Ni ja ngwanka metre ye Jesukwe mikani kwäre ja nire biani kwe yebiti (Mateo 20:28). Yebätä Bibliata niere Jesús ye “ni jökrä” mikaka kwäre (1 Juan 4:14). Arato tä niere: “Ne mden aisete, Jesu aibe ni diantarikä. Nebti Ngöbökwe ni mda mikani ñakare jire kä nebtä ni diantarikäre” (Hechos 4:12).

 Jesús krütani ni jökrä tä tödeke ie ye kräke (Hebreos 2:9; Juan 3:16). Ye bitikäre, ni kwati krütani ye ngätäite Ngöbökwe mikaninta nire aune Jesús nikaninta kä kwinbiti ni üaire erere (Hechos 3:15). Jesús tä kä kwinbiti, “aisete nire nire tä kite Ngöböye rabakäre dianintari Jesu köböire, [...] angwane Jesu abko tä nüne kärekäre blitakäre kräke Ngöböbe” (Hebreos 7:25).

¿Jesús blitadre ni kräke ye ñobätä nita ribere jai?

 Ni jökrä ja mikaka ngite (Romanos 3:23). Ngite ye tä niken ni ngwena gata kokwäre aune ye ki kwrere ni kräke rökrakäre Ngöbö ken (Romanos 6:23). Akwa Jesús ye “ni di mikaka” o blitaka nire tä tödeke ja nire biani kwe yei ye kräke (1 Juan 2:1, TNM). Jesukwe ja nire biani ni ütiäre yebätä raba blite ni kräke, ne kwe Ngöbökwe orasion nikwe kukwe nuadre aune ngite kitadre kwe ta nibiti (Mateo 1:21; Romanos 8:34). Ngöbö tä Jesús kukwe nuin ñan ñobätä aune tä dre kärere ie ye Ngöbö töi erere. Niarakwe Jesús juani kä tibienbätä ne kwe ni jökrä rabadre kwäre niara köböire (Juan 3:17).

¿Jesús mikadre era jai ye aibe köböire ni raba nemen kwäre?

 Ñakare. Nikwe Jesús mikadre era jai ye köböire ni raba nemen kwäre, akwa nikwe kukwe mada bäri ütiäte nuaindre (Hechos 16:30, 31). Biblia tä niere: “Ni ngätäte, ni murie ñakare ngwane, ni ngätä tä ngwakare. Ne kwrere arato, ni tä tödeke Ngöböbiti, akwa ni ñakare sribi nuainne niara kräke ngwane, nebrä ngwarbe” (Santiago 2:26, NGT). Ni rabadre kwäre yekäre:

•   Ja kitadre Jesús aune Rün Jehová yebätä (Juan 17:3).

•   Tödekadre niaratre ie (Juan 12:44; 14:1).

•   Kukwei mikadre täte yebiti tödeka bämikadre (Lucas 6:46; 1 Juan 2:17). Jesukwe niebare nire käkwe “Dänkien” niei ie ye ñan ai köböire rabai kwäre, ñakare aune nire käkwe Rün töi nuaindi ye rabai kwäre (Mateo 7:21).

•   Kukwe kri rabai ni kisete ngwane nikwe tödekadre jankunu. Jesukwe niebare: ‘Nire nire käkwe nünandrekä dite jabtä, nebebe kä mrä, ni ye abko rabadi dianintari’ (Mateo 24:13).