Kukwe ja jie ngwankäre Bibliabätä tä dre niere ja tötika kwelate yebätä ye erere nunta nuainne. Ni Testiko itire itire tötikani Bibliabiti ye köböire töi ño ye ererebätä raba kukwe ja jie ngwankäre ruäre tä tikani jatäri nete ye mike täte, yebätä nibike ja tötike. a

•  Ja tötikadre kwelate ye ütiäte

•  Ja tötika kwelate ye rabadre tuin kwin nie

•  Ja tötika kwela krite ye raba kukwe tare mike nemen bare nibätä aune kukwe ja üairebiti arato

•  ¿Nitre Testiko Jehovakwe yekwe kwela tärä bämänte?

 Ja tötika kwelate ye tä ni dimike “ja ngwen töbätä aune töbike kwin”, aune Biblia tä blite kwin kukwe nebätä (Proverbios 2:10, 11; 3:21, 22). Arato Jesús niebare nitre ja tötikaka ie, rabadre kukwe driebare ietre ye driere nitre mada ie (Mateo 28:19, 20). Ye medenbätä, nunta nitre kukwe nunkwe yebätä töi mike aune dimike ja tötike täte kwelate, ñodre ñäkädre täräbätä, tärä tikadre, aune blitadre kwin kwetre, b arato kukwe mada mikata täte mikadre gare jai aune nitre nüne ño kä mada känti yebätä ja kitadre (1 Corintios 9:20-22; 1 Timoteo 4:13).

 Ja tötikadre kwelate ye tuin ütiäte nitre gobrantre ie aisete ja tötikadre kwelate aune kolegiote ye tätre nuainmana nie. Kukwe ükaninte ne nunta mike ütiäte jai, ñobätä ñan aune nunta kukwe ne mike täte: “Nikwe nitre gobranka mikadre täte” (Romanos 13:1). Arato nunta nitre bati töi mike ja tötike kwin aune ja di ngwen nuainne. c Biblia tä niere erere: “Mun tädre jondron meden meden nuainne, ye munkwe nuain ja nire tätebiti jondron nuain Jehová kräke ye kwrere, aune ñaka ni kä tibienbätä kräke ye kwrere” (Colosenses 3:​23, TNM).

 Ja tötika kwelate ye köböire nita ni mräkä ngübare. Biblia tä niere, “nire ñaka tä mräkätre tä gwi ben ye ngübare ngwane ñaka tä tödeke jankunu” (1 Timoteo 5:8, TNM). Ja tötikadre kwelate ye raba ni dimike dre ribeta ni mräkätrekwe ye bien ietre. Ñodre tärä The World Book Encyclopedia tä mike gare, kukwe ütiäte kräke ja tötikata kwelate ye abokän “ni mikakäre juto sribikäre kwin ni käite”. Nire ie kukwe gare aune nuain gare kwin yei rabai bäri nuäre kräke sribi känänkäre ne kwe rabadre mräkätre ngübare, ye erere ñaka raba bare nire ñaka ja tötikabare kwelate ie (Proverbios 22:29).

 Kukwe madabiti nitre rüne rabadre monsotre kwe ngübare ye abokän mike juto rabadre ünä ye kräke aune ja tötika kwelate ye raba dimike krubäte (2 Corintios 12:14). Nunta nitre rüne töi mike monsotre juen ja tötike kwelate, tätre nüne känti kwela ütiä bianta, ruäre ngwane ñaka nuäre ja tötikakäre kwelate o kä ruäre känti ñaka debe nitre ruäre kräke. d Arato nunta nitre rüne dimike ño raba monsotre kwetre tötike kwela kräke. e

 Kukwe meden medenbätä ni raba ja tötike ye nikwe mikadre gare kwin jai. Biblia tä niere: “Ni ie kukwe ñaka gare tä kukwe jökrä nieta ye mike era jai, akwa ni töbätä abokän tä töbiketari kwin ja käne” (Proverbios 14:15). Kukwe medenbätä ni raba ja tötike jankunu ütiä nuäi aune raba ni dimike ño ye nita mike gare kwin jai ngwane, nita kukwe ja jie ngwankäre ne mike täte. Ñodre, ni tötikata sribi ruäre nuainkäre ye nuainta kä braibe te aune tä ni dimike krubäte.

 Ja tötika Bibliabätä ye bäri ütiäte ja tötika kwelate ye kräke. Ja tötikata kwelate ye ñaka ja erebe ja tötikata Bibliabätä yebe, ñan ñobätä aune ja tötika Bibliabätä ye köböire Ngöbö raba nüke gare kwin nie aune ni raba nemente nire (Juan 17:3). Arato kukwe ükaninte ja ngwankäre kwin ye drieta, ye abokän “kukwe kwin aune kukwe ükadrete ño bätä kukwe metre ye rükai gare, ye abokän kukwe kwin rükai gare jökrä” (Proverbios 2:9). Apóstol Pablo jananbare kwela krite ye kwrere ni raba niere, akwa nükani gare ie, “Dänkien Kristo Jesu rükadre gare bäri kuin [...] ne abko bäri ütiäte” (Filipenses 3:8; Hechos 22:3). Ye erere arato, nitre testiko Jehovakwe ruäre kä nengwane ja tötikabarera kwela krite, akwa niaratre kräke ja tötika Bibliabätä ye bäri ütiäte. f

