1. Bichi binazigana kulerhera abantu obuba?

 WAZA kw’ebila byahikiraga Bahamirizi baguma omu kalamo. Nestor na mukage Maria balilonzeze kukolera ahakenere bwenene abahubiri. * Aliko yibahikira ogola muhigo gwabo, balikwanene kurhanga kuyiga kulama na furanga zigeke. Aliko kandi baliri bayubaha oku barhachigwarha busime bunene bakalama na furanga zigeke. Amango Biniam aba Muhamirizi wa Yehova, omu chihugo balahize akasi kerhu, arhegera oku bulala naye amaba muguma omu bakozi ba Yehova, akalibuzwa. N’echola charhuma ayubaha. Aliko echalimuyubahisize bwenene, kwaliri okuntu abantu b’omulala gwage bakajirire amango bakamenyere oku ajire omu dini lihyahya. Valérie balimupimire embero mbi y’obulwala bw’akansere, analwisa bwenene mpu y’apata omunganga wakamubera ey’anakengere enyigirizo ze Biblia ayemerere oku bilolere eshagama. Kweri, aliri ayubaha oku afa.

2. Bichi birhumire rhukwanene kujira okwerhu koshi yirhuhima obuba bwerhu?

² Wachigerere kugwarha obuba buli nk’obola? Banene mu rhwewe bachigerere kuchiyunva ntyo. Akaba rhurhayigire kuhima obuba bwerhu, nkabaga kweri rhwakarhola esimikiro zibi zakahuma n’oku bwira bwerhu haguma na Yehova. Ebyola bi Shetani alonzeze rhujirage. Anashuba kuchihangana kukolesa obuba bwerhu mpu yirhurhakenga amarhegeko ma Yehova, maheberemo erhegeko ly’okuhubiri emyazi minja. (Ufu. 12:17) Shetani ali mubi bwenene, arhajira bonjo anagwerhe emisi. Aliko, wakachilanga kuye. Nka gurhe?

3. Bichi byarhurhabala rhuhime obuba bwerhu?

 ³ Amango rhwamachizera oku Yehova arhuzigire, k’okuderha oku ali aha burhambi bwerhu, Shetani arhakarhuyubahisa. (Zb. 118:6) Omufano, omwandisi we Zaburi 118 aligerere omu bihe bikomere bwenene. Aligwerhe bashombanyi banene, na baguma mubo baligwerhe echeo ch’enyanya (omustari 9, 10). Mango maguma, aliri ahidikwa bwenene (omustari 13). Na Yehova abaga amuhere obuhane bukomere (omustari 18). Aliko chiro akaba ntyo, oyola mwandisi we zaburi agwarha obushiru b’okuyimpa ntya: “Nta yubaha.” Bichi byarhumaga achiyunva abegerere ntyo? Alimenyere oku chiro akaba Yehova abaga amuhanire, ali She w’embingu omuzigiire bwenene. Oyola mwandisi we zaburi alichizerere kweri oku chiro ahurana n’ebibazo bili gurhe, buli mango Mungu wage w’obuzigire aba tayari kumurhabala.​—Zb. 118:29.

4. Buba bwa nyabachi rhwakahima akaba rhuchizerere oku Yehova arhuzigire?

⁴ Rhukwanene rhuchizere oku Yehova arhuzigire buli muguma werhu bwage-bwage. Obola bwizere bwarhurhabala rhuhime obuba bwa mbero esharhu abantu banazigana kugwarha: 1) okuyubaha oku rhurhagala kuhahira abantu b’omulala gwerhu; 2) okuyubaha abantu, na 3) okuyubaha olufu. Abantu rhwashambereko omu chifungo ch’oburhanzi, bagalaga kuhima obuba bwabo bulala balichizerere oku Mungu abazigire.

