MWAZI G’OKUYIGA 4
OLWIMPO 18 Koko Okurhuhaanira Enchungu
Bichi Enchungu Erhuyigirize?
“Tala gurhe obuzigire bwa Mungu bwayerekenwe.”—1 YO. 4:9.
EBIRHWAYIGA
Rhwabona bichi olufu lwa Yesu lwakarhuyigiriza okubilolere engeso zinja bwenene Yehova na Yesu bayerekene.
1. Nyungu zihe rhunapata omu kuhika oku Lwibuko l’olufu lwa Kristu lwa buli mwaka?
YEHOVA arhuhere empano y’akachiro kanene bwenene amango arhuma Omugala afe eju y’abantu boshi! (2 Ko. 9:15) Bulala Yesu alifire eju yerhu, rhwakaba bera wa Yehova. Kandi rhwakapata obulangalire b’okulama esiku n’amango. Rhugwerhe mpanvu zinene z’okubwira Yehova koko warhuhere enchungu, bulala arhuzigire bwenene! (Ro. 5:8) Omu kurhurhabala rhugenderere kuyerekana eshukrani n’okurhayibirira haban’akatyu ebi Yehova na Yesu barhujirire, Yesu arhonderesa Olwibuko lwa buli mwaka l’olufu lwage.—Lu. 22:19, 20.
2. Bichi rhwaganirako mu gunola mwazi?
2 Gunola mwaka, Olwibuko lwaba Lweboso Siku 12, Mwezi gwa 4, 2025. Kweri rhweshi yi rhwachirheganya yi rhuluhikako. Omu mango m’Olwibuko, rhwayunguka bwenene rhukarhola akasanzi k’okukengera a oku bi Yehova n’Omugala barhujirire. Mu gunola mwazi, rhwaganira oku by’enchungu erhuyigirize okubilolere Yehova n’Omugala. Omwazi gwakulikiraho gwarhurhabala kuyunva gurhe rhwakayunguka n’enchungu, na gurhe rhwakayerekana eshukrani oku biyilolere.
BICHI ENCHUNGU ERHUYIGIRIZE OKUBILOLERE YEHOVA?
3. Gurhe olufu lwa muntu muguma lwakayokola amamiliyoni m’abantu? (Olole n’efoto.)
3 Enchungu erhuyigirize okubilolere ehaki ya Yehova. (Kum. 32:4) Amango Adamu afunda kukenga Mungu, aba munya-byaha, anafa. Bulala nerhu rhuli bana ba Adamu, rhuli banya-byaha rhunahikira chiro n’okufa. (Ro. 5:12) Yi rhurhenga omu buja bw’echaha n’olufu, Yehova arhuma Yesu ahane enchungu. Aliko gurhe enterekero ya muntu muguma mushinganyanya yayokwere amamiliyoni m’abantu? Entumwa Paulo aderhere ntya: “Kuguma n’okurhakenga kwa muntu muguma [Adamu] banene babere banya-byaha, ntyo kon’oko kugerera okukenga kwa muntu muguma [Yesu] banene nji baba banya-kunali.” (Ro. 5:19; 1 Ti. 2:6) Omu bindi binwa, haliri omuntu oshinganene wafundaga kukenga warhuhebaga omu buja bw’echaha n’olufu. Okubwindi, haba omuntu oshinganene onakengere arhukula m’obola buja.
Muntu muguma arhumire rhwaba omu buja bw’echaha n’olufu. Kon’okola muntu muguma arhukulire m’obola buja (Olole echifungo cha 3)
4. Bulagurhe Yehova arhayemereraga konyine oluburho lwa Adamu lwalimukengere lulame esiku n’amango?
4 Kweri si Yesu alikwanene kufa y’arhuyokola? Bulagurhe Yehova arhayemereraga konyine oluburho lwa Adamu lwalimukengere lulame esiku n’amango? Rhwabo nka bantu barhashinganene rhwakawaza okw’eyola yeyakabere njira nyinja y’okumala echola chibazo. Aliko okujira ntyo kurhakapatene n’ehaki ya Yehova eshiganene. Bulala Yehova aba Mungu w’ehaki, arhakayibirire haban’akatyu echijiro cha Adamu ch’okurhakenga.
