1. Chibazo chihe rhweshi yi rhwahurana?

 BULI lusiku, birhuhemere okurhola esimikiro. Ziguma zakaba ziyorohere kurhola, omufano nka bichi rhwayukula changwa mangochi rhukwanene kuja kulyama. Hali ezindi simikiro ziba zikomere bwenene kurhola. Ezola simikiro nkabaga zakahuma oku magala merhu, obusime bwerhu, abazigirwa berhu n’obuharamye bwerhu. Rhulonzeze esimikiro zerhu zirhulerhere enyungu n’abantu b’omulala gwerhu. N’ech’akamaro bwenene, rhuchizerere okw’esimikiro zerhu zasimisa Yehova.​—Ro. 12:1, 2.

 2. Bichi wakajira y’orhola esimikiro z’obwengehe?

² Akaba olonzeze kurhola esimikiro y’obwengehe bikuhemere 1) omenye obukweri bw’ebintu, 2) olonze amawazo ma Yehova okubilolere esimikiro oli walonza kurhola, na 3) okengere bwenene okubilolere ebyoli walonza kuchishoga. Gunola mwazi gwaganira kw’ebyola bintu bisharhu rhukwanene kujira, kandi gwarhurhabala kulola gurhe rhwakakoomeza obuhashe bwerhu b’obwirhegerezi.​—Mez. 2:11.

OMENYE OBUKWERI BW’EBINTU

 3. Bulagurhe rhukwanene kurhanga kumenya obukweri bw’ebintu embere y’okurhola esimikiro? Lerha omufano.

³ Echintu ch’oburhanzi chakarhurhabala kurhola esimikiro nyinja, kuli kurhanga kumenya obukweri bw’ebintu. Bulagurhe okujira ntyo kuli kw’akamaro? Waza ok’omuntu ogwerhe echibazo chikomere ch’amagala amaja kubonana na dogutere. Ka dogutere akarhola esimikiro okubilolere amafumu aha oyola mulwala buzira kurhanga kumusuzuma changwa kumubaza bibazo bilebe? Nanga berhu we! Nawe wakarhola esimikiro zinja nk’orhangire kuwaza bwinja bwinja okubilolere obukweri bw’ebintu bupatene n’ehali yawe. Gurhe wakajira ntyo?

 4. Nk’ok’olwandiko lwa Mezali 18:13 luderhere, bichi wakajira y’ochizera oku warhegerere obukweri bw’ebintu? (Olole n’efoto.)

 ⁴ Wakarhegera obukweri bw’ebintu ahanene amango oli wabaza ebibazo. Omufano, waza bamakuhamagala oje kuchisimisa haguma n’abandi. Okwanene kujayo si? Akaba orhamenyene bwinja n’omuntu obahamagere changwa okuntu ebintu bipangirwe, byakakuhema omubaze ebibazo bili nk’ebila: “Ngahe na mangochi rhwabuganana? Rhwaba bantu bangana gurhe eyola munda? Inde wayumangira ebintu n’okuchizera oku buli chintu choshi chagenda bwinja? Bande rhwaba haguma nabo? Bichi birheganyizwe abantu bajira kw’eyola mbuganano? Ka nji haba amavu?” Ebishubizo by’ebyola bibazo byakurhabala orhole esimikiro y’obwengehe.​—Osome Mezali 18:13.

 5. Bichi okwanene kujira amango wamarhegera obukweri bw’ebintu?

⁵ Amango wamarhegera obukweri bw’ebintu, okengere bwinja bwinja okubilolere obola bukweri. Omufano, gurhe byakaba nka wamarhegera okw’abantu barhakenga amakanuni me Biblia bahika kw’eyola mbuganano changwa abantu bachinywera amavu nk’okubashondere? Obwene okw’eyola mbuganano yakahindamuka n’okuba fete y’obudambi si? (1 Pe. 4:3) Okubwindi, gurhe byakaba nk’eyola mbuganano yajirwa omukasanzi onaja okumbuganano z’echibaga changwa omu kasi k’amahubiri? Amango wamawaza oku bukweri  bw’ebintu byoshi okubilolere eyola mbuganano, echola chakurhabala orhole esimikiro nyinja. Aliko hachili echindi chintu okw’anene kujira. Omenyere okuntu oli wabona eyola hali, aliko okwanene kuchibaza ntya, gurhe Yehova yewe yayibona?​—Mez. 2:6.

OLONZE AMAWAZO MA YEHOVA

 6. Nk’ok’olwandiko lwa Yakobo 1:5 luyerekene, bulagurhe rhukwanene kuhema Yehova oburhabale omu sala?

⁶ Oheme Yehova akurhabale orhegere amawazo mage. Yehova arhulaganyize okw’arhuhereza obwengehe yi rhugala kurhegera akaba simikiro ndebe y’amusimisa. Obwengehe buli nk’obola “anabuhereza buli yeshi n’omurhima goshi buzira kuderha derha omuntu.”​—Osome Yakobo 1:5.

