Encuesta nuainbare yete monsotre estadounidenses 80% näre tä orare Ngöböi, akwa ye ötare be tä nuainne mantre jetebe. Ni ruäre rabadre ngwentari jai: “¿Ja rabadre ruin kwin nie ye aibe kräke orasion ye kwin?”.

•  ¿Orasion ye metrere dre gärätä?

•  ¿Bäkänä Ngöbö tä ti kukwe nuin?

•  ¿Drebätä ti raba orare?

•  Monsotre ruäre tä kukwe ne niere

 Oradre ye abokän blitata Jehová ni jondron jökrä sribekä yebe. Dre gärätä kukwe yebiti, yebätä töbike: Niara bäri kri ni kä nebätä biti ta akwa “niara ñan tä mente ni itire itire bätä” (Hechos 17:27). Biblia tä ni nübaire kukwe ñan tuabare ne nuainne: “Krötö känime Ngöbö ken munkwe amne Ngöbökwe krötadi känime mun ken” (Santiago 4:8).

 ¿Mä raba dre nuainne rökrakäre Ngöbö ken?

•   Orasion yebiti. Blitata ben. 

•   Ja tötikadre Bibliabätä. Yebiti Ngöbö “tä blite” mäbe.

 Mäkwe oradi aune mäkwe niara kukwe nuadi Bibliabätä ye käkwe mä mikadi ja kete Ngöböbe.

 “Blitadre Jehová, ni bäri kri kä kwinbätä ben, ye kukwe bäri ütiäte ye kukwe bäri kwin tä ni nebätä kwe” (Jeremy).

 “Ja ruin ño tie ye tita niere Jehovai ye köböire ja ruin bäri ken tie” (Miranda). 

 Ngöbö era mä kräke aune mä tärä orare ie akwa ñaka mä kukwe nuin raba nemen ruin mäi. Akwa, Jehová ye “Orasion nikwe kukwe nuaka” nieta Bibliakwe (Salmo 65:2). Kukwe jökrä tä mä töi nike ye mäkwe niedre ie nieta kwe mäi. ¿Ñobätä? Ñobätä ñan aune Ngöbö ye töita nibätä (1 Pedro 5:7).

 Töbike kukwe nebätä: ¿Käre mäta blite ja ketamuko mäkwe ben? Ye erere mä raba nuainne Ngöböbe arato. Käre mäkwe blita ben aune mäkwe kädeka kä kwe yebiti (Salmo 86:5-7; 88:9). Biblia tä mä nübaire orare mantre jetebe ie (1 Tesalonicenses 5:17).

 “Orasion yete tita blite ti Rün kä kwinbiti ben dreta ti brukwäte ye jökrä tita niere ie” (Moises).

 “Kukwe ütiäte ye tita niere Jehovaie, tita nuainne ti meye aune ja ketamuko tikwe ben ye erere” (Karen).

 Bibliata niere: “Munkwe oradre aune ja di kärädre bätä debe biandre, yebiti munta dre dre ribere jai ye munkwe mika gare jökrä Ngöböi” (Filipenses 4:6).

 ¿Mäta ja tuin drebe ye mä raba mike gare ie ye ai gärätä? ¡Jän! Biblia ara tä ni nübaire ye nuainne: “Tribe mäkwe ye mäkwe kita Jehová kötärä, aune niarakwe mä ketaibätä” (Salmo 55:22).

 Akwa, kukweta mä kisete ye ñan aibe mä rabadre niere ie. Meri iti kädekata Chantelle tä niere: “Kukweta ti kisete ye aibebätä tita ja di kärere Jehovai ngwane ti ñan ja ketamuko kwin Jehovakwe”. Tä niere jankunu: “Kukwe nuaindre käne nikwe ye abokän debe biandre ie aune jondron keta kabre tärä abokän bätä debe biandre ie, ne ti töita kore”.

 Töbike kukwe nebätä: ¿Dre drebätä mäta debe bien? Kukwe ketamäbätä mä raba debe bien matare Jehovai yebätä töbike.

 “Ñodre nita kriblü chi mrusaire ye raba ni töi mike debe bien Jehovai” (Anita).

 “Bersikulo keteiti Bibliabätä tuin kwin mäi o Jehovakwe jondron sribebare abokän tä mä töi mike niä yebätä töbiketari. Biti debe bien kukwe yebätä ie.” (Brian).