1. Nk’oku biyandikirwe omu Muhubiri 7:20, bukweri buhe Omwami Sulemani aliyandikire?

 OMWAMI Sulemani aliderhere ntya: “Nta muntu munya-kunali oku gulu onajira amenja buli mango orhanagoma haba n’akatyu.” (Muh. 7:20) Obola buli bukweri! Rhweshi rhuli banya-byaha. (1 Yo. 1:8) Che chirhumire rhweshi rhukenere oku Mungu arhubabalire n’aberhu bantu nabo barhubabalire.

2. Gurhe omuntu anachiyunva amango mwira wage w’oku murhima amamubabalira?

² Nta ngangane, oyibukire amango wagayisaga mwira wawe w’oku murhima. Walilonzeze mushube mube bera, che chirhumire walimuhemere obonjo burhengere oku murhima. Gurhe walichiyunvirhe amango mwira wawe akubabalira oku bulonza? Ka walichiyunvirhe orhulerere? Nechi, wanayunva osimire!

3. Bichi rhwaganirako mu gunola mwazi?

³ Rhulonzeze Yehova abe mwira werhu w’oku murhima, aliko mango maguma, rhunaderha changwa kujira chintu chilebe chimugayisize. Aliko si, nka gurhe rhwakachizera oku Yehova ali tayari kurhubabalira? Mu njira nchi obubabale bwa Yehova burhali kuguma haba n’akatyu n’obubabale bw’abantu? N’oku buzinda, bande Mungu anababalira?

4. Bulagurhe rhwakachizera oku Yehova ali tayari kubabalira?

⁴ Echinwa cha Mungu chirhubwirire oku Yehova ali tayari kubabalira. Amango Yehova abwira Musa oku bilolere engeso zage oku Musozi gw’Esinai, aderha ntya kugerera malayika wage: “Yehova, Yehova, Mungu w’olukogo n’obonjo,  orhagwarha burhe juba-juba, onagwerhe buzigire bunene bwimana n’okuli, onayerekana obuzigire bwimana oku bihumbi, onababalira egosa, okugoma n’echaha.” (Kut. 34:6, 7) Yehova ali mwinja anali Mungu ogwerhe olukogo oli tayari kubabalira buli mango abanya-byaha bahungamire.—Ne. 9:17; Zb. 86:15.

5. Nk’oku olwandiko lwa Zaburi 103:13, 14 luderhere, bichi Yehova anajira bulala ab’amenyere abantu bwinja-bwinja?

⁵ Bulala Yehova ye Mulemi werhu, ab’amenyere buli chintu oku birhulolere. Waza kw’echila! Ab’amenyere buli choshi ku buliyeshi olamire oku gulu. (Zb. 139:15-17) Bobola anabona obuzamba boshi rhwashokwere oku bazere berhu. Chiro, anab’amenyere ebyarhuhikiire omu kalamo byarhumire rhwagwarha oborhere rhugwerhe. Bichi Yehova anaj’ajira bulala ab’arhumenyere bwinja-bwinja? Binarhuma arhuyereka olukogo.​—Zb. 78:39; osome Zaburi 103:13, 14.

6. Nka gurhe Yehova ayerekene oku ali tayari kubabalira?

⁶ Yehova ayerekene oku ali tayari kubabalira. Ab’amenyere echola bulala kugerera ebijiro by’omuntu murhanzi Adamu, rhweshi rhwaja omu muvumo gw’echaha n’olufu. (Ro. 5:12) Ntacho rhwakagala kujira rhwabo rhwenyine yirhuchikula changwa n’abandi omu muvumo gw’echaha n’olufu. (Zb. 49:7-9) Aliko, Mungu werhu w’obuzigire alirhuyerekere olukogo omu kujira omupango g’okurhukula m’obola buja. Bichi alijirire? Yohana 3:16 ederhere oku, Yehova arhuma Omugala w’echinege afe eju yerhu. (Mt. 20:28; Ro. 5:19) Yesu afire ahali herhu y’ayokola buli yeshi wayerekana obwemere mu ye. (Ebr. 2:9) Byalikwanene kuluma Yehova bwenene oku murhima amango abona Omugala muzigirwa afa olufu lw’amalibuko lunakozeze eshoni! Kweri, Yehova arhakayemerere Omugala afe akaba arhalilonzeze kurhubabalira.

