Jesukwe ja nire biani yebiti Jehovakwe ni mikani kwäre ngite aune gata yebätä. Bibliata niere Jesús därie yebiti ni ütiä biani kwe ne kwe ni rabadre kökanintari (Efesios 1:7; 1 Pedro 1:18, 19). Yebätä Jesukwe niebare jatani ja nire kwe bien ni kwati kökatarikäre (Mateo 20:28).

¿Ñobätä ni kwati kökataridre ye ribe nämäne?

 Ngöbökwe Adán, ni brare kena dätebare,ye töi nämäne metre aune ngite ñan nämänebätä. Aune nünandre kärekäre kwe ye nämäne kräke, akwa nianinte kän ja töi mikani kwe ñaka Ngöbö mike täte yebätä (Génesis 3:​17-​19). Aune ngite neketaninkä Adán monsoi yebätä (Romanos 5:​12). Ye medenbätä, Bibliata niere Adankwe ja aune ngäbriänkätre rürübäinbare klabore ngite aune gata ie (Romanos 7:​14). Dre nianinte kän ye ni iti jire chi raba bienta, ñobätä ñan aune ni jökrä töi ngite (Salmo 49:​7, 8).

 Adán mräkätre ye namani tuin bobre Ngöböi ja ñan namani nuainne kräke yebätä (Juan 3:​16). Akwa niara ye kukwe ükatekä metre, yebätä ñaka ngite diani jerekäbe biti ta kwe ni ñaka ja mike ngite ye kwrere (Salmo 89:14; Romanos 3:​23-​26). Ni kä nebätä tare kwe yebätä kukwe ükaninte erametre kwe, ñaka ngite juankäre jerekäbe ta nibiti, ñakare aune diankakäre täte (Romanos 5:​6-8). Kukwe ükaninte metre ye abokän ni kökatarita.

Ni kökatarita ye abokän dre gärätä

 Ni kökanintari nieta Bibliabätä ye abokän kukwe ketamä jatäri ne gärätä:

1.   Ye abokän ütiä nuäi bianta (Números 3:​46, 47).

2.   Ye köböire ni iti mikata kwäre o jondron tä nementa nikwe (Éxodo 21:30).

3.   Jondron nianinte ye ütiä nuäi abokän näre ütiä bianta. a

 Kukwe nieta ne aune Jesukwe ja nire biani ye ja erebe kukwe nekänti ani mike gare jai.

1.   Ütiä nuäi erere bianta. Bibliata niere nitre kristiano ütiä nuäi ererebätä kökani (1 Corintios 6:​20; 7:​23). Ütiä ye abokän Jesús därie yebiti “ni kukwe bätäkä ngwarbe amne ni juta kwatirekwatire te amne ni nünanka kä ketareketare temen” kökanintari kwe Ngöbö kräke (Revelación [Apocalipsis] 5:8, 9).

2.   Mika kwäre. Jesús ja nire biani ye tä ni mike kwäre ngite yebätä (1 Corintios 1:​30; Colosenses 1:​14; Hebreos 9:​15).

3.   Ütiä näre. Ja nire metre nianinte Adán kän ye ütiä nuäi abokän näre ütiä bianinta Jesukwe ja nire kwe yebiti (1 Corintios 15:21, 22, 45, 46). Biblia tä niere: “Ñobätä ñakare angwane ni itibe käkwe ja mikani käme köböite ni kwati mikani ni käme kwrere. Ne kwrere arato ni itibe käkwe ja mikani kwin köböire ni kwati mikani ni kwin kwrere” (Romanos 5:19, NGT). Ne tä mike gare, ñobätä ni itibe krütani ni kwati mikakäre kwäre ngite yebätä. Ye erere, ja nire biani Jesukwe ye köböire ni jökrä kökanintari nire tä ja di ngwen kukwe ne mikakäre ütiäte jai kwe kukwe kwin rabai (1 Timoteo 2:5, 6).