Köbö 24 nemen 26 julio kä 2015 yete, nitre testiko Jehovakwe kwati krubäte blite kukwe tagalo yebiti käkwe ja ükaninkrö gätä kri ütiätebätä Roma (Italia) yekänti, kä ye nemenkä kilómetro 10,000 biti bäri nemen Filipinas, nitre tagalo käite yekänti.

Nengwane nitre filipino 850,000 biti bäri tä nüne Europa. Ye köböire konkrekasion nitre testiko Jehovakwe niena 60 aune nitre Testiko braibe tä ja ükökrö kä jene jene känti arato, niaratre tätre gätä nuainne kukwe tagalo yebiti aune tätre kukwe driere nitre filipino yei.

Akwa, krire kena ja ükaninkrö keteitibe kwetre gätä kri köbömä nuainbare Roma niaratre kukweibiti yebätä. Kä rababa juto nitre 3,239 nämene ja ükaninkrö yete yebätä, ñan ñobätä aune Mark Sanderson, sribikä Nitre Braibe Konkrekasion Jökrä Testiko Jehovakwe Ngübabitikä yebe, abokän kukwe driebare Filipinas, käkwe kukwe kädrieba mrä köbö kwatire kwatire te.

Ni ruäre tä niken gätä kri nuainta kukwe kwe yebiti o kukwe mada nüke gare ie yebätä, ¿ye ja erebe? Meri iti kädekata Eva nünanka España tä monso kwe ngübare kaibe tä niere: “Ti blite chi kukwe inglere yebiti akwa gätä kri nuainba kukwe tagalo yebiti ye köböire kukwe drieta Bibliabätä ye mataba kwin ti brukwäte”. Niara aune monso nibu kwe ja töi mikani ñaka niken mröre mentokwäre niaratre nämene nuainne käre bämän kratire kratire te ye erere, ñakare aune nuainbare batibe sö kratire kratire te ne kwe ngwian rabadre kwetre nänkäre Italia. Eva tä niere: “Nunkwe ja di ngwanba niken gätä kribätä ye köböire kukwe kädrieba yete ye rükaba gare jökrä tie”.

Jasmin, ni nünanka Alemania, käkwe köbö ruäre käräbare ngwarbe jai nänkäre gätä kri yebätä. Niara tä niere: “Köbö jatabara nüke nänkäre gätä kri yebätä angwane köbö bian ñaka raba ngwarbe tie nieba tie ñan ñobätä aune sribi rababa krubäte nuaindre. Tikwe ja töi mikaba jäme, tikwe oraba Jehovai aune tikwe blitaba ni sribi bökänkä tikwe yebe. Nunkwe sribi ükateba jai ne kwe ti rikadre gätä kri yebätä. Ti rababa ja etebatre aune ja ngwaitre filipino nünanka Europa yebe yebätä kä rababa juto krubäte tibätä”.

Nitre filipino kwati tätre nüne Europa ye tä nemen ulire kä kwetre namaninkä ietre yebätä aune ja ketamuko kwetre nikani nüne kä madakänti yebätä arato. Gätä kri nuainbare ye köböire nitre ja ketamuko ye kwati ja tuaninta akwa ye ngwane ja etebatre kwrere (Mateo 12:48-50). Fabrice tä niere: “Nitre gare tie ben tikwe ja tuabata ye käi rababa nuäre krubäte tibätä”. Gätä kri krütaba ngwane meri Testiko rababa gwä gwä niere: “¡Gätä kri ne ja mräkätre ben!”.