Harold Corkern, Nitre Braibe Konkrekasion Jökrä Ngübabitikä dimikaka tä sribire Nitre Dianinkä Tärä Sribeta Jie Ngwankäre yebe, ye tä kukwe kädriere kädekata “Nikwe sribidre ja di tätebiti”. Käre, ja mräkätre aune ja ngwaitre tä sribire ja töi jeñebiti kä Warwick yekänti ye nitre Testiko tä nüke tuinbiti ye tätre kukwe ütiäte kädriere niaratre dimikakäre.

Lona ngwen tä nitre sribikä ja töi jeñebiti ye kriemike kä ñüre yete kä nemen tibo krubäte yebätä ne kwe sribita kwetre ye rabadre bare täte ietre. Ju nete cocina, mrö käi, ni bren kräkäi mika käi aune dän bätäte käi ye rabai.

Nitre electricista tä ja ükete cable ketakakäre. Ju nünankäre jene jene yete cable ketaninanka 12,000 metro (40,000 pie). Kä Warwick kökani ye bitikäre kä nikani braibe ta yete electricidad yebätä sribi jatani aune sribidi jankunubätä nememe ju sribedi täte ye ngwane.

Sribikä iti tä balcón yebiti cinta adhesiva ketekä jondron te ñö ñaka betekä ta mikadrebiti ye känenkri. Piso mrä kwin yete balcón jene jene tä yebiti polimetilmetacrilato (PMMA) mikani, ye abokän jondron ñöre ketakata abokän teta ñö ñaka betekä meden gärätä.

Ni rüne tä sribire ngängän ben cable luz mikara ju nünankäre jene jene te ye ketakakäre.

Nitre sribikä ie mröta krubäte ye tä mröre mrö käi sribebare ken yekänti. Köbö kwatire kwatire te mrö blato 2,000 biti bäri döräita ñänä ruäre.

Nitre sribikä tä varilla hierrore mike Ju jondron ükatekäre rabai mrä tibien yekänti.

Monsotre kia ruäre käkwe tärä tikanina debe biankäre nitre ju sribekä ja töi jeñebiti yei. Nitre sribikä kwati ye tä niken köbö braibe te ju sribekäre. Bämän kratire kratire yete nitre 500 näre tä nüke sribire ja töi jeñebiti. Sö febrero yete, nitre Testiko 2,500 näre käkwe sribibare köbö kwatire kwatire te kä Warwick yekänti.

Ju sribeta ye namanina bare 60% näre. Enero aune abril kä 2015 yete jukrä ye sribebare täte, aune jukrä hierrore oficina aune jondron mada kräke nitre ja mräkäre Betel ie ye sribebarera täte arato. Sö ye ngrabare arato panel keta kabre sribebare cemento mritani jä okwlabe yebiti ye mika jatani ju jondron ükatekäre yete, ji nänkäre ju nünankäre jene jene kokwäre ye sribe jatani aune ñö okwä Sterling Forest (Blue Lake) yekänti ye ükate jatani.

Escalera sribeta abokän üai dianinkä kunkwäre tuin menteni. Escalera piso ketarike kräke ye krä sribekäre nitre menteni nübaibare, aune nitre Testiko tä sribire yete ye käkwe cemento mritani jä okwla kekani te.

Kä ñüre yete kä tibo krubäte ye näire, nitre sribikä tä varilla piso tibien kräke ye mike. Sö enero aune marzo ye ngrabare kä Warwick yekänti nieve nänkäni tibien 50 pulgada. Nitre kwati käkwe jondron nieve diankakäre yebiti nieve dianinkä sribita yekänti. Ne madakäre, kä ükaninte ne kwe nitre sribikä ja töi jeñebiti ye rabadre niken ja mike krube.

Zinc sribebare metal yebiti ye mikata ju dokwä sribebare yebiti. Sö abril jatanina krüte ye ngwane, ju jene jene nünankäre sribeta dokwä krobu yebiti zinc mikanina. Sö junio ye ötareta ju nünankäre B ye dokwäbiti zinc mikani täte.

Grúa mente kwin yete ju nünankäre B ye tuin menteni.

Tubo ükaite ño tibienta üai sribebare täräkwatabätä ye nitre plomero tä mike ñärärä. Sribi ye nuainkäre jökrä, tubo ükaite ño tibienta ye üai mada sribebare 3,400 aune yebiti sribidi.

Elevador sribikäre yete, nitre sribikä tä kwinta lona mike ju bäre ta ju kriemikakäre. Nitre jökrä sribikä elevador sribikäre aune tijera kwrere yebiti aune máquina madabiti ye tötikata kwin ne kwe sribidre kwin kwetre jondron yebiti. Ja ngübadrebiti ño sribikänti aune dre nuaindre mikadre gare bätä jondron ngwandre ño karobiti yebätä nitre sribikä tötikata. Ne madakäre, nitre sribikä ja kriemikadre ño ne kwe ñaka betadrekä timo aune mascarilla mikadre ño ja ngwärebiti kwetre yebätä tötikata.

Ju sribeta nedrinkri yekänti, ju nünankäre jene jene ye tuin menteni. Sö abril namanina krüte ye ngwane, sribi kri krubäte nuainta maquina aune electricidad yebiti ye jännamani ju nünankäre A, B aune D yekänti. Ju nünankäre C (üai ñaka tuin nete) yebätä yeso mika jatani aune ki ye jüka jatani, bätä baldosa mika jatani tibien arato.

Elevadora sribikäre yete, nitre sribikä nibu tä jondron jüente ju bätärita ne kwe vapor rikadre ta. Sö krobu näre tä niken ta yete ju nünankäre jene jene ye bätärita jondron ye jüateta.

Nitre sribikä cementobätä ye ruäre tä üma yebiti ki sribere. Ju sribeta keteiti nekänti jondron kökai ye mikai aune kä mada mada jondron mikara rabai.

Ni busiaka o burie ketaka ñöte nübaibare válvula käne ye kwitakäre mrä yebe ñö okwä yete. Nengwane, kise nitadre botón yete ye aibe köböire ñö ye mika raba tä nemente aune ye köböire murie kri ñübe minimini rükadre ye ngwane ñö ñaka niadre jate.