Üai deme Ngöbökwe ye abokän niara die abokänbiti tä jondron nuainne (Miqueas 3:8; Lucas 1:35). Ngöböta üai deme, niara die, ye mike kä ño erere känti ngwane, tä nuainne ja töi mikakäre nemen bare (Salmo 104:30; 139:7).

 “Üai” nieta Bibliabätä ye abokän rúaj hebreore aune pnéuma griegore. Bäsi käre, kukwe yebiti blitata Ngöbö die yebätä, ye abokän üai deme (Génesis 1:2). Akwa “üai” nieta ye abokän ne gärätä arato:

•   Mürie jäkäta (Habacuc 2:19; Apocalipsis 13:15).

•   Mürie (Génesis 8:1; Juan 3:8).

•   Diebiti ni nire aune jondron nire tä nüne (Job 34:14, 15).

•   Nita ja töi mike ño (Números 14:24).

•   Nitre üaire, ñodre, Ngöbö aune angeletre (1 Reyes 22:21; Juan 4:24).

 “Üai” nieta ye kukwe jene jene gärätä, akwa tä kukwe arabe mike gare. Ye abokän blitata jondron ñaka tuin nie, akwa dre nuainta kwe abokän tuin nie. Üai deme Ngöbökwe ye abokän “mürie kwrere, ñaka tuin nie, ni ñaka raba nuin kisebiti aune dite krubäte” (Diccionario expositivo de palabras del Antiguo y del Nuevo Testamento exhaustivo, de William E. Vine).

 Bibliabätä üai deme ye ketata Ngöbö “kise” yebätä (Salmo 8:3; 19:1; Lucas 11:20; Mateo 12:28 mikadre ñärärä arato). Ni iti tä ja küde diebiti jondron dätere, ye erere arato üai deme yebiti Ngöbökwe ne nuainbare:

•   Kä kwinta bätä kä tibien sribekäre (Salmo 33:6; Isaías 66:1, 2).

•   Biblia sribekäre (2 Pedro 1:20, 21).

•   Nitre kira niara mikaka täte rabadre kukwe ñan tuabare nuainne aune kukwe driere (Lucas 4:18; Hechos 1:8; 1 Corintios 12:4-11).

•   Nitre niara mikaka täte rabadre kukwe kwin bämike (Gálatas 5:22, 23).

Üai deme ye ñaka Ngöbö

 Bibliabätä üai deme ketata Ngöbö “kise” o Ngöbö “mürie” yebätä ngwane, ye tä mike gare üai deme ye ñaka Ngöbö (Éxodo 15:8, 10). Ni jondron sribekä kise tärä, akwa kise ñan raba jondron nuainne kaibe, ñobätä ñan aune ngrabare aune jisai tä sribire gwairebe kisebe. Ye erere arato, üai deme yebiti Ngöbö tö dre nuaindi aune ñongwane tö nuaindi ye erere tä nuainne (Lucas 11:13). Arato, Bibliabätä üai deme bämikata ñö kwrere aune ketata jondron ñaka tuin nie aune ñaka nire yebe, ñodre, tödeka aune kukwe nüke gare nie yebe. Üai deme ketata jondron jene jenebätä ye jökrä tä mike gare ñaka Ngöbö (Isaías 44:3; Hechos 6:5; 2 Corintios 6:6).

 Bibliabätä Ngöbö kä jeñe kädekateta, ye abokän Jehová aune Monso kwe kä jeñe kädekateta, ye abokän Jesukristo, akwa üai deme ye kä tärä jeñe mika ñaka gare jire (Isaías 42:8; Lucas 1:31). Bati, kukwe ñan tuabare mikani tuare Esteban ie kä kwinbätä yete ñaka ni nimä tuani kwe, ñakare aune ni nibukube tuani kwe. Biblia tä niere: “Esteban abko, btä Ngöbö Üai Deme namani täte, käkwe nikrabare kä käinbti angwane, Ngöbö [...] amne, Jesu abko mikanina bäri ütiäte Ngöbökwe [...] btä Esteban okwä namani” (Hechos 7:55). Üai deme die yebiti Ngöbökwe kukwe ñan tuabare ye mikani tuare Esteban ie.

 Nitre ruäre tä niere: Ngöbö nimä ngöböre itibe ye iti abokän üai deme. Ye erere Biblia ruäre tä mike gare 1 Juan 5:7, 8 yebätä, ñodre, Biblia Ngöbö Täräe aune Reina-Valera.

 Kukwe metre: 1 Juan 5:7, 8 yete Biblia Ngöbö Täräe tä niere: “Testikokä tä nimä kä käinbätä: Ni Rün, Kukwe, aune Ngöbö Mürie Deme; angwane nimä ne abrä itibe. Erauto nebätä testikokä tä nimä kä tibienbätä”. Akwa nitre ja tötikaka kukwe nebätä ie namanina gare, apóstol Juan ñaka kukwe ye tikani, aisete kukwe ye ñaka tädre Bibliabätä. Ñodre, biblista Bruce M. Metzger käkwe tikani: “Nuevo Testamento tikani täte ye bitikäre kukwe ye mikani, aisete ñaka tädre yete” (Comentario textual al nuevo testamento griego).

 Nitre ruäre tä niere: Biblia tä üai deme ye bämike ni nire kwrere, aisete üai deme ye ni nire.

 Kukwe metre: Bibliabätä ruäre ngwane üai deme ye bämikata ni nire ye kwrere. Ñodre, Jesukwe üai deme ye bämikani ni ni dimikaka ye kwrere (paráclito) käkwe kukwe mikai gare, ni jie ngwain, blitai, ni kukwe nuai, Ngöbö käikitaikä aune ni jondron bökänkä ye kwrere (Juan 16:7-15). Akwa ye ñan tä mike gare üai deme ye abokän ni nire kwrere. Kukwe töbätä kite Ngöbökri, gata bätä ja mika ngite ye Biblia tärä bämike ni nire ye kwrere arato (Proverbios 1:20; Romanos 5:17, 21). Ñodre, kukwe töbätä kite Ngöbökri yekwe monso tärä nieta aune ja mika ngite ye bämikata ni ni nuatekä, ni ni kämikaka aune ni iti töta nemen jondron ni madakwe tuai jakwe ye kwrere (Mateo 11:19; Lucas 7:35; Romanos 7:8, 11).

 Nitre ruäre tä niere: Nitre ngökata ñöte ngwane, nuainta üai deme käbiti, aisete ye tä mike gare üai deme ye abokän Ngöbö.

 Kukwe metre: Bibliabätä, kukwe nuaindre “ni mada käbiti” nieta ye tä mike gare ni ye nämäne kädekani kukwe ruäre nuainkäre (Deuteronomio 18:5, 19-22; Ester 8:10). Ni iti tä ja ngökö ñöte üai deme käbiti ngwane, üai deme ye abokän Ngöbö die aune yebiti Ngöböta ja töi mike nemen bare ka ngäbitita kwe (Mateo 28:19).

 Nitre ruäre tä niere: Üai deme abokän Ngöbö ye nitre Jesús kukwe nuaka aune apóstol kwe nämäne mike era jai.

 Kukwe metre: Biblia aune kukwe kira tikani ñan tä kukwe ye erere mike gare. Encyclopædia Britannica tä niere: “Üai deme ye abokän Ngöbö drieta, ye ükaninte Concilio de Constantinopla kä 381 Kristo bitikäre”. Concilio ye nuainbare kä nikanina 250 ta apóstol mrä krütani ye bitikäre.