5. Bichi byakalerhera erhwe ly‘omulala milago minene? (Olole efoto eli oku chiganda.)

⁵ Omukristu oli rhwe ly’omulala, anabona oku akasi agwerhe k’okuhahira omulala gwage kali k‘akamaro. (1 Ti. 5:8) Akaba oli rhwe ly’omulala, nkabaga mu chinola chihe ch’obulwala b‘okuyahukira, waliri wayubaha oku waheza akasi kawe. Nkabaga waliri wayubaha oku orhapata akalyo k’okulisa omulala gwawe changwa olufuranga l’okulipa enju. Nkabaga kandi waliri wayubaha oku okaheza akasi kawe, orhachibona akandi. Changwa kuguma na Nestor na María rhwashambalagako burhanzi, nkabaga nawe waliri wayubaha kulama na lufuranga lugeke. Shetani agalire kujira bantu banene baleke kukolera Yehova, bulala baligwerhe obuba buli nk’obola.

6. Bichi Shetani analonza rhuyemere?

⁶ Shetani y’ajira okwage koshi mpu yi rhuyemera oku Yehova arhalaga ku buli muntu bwage-bwage, oku arharhuzigiire, arhanarhurhabala kushishikala omulala gwerhu. Echola chakarhuma rhwawaza oku rhukwanene kujira okwerhu koshi yi rhulanga akasi kerhu k’omubiri na chiro akaba okujira ntyo kwakarhuhema rhuvune amakanuni me Biblia.

7. Bichi Yesu arhurhabere rhuchizere?

⁷ Yesu omenyere Eshe bwenene kulusha owindi muntu yeshi-yeshi, arhurhabere rhumenye bwinja oku Mungu werhu, “abamenyere ebi rhulagirire chiro n’embere rhurhazimuhema.” (Mt. 6:8) Kandi Yesu amenyere oku Yehova ali tayari kurhuha ebirhukenere. Rhwabo nka Bakristu, rhuli baguma b’omu mulala gwa Mungu. Rhwakachizera oku yewe nka Rhwe ly’omulala gwage, Yehova akenga akanuni yewe yenyine ayandikisaga omu 1 Timoteo 5:8.

8. a) Bichi byarhurhabala rhuhime obuba amango rhwamawaza oku rhurhagala kuhahira omulala gwerhu? (Matayo 6:31-33) b) Nka gurhe rhwakayiganya mulume muguma na mukage bayerekenwe oku foto bahekere mwali-werhu muguma akalyo?

⁸ Amango rhwamachizera oku Yehova arhuzigiire anazigiire n’omulala gwerhu, rhwachizera oku rhwapata ebintu byoshi rhukenere. (Osome Matayo 6:31-33.) Yehova alonzeze kurhuha ebirhukenere bulala arhuzigire anali Darha ohaana bwenene! Amango alema egulu,  alijirire binene olekere okurhuha ebintu by’akamaro rhukenere yirhugenderera kulama. Alilemere bintu binene oku gulu binarhulerhera busime bunene. (Mwa. 2:9) Chiro akaba oku mango maguma rhwakaba rhugwerhe ehi rhukenere hoshaho, rhukwanene kuyibuka oku ehyola rhugwerhe, rhuhigwerhe bulala Yehova yiwarhuhaga hyo. Yehova ali agenderera kurhuhahira. (Mt. 6:11) Rhukwanene kugenderera kuyibuka oku ebintu by’omubiri rhuli rhwalekana nabyo zene, birhakahuzanywa chiro n’ebi Mungu werhu w’obuzigire arhuha zene n’omu mango mayinjire. Echola chi Nestor na María bahikiraga kurhegera.​—Isa. 65:21, 22.

9. Bichi omufano gwa Nestor na María gwakakuyigiriza?

⁹ Nestor na María baligwerhe enju ekwirire n’akasi kenja omu chihugo che Colombie. Baderhere ntya: “Rhwaliri rhwawaza oku rhurhakayorohya akalamo kerhu yi rhugala kukola binene omu kasi ka Yehova, aliko rhwalema rhwayubaha ok’okulama na lufuranga lugeke kurharhulerhera obusime.” Bichi byabarhabalaga bahime obuba bwabo? Bawaza ku njira zinene Yehova abayerekeremo oku abazigiire. Bulala balichizerere oku buli mango Yehova abashishikala, baleka amakasi mabo menja ma mushahara gunene. Baguza enju yabo, bahamira omu eneo eli omu chihugo chabo ekeneere bwenene abahubiri b’Obwami. Gurhe bali bachiyunva oku bilolere eyola simikiro barholaga? Nestor aderhere ntya: “Rhwachibwenere obukweri bw’ebinwa bili omu Matayo 6:33. Rhurhasaga bula haba n’akatyu echintu ch’omubiri rhukenere. Rhunagwerhe busime bunene omu kalamo zene.”