7. Bantu baguma bahe bashamberwe omu Biblia Yehova alibabalire oku bulonza?

⁷ Ebiblia egwerhe emifano ya bantu banene Yehova ababaliraga oku bulonza. (Efe. 4:32) Inde muguma mu bo oyibukire? Nkabaga oyibukire Mwami Manase. Oyola mulume mubi aligoseze Yehova bwenene mu njira zinene. Aharamya ba mungu b’obubeshi, anaheba abandi omurhima mpu nabo bajire ntyo. Aliri ayirha abana bage n’okubahana nka nterekero ku bamungu b’abapagani. Chiro ajira  n’obubi bukabizye omu kuheba esanamu ya mungu w’obubeshi omu hekalu lichesibwa lya Yehova. Ebiblia ederhere ntya oku bimulolere: “Ajira maligo manene bwenene omu masu ma Yehova, y’amugayisa.” (2 Ny. 33:2-7) Aliko, amango Manase ahungama n’omurhima goshi, Yehova alimubabalire. Mungu anashuba kumugalula oku bwami bwage. (2 Ny. 33:12, 13) Nkabaga wakashuba kuwaza oku Mwami Daudi wajiriraga Yehova ebyaha bikomere, omufano, echaha ch’obugonyi n’ech’okuyirha omuntu. Amango Daudi ahungama n’omurhima gwage goshi n’okuyemera amagosa mage, naye Yehova amubabalira loshi. (2 Sa. 12:9, 10, 13, 14) Nechi, rhwakachizera oku Yehova ali tayari kubabalira. Rhwabona ok’okuntu Yehova anababalira kurhaba kuguma n’oku abantu banababalira haba n’akatyu.

8. Nka gurhe obuhashe buminuzize Yehova agwerhe b’okucha enshinja bunamushunika ababalire?

⁸ Yehova ali “Muzuzi w’egulu lyoshi.” (Mwa. 18:25) Omuzuzi mwinja akwanene amenye bwinja amarhegeko. Yehova ali Muzuzi werhu, anamenyere bwinja amarhegeko bulala yenarhuha amarhegeko. (Isa. 33:22) Nta muntu n’omuguma omenyere ebinja n’ebibi kuguma n’oku Yehova ab’abimenyere. Bichi bindi omuzuzi mwinja ab’akenere? Akwanene kurhanga kuyunva bwinja-bwinja olushinja embere aluche. Che chirhumire Yehova ali Muzuzi mwinja bwenene bulala buli mango ab’amenyere olushinja bwinja-bwinja.

9. Myazi michi Yehova ab’amenyere embere arhole esimikiro ly’okubabalira omuntu changwa nanga?

⁹ Yehova yewe arhali kuguma n’abazuzi b’abantu bulala ab’amenyere bwinja-bwinja buli lushinja loshi luli embere zage. (Mwa. 18:20, 21; Zb. 90:8) Yewe aba ayinji binene kulusha eby‘omuntu akabona changwa kuyunva. Ab’amenyere bwinja-bwinja oku ebijiro by’omuntu binashunikwa n’engeso ashokolaga oku bazere bage, amasomo asomere, ah’alamire, changwa okuntu ali achiyunva n’obuhashe bwage b’obwenge. Na kandi, Yehova anasoma omu murhima. Yehova ab’amenyere bwinja-bwinja echarhumaga omuntu ajira chintu chilebe. Ntacho rhwakabisha Yehova. (Ebr. 4:13) Bobola, eyi Yehova ababalira omuntu anajira ntyo bulala ab’amenyere bwinja-bwinja ezola mpanvu zoshi.

10. Bulagurhe rhwakaderha oku buli mango Yehova anacha olushinja omu njira y’okunali enashinganene? (Kumbukumbu la Torati 32:4)

¹⁰ Buli mango Yehova anacha olushinja omu njira y’okunali enashinganene. Arhajira kabolo haba n’akatyu. Yehova arhababalira omuntu mpu bulala akwirire, ali muchire, ali w’akamaro changwa oku agwerhe obuhashe bunene bw’akaburhano. (1 Sa. 16:7; Yak. 2:1-4) Ntaye wakaseza Yehova mp’u ajire chintu chilebe changwa mpu amuhe ebituliro. (2 Ny. 19:7) Esimikiro zage zirhashunikwa habanakatyu n’okuntu agayisizwe changwa okuntu ali achiyunva. (Kut. 34:7) Nta ngangane, Yehova ali Muzuzi mwinja bwenene bulala ab’amenyere choshi oku birhulolere n’ehali yerhu.​—Osome Kumbukumbu la Torati 32:4.