 7. Gurhe wakarhegera amawazo ma Yehova okubilolere chintu chilebe? Lerha omufano.

⁷ Amango wamamala kusalira Yehova y’akuhereza obwerekezi, obe merangwe okubilolere echishubizo akuhereza. Rhurhole omufano: Rhuderhe oku wamahera amango oli wabalama, wakahema oburhabale oku muntu olamire mw’eyola eneo. Aliko si wakagenderera n’olugenzi lwawe n’obo arhaza kukushubiza? Nanga chiro. Wayunviriza bwinja bwinja obwerekezi akuhuhereza. Intyo kon’oko, amango wamamala kuhema Yehova akuhe obwengehe, ochihangane kurhegera echishubizo chage omu kulonza esheriya n’amakanuni me Biblia mapatene n’ehali yawe. Omufano, amango oli wachishoga akaba waja oku mbuganano y’okuchisimisa rhwabaga rhwashambereko embere,  okwanene kurhegera bichi Ebiblia ederhere okubilolere efete z’obudambi, abera babi, n’akamaro k’okuheba enyungu z’Obwami oku nafasi y’oburhanzi ahali h’eby’osimire woyo wenyine.​—Mt. 6:33; Ro. 13:13; 1 Ko. 15:33.

 8. Gurhe wakajira akaba okenere oburhabale y’opata emyazi oli walonza? (Olole n’efoto.)

⁸ Mango maguma wakaba okenere oburhabale y’opata emyazi oli walonza. Wakahema ehano ku mwene-werhu changwa mwali-werhu wagerere mu binene. Aliko kandi wayunguka bwenene nka wamachilonzeza emyazi woyo wenyine. Hali eyindi myazi minene omu bikoleso byerhu by’okulonza emyazi, nka Musaada Wakutafuta Habari Kwajili ya Mashahidi wa Yehova (Oburhabale oku Bahamirizi ba Yehova b’Okulonza Emyazi) na Maandiko ya Kutusaidia mu Maisha ya Kikristu (Amandiko m’Okurhurhabala omu Kalamo k’Echikristu). Oyibuke ok’omuhigo gwawe kuli kurhola esimikiro yasimisa Yehova.

 9. Gurhe rhwakachizera okw’esimikiro yerhu yasimisa Yehova? (Waefeso 5:17)

⁹ Gurhe rhwakachizera okw’esimikiro yerhu yasimisa Yehova? Ech’akamaro bwenene mu byoshi, birhuhemere rhurhange rhumumenye bwinja. Ebiblia ederhere ntya: “Okumenya Oli Muchesibwa bwenene buli bwenge.” (Mez. 9:10) Kweri obumenyi b’okuli burhengene n’okumenya engeso za Yehova, omuhigo gwage, ebyasima n’ebyashomba. Ochibaze ntya: ‘Okubilolere ebimenyere eju ya Yehova, simikiro ehe nakarhola yamusimisa?’​—Osome Waefeso 5:17.

10. Bulagurhe amakanuni me Biblia mali m’akamaro bwenene kulusha emicho n’emigenzo y’omulala?

¹⁰ Yi rhugala kusimisa Yehova, mango maguma byarhuhema rhujire chintu chilebe chagayisa abaturanyi, abera n’abantu b’omulala gwerhu. Omufano, bazere baguma bakaseza omunyere wabo ashabwe n’omuntu ogwerhe efuranga changwa wabaha shigi linene chiro akaba arhagwerhe ehali nyinja y’ekirho. Amawazo mabo marhali mabi, kweri balonzeze omunyere wabo agwarhe ebintu by’omubiri by’okumurhabala. Aliko inde wamurhabala abe muntu ogwerhe amajambere m’ekiroho? Gurhe Yehova anabona eyola hali? Rhwakabona echishubizo omu lwandiko lwa Matayo 6:33. Ahola Abakristu bahemerwe kugenderera “kurhanga kulonza Obwami.” Chiro akaba rhunakenga abazere berhu n’okukenga abantu barhuzungulukire, ech’akamaro bwenene ku rhwabo kuli kusimisa Yehova.

OKENGERE BWENENE OKUBIWACHISHOGA

11. Ngeso ehe eganirirwe omu Wafilipi 1:9, 10 yakakurhabala okengere bwenene okubiwachishoga?

¹¹ Enyuma y’okupata amakanuni me Biblia maderhere okubilolere esimikiro yawe, okwanene kuwaza bwinja bwinja okubiwachishoga. (Osome Wafilipi 1:9, 10.) Engeso y’obwirhegerezi y’akurhabala owaze bichi byakarhengerera mu buli choshi wachishogere. Mango maguma byakaba birhakomere okurhola esimikiro. Aliko arhali buli simikiro yi wakarhola juba juba. Obwirhegerezi bwakurhabala kurhola esimiro z’obwengehe chiro n’amango oli omuhali zikomere.

