Jondron jökrä tuin Ngöböi aune niara die yebiti törba dre nuin ye erere tä nuainne (Proverbios 15:3; Hebreos 4:13). Akwa Biblia ñan tä niere Ngöbö tä kä jökrä känti aune jondron jökräbätä, ñakare aune tä niere Ngöbö ye üaire aune tä kä keteiti känti.

•   Ngöbö abokän ño: Ngöbö ye abokän üaire (Juan 4:24). Aisete ni ñan raba Ngöbö tuin ja okwä jeñebiti (Juan 1:18, TNM). Kukwe mikani tuare köböre tä tikani Bibliabätä, yete Ngöbö tä kä keteiti känti aune ñaka tä kä jökrä känti (Isaías 6:1, 2; Apocalipsis 4:2, 3, 8).

•   Tä medente: Ngöbö tä nüne kä ja üaire yekänti, ye abokän ñaka ja erebe kä tibien aune kä kwinta yebe. Kä ja üaire kä kwinbätä yekänti niara tä (1 Reyes 8:30). Biblia tä niere, bati “kä nükani Ngöbö monsoitre ie nänkäre Jehová känti”. a Ye mike gare Ngöbö tä nüne kä keteiti känti (Job 1:6).

Ngöbö ñaka tä kä jökrä känti se, ¿metrere raba ti kriemike ya?

 Jän. Ngöbö tä nüne kä ja üaire yekänti, akwa töita krubäte ni nünanka kä tibienbätä yebätä. Nire nire tä ja di ngwen krubäte niara mikakäre täte ye niarata dimike (1 Reyes 8:39; 2 Crónicas 16:9). Niara töita krubäte nibätä aune tä ni ngübare, ¿ye tä mike gare ño nie?

•   Nita orare ngwane: Jehovata orasion nikwe ye kukwe nuin biare (2 Crónicas 18:31).

•   Nita deprimido ngwane: “Jehová tä nitre brukwä nötaninte ye ken; nitre tä di nianinkä krubäte ye mikata kwäre kwe” (Salmo 34:18).

•   Mäträdre nibätä ye nita ribere jai ngwane: Biblia yebiti, Jehovata kukwe mike nüke gare nie aune ji medenbiti ni rikadre yebiti tä ni jie ngwen (Salmo 32:8).

Ngöbö tä jökrä känti nieta ye ñaka metre

 Nitre ruäre tä niere: Salmo 139:8 tä mike gare Ngöbö tä kä jökrä känti, ñobätä ñan aune yete nieta: “Ti rikadre kä kwinbiti akräke, mä tädre yete; aune ti rabadre Dobote tibien akräke, mä tädre yete arato”.

 Kukwe metre: Texto ne ñan tä mike gare Ngöbö tä kä jökrä känti batibe, ñakare aune nita kä meden känti, akwa niara raba ni dimike mikata.