11. Mu njira nchi okuntu Yehova anababalira kurhali kuguma n’okuntu abantu banababalira?

¹¹ Abandisi b’Amandiko me Chiebrania balirhegerere okuntu Yehova anababalira kurhaba kuguma n’okw’abantu. Baguma balikoleseze echinwa che Chiebrania ech’echitabu chiguma chaliderhere ko “chikolesezwe konyine omu kuyerekana okuntu Mungu anababalira abanya-byaha, n’echola chinwa chirhakoleswa haba n’akatyu omu kuyerekana  obubabale omuntu anayereka owabo bugwerhe emipaka.” Yehova yenyine yegwerhe obuhashe b’okubabalira loshi omunya-byaha wahungamire. Bichi binarhengerera amango Yehova amarhubabalira?

12-13. a) Bichi omuntu anagwarha amango Yehova amamubabalira? b) Enyungu z’obubabale bwa Yehova zinagenderera kuhika mangochi?

¹² Amango rhwamayemera oku Yehova arhubabalire, rhwagwarha “ebihe by’okurhuliriza,” biheberemo omurhula g’omu bwenge n’ezamiri zichere. Obubabale buli nk’obola burhakarhenga emw’abantu s’aliko bukwanene kurhenga emwa “Yehova yenyine.” (Mdo. 3:19) Amango Yehova amarhubabalira, anashuba galula obwira bwage haguma nerhu loshi, byanaba nka rhurhasaga kujira echaha haba n’akatyu.

¹³ Amango Yehova amarhubabalira, arharhubikira omujinya haba n’akatyu changwa kurhuha obuhane eju y’echola chaha rhwajiraga. (Isa. 43:25; Yer. 31:34) Yehova anahira ebyaha byerhu hale “nka kulala amazukiro m’ezuba maba hale n’amazikiro.” * (Zb. 103:12) Amango rhwamawaza kangana gurhe obubabale bwa Yehova buli bungana, rhwanayunva rhugwerhe eshukurani kuye n’okumukenga. (Zb. 130:4) Aliko si, bande Yehova anababalira?

14. Kugera ahala, bichi rhwayigire oku bilolere esimikiro ya Yehova y’okubabalira?

¹⁴ Nk’oku rhwabwene, amango Yehova amarhola esimikiro ly’okubabalira changwa nanga, arhalola akaba echaha chalikomere changwa nanga. Kandi, rhwayigire oku Yehova anakolesa obuhashe bwage yewe nka Mulemi werhu, oheba h’amarhegeko na Muzuzi werhu amango ali alola akaba ababalira muntu mulebe changwa nanga. Aliko si, bichi Yehova anarhanga lolerako embere arhole esimikiro ly’okubabalira changwa nanga?

15. Nk’oku Luka 12:47, 48 ederhere, bichi biguma Yehova anagererezako?

¹⁵ Chiguma Yehova anagerereza ko, kuli kumenya akaba owajiraga echaha alimenyere akaba aliri ajira echintu chibi. Yesu aliyerekene bwinja echola omu Luka 12:47, 48. (Osome.) Amango omuntu amapanga okujira echintu chibi chinagayisa Mungu anamenyere  oku chili chibi aliko anachijira, ahola eyi amajira echaha chikomere. Yehova akachishoga okurhababalira oyola muntu. (Mk. 3:29; Yoh. 9:41) Aliko rhukwanene rhuyemere oku mango maguma rhunaba rhumenyere oku ebi rhwajirire byaliri bibi. Ka rhwakalangalira oku Mungu arhubabalira? Nechi! N’echola chamarhugeza oku chindi chintu Yehova anagererezako.

