TÖBIKE KUKWE NEBÄTÄ: museo känti jondron kirakira mikata tuare yekänti mä rikadre basare. Jondron jökrä ye bäsi mäkäte, ngututu aune ngetrani. Mada abokän tä klabare. Akwa keteiti abokän tä kwin. Sribebare ño ye erere tä ngöi täte. “¿Tä ngöi noko abokän mrä ya?”, mäkwe ngwandretari ni sribikä iti yete ie. Aune, “ñakare”, niedre kwe mäi, “ñakare aune ye bäri kira aune sribebare ño ye erere täbe känime”, niedre kwe mäi. “¿Akräke nämäne mikani kwin ngwäte ya?”, mäkwe ngwandretari ie. “Ñakare”, niedreta kwe mäi, “nebätä bäri kukwe keta kabre namanina bare. Ñodre, ñü, murie dite aune nitrekwe ja di ngwanina juankäre ngwarbe”, niedre kwe mäi. Yebätä mä rabadre töbike kukwe nebätä: “¿Tä sribebare drebiti?”.

Biblia keta raba jondron kira tä kwin aune ngöi kädrite ye erere. Biblia ye tärä kirabe. Bäkänä, tärä kira mada mada tärä, akwa jondron ngututure erere ruäre nikanina ngwarbe. Tärä kirakira ye ruärebätä kukwe científico nämäne tikani, akwa nengwane kukwe ye mikata gare bäri kwin. Aisete, kukwe nämäne tikani käne ye nikanina ta. Mada abokänbätä ni kräkäi mikadre ño ye nämäne tikani, akwa ye erere nikwe ja kräkäi mikadre nengwane ngwane, kukwe bäri tare raba nemen bare nibätä. Aune tärä kira mada yebätä kukwe kiakia aibe kite nemenkä, ñobätä ñan aune niena ngututu o kukwe ruäre nianinante.

Biblia abokän ñaka tärä mada mada ye erere. Kä nikanina 3,500 biti bäri ta yete tika jatani, akwa nengwane täbe ngöi. Bäkänä, kä raire te nitre ja töi mikani Biblia kukwe, ñäkäire aune ñaka kain ngäbiti. Kukwe keta kabre nuainbare gatekäre, akwa yebiti ta kukweta tikanibätä ye täbe ütiäte. Ne madakäre, kukweta tikani Bibliabätä ye jämi niken ta, ñobätä ñan aune kukwe mrä mrä mikata gare nengwane ye erere Biblia käkwe mikanina gare mekerabe.

Akwa mä tä ngwentari jai: “¿Metrere kukwe ja jie ngwankäre drieta Bibliakwe ye raba ni dimike nengwane?”. Kukwe ye mikakäre gare jai, töbike kukwe taretare ben nitre tä ja tuin yebätä. ¿Meden meden tä nitre ngwen ja tare nike bäri? Mä raba nemen töbike rü nuainta, kä tibien juanta ngwarbe, ni nuainta tare o kukwe ñaka kwin nuainta yebätä. Kukwe kwin Bibliabätä ja jie ngwankäre ye ruäre mike gare jai. Mä täi mike gare ngwane, ne ngwentari jai: “Ni jökrä käkwe kukwe ne mikadre täte ngwane, ¿nüna rabadre bäri kwin ya?”.

KÄ JÄME TAREDRE

“Nire nire tä ja di ngwen ja kete jäme ni madabe yebätä kätä juto, ñobätä ñan aune niaratre kädekai ‘Ngöbö monsoitre’” (Mateo 5:9, TNM). “Munkwe ja die mikadre käre nünakäre jäme ni jökräbe” (Romanos 12:18).

NI MADA MIKADRE TUIN BOBRE JAI AUNE NGITE JUANDRE TABITI

“Kä tä nuäre nibätä angwane ni tä ni mada mike tuin bobre jai, ñobätä ñan angwane Ngöbökwe ni ye mikai tuin bobre jai arato” (Mateo 5:7, NGT). “Munkwe ja moto mika kuin jakrä kwärikwäri amne ja raba ruentari tare kwärikwäri munye amne, Ngöbökwe ni ngite dianinkä ño nibtä Kristo köböire, ye kwrere munkwe ja ngite dian jabti ta kwärikwäri arato” (Efesios 4:32).

NI KWATA BÄ JENE JENE NÜNANDRE JÄME JABE

“Ni dätebare itibe [Ngöbökwe], ye mdenkri abko ni nena keta kabre kä nebtä, ye rabadre nüne kä jökräbti temen kä nebtä abkokäre” (Hechos 17:26). “Ngöbö abrä ñan tärä ni kitete, akwa juta ño kwa te, niara jürä ngwanta nirekwe, angwane nire tä jondron kwin nuainne, ye nie abrä tuin bobre Ngöbö ie” (Hechos 10:34, 35, NGT).

KÄ TIBIEN NGÜBADRE KWIN

“Ngöbökwe ni dätebare mikani nüne Eden kwe, ye abko käkwe sribidre, käkwe kä ngibiadrebti abkokäre mikani Eden kwe” (Génesis 2:15, JK). “Nire nire käta kä temen ne juen ngwarbe abko [Ngöbökwe] juandi ngwarbe arato” (Apocalipsis 11:18).