 Proverbios keteiti tä niere: “Ni töbätä ie kukwe tare ye tuin aune tä kämikekä” (Proverbios 22:3). Ja tötika kwela krite aune ja tötika mada krikri ye raba kukwe tare mike nemen bare nibätä aune kukwe ja üairebiti arato, ye tä gare metre nunye. Ye medenbätä ni testiko kwati ñaka ja töi mike aune ñaka monso kwe töi mike nemen kä ye erere känti, ñobätä ñan aune ja tötika yekänti ruäre kukwe metre ñaka drieta, ñodre ni raba bämike:

•   Ngwian ye tä kä ngwen juto nibätä aune tä ni mike nüne kwin

   Ja tötikadre kwela krite ye aibe köböire sribi ütiä biainta kwin raba kwen nie, nieta bä kabre. Kukwe nebätä metrere nitre kwati tä niken ja tötike kwela krite. Ngwian yekwe kä juto aune nüna kwin biandre ye nitre kwati tä nemen nütüre, akwa Biblia tä niere nita töbike ye erere abokän ngwarbe. Kukwe mada bäri ütiäte abokän Biblia tä driere “nita ngwian tarere, ye abko tä niken ni mike kukwe nuene blo blo ngwian diankrä jae” aune ye köböite ni ñaka raba tödeke jankunu (1 Timoteo 6:10). Ye medenbätä nitre testiko Jehovakwe tä ja di ngwen krubäte ne kwe ñaka ngwian taredre bäri aune rabadre ngökö (Mateo 13:22).

•   Ja tötika kwela krite ye tä ni mike ütiäte

   Ño räbäne, Nika Gilauri, ni nämäne sribikä gobranbe Georgia, mikani gare kukwe meden abokän erere nitre nämäne töbike juta kwe yekänti: “Georgia yete ja tötikadre kwela krite ribeta ñobätä ñan aune yebiti ni raba nemen ütiäte”. Aune niebare kwe arato mekerabe “monsotre bati abokän ñaka ja tötikabare kwela krite ye nämäne nemen gaidre mräkätre kwe kräke”. g Akwa Biblia abokän tä mike gare nie ja ñaka rabadre ruin ütiäte nie kä nebätä. Jesús niebare nitre kukwe ngwarbe drie jie ngwanka niara näire ie, niaratre abokän tö nämäne ni mada käkwe mikadre ütiäte: “Mun abokän tä ja käikitekä kwärikwäri [...] aisete ¿mun raba tödeke ño tibiti?” (Juan 5:43-44). Ja ketabätä nitre tä kwela krite yete ben ye raba ni töi mike ja mike bike kri, kukwe ye kräke Ngöbö tä ja brukwä mike (Proverbios 6:16,17; 1Pedro 5:5).

•   Ni itire itire rabadre kukwe den nuaindre jai kukwe kwin aune käme yebätä

   Ngöbö töita ñö kukwe kwin aune käme yebätä ye erere, nitre testiko Jehovakwe tä kain ngäbiti (Isaías 5:20). Akwa, tärä keteiti bätä kukwe tikani, kwela kri yete nitre ruäre tä ni mada mike ja dibiti kukwe ruäre nuainne ye köböite “monsotre ja tötikaka kwati käkwe kukwe diani nuaindre jai okwä kware, ñaka nämäne töbike, kukwe kwin aune käme yebätä”. h Kukwe ne erere tä tikani Bibliabätä arato: “Ni kukwe muko diän diän ben ni töi kuin metre tä ja kete angwane, ni töi kuin metre abko tä nemen diän arato ” (1 Corintios 15:33). Kwela kri yekänti kukwe ruäre nuainta abokän Ngöböta ñäkäire, ñodre ni dröba nikaka, ni sö duaka aune ni ñaka ja mäkäninte tä nemen jabe (1 Corintios 6:9,10; 2 Corintios 7:1).

•   Ja tötika kwela krite yebiti jondron kwin nuain raba käte tibien

   Ni jökrä ñaka ja tötike kwela kri yete ngwian ganainkäre krubäte, rabakäre ütiäte o kä ngwiana juto jabätä kukwe keta kabre bätä. Ni kwati tö ja ngwain kwin aune jondron kwin nuain käte tibien. Töbikadre kore ye kwin, akwa nun testiko Jehovakwe abokän tä näin ji mada jiebiti. Jesús ye erere nunta töbike, gobran ngöbökwe ye aibe käkwe kä tibien ne kwitai bäri kwin (Mateo 6:9, 10). Akwa, nun ñaka tä kwekebe gobran Ngöbökwe käkwe kukwe ükaite nun kräke ye ngübare. Ñakare aune, Jesús diribare erere, nunta dirire kä ngöi jökräbiti tibien aune kä kwatire kwatire nunta nitre kwati dimike nüne bäri kwin i (Mateo 24:14).