Kukwe griegore anástasis kwitata Bibliabätä “ni gakröta” o “ni mikata nire” ye abokän “ni tä nüke krö bobukäreta” meden gärätä. Ni iti gakröta ngwane, ye abokän mikata krö ye kwrere, ja nire bianta ie o mikata nire töi nämäne käne erere (1 Corintios 15:12, 13).

 Escrituras Hebreas o Antiguo Testamento nieta nitre ruärekwe yete kukwe ni gakröta ye ñaka raba kwen. Akwa tö ngwan nämäne kukwe ye ie yebrä nieta yete. Ñodre, ni Ngöbö kukwe niekä Oseas yebiti, Ngöbökwe ne käbämikani: Dobo ye kisete ti mun mikai kwäre; gata yebätä tikwe mun diaintari (Oseas 13:14; Job 14:13-15; Isaías 26:19; Daniel 12:2, 13).

 ¿Nitre krütanina ye gaikröta medente? Nitre ruäre ye gaikröta kä kwinbiti gobrankäre Kristobe (2 Corintios 5:1; Revelación [Apocalipsis] 5:9, 10). Biblia tä kukwe ye kädeke “nitre gaikröta kena” o “nitre gaikröta bäri käne” (Apocalipsis 20:6, TNM; Filipenses 3:11, TNM). Kukwe ketebu ye tä mike gare nitre mada gaikröta arato. Nitre gaikröta mrä ye abokän bäri kwati aune nitre ye nünain kä tibienbätä (Salmo 37:29).

 ¿Ni iti gakröta ngwane dreta nemen bare? Ngöbökwe ja di biani Jesús ie nitre krütanina mikakäreta nire (Juan 11:25). Aune die yebiti “nitre jökrä tä dobote” ye Jesukwe mikaita nire, bä, töi, aune nämäne ja ngwen ño ye arabebiti (Juan 5:28, 29, TNM). Nitre gaikröta nünankäre kä tibienbätä yekwe ja ngrabare kräre aune ngätäre kwin rabai kwetre (Isaías 33:24; 35:5, 6). Akwa nitre gaikröta nünankäre kä kwinbiti ye ie ngrabare kä kwin kiri o üaire ye biain ye abokän niaratre kwitai üaire (1 Corintios 15:42-44, 50).

 ¿Nire nire gaikröta? Kä tibienbätä “ni kuin amne ni käme krütanikrütani abko Ngöbökwe mikadita nire” drieta Bibliakwe (Hechos 24:15). Ni kwin gaikröta ye ngätäite ni brare aune merire ja ngwanka metre ñodre Noé, Abrahán aune Sara ye tä (Génesis 6:9; Hebreos 11:11; Santiago 2:21). Aune ni käme gaikröta ye abokän nire nire ie Ngöbö ñaka namani gare aune kä ñaka nämäne ietre mikakäre täte meden gärätä.

 Akwa nire nire käkwe nierare ñaka Ngöbö mikani täte aune ñaka ja töi kwitani ye ñaka gaikröta jire. Ni ye tä krüte ngwane tä krüte kärekäre (Mateo 23:33; Hebreos 10:26, 27).

 ¿Ñongwane nitre ye gadrekröta? Nitre gaikröta kä kwinbiti ye rabadre bare Kristo rabai Gobrane ye näire niebare Bibliabätä aune ye jatani nemen bare 1914 (1 Corintios 15:21-23). Nitre gaikröta kä tibienbätä ye rabai bare Kristo Gobrandi Kä Mil te. Kä ye näire kä tibien ne kwitai bä nuäre (Lucas 23:43; Revelación 20:6, 12, 13).

 ¿Kukwe tärä tö ngwankäre nitre gaikröta ye ie? Jän. Nitre ni ökän ganinkröta nitre mada okwäbiti ye Biblia tä mike gare (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; 20:7-12; 1 Corintios 15:3-6). Lázaro ganinkröta ye bäri tä ni töi mike ñan krütare. Ñobätä ñan aune niara krütani ye köböi nikanina köböbokä ta akwa Jesukwe ganinkröta nitre kwati okwäbiti (Juan 11:39, 42). Nitre ja mikaka Jesús rüere ie kukwe ye ñaka namani mikadre ngwarbe jai, aisete kukwe dätebare kwetre Jesús aune Lázaro kämikakäre (Juan 11:47, 53; 12:9-11).

 Biblia tä mike gare Ngöbö die tärä ja nire biankäreta nitre krütanina ie. Niara töi bäri kri, aisete kukwe kiakia jökrä törö ie nitre krütanina itire itire yebätä. Arato, Niara Bäri Dite Krubäte, aisete ketabätä ñaka raba nitre gakrökäreta (Job 37:23; Mateo 10:30; Lucas 20:37, 38). Ngöbö die tärä nitre krütanina mikakäreta nire, akwa ne bäri ütiäte niara tö nitre ye gaikröta. Ngöbö jatai nitre gainkrö nünankäre kä tibienbätä, ye ngwane ja rabai ruin ño ie ye Biblia tä mike gare krörö “Mäkwe jondron dätebare ja kisebiti ye mä törbadi tuai” (Job 14:15).

Kukwe ngwarbe nütüta Ngöbökwe nitre gaikröta yebätä

 Ni ruäre tä nütüre: Ni gakröta ngwane, alma ñan krüte ye tä nementa ni ngrabare yebätä.

 Kukwe metre: Bibliabätä alma ye abokän ni ara gärätä, ye ñaka jondron tä nemente nire nita krüte ye bitikäre (Génesis 2:7; Ezequiel 18:4). Ni iti mikata nire bobukäre ngwane, alma ñan krüte tä nementa ngrabarebätä nieta ye erere ñan tä nemen bare, ñakare aune ni ye arabe tä nementa nire.

 Ni ruäre tä nütüre: Nitre ruäre mikaita nire ye bätäräbe gaite.

 Kukwe metre: “Nitre kukwe käme nuainkä ye gaikröta kukwe ükatekäre bentre” nieta Bibliakwe (Juan 5:29, TNM). Nitre ye kukwe nuainbare jämi krüte känenkri ye ñan aibätä kukwe ükaite bentre, ñakare aune gaikröta ye bitikäre kukwe nuaindi kwetre yebätä kukwe ükaite bentre. Jesukwe niebare: Nitre krütanina ie Ngöbö Monsoi kukwe juruai aune nire käkwe mikadi täte [metre ta nieta: nirekwe kukwe nuai] ye käkwe nünain (Juan 5:25). Nitre gaikröta käkwe Kristo kukwe nuai o kukwe driebare kwe mikai täte ngwane, niaratre kä ye tikai tärä “ja nire krä” yebätä (Revelación 20:12, 13TNM).

 Ni ruäre tä nütüre: Nitre krütanina ye gaikröta ngrabare käne ye arabebiti.

 Kukwe metre: Nita krüte ye bitikäre ni ngrabare ye tä ngütiete aune yebiti ñaka nemena mada (Eclesiastés 3:19, 20).