“Ñäkädre Bibliabätä ye raba ni mike nainte ye kwrere raba tuin nie. Akwa ñäkä ñan garebätä nie ye aibe ngwane tä ni mike nainte monso bati kädekata Will tä niere.

 ¿Ñäkä Bibliabätä ye käi rabadre juto mäbätä yekäre mä raba dre nuainne ye mä tö mikai gare jai? Kukwe ja tötikara ne käkwe mä dimikai.

•  Kukwe kädrieta Bibliabätä ye mätä yete ye erere mäkwe bämika ja töite

•  Mäkwe kukwe känä

•  Monsotre mada tä kukwe ne niere

 Mä tä ñäke Bibliabätä ngwane mäkwe nuain köre:

1.   Kukwe kädrieta Bibliabätä medenbätä mä tö ja tötikai ye mäkwe känä. Kukwe namani bare Bibliabätä, Evangelio keteiti o ñäkä Bibliabätä dramatizada tä jw.org ye mäkwe dianka jai.

2.   Kukwe namani bare yebätä mäkwe ñäkä. Mä raba ñäke aibebätä o ja kukwei kribiti mä mräkätre o ja ketamuko mäkwe ben. Ni iti raba kukwe nakaninkä ye ererebätä ñäke aune ni mada abokän raba kukwe namani bare ño ye ererebätä ja kukwei mike.

3.   Kukwe nieta nete ne erere mä raba nuainne:

   •   Kukwe nakaninkä ño nieta Bibliakwe ye erere mä raba üai sribere o kukwe namani bare ño jatäri ye ererebätä mä raba dibujo sribere. Kukwe nakaninkä ño ye mä raba mike üai keteitire keteitire yebätä.

   •   Mäkwe esquema sribe. Ñodre, mäta ñäke ni iti käkwe ja ngwani metre yebätä ngwane kukwe nuainbare kwe aune töi kwin, ye mäkwe keta kukwe kwin namani bare kräke yebätä.

   •   Kukwe nieta Bibliakwe yebätä mäkwe reportaje nuain. Kukwe namani bare yebätä mäkwe kukwe jene jene mika gare aune nibätä blitata aune nitre mada käkwe kukwe nakaninkä tuani yei mäkwe “entrevista” nuain.

   •   Ni iti kädrieta Bibliakwe ye käkwe ñan kukwe kwin diani jai ngwane ye köböite kukwe jene rabadre bare bätä ye bämike ja okwäte. Ñodre, Jesús ye nire ñaka gare Pedro ie niebare kwe ngwane yebätä töbike (Marcos 14:66-72). ¿Pedro mika namani ja dibiti kukwe nuainne ngwane niarakwe ja ngwandre ño?

   •   Ja rabadre ruin niara erere mäi ngwane, kukwe nakaninkä kä drieta Bibliakwe ye erere mäkwe kukwe tika jabätä. Kukwe kä drieta ye tä dre driere mäi ye mäkwe tika (Romanos 15:4).

 Kukwe nakaninkä Bibliabätä ye mäkwe mikaitari ñärärä kwin ngwane, perla tä ükani ye raba kwen mäi. Ruäre ngwane, kukwe keteiti o ketebu ye tä kukwe ütiäte mike gare.

 Ñodre, Mateo 28:7 ye mä raba kete Marcos 16:7 yebe.

•    ¿Jesús köböra ja mike tuare nitre ja tötikaka kwe ie aune “Pedro ie” tikani Marcokwe ye ñobätä tikani kwe?

•  Pista: Marcos ñan nämäne yete ñakare aune Pedro käkwe kukwe ye täinbare ie.

•  Perla Bibliabätä: ¿Jesús töi nämäne Pedro tuabätä bobukäre ye ñobätä käkwe Pedro töi mikani jäme? (Marcos 14:66-72). ¿Jesús ye ja ketamuko era metre ye bämikani ño kwe Pedro ie? ¿Mä tö ja ngwain ja ketamuko kwin ngwane mä raba ja ngwen ño Jesús erere?

 Kukwe nakaninkä ye mä tä bämike ja okwäte aune mätä kukwe känene bäri ngwane ñäkä Bibliabätä ye käita nemen juto mäbätä.