5. Bulagurhe rhukwanene kuchizera oku buli mango Yehova ajira ebili binja?
5 Nka Yehova arhahanaga enchungu aliko anayemerera oluburho lwa Adamu lulame esiku n’amango chiro akaba oku lurhalishinganene, akabere ey’amayibirira amakanuni mage okubilolere echinja n’echibi. Okuntu byakajire byaba, abantu bakayubahire oku nj’ashuba kuyibirira amakanuni mage, ey’arhanachiyeneza eby’aderhere okw’ajira omu mango mayinjire. Abantu bakagwarha engangane oku Yehova arhakayeneza ebilagane byage byoshi si? Nta mpanvu rhugwerhe z’okuyubaha okw’ebyola nji byarhengerera. Bulagurhe? Bulala Yehova alijirire eby’ehaki chiro akaba ok’okujira ntyo kwalimuhemere ahane Omugala w’echinege. Bobola rhwakachizera oku buli mango ajira ebili binja.
6. Njira ehe nguma enchungu eyerekene obuzigire bwa Yehova? (1 Yohana 4:9, 10)
6 Obuzigire Yehova arhugwerheko y’eyindi ngeso ahanene yamushunikaga arhume Yesu afe eju yerhu. (Yoh. 3:16; osome 1 Yohana 4:9, 10.) Enyigirizo okubilolere enchungu ziyerekene oku Yehova arhalonzeze konyine rhupate akalamo k’esiku n’amango, s’aliko kandi alonzeze rhube chigabi ch’omulala gwage. Oyibuke okw’amango Adamu ajira echaha, Yehova amufukuza kurhenga omu mulala gw’abanamuharamya. N’okubyalijire byaba, rhweshi rhwaburhwa embuga y’omulala gwa Mungu. Aliko bulala enchungu yalipirwe, abantu boshi bagwerhe obwemere mu Mungu banamukengere, hagera amango bashuba kugaluka omu mulala gwage. Chiro na zene rhwakagwarha obwira bukomere haguma na Yehova na haguma na bene-berhu na bali-berhu. Kweri Yehova aba arhuzigire!—Ro. 5:10, 11.
7. Gurhe okuntu Yesu alibukaga kurhurhabere kumenya kangana gurhe Yehova arhuzigire?
7 Rhwakayunva bwinja bwinja gurhe Yehova arhuzigire amango rhwamakengera kangana gurhe byalimubabeze amango abona Omugala y’alibuka. Shetani anaderha oku nta mukozi wa Mungu wakagenderera kuyorha mwimana kuye amango bimukomerere kujira ntyo. Omu kuyerekana oku Shetani ali mubeshi, Yehova aleka Omugala alibuke embere afe. (Yob. 2:1-5; 1 Pe. 2:21) Yehova aliri abona gurhe abapinzani b’amadini yi basuzagura Yesu, gurhe abasoda yibamukobola n’okumumanika oku murhi. Naho Yehova abona gurhe Omugala muzigirwa afa enyuma y’okulibuka bwenene. (Mt. 27:28-31, 39) Yehova aligwerhe obuhashe b’okubuza ebyola byoshi bimenye byahikira Omugala. Omufano, amango abanzi bage baderha ntya: “Leka [Mungu] aje amuyokola akaba amuzigire,” kweri ntyo ku Yehova akanajirire. (Mt. 27:42, 43) Aliko nka Mungu ajiraga ntyo, Yesu arhakachigalire kuhana akalamo kage nka nchungu, rhurhakanachigwarhire n’obulangalire. Bobola Yehova alilekere Omugala alembere amalibuko kugera ah’afiraga.
