Köbö 9 junio 2024 ye ngwane, Jeffrey Winder, ni Cuerpo Gobernante, käkwe tärä Mateo aune Marcos criollo guadalupeño kukweibiti mikani tuare. Asamblea especial 2024, “¡Ani kukwe kwin ye driere!”, nuainbare Baie-Mahault (Guadalupe) yete, kukwe kädriebare mrä yete kukwe ye mikani gare. Nitre 8, 602 janamane ngwärere gätä kri yebätä aune 5, 588 ja conectabare videoconferencia yebiti. Nitre janamane ngwärere ye ie Biblia: Las Buenas Noticias según Mateo biani kati täräre. Nitre janame gätäbätä ye käkwe bengwairebe tärä ketebu ye dianinkä jai jw.org aune JW Library yete.

Nitre 300, 000 biti bäri tä blite criollo guadalupeño yebiti kä Guadalupe yete aune 200, 000 kä Francia yete. Nengwane etebantre aune ngwañontre 3, 300 tä sribire konkrekasion 42 te criollo guadalupeño kukweibiti kä Guadalupe yete aune etebantre aune ngwañontre 80 tä sribire grupo ketebu te kä Francia yete.

Köbö 28 junio 2024 ye ngwane, Geoffrey Jackson, ni Cuerpo Gobernante, käkwe Biblia. Traducción del Nuevo Mundo kukwe armeniobiti tuaninte ye mikani tuare. a Gätä kri regional 2024, “¡Ani kukwe kwin ye driere!”, nuainbare Ereván (Armenia) yete, gätä kri köböi kena ye ngwane mikani tuare. Nitre 6, 155 janamane, nitre yekwe jötrö ngwarbe Traducción del Nuevo Mundo digital dianinkä jw.org aune JW Library yete. Sribei täräre ye rabai bare ja känenkäre kä nete.

Biblia kena kwitani kukwe armeniobiti ye nuainbare siklo 5 Kristo ye bitikäre. Traducción del Nuevo Mundo de las Santas Escrituras täte ye sribebare kena kukwe armeniobiti kä 2010 ye ngwane. Kä Armenia yete, nitre 3 millón tä blite kukwe armeniobiti; nitre ye ngätite, etebantre aune ngwañontre 10, 550 tä sribire konkrekasion 117 blitaka kukwe armeniobiti yete. Ne madakäre, kä mada jene jene Europa aune Estados Unidos yete, etebantre aune ja ngwaitre 5, 200 tä sribire konkrekasion blitaka kukwe armeniobiti te aune grupo blitaka kukwe armeniobiti te.

Köbö 28 junio 2024 ye ngwane, Freeman Abbey, ni Comité Sukursal juta Ghana, käkwe tärä Mateo kukwe fantibiti mikani tuare. Gätä regional 2024, “¡Ani kukwe kwin ye driere!”, nuainbare Ju Gätä Kri nuainkäre Takoradi, kä Sekondi-Takoradi (Ghana) yete, ye ngwane kukwe ye mikani gare. Nitre 1, 230 janamane gätä yebätä aune nitre 2, 022 käkwe gätä ye kukwe nuabare videoconferencia yebiti. Nitre janamane ngwärere ye ie Biblia: Las Buenas Noticias según Mateo biani kati. Ne madakäre, bengwairebe tärä ye dianinkä jai jw.org aune JW Library yete.

Nitre 6 millón näre tä blite kukwe fanti yebiti nieta. Konkrekasion kena ükaninte kukwe fanti yebiti septiembre 1935 ye ngwane, ye nemenkä matare kä Sekondi-Takoradi yete. Nengwane, nitre 9, 700 Testiko tä sribire konkrekasion 158 blitaka kukwe fantibiti kä Ghana ñäre te.

Köbö 28 junio 2024 ye ngwane, David Splane, ni Cuerpo Gobernante, käkwe Traducción del Nuevo Mundo täte kukwe islandés yebiti mikani tuare, nitre 1, 312 janamane gätä yebätä ye ie. Asamblea especial 2024, “¡Ani kukwe kwin ye driere!”, nuainbare Reikiavik (Islandia) yete, gätä kri köböi kena yete tärä ye mikani tuare. Nitre kwani gätäbätä ye ie Biblia ye biani kwati täräre aune Biblia ye dianinkä kwetre jai jw.org aune JW Library yete.

Kä 2019 ye ngwane, Traducción del Nuevo Mundo de las Escrituras Griegas Cristianas kukwe islandébiti sribebare. Ja mräkätre 395 tä sribire konkrekasion ketarike blitaka kukwe islandébiti yete. Traducción del Nuevo Mundo täte niena kwetre ye käi juto krubätebätä, Biblia yebiti kukwe driedi kwetre nitre nünanka kä mutu mrente yete ie yebätä, nitre 390, 000 tä nüne yete.

Köbö 28 junio 2024 ye ngwane, Johannes De Jager, ni Comité Sukursal juta Angola, käkwe tärä Mateo, Lucas aune Hechos kukwe ñembabiti mikani tuare. Gätä kri regional 2024, “¡Ani kukwe kwin ye driere!”, nuainbare Menongue (Angola), yete kukwe ye mikani gare. Nitre 450 kwani gätäbätä ye ie Biblia: Las Buenas Noticias según Mateo biani kati. Ne madakäre, tärä ketamä mikani tuare ye mikani bengwairebe digital jw.org aune JW Library yete.

Angola yete, nitre 1 millón näre tä blite kukwe ñembabiti. Konkrekasion kena blitaka kukwe ñembabiti ye ükaninte kä 2011 ye ngwane. Nengwane, etebantre aune ngwaitre 260 tä sribire konkrekasion keta kwä te aune grupo te, blitaka kukwe ñembabiti juta Angola aune Namibia yete.

Köbö 30 junio 2024, Carlos Martínez, ni Comité Sukursal Centroamérica, käkwe Biblia Ngöbö Kukwei Tikani Mateokwe kukwe ngäberebiti mikani tuare gätä grababare yete. Gätä ye mikani tuare Ju Ja Ükarakrö kwatí te Panamá aune Costa Rica yete aune kukwe mikani gare ye bitikäre, ngäbetre 2, 032 janamane gätäbätä ye ie tärä Mateo täräre biani kati. Tärä ye dianinkä kwetre jai arato jw.org aune JW Library yete.

Ngäbetre 216, 000 biti bäri tä blite ngäbere; kwatí tä nüne Panamá aune Costa Rica. Juta Panamá aune Costa Rica yete, konkrekasion 26 kukwe ngäberebiti tä aune grupo ketebu kukwe ngäberebiti tä, yete etebantre aune ngwañontre 877 tä Jehová mike täte.