Ñakare. Iglesia jökrä ye ñan ja erebe. Ngöbö mikata täte blo ye ñan ka ngäbitita kwe ye raba kwen nie bämikani Bibliabätä. Kukwe ne ñäkäbiti raba ketebu.

Kena: ngöbö ngwarbe mikata täte

 Ngöbö ngwarbe mikadre täte ye ñan raba ni dimike jire chi nieta Bibliakwe (Jeremías 10:3-5; 16:19, 20). Jehovakwe a kukwe ne niebare nitre israelita ie mäkwe ñaka ngöbö mada ye mike täte (Éxodo 20.3, 23; 23:24, Dios habla hoy). Nitre israelita käkwe ngöbö ngwarbe mada mikani täte ngwane, Jehová mätä namani kri (Números 25:3; Levítico 20:2; Jueces 2:13, 14).

 Ngöbö täbe kukwe arabe niere matare “Jondron ruäre mikata “ngöböre” jai yebätä (1 Corintios 8:5, 6; Gálatas 4:8). Nire tö niara mikai täte ye ñaka rabadre ngöbö ngwarbe mike täte ye ribeta kwe. Biblia tä niere: Nän mento niara ngätäite, aune mun ñan ja mrita ben (1 Corintios 6:14-17). Ngöbö mikata täte ño ye jökrä ja erebe aune yebiti ni raba ja kete Ngöbö ben, ¿se ñobätä niara tä ne nuainmana nie?

Ketebu: Ngöbö mikata täte akwa nuainta blo

 Kukwe nuain nämäne ngöbö ngwarbe mikakäre täte o töbika nämäne ño nitrekwe ye erere nitre israelita jatani ja ngwen aune kukwe ngwarbe mritani kwetre kukwe metre yebe ngwane Ngöbökwe ñaka niaratre kani ngäbiti mada (Éxodo 32:8; Deuteronomio 12:2-4). Jesús näire nitre kukwe ngwarbe jie ngwanka ñan ngöbö mikaka täte metre yei Jesukwe kukwe ñäkäbare. Niaratre nämäne ja bämike ni kukwe metre mikaka täte erere, akwa metrere niaratre ja bämikaka jerekäbe, “akwa jändrän bäri ütiäte kri nuendre abko Kukwe Biani Ngöbökwe Moiséye tä dirire abko munta nuene ñakare abko krörö: Kukwe ükadrete era metre ni mada mdakrä amne ni mda mda ngwiandre ruentari tare jai, erere arato tödekadre kwatibe Ngöböbti” (Mateo 23:23).

 Nengwane ja jie ngwanta Bibliabätä ngöbö mikakäre täte ye religión meden tä nuainne yebrä tä niken ni ngwena ngöbö kokwäre (Juan 4:24; 17:17; 2 Timoteo 3:16, 17). Kukwe ñäkäita Bibliabätä drieta nitrekwe ye tä nitre ye denkä bäri mento Ngöböbätä. Kukwe nieta Trinidadbätä, ja nire ñan krüte nibätä aune ni ngwanta ja tare nike käre ye drieta Bibliakwe nütüta nitre kwatikwe. Akwa, kukwe mikata era jai ne kite ngöbö ngwarbe mikata täte yekri. Kukwe meden meden tä ne mike täte ye abokän kukwe ngwarbe kwrere, ñan ñobätä aune tätre kukwe metre Ngöböbätä ye kwite töbikata ño nitrekwe ye erere (Marcos 7:7, 8).

 Ne madakäre, ja bämikata jerekäbe ye kräke Ngöbö brukwä (Tito 1:16). Kukwe nuainta ngöbö mikakäre täte ye ni dimikadre ja kete Ngöbö ben yekäre, kukwe ne rabadre ni dimike köbö kwatire kwatire te, aune ñan jondron nuainta käre ja kwrere yebiti. Ñodre, Bibliabätä nieta: “Amne nane mun ruäre tä nekete Ngöbö Kukweibätä ruen munye, akwa mun kada nekete ñakare blitadre amne munta ñäke krübäte ni mda mdabtä nengwane, munta ja ngökö au amne kukwe btä munta nekete ye abko tä nebe ngwarbe, ütiäte ñakare, ñobtä ñan angwane nire nire käta tödeke metre Jesubti abko tä nüne kwin amne deme Ngöbö ngwarekri amne tä kukwe krörökrörö nuene: ngäbäkre uli uli die mikadre. Erere arato, meri kän brare krütanikütani käta ja tare nike bätäkä ngwarbe , ye abko die mikadre amne kukwe kämekäme kä netbä ye ngäniene ja ngibiadre kwin deme. Nikwe nuendre kore, ye ngwane nita nekete era metre Ngöbö Kukweibtä” (Santiago 1:26, 27). Kukwe nuainta Ngöbö mikakäre täte merebe aune bökän yebätä, La palabra de Dios para Todos tä “Religión bokän” niere bersikulo nekänti.