Monso chi kädekata Hugo abokänbiti kä kwäjätä, käkwe monsotre kwelate dimikani yebätä nitre ükaninte Inglaterra yekänti ni mada dimikakäre yekwe premio Diana biani ie. Monso chi ye käkwe monsotre nänkä kwelate ben mika nämene tuin ngwarbe jai ye dimikani, yebätä premio ye biani ie.

Hugo kukwe ne niebare: “Video Ño mä ja kriemikadre akwa ñaka ni mada nuaindre tare ye käkwe ti dimikani. Video ye raba kwen jw.org yete. Kukwe drieta video yete, ye köböire tikwe ja töi mikaba monsotre mikata tuin ngwarbe jai kwelate ye dimike”.

Hugo käkwe video ye mikani tuare nitre profesor kwe ie, ye bitikäre kukwe ükaninte ne kwe monsotre jökrä kwelate käkwe Internet käi nitre tesiko Jehovakwe yete kukwe känändre. Nengwane, monsotre nänkä kwelate Hugo ben abokänbiti kä niena kwä kwä nememe kwäjätä näre, tätre käre kukwe känene Internet käi jw.org yete. Niaratre niebare monsotre mada tä niaratre mike tuin ngwarbe jai yebe ja tuakäre aune kukwe mada ütiäte ngwantarita kwetre jai ye tä kwen ietre Internet käi jw.org yekänti. Ñodre, kukwe ne: “Cómo conseguir amigos verdaderos”.

Kwela mada Inglaterra yekänti monsotre mada nämene Elijah, abokänbiti kä nämene kwä kwä, mike tuin ngwarbe jai. Ye medenbätä, mräkätre kwe ja töi mikani video Ño mä ja kriemikadre akwa ñaka ni mada nuaindre tare ye tuin aune blitebätä ben; monsotre niara mikadre tuin ngwarbe jai ye ngwane dre niedre aune dre nuaindre kwe yebätä ja kitani kwetre, ye käkwe dimikani ñaka kä jürä ngwen jabätä ja tuakäre kukwe yebe. Ye bitikäre, kukwe ükaninte bämän krati te monsotre mikata tuin ngwarbe jai kwelate ye dimikakäre, ye ngwane profesor kwe käkwe video ye mikani tuare monsotre jökrä yei.

Monsotre mikata tuin ngwarbe jai kwelate ye ñaka nuainta Inglaterra ye aibe känti, ñakare aune kä jökräbiti tibien. Video Ño mä ja kriemikadre akwa ñaka ni mada nuaindre tare tä monsotre juta keta kabre känti dimike.

Juta Estados Unidos yekänti, monso chi merire abokänbiti kä nämene kwäjätä, kädekata Ivie nämene monso merire nänkä kwelate ben jürä ngwen jabätä, ñobätä ñan aune monso ye nämene niara mike tuin ngwarbe jai. Ivie käkwe video Ño mä ja kriemikadre akwa ñaka ni mada nuaindre tare tuani angwane ye käkwe dimikani ja tuin ngwärere monso yebe. Arato, Ivie ja driebare profesora kwe ie aune profesora ye käkwe dimikani. Monso merire nämene Ivie mike tuin ngwarbe jai ye käkwe ribebare ie rabadre ngite juen tabiti. Nengwane niaratre tä ja kete kwin jabe.

Nun testiko Jehovakwe töita krubäte monsotre yebätä. Ye medenbätä, nunkwe kukwe mikai gare jankunu monsotre dimikakäre, ne kwe monsotre mikata tuin ngwarbe jai o kukwe mada ye kwrere ben ja tuadre kwetre.