12-13. Gurhe obwirhegerezi bwakakurhabala kurhola esimikiro y’obwengehe okubilolere akasi k’omubiri?

¹² Rhuganire kw’eyila hali. Yiwalonza akasi y’oshishikala omulala gwawe. Wanapata rhwasi rhubiri. Wanawaza okubilolere orhola rhwasi, rhuli rhwasi nyabachi, eprograme y’orhola rhwasi, ebisanzi byalema byakuhema y’ohika k’orhola rhwasi, n’ebindi n’ebindi. Amola makasi m’ombi Abakristu bakamakola, nkabaga wanachishoga kasi kaguma bulala osimire okuntu kali changwa bakulipa furanga zinene. Hali ebindi bintu okwanene kuwazako embere y’okurhola esimikiro.

¹³ Omufano, eprograme y’akasi egongene n’eprograme y’embuganano y’echibaga  chenyu si? Eprograme yawe y’akasi egongene n’akasanzi okwanene kurhabala m’omulala gwawe guchiyunve guli omu bulanzi, guzigirwe, gunali hofi na Yehova si? Okuchibaza ebyola bibazo kwakurhabala “omenye bihe by’eby’akamaro bwenene,” k’okuderha, obuharamye bwawe n’eby’omulala gwawe gukenere kulusha okulonza efuranga zinene. Naho wakarhola esimikiro Yehova agisha.

14. Gurhe okukolesa obwirhegerezi n’okuyerekana obuzigire kwarhurhabala rhumenye rhwasirhaza abandi?

¹⁴ Kandi obwirhegerezi bwakarhuma rhwawaza okubilolere okuntu esimikiro rhwarholere yakahuma oku bandi bantu na ntyo yanarhuma “rhurhasirhaza abandi.” (Flp. 1:10) Echola chili ch’akamaro bwenene amango oli warhola esimikiro zikulolere woyo wenyine okubilolere okuyambala n’okuchipamba. Omufano, rhwakachishoga kuyambala n’okuchipamba nk’okurhulonzeze. Gurhe si akaba byakasirhaza abali omu chibaga changwa abali embuga w’echibaga? Obwirhegerezi bwarhurhabala rhukenge amawazo m’abandi. Obuzigire bwarhushunika rhuhebe enyungu “z’owindi embere” rhunagwarhe  olugero. (1 Ko. 10:23, 24, 32; 1 Ti. 2:9, 10) Naho rhwakaja rhwarhola esimikiro eyerekene oku rhuzigire, rhunakengere abandi.

15. Bichi okwanene kuwazako mbere y’okurhola esimikiro y’akamaro?

¹⁵ Akaba oli warhola esimikiro y’akamaro owaze okubilolere engaruka zayo. Yesu arhuyigirize oku “rhuganje edepanse.” (Lu. 14:28) Bobola olole ebisanzi bingana gurhe, efuranga n’emisi byakuhema y’esimikiro yawe eyenera. Mu hali ziguma wakaganira n’abantu b’omulala gwawe y’omenya bichi buli muguma akwanene kujira yashigikira eyola simikiro. Bulagurhe okuchirheganya ntyo kuli kwinja? Echola chakakurhabala orhegere akaba esimikiro yawe yakahindamulwako bugeke changwa akaba wakaleka eyola simikiro orhole eyindi. N’akaba wayemerere abantu b’omulala gwawe bakurhabale n’okuyunviriza amawazo mabo, baba tayari kukurhabala y’orhola esimikiro y’alerha amalehe menja.​—Mez. 15:22.

ORHOLE ESIMIKIRO Y’ALERHA AMALEHE MENJA

16. Bichi byakakurhabala kurhola esimikiro yalerha amalehe menja? (Olole echisanduku “ Okuntu Rhwakarhola Esimikiro z’Obwengehe.”)

¹⁶ Akaba wamalire kukulikira byoshi rhwaganirireko, waba tayari kurhola esimikiro y’obwengehe. Wapatire byoshi okenere, wasuzumire n’amakanuni makurhabala orhole esimikiro esimisize Yehova. Naho wakaja wabwira Yehova akurhabale esimikiro yawe elerhe amalehe menja.

17. Bintu bihe by’akamaro byakurhabala kurhola esimikiro zinja?

¹⁷ Chiro akaba oku walirholere esimikiro zinene omu mango magerere zalerha enyungu, oyibuke okw’ech’akamaro y’orhola esimikiro zinja, kurhali kulangalira obwenge bwawe, changwa ebi wagereremo, s’aliko obwengehe burhengere emwa Yehova. (Mez. 2:1-5) Yehova yenyine yewakakuhereza obumenyi b’okuli, obwenge, n’obwirhegerezi. Ebyola byoshi bili bigabi by’akamaro by’obwengehe. Yehova akakurhabala orhole esimikiro zamusimisa.​—Zb. 23:2, 3.