Yesu ya kafa mana misali mai kyau da za mu iya bi musamman idan muna fuskantar matsaloli ko kuma tsanani. (1Bi 2:​21-23) Ko da yake an zazzagi Yesu, bai rama ba har ma a lokacin da yake shan wahala. (Mk 15:​29-32) Me ya taimaka masa ya jimre? Ya ƙudura zai yi nufin Jehobah shi ya sa ya jimre. (Yoh 6:38) Ban da haka ma, ya mai da hankali ga “farin cikin da aka sa a gabansa.”​—Ibr 12:2.

Me za mu yi idan aka wulaƙanta mu saboda imaninmu? Kiristoci na gaskiya ba sa ‘sāka wa mutane da mugunta.’ (Ro 12:​14, 17) Idan muka yi koyi da abin da Yesu ya yi sa’ad da yake shan wahala, za mu yi farin ciki cewa Allah yana amincewa da ibadarmu.​—Mt 5:​10-12; 1Bi 4:​12-14.

KU KALLI BIDIYON NAN SUNAN JEHOBAH YA FI MUHIMMANCI, BAYAN HAKA, SAI KU AMSA TAMBAYOYIN NAN:

• Ta yaya ’Yar’uwa Pötzinger * ta yi amfani da lokacinta da kyau sa’ad da aka tsāre ta?

• Wace irin wahala ce Ɗan’uwa da ’Yar’uwa Pötzinger suka jimre sa’ad da suka yi zama a sansani dabam-dabam?

• Me ya taimaka musu su jimre?