10. Bulagurhe birhakasomeza okubona omuntu ali ayubaha owabo?

¹⁰ Kurhenga amango Adamu na Eva bachihenulaga ku Yehova, omuntu agenderere kulibuza owabo. (Muh. 8:9) Abantu banakolesa kubi obukulu bwabo omu kukolera ababo amabi, ababandi bali bajira ebijiro bibi bwenene, abanafunzi b’ebigamba oku masomo bali badukanga n’okuyubahisa ababo banafunzi, hali nabanakolera emilala yabo kubi. Kweri, birhakarhusomeza okubona omuntu ali ayubaha owabo! Nka gurhe Shetani ali achihangana kukolesa obuba rhugwerhe oku bantu y’arhugeregeza?

11-12. Nka gurhe Shetani anakolesa obuba rhugwerhe oku bantu y’arhugeregeza?

¹¹ Shetani ali arhushumika rhuyubahe abantu yi rhuleka akasi kerhu k’okuhubiri changwa kuleka kujira ebintu Yehova arhubwirire  rhujire. Kugerera amashumi ma Shetani, marhegesi manene malahize akasi kerhu n’okurhulibuza. (Lu. 21:12; Ufu. 2:10) Mu linola gulu lya Shetani, bantu banene bali bayeneza emyazi y’okuhabula n’obubeshi bukabizye oku bilolere Abahamirizi ba Yehova. Abantu bayemerere obola bubeshi bakarhushekera, chiro n‘okurhurhera. (Mt. 10:36) Ka rhusomezwe n’obola bulyalya bwa Shetani? Nanga chiro. Abaga akoleseze obola bulyalya bwage mu myaka 100 ya burhanzi!​—Mdo. 5:27, 28, 40

¹² Obuuba n’obupinzani burhengere oku bakulu b’ebihugo arhali y’entwaro yonyine Shetani anakolesa. Bantu baguma banayubaha eju y’eby’abantu b’omulala gwabo bakawaza amango bamaba Bahamirizi ba Yehova. Mango maguma banayubaha bwenene echola kulusha oku bakashurhwa. Bazigiire abantu b’omulala gwabo bwenene bakasima nabo bahikire kumenya Yehova n’okumuzigira. Binabaluma oku murhima bwenene amango bamayunva abantu b’omulala gwabo baderha kubi Mungu w’okuli n’abanamuharamya. Aliko mango maguma abantu b’omulala baliri barhupinga mira, bakahikira kuba Bahamirizi ba Yehova. Aliko gurhe byakaba amango abantu b’omulala gwerhu bamarhujahika loshi eju y’obwemere bwerhu buhyahya? Gurhe rhwakajira?

13. Nka gurhe okuchizera oku Mungu arhuzigire kwakarhurhabala rhulembere amango abantu b’omulala gwerhu bamarhujahika? (Zaburi 27:10)

¹³ Rhwakarhulirizwa n’ebinwa bikwirire bili omu Zaburi 27:10. (Osome.) Amango rhwamayibuka kangana gurhe Yehova arhuzigiire, rhurhayubaha ebyakarhengerera chiro n’amango bamarhujahika. Rhunachizerere oku nji rhwapata oluhembo eju y’okulembera kwerhu. Yehova arhuha buli choshi rhukenere, arhurhabala rhurhulere, rhugwarhe obusime, rhunahikire kumuyegera! Ebyola bi Biniam rhwashambalagako burhanzi alichibwenere.

