Juta Sajonia, República Democrática Alemana (RDA) yekänti ti därebare. Nun jakänti gwi nun nämä ja tarere aune tikwe ja ngwandre kwin ye ti rün bätä ti meye käkwe drieba tie. RDA ye comunista, aisete nitre kwati juta Sajonia ja mikadre kukwebätä ye ñaka nämä ütiäte kräketre. Ti ñaka nämä Ngöbö mike era jai arato. Kä 18 näre te kukwe ketebu nämä ti töite ye abokän ñaka Ngöbö mikadre era jai aune comunismo.

Kukwe comunismo ye nämä tuin kwin tie, ñobätä ñan aune ni jökrä mika nämä tuin ja erebe ja kwrere. Ti kräke abokän nitre rabadre tuin ja erebe yekäre, nitre jondron bökäne aune ñaka jondron bökäne yebiti jondron döräire ja närebe nämä ruin tie. Aisete ti rikaba sribire monsotre bati bati organización comunista yebe. Kä nämä 14 tibiti ngwane, tikwe sribiba krubäte proyecto medioambiental yebätä, yete ti nämä täräkwata ükekrö reciclakäre. Ye rababa tuin kwin nitre sribikä gobranbe kä Aue ye ie, yebätä premio bianba kwe tie. Ti nämä bati, akwa nitre político krikri kä yekänti rababa gare tie. Tikwe kukwe dianba nuaindre jai ye kwin aune kukwe kwin nämä ja känenkäre ti kräke nämä ruin tie.

Akwa ye erere ñan rababa bare. Kä 1989 ye ngwane, muro Berlín juanba ngwarbe aune kä Europa del Este yekänti kukwe comunismo ye mika ñan rababara ütiäte. Ye bätäräbe rababa gare tie kukwe blo blo nuain nämä krubäte. Ñodre, nitre ñan nämä kukwe comunismo ye mike ütiäte jai ye ñaka mika nämä ütiäte jai. Kukwe ye mataba tare tibätä, ñobätä ñan aune kukwe comunismo yete ni jökrä ja erebe drie nämä. Se ñobätä ñan rababara ütiäte mada ñan rababa nüke gare tie. Kukwe jökrä ye rababa ti mike nainte, ti ñan rababara tö ngwen kukwe ye ie.

Aisete, ti rikaba ja kite musika aune pintura yebätä. Ti rikaba ja tötike musikabätä kwelate ne kwe ti rikadre universidad. Ti rabadre musika täkäkä aune sribikä pinturabätä ye ie ti nämä tö ngwen krubäte. Tikwe ja ngwandre kwin driebare tie ye ti ñan rababara nuainne. Tikwe kä ngwandre juto jabätä ye bäri rababa ütiäte ti kräke aune ti rababa dikekä meritre bati bati kwati ben. Akwa musika, ti nämä sribire pinturabätä, ti nämä ja ngwen kämekäme ye ñaka nämä ti töi mike jäme. Ja nämä ruin ño tie ye erere ti nämä bä sribere cuadrobätä. ¿Dre rabai bare ja känenkäre? ¿Ñokäre nita nire? ye ti nämä ngwentari jai.

Ti tö nämä kukwe mikai gare jai ye rababa gare tie mada, ye ngwane ti töi rababa niä. Bati, ti nämä kwelate ngwane, monsotre ja tötikaka nämä täkänintubu nämäntre blite kä ja känenkäre yebätä, yekänti ti rababa täkänintubu siba. Yete Mandy, * ni testiko Jehovakwe nämä käkwe nieba tie: “Andreas, dre rabai bare ja känenkäre aune ñokäre nita nüne mä tö mikai gare jai yekäre, mäkwe ñäkä Bibliabätä”.