8. Yehova aliyunvirhe amalumwa amango aliri abona Omugala y’alibuka si? Fasiriya. (Olole n’efoto.)
8 Rhurhakwanene kuwaza oku bulala Mungu ali mugala-byoshi, arhakachiyunva kuntu kulebe! Yehova arhulemere oku shusho lyage, arhuhereza obuhashe b’okuchiyunva kuntu kulebe, k’okuderha oku naye ajira obola buhashe. Ebiblia ederhere okw’anachiyunva “ababere n’okugayiswa.” (Zb. 78:40, 41) Rhuganire oku mufano gwa Abrahamu na Isaka. Oyibuke oku Yehova alibwirire Abrahamu ahane omugala w’echinege nka nterekero. (Mwa. 22:9-12; Ebr. 11:17-19) Waza oku mugayo na mulago gungana gurhe Abrahamu aligwerhe amango aliri hofi kuyirha omugala. Ba nka wawaza kangana gurhe Yehova alichiyunvirhe kubi n’okugwarha omugayo gunene amango abona gurhe abantu yi balibuza Omugala n’okumuyirha!—Olole oku jw.org evideo Imitez leur foi: Abraham, Partie 2 (Oyiganye Obwemere Bwabo—Abrahamu Echigabi cha 2).
Yehova aliyunvirhe amalumwa amango aliri abona gurhe Omugala y’alibuka (Olole echifungo cha 8)
9. Nka gurhe olwandiko lwa Waroma 8:32, 38, 39 lukurhabere kubona kangana gurhe Yehova akuzigire woyo na bene-benyu na bali-benyu?
9 Enchungu erhuyigirize oku nta muntu n’omuguma orhuzigire bwenene kulusha Yehova, chiro n’omuntu w’omulala, changwa n’omwira mwinja. (Osome Waroma 8:32, 38, 39.) Kweri rhwakachizera loshi oku Yehova aba arhuzigire bwenene kulusha n’okuntu rhuba rhuchizigire. Olonzeze kulama esiku n’amango si? Yehova yelonzeze olame esiku n’amango kukulusha. Olonzeze ebyaha byawe bibabalirwe si? Yehova yelonzeze ntyo bwenene kukulusha. Byoshi arhuhemere rhujire kuli kuyerekana eshukrani oku mpano nyinja y’enchungu, rhugwarhe obwemere muye, rhunamukenge. Kweri enchungu erhuyerekere bwinja bwinja kangana gurhe Yehova arhuzigire. Chiro n’omu gulu lihyahya nji rhwayiga okubilolere obuzigire bwa Yehova.—Muh. 3:11.
EBY’ENCHUNGU ERHUYIGIRIZE OKUBILOLERE YESU
10. a) Bichi byarhumaga Yesu ayunva omulago okubilolere olufu lwage? b) Mu njira zihe Yesu aliyerekene oku Yehova ali muntu w’ehaki? (Olole n’echisanduku “ Enterekero ya Yesu Yaliyerekene oku Yehova Ali w’Ehaki.”)
10 Yesu analaga bwenene okubilolere erenge ly’Eshe. (Yoh. 14:31) Yesu aliyunvirhe mulago gunene bwenene eju abantu bakawazize kubi okubilolere Eshe, bulala akafire nka muntu wadukangire Mungu na nyankola maligo. Echola checharhumaga asalira ntya: “Darha akaba byakashobokana ogeze echi chikombe hale nani.” (Mt. 26:39) Aliko bulala Yesu aliyorhere mwimana ku Yehova kuhika oku lufu lwage, aliyerekene bwinja bwinja okw’ebi Shetani aderhaga okubilolere Eshe byaliri by’obubeshi.