14. Bichi omufano gwa Biniam gwakakuyigiriza?

¹⁴ Biniam aba Muhamirizi wa Yehova chiro akaba oku oburhegesi bwaliri bwalibuza bwenene Abahamirizi ba Yehova omu chihugo chage. Rhulolage nka gurhe okumenya oku Yehova amuzigiire kwalirhabere Biniam aleke kuyubaha abantu. Aderhere ntya: “Obola bupinzani bwalikomere bwenene kulusha nk’okunaliwazize. Aliko echi naliyubahire bwenene kulusha okulibuzwa n’oburhegesi, kwaliri kupingwa n’abantu b’omulala gwani. Esimikiro narholaga y’okuba Muhamirizi wa Yehova, yakavunire darha omurhima orhaliri Muhamirizi n’omulala gwani nago, gurhakachinkengere haba n’akatyu.” Aliko Biniam alichizerere  oku buli mango Yehova anashishikala balala azigiire. Biniam afasiriye ntya: “Nahwanza kuwaza okuntu Yehova arhabere abaliri balembera ebibazo by’okubula efuranga, akabolo, kurherwa n’echigusho ch’abantu bagwerhe ebisirani. Nalimenyere oku nka genderera kubera mwimana emwa Yehova, akangishire. Amango baliri bazigana kunfarha chiro n’okundibuza, nalichibonera nyenyine oku buli mango Yehova anarhurhabala amango rhuyorhere bimana emwage.” Biniam achibonera oku kweri Yehova ali She, n’oku abantu ba Mungu guli mulala gwage g’okuli.

15. Bulagurhe kurhali kubi okuyubaha olufu?

¹⁵ Ebiblia ederhere kweri ok’olufu ali mushombanyi werhu. (1 Ko. 15:25, 26) Rhwakayubaha amango rhwamawaza oku bilolere olufu, ahanene amango rhwabo changwa omuzigirwa werhu alwere bwenene. Bichi birhuma rhwayubaha olufu? Bulala amango Yehova arhulemaga, alirhuhere enyorha y’okusiimira akalamo esiku n’amango. (Muh. 3:11) Aliko okuyubaha olufu kwakarhurhabala rhulange akalamo kerhu. Omufano, kwakarhurhabala rhuchishoge bwinja akalyo rhwalya n’okuyinja rhwajira esporo oku kahunda, kwakarhushunika rhuje emwa munganga changwa kugula amafumu amango rhulwere, n’okurhaheba akalamo kerhu omu buhanya buzira mpanvu.

16. Nka gurhe Shetani anachihangana kukolesa obuba rhugwerhe oku bilolere olufu?

¹⁶ Shetani amenyere oku rhusima akalamo kerhu. Aliko anaderha oku rhwakahaana buli choshi-choshi chiro n’obwira bwerhu haguma na Yehova mpu yirhulanga akalamo kerhu ka zene. (Yob. 2:4, 5) Shetani achirhebekere bwenene! Aliko, bulala “y’egwerhe obuhashe b’okulerha olufu,” Shetani anachihangana kukolesa obuba b’olufu y’arhuma rhwajahika Yehova. (Ebr. 2:14, 15) Mango maguma, abambali ba Shetani banayubahisa abantu ba Yehova oku babayirha akaba barhalekene n’obwemere bwabo. Changwa amandi mango, Shetani akabona oku rhukenere kubukwa juba-juba, anaja akolesa echola mpu yirhuvuna amakanuni ma Yehova. Badogtere changwa abantu b’omulala barhali Bahamirizi ba Yehova, bakarhuhidika mpu yirhuyemera barhuhebe mw’eshagama, n’okola kwakaba kuvuna esheria ya Mungu. Changwa muntu mulebe akachihangana kurhuyemeza mpu rhuyemere amatunzo marhafarhene n’amakanuni me Biblia.