16. Okuhungama byebichi, na bulagurhe kuli kw’akamaro akaba rhulonzeze kubabalirwa na Yehova?

¹⁶ Echindi chintu Yehova anagererezako kuli kumenya akaba omuntu wajirire echaha ahungamire eby’okuli. Okuhungama k’okuderha gurhe? Okuhungama kuli “kuhindamuka kw’amawazo m’omuntu, oborhere n’engeso n’emihigo yage.” Kandi kuheberemo okuchiganya bwenene n’okuyunva obabezwe bwenene n’ebintu bibi wajirire changwa oku bilolere okurhajira ebintu binja walikwanene kujira. Omuntu wahungamire ajira omugayo oku bilolere ebintu bibi ajirire bulala arhumire obwira bwage haguma na Yehova bwazamba n’echola chamushunika ajire ebyola bintu bibi. Oyibuke oku Omwami Manase na Daudi bombi balijirire ebyaha bikomere; aliko Yehova abababalira bulala balihungamire by’okuli. (1 Fa. 14:8) Yehova anarhubabalira konyine akaba rhwahungamire. Aliko rhukwanene kujira ebindi olekere okuyunva omugayo konyine oku bilolere ebyaha rhwajirire. Rhukwanene kuba tayari kujira echi rhwakola. * Echi chamarhuma rhwashuba kuhika oku chindi chintu Yehova anagererezako.

17. Okuchishubako k’okuderha gurhe, na bulagurhe bili by’akamaro akaba omuntu alonza kuyaka okushuba galukira ebyaha bya mira? (Isaya 55:7)

¹⁷ Okuchishubako chili chindi chintu ch’akamaro Yehova anagererezako. Okuchishubako kuli “kuhindamula okuntu rhwaliri rhwachigendesa.” Omu bindi binwa, omuntu akwanene kuleka kujira ebintu bibi n’okuhwanza kulama omu njira Yehova alonzeze abantu bage balame. (Osome Isaya 55:7.) Omuntu yenyine akwanene kuhindamula amawazo mage y’agala kuyerekezwa n’amawazo ma  Yehova. (Ro. 12:2; Efe. 4:23) Rhukwanene kuhigirira kulekana n’amawazo merhu mabi ma mira ebijiro byerhu. (Kol. 3:7-10) Nechi, kuli kugerera obwemere bwerhu rhugwerhe omu nterekero ya Yesu, byebyahaaga Yehova esimikiro y’okuli y’okurhuha obubabale n’okurhushuka kw’ebyaha byerhu. Yehova nj’arhubabalira kugerera eyola nchungu amango ali alola okuntu rhuli rhwajira okwerhu koshi rhugalire yi rhuhindamula ebijiro byerhu.​—1 Yo. 1:7.

18. Bichi rhwaganirireko oku bilolere obubabale bwa Yehova?

¹⁸ Rhugalukire oku bugeke oku mawazo m’akamaro rhwaganirireko. Kweri, Yehova ye muntu onababalira loshi omu mahanga moshi. Bulagurhe rhwakaderha ntyo? Ech’oburhanzi, buli mango aba tayari kubabalira. Echa kabiri, ab’arhumenyere bwinja-bwinja. Ab’amenyere buli chintu oku birhulolere, yewe yena muntu ob’amenyere bwinja akaba omuntu ahungamire eby’okuli. Echa kasharhu, eyi Yehova arhubabalira, anarhubabalira loshi n’embere zage, rhwanaba nka rhurhasaga jira echaha haba n’akatyu. Echola chinarhurhabala rhugwarhe ezamiri zichere n’okuyemerwa na Yehova.

19. Chiro akaba oku rhurhashinganene, rhwanagenderera kujira ebyaha, bulagurhe rhwakagwarha omwishingo?

¹⁹ Kweri, bulala rhuchili bantu barhashinganene, rhwagenderera kujira ebyaha. Aliko, rhwakagwarha echirhulirizo kugerera ebinwa bili omu chitabu Etude Perspicace des Ecritures, Volume 2, bukurasa 765, haderhere ntya: “Yehova ali wa lukogo anamenyere abakozi bage, oku bali bazamba, b’obola birhahemere bagenderere kugwarha omugayo amango moshi bulala barhashinganene banajira amagosa. (Zb. 103:8-14; 130:3) Nka balamire nk’okw’amakanuni ma Mungu maderhere, bakagwarha obusime. (Flp. 4:4-6; 1Yo. 3:19-22).” Ebyola binwa bihebere omurhima bwenene!

20. Bichi rhwaganirako omu mwazi gukulikire?

²⁰ Rhugwerhe eshukrani bulala Yehova ali tayari kurhubabalira amango rhwamababazwa kweri n’ebyaha rhwajirire. Nka gurhe rhwakayiganya obubabale bwa Yehova? Mu njira zihe obubabale bwerhu buli kuguma n’obubabale bwa Yehova, aliko ngahe bulekene? Bulagurhe okumenya ngahe bulekene kuli kw’akamaro bwenene? Omwazi gukulikireho gwashubiza kw’ebyola bibazo.