11. Gurhe Yesu aliyerekene okw’alizigire abantu bwenene? (Yohana 13:1)
11 Kandi enchungu erhuyigirize oku Yesu analaga bwenene oku bantu, ahanene abanafunzi bage. (Mez. 8:31; osome Yohana 13:1.) Omufano, Yesu alimenyere oku hali bintu biguma byakamukomerere kujira amango m’akasi kage k’okuhubiri oku gulu, ahanene okulibuka bwenene embere afe. Aliko Yesu alijirire ebyola bintu byoshi bikomere, arhali mpu bulala Yehova alimubwirire ajire ntyo s’aliko ahanene bulala alizigire abantu. Yesu aliyerekere abantu buzigire bunene omu kubahubiri, okubayigiriza n’okubarhabala. Chiro n’olusiku l’olufu lwage, Yesu alirholere akasanzi k’okuyigiriza entumwa zage, okubaheba omurhima n’okubarhuliriza. (Yoh. 13:12-15) Chiro n’amango aligwerhe malumwa manene ey’ali hofi kufa oku murhi gw’amalibuko, Yesu aha nyankola-maligo waliri haguma naye, obulangalire omu kumubwira okw’akabere haguma naye omu paradizo, n’okuyerekana okwalagire kunyina omu kubwira Yohana amushishikale. (Lu. 23:42, 43; Yoh. 19:26, 27) Bobola Yesu aliyerekere abantu buzigire bunene arhali omu kubafira konyine s’aliko n’omukuntu aliri abakolera oku buzigire n’oku bwinja.
12. Bichi Yesu y’arhujirira zene?
12 Chiro akaba oku Yesu alihanire akalamo kage “liguma na liguma amango moshi,” achigenderere kurhujirira bintu binene. (Ro. 6:10) Bintu bihe ebyola? Agenderere kukola y’arhuhereza bintu binene binja bwenene rhwakapata kugerera enchungu. Lola eby’ali akola. Yakola nka Mwami werhu, Mudahwa werhu Mukulu, na rhwe ly’echibaga. (1 Ko. 15:25; Efe. 5:23; Ebr. 2:17) Ayumangire akasi k’okugusha abashigwa n’echigusho chinene, akola kasi nji kahwa embere amalibuko makulu mahwe. b (Mt. 25:32; Mk. 13:27) Kandi y’arhabala omuja mwimana onakengukire y’agenderera kurhuhereza ebirhulagirire yi rhukolera Yehova oku bwimana mu zinola siku z’obuzinda. (Mt. 24:45) N’omu mango m’Oburhegesi bwage bwa myaka Chihumbi, nj’agenderera kurhuhereza ebirhukenere. Kweri Yehova ahanire Omugala eju yerhu!
OGENDERERE KUYIGA EBINTU BIHYAHYA
13. Gurhe okukengera kwakurhabala ogenderere kuyiga okubilolere obuzigire Mungu na Kristu barhugwerheko?
13 Wakagenderera kuyiga okubilolere obuzigire Yehova Mungu na Yesu Kristu barhugwerheko nk’ogenderere kukengera oku bibakujirire. Nkabaga omu mango m’Olwibuko lwa guno mwaka, wakasoma bwinja bwinja chiguma changwa ebitabu byoshi bye Enjili. Orhalonzaga kusoma sura zinene oku liguma. Ahali h’okujira ntyo, osome kubuyabuya yobona ezindi mpanvu zirhumire rhukwanene kuzigira Yehova na Yesu. Onaganire haguma n’abandi oku bintu bihyahya wa bwenene amango m’obusomi bwawe.
14. Gurhe okulonza emyazi kwakarhurhabala rhugenderere kuyiga binene okubilolere enchungu n’ezindi nyigirizo? (Zaburi 119:97) (Olole n’efoto.)
