Julio kä 2013 ye ngwane, Nitre Braibe Konkrekasion Jökrä Testiko Jehovakwe Ngübabitikä käkwe tärä juani nitre misionero aune nitre sribikä köbö täte tä juta madate ye kräke. Gätä kri känti nitre juta madate nübaita o gätä kri regional nuaindi kä 2014 aune 2015 kömikai, yete niaratre rabadre niken aune dimikai ye mikani gare tärä yebätä.

Nitre sribikä köbö täte ye ñaka rikadre gätä kri ye aibebätä, ñakare aune rikadre basare mräkätre aune ja ketamuko kwe känti yekäre kukwe ye ükaninte. Juta ükaninte Ngöbökwe käkwe niaratre ütiä biain ye mikani gare tärä yebätä arato.

Kä nikanina ta yete kukwe ne kwrere ükaninte, akwa kä nete rabai bare jene. Nitre Dianinkä Tä Kukwe Ükete Ni Tötikakäre ye käkwe Oficina mrä ükaninte central mundial yete boleto kökakäre.

Tärä juani ye bitikäre, nitre namanina täräkwata juen oficina yete boleto nänkäre avionte diankakäre jai. Enero kä 2014 ye ngwane sribi namani nuaindre krubäte nitre sribikä oficina yete yei. Nitre sribikä Oficina ükaninte central mundial yete boleto kökakäre ye käkwe kukwe ükaninte nitre sribikä köbö täte kä jökräbiti tibien ye kräke.

Kukwe jökrä ükadrete ye ñaka namani nuäre. Ñodre, nitre ruäre nämene Reykjavík (Islandia) namani nändre ie kä Cochabamba (Bolivia); mada abokän nämene Nouméa (Nueva Caledonia) namani nändre kä Antananarivo (Madagascar) yekänti. Ruäre nämene kä Port Moresby (Papúa Nueva Guinea) ye nikani kä Seattle (Washington, Estados Unidos) yekänti, aune mada nämene Ouagadougou (Burkina Faso) ye nikani nemen Winnipeg (Canadá) yekänti.

Nitre nirike mikani sribire Oficina ükaninte central mundial yete boleto kökakäre käkwe boleto kökani krubäte nitre 4,300 bäsi näre sribikä juta 176 jene jene yete ye kräke. Konkrekasion keta kabre ngwian biani ye köböire kukwe ne jökrä namani bare kwin.

Kukwe ükaninte kräketre yebätä namani debe bien krubäte. Ni misionero gure kukwe tikani krörö: “Matare nun näinta Sureste Asia yete sribikäre jankunu. Kätä juto nunbätä, ñobätä ñan aune kä kwärike nikani ta yete nun ñaka nementa ja käite, akwa kukwe ükaninte nun dimikakäre ne köböire nun janamene Inglaterra basare nun mräkätre ie. Ne ñaka nuaindre akräke nun ñan janandre jire. Nitre kukwe ye ükatekä, yei nunta debe bien krubäte”.

Ni misionero iti tä sribire Paraguay käkwe tikani: “Ti muko aune ti nun tönibi debe biain krubäte, nun janamene gätä kri känti nitre juta madate nübaita nuainbare Nueva Jersey (Estados Unidos) yekänti yebätä. Kä 2011 ye ngwane nunkwe ja töi mikaba ngwian ükökrö jai, ne kwe nun rikadre Estados Unidos aune oficina bäri kri ye mikakäre gare jai arato. Akwa sö junio, nun nübaiba konkrekasion nitre blite kisebiti Paraguay ye tuinbiti, aune nämä gare nunye nunkwe nändre kwäräkwärä, yebätä nunkwe töbikaba krubäte aune nunkwe ja töi mikaba karo kökö jai sribi mikaba nun kisete ye nuainkäre bäri kwin aune nunkwe ja töi mikaba ñaka niken Estados Unidos. Akwa tärä juanba nunye nun nübaikäre gätä kri känti nitre juta madate nübaita nuaindi yebätä. ¡Nun tö nämä dre ie ye namani bare! Jehová ja töi mikani kwin nun kräke aune nun tare kwe ye bämikani kwe nunye yebätä nunta debe bien krubäte ie.

Nitre gure nünanka Malaui käkwe tikani: “Tä debe krubäte nunta niere correo electrónico nebiti. Munkwe ja di ngwani krubäte aune ngwian kitaninkä kukwe ne mikakäre nemen bare ye gare nunye. Sribibare krubäte aune juta ükaninte Ngöbökwe ja töi mikani kwin nun kräke, ne kwe nun janandreta ja käite, gätä kri känti nitre juta madate nübaita yebätä aune nun tädre keteitibe nun mräkätre bätä ja ketamuko nunkwe ben, yebätä nunta debe bien krubäte”.

Nitre sribibare Oficina ükaninte central mundial yete boleto kökakäre yebätä kä namani juto krubäte. Mileivi tä niere: “Nitre misionero dimikani rikakäreta ja käite mräkätre kwe aune ja ketamuko kwetre miketa ñärärä ye abokän ütiäte krubäte”. Dorise mikani gare: “Juta ükaninte Ngöbökwe tä nitre sribikä juta madakänti ye tarere krubäte ye namani gare tie”. Rodney, ji ngwanka oficina ükaninte yete niebare: “Kukwe ükaninte yete tikwe nitre dimikani siba yebätä kätä juto tibätä”.

Nitre testiko Jehovakwe kä jökräbiti tibien yebätä kätä juto, ñobätä ñan aune niaratre ngwian biani ja mräkätre tä ja di ngwen krubäte ye dimikakäre näinta ja käite.