Religión ruäre tä niere Jesús ye kädekata Miguel jämi nüke kä tibienbätä ye känenkri aune nükani ye bitikäre. a Ngöbö Kukwei tä niere, Miguel käkwe ñäkäbare jai satana ben aune ye arabe käkwe ángel iti dimikani ne kwe kukwe juani Ngöbökwe Daniel kräke ye rabadre kisete (Daniel 10:13, 21; Judas 9). Ngöbö aibe raba Gobrane ye kiri Miguel tä ja mike aune tä rüre Ngöbö rüe yebe. Ye medenbätä kädekadre kore ye ñaka blo, kä ye ne gärätä, “¿Nire Abokän Ngöbö Erere?” (Daniel 12:1; Revelación [Apocalipsis] 12:7).

 Jesús ye arcángel Miguel ara ye ñobätä ñan töbikata blo ye ani mike gare jai.

•   Miguel ye arcángel (Judas 9). Arcángel ye abokän “angeletre jie ngwanka” gärätä aune tä bersikulo ketebukebebätä Bibliabätä. Aune bersikulo ketebu yekänti blitata Arcángel yebätä ngwane blitata ni itibe yebätä aisete ye tä mike gare ye ángel itibe kädekata kore. Jesús nükaninanta nire yebätä ngwane bersikulo keteiti ye tä niere, däkien kä kwinbiti jatai kuintubu, arcángel kukweibiti (1 Tesalonicenses 4:16). Kukwe ne ta niere, Jesús ye kukwei arcángel erere. Ye medenbätä nie raba Jesús ye arcángel Miguel.

•   Miguel tä nitre üaire jie ngwen. “Miguel btä angele mda mda käkwe rüba mökata […] rüere” (Revelación 12:7). Niara tä kädekani ni kri erere kä kwinbätä. Biblia tä kädeke príncipe ütiäte aune “príncipe kri” (Daniel 10:13, 21; 12:1). Kädekata kore nebiti, niara tä angeletre kä kwinbiti jie ngwen nemen gare. Ni ie kukwe gare krubäte Nuevo Testamento yebätä David Aune, tä kukwe ye niere Miguelbätä.

   Biblia tä blite angeletre kä kwinbätä jie ngwanka yebätä ngwane, tä ni iti mada aibe kädeke. “Ye abko, ni Dänkien Jesu tä kä käinbti abko jatadita angele dite dite kwe ben ñukwä jutrate” (2 Tesalonicenses 1:7, 8; Mateo 16:27). Ne madakäre “Jesús Gobrán kri nikani kä kwinbätä, angwane tä Ngöbö kise ruinkri. Angeletre, gobrantre, angwane drekwa die jökrä tä Jesús Gobrán kri täni” (1 Pedro 3:21, 22, Ngöbö Täräe [NGT], tärä okwä ükaninte). Jesús aune Miguel ye Ngöbökwe kädekadre ja ribare angeletre jie ngwanka ye ni ñan raba nütüre. Ñakare aune Miguel aune Jesús ye ni arabebätä blitata yebrä nütü raba.

•   Miguel rükai krö “ja tare nika ñaka kri nükebe kä ye näire abokän erere ja tare nikadi kri krubäte” ye ngwane (Daniel 12:1). Kukwe, “rükai krö” nieta ye abokän gobran iti käkwe kukwe ütiäte nuaindi meden gärätä tärä Daniel yebätä. (Daniel 11:2-4, 21). Jesukristo abokän “Ngöbö Kukwei” niara “Jrei Bäri Kri Jrei Mda Mda Kräke” käkwe kukwe nuaindi nitre ja mikaka Ngöbö rüere gatekäre aune juta kwe krie mikakäre (Revelación 19:11-16). “Kä dätebare kena angwane ja tare nika ñakare krübäte kore abko erere ja tare nikadi kri krübäte” ye ngwane nuaindi kwe (Mateo 24:21, 42).