14 Akaba wamamala myaka minene omu kuli, nkabaga wakachibaza akaba hachili ebindi bintu bihyahya wakayiga okubilolere ehaki ya Mungu, obuzigire bwage n’enchungu. Kweri buli mango rhwagwarha ebintu bihyahya by’okuyiga okubilolere eyola myazi. Bobola bichi okwanene kujira? Osome n’okuyiga emyazi esimisize eli omu bitabu byerhu eyumangire oku Biblia. Amango wamasoma chintu chilebe omu Biblia orhayunvirhe bwinja, olonze emyazi omu bitabu byerhu. Naho omu lusiku loshi okengere oku biwavulwire n’ebi bikuyigirize okubilolere Yehova, Omugala, n’okuntu bakuzigire.—Osome Zaburi 119:97 n’amahugulo m’eshishi.
Chiro akaba oku rhwamamala myaka minene omu kuli, rhwakayongera eshukrani yerhu oku nchungu (Olole echifungo che 14)
15. Bulagurhe rhukwanene kugenderera kulonza obuchire b’omu Chinwa cha Mungu?
15 Orhavunikaga omurhima akaba orhabwene chintu chilebe chihyahya changwa chisimisize buli mango oli wasoma changwa yi walonza emyazi omu bitabu byerhu. Ochibone nka muntu oli walonza e oro. Ahanene omuntu oli walonza e oro akwanene kugeza esa zinene changwa siku zinene ey’ali akola embere apate hi oro hityuli. Aliko anagenderera bulala amenyere oku chiro apata hi oro hingana gurhe hili hy’akamaro bwenene. Ebintu bihyahya rhunayiga omu Bibila, bili by’akamaro bwenene kulusha e oro! (Zb. 119:127; Mez. 8:10) Bobola obe muntu w’okulindira onakenge eprograme yawe y’okusoma Ebiblia.—Zb. 1:2.
16. Gurhe rhwakayiganya Yehova na Yesu?
16 Amango oli wayiga, owaze oku kuntu wakakolesa omu kalamo kawe ebi wayigire. Omufano, oyige ehaki ya Yehova omu kukolera abandi buzira kabolo. Oyiganye obuzigire bwa Yesu kw’Eshe n’oku bandi omu kuyemera walibuka eju y’ezino lya Yehova, n’okuchihana oku nyungu za bene-benyu na bali-benyu b’Abakristu. Kandi oyiganye Yesu omu kuhubiri abandi yi nabo bapata orozo l’okumenya ebintu bisomeze Yehova ajirire abantu, bayerekane n’obwemere omu nchungu.
17. Bichi rhwayiga omu mwazi gukulikireho?
17 Oku rhunali rhwayiga n’okusimiswa n’enchungu, kurhwanazigira bwenene Yehova n’Omugala. Na bulala rhuzigirebo bwenene nabo baja barhuzigira bwenene bwenene. (Yoh. 14:21; Yak. 4:8) Rhugenderere kukolesa bwinja buli chintu Yehova arhuhere omu kugenderera kuyiga okubilolere enchungu. Omu mwazi gukulikireho rhwayiga mu njira zihe rhwakayunguka n’enchungu na nka gurhe rhwakayerakana eshukrani oku buzigire bwa Yehova.
OLWIMPO 107 Rhuyiganye Obuzigire bwa Mungu
a AMAFASIRIYO M’EBINWA: “Okukengera” kuli kuwaza bwenene okubilolere mwazi gulebe, n’okuyiga binene okubigulolere yi rhuguyunva bwinja bwinja.
b Okugusha “ebintu bili embingu” Paulo ayerekene omu Waefeso 1:10, kurhali kuguma n’okugusha “abachishogerwe” Yesu ashambalagako omu Matayo 24:31 n’omu Marko 13:27. Paulo ali aganira okubilolere akasanzi Yehova anachishoga abagala b’ekiroho omu kubashiga amavurha kugerera eroho lichesibwa. Yesu ali aderha okubilolere akasanzi abashigwa bayorhere nji bagushwa embingu amango m’amalibuko makulu.
