne. Kä julio 1982 yete Tony aune ti nun ja ngökaba ñöte ni testiko Jehovakwe erere.

Tikwe ja mäkäbare Jehovabe ye köböire ti namani kwäre. Jehovakwe nun dimikanina kukwe tare näire ye nunkwe tuanina Tony ben. Namanina gare nunye tö ngwandre ie kukwe tare näire aune käre tä nun mräkä ngübare ye tuin nunye (Salmo 55:22).

Monso nunkwe brare aune merire, ye nunkwe dimikanina ja mäke Jehovabe ye käi juto nunbätä. Aune erere arato nun bräntre tä kukwe mike gare jai yebätä käita juto nunbätä.

Ti ñaka niena ngwätere töbikabätä dre rabai bare ja känenkäre o gata yebätä. Tony aune ti nunta sribire krubäte bämän kratire kratire konkrekasion nitre testiko Jehovakwe ye tuinbiti, ja mräkätre dimikakäre. Ja mräkätre yebe nunta kukwe driere nitre ie, tödekai Jesubiti kwetre ngwane, raba nüne kärekäre arato.