JA TÖI MIKATA JONDRON TUABÄTÄ KRUBÄTE JAKWE AUNE JA MIKATA GURE NGWARBE YE KRÄKE NI BRUKWÄ RABADRE

“Ni rabadre jändrän bkäne kabre, ñan ye köböire kä rabai nuäre nibtä, aisete mun tö jändrän bkäne kabre jakrä, ye ngäniene munkwe ja ngibia” (Lucas 12:15). “Ja mika gure bati bati bätäkä ngwarbe amne kukwe mda kämekäme meri amne brare ngätäite amne, jändrän jenena ie ni töta nebe jakrä, ye ñan kwandre jire chi mun ngätäite” (Efesios 5:3).

KUKWE METRE NUAINDRE AUNE SRIBIDRE JUME

“Nun tö jändrän jökrä nuene kuin metre” (Hebreos 13:18). “Mun mden mden nämane gore ye käkwe ñan go mda [...], munkwe sribi era metre ja kise jenbti jakrä” (Efesios 4:28).

NIRETA JA DI RIBERE YE DIMIKADRE

“Nire nire moto ulire abko munkwe die mika kä mikakäreta nuäre btä. Erere arato, nire nire di krüte abko munkwe die mika. Erere arato, mun ñan moto raba romon jötrö jötrö ni mda mdakrä” (1 Tesalonicenses 5:14). “Ngäbäkre uli uli die mikadre. Erere arato, meri kän brare krütanikrütani käta ja tare nike bätäkä ngwarbe, ye abko die mikadre” (Santiago 1:27).

Kukwe ütiäte kädrite ye Biblia ñan tä mike gare jerekäbe nie, ñakare aune nikwe mikadre ño täte ye drieta kwe nie arato. Nitre käkwe kukwe ne mikadre täte ngwane, kukwe ñan tädre krubäte ni kisete kä nengwane, ¿ñan ererea? Ye meden kisete, kukwe drieta Bibliakwe ye nengwane bäri ütiäte aune raba ni dimike bäri kwin. ¿Akwa gwä ngwane Biblia raba mä dimike ño?

Ni bäri töbätä nünanbare kä tibienbätä käkwe niebare: “Ni töbätä abokän nüke gare jondron nuainta kwe yebiti” (Mateo 11:19, TNM). Kukwe ye metre, ¿ñan ererea? Kukwe drieta nie ye kwin ni kräke ye ni törbadre mikai gare jai ngwane, nikwe mikadre täte. Biti, kukwe meden kwin tä nemen bare ni kräke ye nikwe mikadre ñärärä. Aisete, mä raba nemen töbike kukwe nebätä: “Kukwe drieta Bibliakwe ye kwin ti kräke ngwane, rabadre ti dimike nüne bäri kwin. ¿Metrere raba ti dimike kukweta ti kisete ye ükatekäre bäri kwin?”. Ari keteiti mike gare jai.

Diana * nämäne nüne kä jutobiti, ja nämäne ruin kwin ie aune kukwe kwin keta kabre nuain nämäne kwe. Akwa batibe kukwe tare nakaninkäbätä. Ngängän kwe krütani kän, mukokwe tuanimetre aune ngwian ñan namani krubäte ie ja ngübakäre. Niara tä niere: “Ja rababa ruin ngwarbe tie. Ti ngängän ñaka, ti muko ñaka aune ju ñaka tikwe. Jondron jökrä riateba tikän. Ja ñan rababara ruin ütiäte tie, ti di riateba aune ti ñan rababara tö ngwen”.

Kukwe nieta Salmo 90:10 ye nükani gare kwin Diana ie. Yete nieta: “Nita nüne kä 70 te, o nita dite ngwane, nita nüne kä 80 näre te. Akwa ja tare nikata krubäte aune nita nemen ulire. Kä yeta niken jötrö ta aune nita krüte”.

Diana nämäne ja tuin kukwe tare ben ngwane, kukwe känänbare kwe Bibliabätä ja dimikakäre. Kukwe kwin ngüba ñaka nämäne kwe ye namani bare kräke. Kukweta nemen ni kisete ye ngwane, kukwe känändre Bibliabätä ja dimikakäre ye köböire kukwe kwin tä nemen nikwe ye nükanina gare nitre kwati ie. Biblia ye abokän jondron kira ngöi täte miri gare kena ye erere ye namanina gare ietre. Tärä kira mada mada ñan niena ütiäte kä nengwane ye erere ñan nemen bare Bibliabätä. ¿Akräke Biblia ye ñaka tärä mada mada ye erere? ¿Erametre Ngöbö töita tikanibätä aune ñan ni kä tibienbätä ai töita tikanibätä? (1 Tesalonicenses 2:13).

Nita nüne kä braibe te aune kukwe tare ben nita ja tuin yebätä mä tärä töbike raba ruin nuen. Kukweta nemen mä kisete ngwane, ¿nire känänta mäkwe ja töi mikakäre jäme, ja dimikakäre aune ja jie ngwankäre?

Biblia raba mä dimike nüne bäri kwin ye ani mike gare ketamä jai.

1. Raba mä dimike kukwe tare ye kwitebiti.

2. Kukwe rabadre mä kisete ngwane, raba mä dimike ükete.

3. Kukwe ben mätä ja tuin yebätä raba mä dimike kä ngwankäre nüke jai.