Nitre ja ngökanina ñöte ni testiko Jehovakwe ye erere, ñaka niena kukwe driere aune ñaka niena ja ükökrö konkrekasionte yebe nunta blite jankunu. Aune nunta ja di ngwen dimike kukwe ja üaire yebiti aune nunta dimike ne kwe jatadreta konkrekasionte.

 Ni Testiko ja ngökanina ñöte tä kukwe käme nuainne ye ngwane, kitaka raba konkrekasionte. Akwa, ye ñaka nuainta jötrö ngwarbe. Ñakare aune nitre ñaka tä kukwe nieta Bibliabätä ye erere mike täte aune ñaka ja töi kwite, ye ngwane kitakata kukwebätä, bätä nitre konkrekasionte ñaka raba blite bentre. Biblia tä mike gare metre: “Nitre tä mun ngätäite, ye brä ben munkwe kukwe ükadrete” (1 Corintios 5:13, Ngöbö Täräe, tärä okwä ükaninte).

 Nitre brare kitakata kukwebätä ye ngwane muko kwe aune monsotre kwe täbe testiko Jehovakwe ye ngwane, ¿dreta nemen bare? Ye ngwane ñaka niena ja mäke kukwe ja üaire yebiti, akwa täbe keteitibe mräkätre kwe yebe. Tä ja mäke muko kwe yebe, ye erere arato monsotre kwetre yebe, tä ja mäke ja erebe.

 Nire nire kitaninkä kukwebätä ye raba nüke gätä nuainta nunkwe yete aune dimikadre ie törbadre angwane, nitre umbre ji ngwanka konkrekasionte raba dimike kukwe ja üairebiti. Ye köböire niaratre rabadreta ni testiko Jehovakwe ye erere. Nitre kitaninkä kukwebätä ye tä kukwe blo ye tuenmetre aune kukwe Bibliabätä ja jie ngwankäre ye ererebätä tö nünain ye bämikadre bökän kwe angwane, raba nementa kukwebätä konkrekasionte.