17. Nk’oku olwandiko lwa Waroma 8:37-39 luyerekene, bichi birhumire rhurhakwanene kuyubaha olufu?

¹⁷ Chiro akaba rhurhalonzeze kufa, rhumenyere oku Yehova arhakaleka kurhuzigira chiro akaba oku rhwamafa. (Osome Waroma 8:37-39.) Amango abera ba Yehova bamafa, agenderera kubayibuka nka kulala balichili baguma-guma. (Lu. 20:37, 38) Agwerhe enyorha y’okubafula. (Yob. 14:15) Yehova alipire echintu ch’akamaro “bwenene mpu yirhugwarha akalamo k’esiku n’amango.” (Yoh. 3:16) Rhumenyere kangana gurhe Yehova arhuzigiire bwenene n’okurhushishikala. Bobola, ahali h’okujahika Yehova amango rhulwere changwa amango rhuli hofi kufa, rhunamuhema arhurhulirize, arhuhe obwengehe n’emisi. Intyo ku Valérie n’eba bajiraga.​—Zb. 41:3.

18. Bichi omufano gwa Valérie gwakakuyigiriza?

¹⁸ Amango Valérie aligwerhe myaka 35, bamupima embero mbi y’obulwala bw’akansere. Lola okuntu obuzigire bwamurhabalaga aleke kuyubaha olufu. Ashambere ntya: “Amango menya oku ndwere akansere, byalilumire bani oku murhima bwenene nani konako. Byalihemere mberwe omu bulyo bukomere yinfuma obola bulwala. Nalijire kulola ba dogtere banene, aliko boshi balahira oku barhakambera  barhanampebere mw’eshagama. Naliyubahire bwenene, aliko bulala nalimenyere esheriya ya Mungu oku bilolere echola, ntayemeraga bampeba mw’eshagama! Akalamo kani koshi, Yehova anyerekere oku anzigiire bwenene. Naho, naligwerhe nani orozo l’okumuyereka oku nani muzigiire. Buli mango naliri nayunva emyazi mibi, yaliri yashuba nkomeza bwenene mpigirire kusimisa Yehova n’okurhaleka Shetani ahime. Buzinda, nayinja pata okuntu nakaberwa buzira kumpeba mw’eshagama. Chiro akaba oku echibazo ch’amagala mani chigenderere, buli mango Yehova anarhuha ebi rhukenere. Omufano, oku mbuganano yerhu y’oku buzinda bw’eboso, rhwaliganirire oku mwazi guderhere ‘Kukabiliana na Matatizo ya Leo kwa Ujasiri.’ (Okulwisa Ebibazo bya Zene n’ Obushiru.)  * Ogula mwazi gwalirhurhulirize bwenene. Rhwaliri rhwagugalukira buli mango. Emyazi eli nk’eyila, n’akasi k’okuhubiri n’okuja oku mbuganano oku kahunda, byarhurhabere nyono na bani rhurhulere n’okurhola ensimikiro zinja.”

19. Bichi byarhengerera hanola hofi-hofi?

¹⁹ Kugerera oburhabale bwa Yehova, Abakristu omu gulu lyoshi, bagalire kulwisa ebihe bikomere n’okupinga Ibilisi. (1 Pe. 5:8, 9) Nawe, wakagala kujira ntyo. Hanola hofi-hofi, Yehova ayerekeza Yesu na balala nj’arhambula haguma nabo, “kulimbula emirimo ya Shetani.” (1 Yo. 3:8) Enyuma w’ahola, abantu ba Mungu bali bamukolera hanola oku gulu “nji barhayubaha na ntaye nji wabayubahisa.” (Isa. 54:14; Mik. 4:4) Oku amola mango manahika, rhukwanene kujira okwerhu koshi yi rhuhima obuba.

20. Bichi byarhurhabala rhuhime obuba bwerhu?

²⁰ Rhukwanene kugenderera kukomeza obwizere bwerhu oku Yehova arhuzigiire kandi analanga abakozi bage. Rhwagala kujira echola amango rhuli rhwawaza bwenene n’okuganira oku kuntu Yehova alangire abakozi bage omu mango ma mira. Kandi birhuhemere rhuleme rhwayibuka okuntu Yehova arhurhabere rhwabo rhwenyine amango rhwaliri rhwahurana ebihe bikomere. Kugerera oburhabale bwa Yehova, rhwakahima obuba bwerhu!​—Zb. 34:4.