Ñakare, kä bä nuäre ne ñan juandi ngwarbe ñan kukwai aune ñan mada mikai ne täte jire chi. Ngöbökwe kä ne dätebare ne kwe nikwe nünandre käre te drieta Bibliakwe.

•   “Nitre kukwe metre nuainkä yekwe kä tibien rabai aune nünai kärekäre te kwetre” (Salmo 37:29).

•   “Niarakwe kä tibien ye ükaninte kwin; ñaka mikaikä kä mada känti jire chi tädi kärekäre”(Salmo 104:5).

•   “Akwa kä tibien tä kärekäre” (Eclesiastés 1:4).

•   “Ñobätä ñan aune Jehová kä kwinta sribekä, Ngöbö metre kä tibien ükatekä, sribebare kwe kärekäre ñaka sribebare ngwarbekäre kwe ñakare aune ükaninte kwe nünankäre” (Isaías 45:18).

 Nitre kä tibienbätä kä ne juandre ngwarbe täte rü o kukwe mada yebiti ye Ngöbökwe ñan tuainmetre nemen bare, ñakare aune niarakwe dre nuaindi ye Biblia tä niere nete, “nire nire käta kä temen ne juen ngwarbe abokän mäkwe juandi ngwarbe arato” (Revelación [Apocalipsis] 11:18). ¿Nuaindi ño kwe?

 Gobrantre kä nebätä ñan tä kä tibien ne ngübare ye täte Ngöbökwe Gobran kä kwinbiti metre yebiti ükaite (Daniel 2:44; Mateo 6:9,10). Jesukristo, Ngöbö monsoi käkwe gobran ne jie ngwain (Isaías 9:6,7). Jesús nämene kä tibienbätä ngwane, jondron dite kä tibienbätä ye mikani kwekebe kwe (Marcos 4:35-41). Niara gobranka, Gobran Ngöbökwe yete yebätä kä tibien ne rabai niara kisete, kä tibien ne ükaite ne kwe bä rabadre, sribebare kena erere (Mateo 19:28; Lucas 23:43).

 Ñakare. 2 Pedro 3:7 ye ñaka tä nüke gare medenbätä töbikata kore, yete nieta: “Kä käinta amne kä tementa [...] gadikä ñukwä jutrabti”. Kukwe nieta nete ne kukwe ketebu raba ni dimike nüke gare jai ye ani mike gare jai.

1.   Kä kwinta, kä tibien aune ñukwä nieta Bibliabätä ngwane kukwe keta kabre gärätä. Ñodre, Génesis 11:1 tä niere: Kä jökrä Noé näire nämäne jankunu kukwe keteitibebiti. Nete kä nieta ye abokän blitata ni nünanka kä tibienbätä yebätä.

2.   2 Pedro 3:7 känti “kä käinta”, “kä tementa” aune “ñukwä” nieta, ye drebätä blitata ye contexto bersikulo yekänti ye tä mike gare. Bersikulo 5 aune 6 yete blitata ñü kri näkäni tibien Noé näire yebätä. Nitre kä ye näire ye ganinte akwa kä tibien ne nämäne jankunu (Génesis 6:11). Arato “kä käinta” ye abokän nitre gobranka kä ye näire ye ganinte kwe. Yebätä, kä tibien ne ñan juani ngwarbe, ñakare aune nitre nämene ja ngwen käme ye ganinte. Akwa Noé aune mräkätre kwe ye namaninte nire aune Ñü Kri ye bitikäre niaratre monso ngibiabare Kä tibienbätä (Génesis 8:15-18).

 Ñü Kri, ñukwä o kä ganinte kädekateta 2 Pedro 3:7, ye kwrere arato käkwe nitre töi käme ye gaite aune ñaka kä tibien ne ai gaite. “Kä kwinta” aune “kä tementabiti” yekänti abokän ni nüne kwin erametre aibe käkwe nünandi ye Ngöbö tä köbö mike nie. “Kä käinta amne kä tementa btin [...] känti abko ni nüne kuin era metre aibe käkwe nünandi” ye käbä mikata Ngöbökwe nie (2 Pedro 3:13). “Kä tementa btin” o nitre mrä yekwe “kä käinta” mrä rabai o gobran mrä ye abokän Gobran Ngöbökwe kä kwinbätä. Gobran yete kä tibien ne rabaita bä nuäre aune jäme (Revelación 21:1-4).