¿Ja ngöka ñöte ye dre gärätä?
Biblia tä kukwe ye mike gare
Ja ngöka ñöte ye abokän ni iti ngökata täte ñöte biti diankata ñöte kwin. a Kukwe yebiti nemen gare nie ñobätä Jesús ja ngökani ñöte ñö kri yete (Mateo 3:13, 16). Ye erere arato ni etíope “nikani mate ñöbtä” ngwane, ja ngökamana ñöte kwe (Hechos 8:36-40).
¿Ja ngöka ñöte ye dre gärätä?
Bibliabätä ja ngöka ñöte ye ketata ni krütani doboi mikata yebiti (Romanos 6:4; Colosenses 2:12). Ye abokän ne gärätä, nita ja ngwen ño ye nita mikete ja jiebiti aune ye täte mada ni kite ja ngwen ni kristiano ja dianinkä mento Ngöbö kräke erere. Ja ngöka ñöte bätä dre dre nuainta rabakäre juto ja ngökakäre ñöte ye Ngöbökwe ükaninte ne kwe ni töi rabadre kwin niara okwäkänti nita tödeke Jesukristo ja nire biani ye ie yebätä (1 Pedro 3:21). Ne madakäre, nitre nänkä Jesube ye rabadre ja ngökö ñöte driebare kwe (Mateo 28:19, 20).
¿Nita ja ngökö ñöte ye tä ni ngite bätete nibätä?
Ñakare. Jesús därie ianinte ye aibe raba ni ngite bätete nibätä drieta Bibliakwe (Romanos 5:8, 9; 1 Juan 1:7). Akwa ni rabadre bätäninte yekäre ni rabadre tödeke Jesubiti, ja töi kwite nüne kukwe driebare kwe ye ererebätä, bätä ja ngökö ñöte (Hechos 2:38; 3:19).
¿Kiatre ngotrore ngökadre ñöte ye drieta Bibliakwe?
Ñakare. Monso kia ngöka nämäne ñöte ye nie ñaka Bibliabätä. Religión ruäre tä ñö metekä o keke kiatre dokwäbiti ngökakäre ñöte nieta, biti tätre monso kia ye kädeke. Akwa ja ngöka ñöte ni kristianokwe ye abokän nire nirebiti kä nena debe näre ye kräke kukwe kwin Gobran Ngöbökwe mikakäre nüke gare jai aune mikakäre era jai (Hechos 8:12). Nitre ye rabadre Ngöbö kukwei kukwe nuin, kai ngäbiti aune ja töi kwite. Kukwe ye erere monso kia ñaka raba nuainne (Hechos 2:22, 38, 41).
Ne madakäre, ni kristiano tä ja ngwen metre Ngöböi ngwane, monso chi kwe tuin ni deme erere o “ñan tä tuen ngite Ngöböye” mikata gare Bibliakwe (1 Corintios 7:14). Monso kia ngöka manandre ñöte akräke, ni mada köböire rabadre deme ye ribe ñaka. b
Kukwe ngwarbe nütüta ni kristiano ngökata ñöte yebätä
Ni ruäre tä nütüre: Ñö metadrekä o kekadre ni itibiti ye ngöröbe aune ngökadre täte ñöte ye ribe ñaka.
Kukwe metre: Nire nire ngökani ñöte nieta Bibliakwe ye jökrä ngökani täte ñö. Ñodre, discípulo Felipe käkwe ni etíope ngökani ñöte ngwane, niaratre nibu “nikanintre nebe ñöbtä” aune ye bitikäre “jatanintre nüketa jate” mikata gare Bibliakwe (Hechos 8:36-39). c
Ni ruäre tä nütüre: Nitre ja mräkäre ngökani ñöte nieta Bibliakwe ngwane, kiatre jökrä ngökani ñöte niaratre bengwaire tä nemen gare. Ñodre, ni ngite käi ngübabitikä juta Filipo te yebätä ne nieta niara “ngökani ñöte [...] mräkä kwekwe ben gwaire jökrä” (Hechos 16:31-34).
Kukwe metre: Blitata ni ngite käi ngübabitikä ja mikani kukwebätä yebätä ngwane, nire nire ja ngökani ñöte ye ie kukwe Jehovakwe nükani gare aune käi namani juto bätätre nieta (Hechos 16:32, 34). Ne tä mike gare nane monso kia nämäne ni ngite käi ngübabitikä gwirete, ja ngökani ñöte mräkä kwebe ngwane, kiatre ye ñaka ngökani ñöte, ñobätä ñan aune kukwe Jehovakwe ñaka raba nüke gare ietre.
Ni ruäre tä nütüre: Gobran Ngöbökwe ye tä monsotre kia kräke niebare Jesukwe ngwane, kiatre ngökadre ñöte drie nämäne kwe (Mateo 19:13-15; Marcos 10:13-16).
Kukwe metre: Jesús kukwe ye niebare ngwane, ñan nämäne blite ja ngöka ñöte yebätä. Ñakare aune ni rabadre Gobran Ngöbökwe yete yekäre ja töi mikadre bobre aune ni tädre juto kukwe mikakäre nüke gare jai monso kia erere bämika nämäne kwe (Mateo 18:4; Lucas 18:16, 17).
a “Ja ngöka ñöte” ye kite kukwe griegore kwitata “kriadre ñöte” yekri (tärä Compendio del Diccionario teológico del Nuevo Testamento, página 97 mikadre ñärärä).
b The International Standard Bible Encyclopedia tä niere erere “monso kia ngökadre ñöte ye kädrie ñan raba jire NT [Nuevo Testamento] yete”. Yete mikata gare arato, “monso kia ngöka jatani ñöte ñobätä ñan aune töbika jatani jene ja ngöka ñöte yebätä aune mika jatani ütiäte krubäte jai jondron madabiti ta”, ye abokän ni ngökata ñöte ye ara tä ngite bätete nibätä nütü namani (vol. 1, págs. 416, 417).
c Diccionario Enciclopédico Salvat tä niere: “Iglesia kristiana kirabe yete ritual JA NGÖKAKÄRE ÑÖTE nuain nämäne ngwane nitre ngöka nämäne täte ñöte” (1967, vol. 2, pág. 577).
Ne rabai tuen kwin mäi arato
KUKWE NGWANTARITA BIBLIA YEBÄTÄ
¿Iglesia jökrä tä ji metre Ngöbö kokwäre driere?
Kukwe ketebu metre mikata gare Bibliakwe abokän tä kukwe ngwantarita ne mike gare.
ESSENTIAL BIBLE TEACHINGS
¿Ngöböta kukwe mikata täte ye jökrä kain ngäbiti?
Kukwe mikata täte ye jökrä kwin nütüta nitre kwati yekwe.
SPECIAL CAMPAIGN
Nunta nitre tötike ño bibliabätä ye mike gare jai
Ja tötika Bibliabätä ütiä kärä ñaka ye kain ngäbiti.