Jän, ñobätä ñan aune nitrekwe ja ükadrekrö Ngöbö mikakäre täte ye ie niara tö. Biblia tä niere: “Erere arato, ari ja kite ja tarere kwärikwäri amne sribi kuin nuene jakrä kwärkwäri. Mdakäre abko, nitre tödekaka Jesubti käta gätäre abko känti ni ruäre ñan tä kwen gätäbtä, ye kwrere nikwe ñan nuendre” (Hebreos 10:24, 25).

 Nitre nänkä Jesús jiebiti ye täi ükaninte kwin ye niara mikani gare: “Munkwe ja taredre kwärikwäri tita niere munye, ne kwrere munkwe ja taredre ne ngwane, mun abko ja töitikaka tibe ye rabadi gare ni jökräye” (Juan 13:35). Kukwe keteiti ütiäte nekänti nitre ja tötikaka Jesube raba ja tare bämike ye abokän ja kete kwin ni kristiano madabe. Ye kräke konkrekasion tädre ükaninte kwin aune rabadre ja ükökrö käre Ngöbö mikakäre täte (1Corintios 16:19). Gwairebe rabai ja mräkäre kä jökräbiti tibien (1 Pedro 2:17).

¿Ni tädre kukwebätä ye aibe ribeta?

 Nitre ja ükadrekrö Ngöbö mikakäre täte ye drieta Bibliakwe. Akwa kukwe ñan tärä jire mike gare ni iti ja mikadre kukwebätä ngwane Ngöbökwe kai ngäbiti. Ñakare aune kukwe ye rabadre ni ye töi kwite. Ñodre, Bibliabätä nieta: “Kukwe mikata täte tuin kwin aune deme Ngöbö ni Rün kräke abokän krörö: nitre uli bätä meritre kän brare krütani ngübadre tädre ja tare nike ye ngwane, bätä ñaka ja mikadre nitre ñaka Ngöbö kukwei mike täte yekri” (Santiago 1:27, TNM).