Kukwe ye raba nemen gare Bibliabätä tie ye ti ñan rababa mike era jai, akwa tikwe känänba. Tikwe ñäkädre Daniel kapitulo 2 yebätä ye Mandy käkwe nieba tie aune tikwe ñäkäbabätä ngwane, ti töi rababa ñan krütare. Profecía ye tä blite juta krikri dite dite yebätä, ye abokän gobrantre tä kukwe keta kabre nuainne ni näire. Ye bitikäre, ni rabai nüne ño ja känenkäre ye profecía mada tä mike gare ye Mandy käkwe mikaba gare tie. Ti nämä kukwe ngwentari jai ye rababa gare tie. ¿Akwa nirekwe kukwe ye tikani? ¿Dre rabai bare ja känenkäre ye nire raba mike gare metre? ¿Kukwe ye nämä mike gare Ngöbö tärä?

Mandy käkwe Horst aune Angelika, nitre gure testiko ye mikaba gare tie. Niaratre ye käkwe ti dimikaba bäri Biblia mike gare kwin jai. Bengwairebe rababa gare tie nitre testiko ye aibe tä Ngöbö kädeke kä jeñe yebiti aune tä driere nitre madai (Salmo 83:18; Mateo 6:9). Jehová tö ni tuai nüne kärekäre kä tibien bä nuäre yete ye rababa gare tie. Salmo 37:9 tä niere: “Nitre tä tö ngwen Jehovai yekwe kä tibien rabai”. Kukwe nieta Bibliakwe ye ererebätä nire nire tä ja di ngwen nüne yekwe kukwe käbämikata ye raba nemen ye rababa tuin kwin tie.

Kukwe nieta Bibliakwe ye erere tikwe ja ngwandre nüne aune tikwe ja töi kwitadre ye ñaka rababa nemen nuäre ti kräke. Tikwe ja kitani musikabätä aune ti sribikä pinturabätä yebätä ja jataba ruin ütiäte tie, akwa tikwe ja töi mikadre bobre yebätä rababa ja kitadre tie. Ne madakäre, ti nämä ja ngwen käme krubäte ye ñaka rababa nuäre ti kräke tuanmetrekäre. Biblia tä kukwe niere ye ererebätä nire tä ja di ngwen nüne ye Jehovata ngübare bätärekä, töi mike nüke gare jai aune tare kwe yebätä tita debe bien krubäte.

Kukwe comunismo aune ñaka Ngöbö mikadre era jai ye kä 18 näre te nämä tuin kwin tie. Dre rabai bare ja känenkäre yebätä ti nämä töbike krubäte, akwa kukwe Bibliabätä rababa gare tie ye käkwe ti töi mikabata jäme. Kä 1993 ye ngwane, tikwe ja ngökaba ñöte aune ti ja mikaba testiko Jehovakwe. Aune kä 2000 ye ngwane, tikwe ja mäkäteba Tabitha ben, niara ye testiko Jehovakwe arato. Nunta kä denkä krubäte jai kukwe Bibliabätä ye driekäre nitre mada ie. Nitre kwati gare nunye ye tä ja ngwen ti nämä ja ngwen käne ye erere, nitre comunista aune ñaka Ngöbö mike era jai ye erere tätre töbike. Tita nitre dimike ne kwe Jehová rabadre gare ietre ye käi juto krubäte tibätä.

Ti jataba ja kete nitre testiko Jehovakwe ben ngwane, ti rün aune ti meye ie ñaka rababa tuin bä. Akwa ye bitikäre, tita ja kete nitre testiko ben ye köböire tita ja ngwen kwin ye gare ietre. Ti rün aune ti meye tä ja tötike Bibliabätä aune tä niken gätäbätä ye käi juto tibätä.

Nitre gure rabadre nüne ño mikata gare Bibliabätä ye erere nunta ja di ngwen nüne ye tä kä mike juto nunbätä. Ñodre, ja ngwandre metre jai kwärikwäri nieta Bibliakwe ye erere nunta nuainne ye tä nun dimike (Hebreos 13:4).

Dre rabai bare ja känenkäre aune nünandre ño yebätä ti ñaka niena töbike krubäte. Nitre testiko Jehovakwe kä jökräbiti tibien tä nüne kä jutobiti aune keteitibe nitre ja mräkäre kwrere ye ngätäite tita siba. Nitre ja mräkäre ye jökrä ja erebe ye erere ie ti tö nämä aune käre ti nämä känene.