Bene-berhu b’oku Beteli balichubwise omwaka eyi bali bashimika e radiyo lya WBBR oku chizimba che Staten, omu Vile ye New York. Bamalire kukwiza ekiwanja, bayumbaka h’enju nzibu-zibu y’okukoleramo n’eyindi eburhambi y’okubika mw’ebintu by’akasi. Amango bamala akola kasi, bene-berhu bagusha haguma ebikoleso bakakenera yi barhonderesa “e radiyo.” Aliko baligwerhe bibazo binene balikwanene kurhanga kumala.

Byalikomere bwenene kuyumbaka e antene ntanzi y’eradiyo. Eyola antene yaligwerhe obule bwa metre 91, yalikwanene kuhebwa ahagarhi-garhi ka mirhi ebiri ya metre 61 y’obule ku buli murhi. E antene y’oburhanzi bakolaga yalibagambire. Buzinda bene-berhu bagala kuyikola bwinja bulala balilangalire oburhabale bwa Yehova. Mwene-werhu Calvin Prosser, wakolaga kw’akola kasi k’okuyumbaka e antene y’oburhanzi aderhere ntya: “Nka rhwagalaga kukola bwinja eyola antene oku turu y’oburhanzi, rhwakachibandire omu chifuba oku bi rhwajirire!” S’aliko bene-berhu balihere Yehova erenge bulala alibarhabere. Aliko balichigwerhe echindi chibazo.

Elyola radiyo ly’okumenyesa emyazi lyali chili lihyahya lirhaliza kulegama lishimikirwe, birhanaliyorohere kugula ebikoleso byoshi byalibikenerwe yi bamala kuliyumbaka. Haliri muntu mulebe waligwerhe enju n’ebikoleso byali byakolere hofi nahola, bene-berhu bava babigula. Ahali bagule emikro, bakolesa etelefone. Budufu buguma omu Mwezi gwa kabiri, bene-berhu baderha oku bapime ebyola bikoleso birhaliri bya beyi linene. Muguma mw’abola bene-berhu yekala Ernest Lowe aderhere biguma mw’eyola ngani eshekeseze oku bilolere ebyarhengereraga olola lusiku. Amango baliri bayimpa, bayunva  Omuzuzi Rutherford b abahamagala oku tetefone, eyi amabayunva bali bayimpa kugerera e radiyo lyage, ey’ali e Brooklyn oku bilometre hofi 25.

Mwene-werhu Rutherford ababwira “Mupunguze kw’eyola volime elugire. Emilenge egwerhe olwamo!” Bene-berhu bayunva bakozezwe eshoni n’aho han’aho baleka kuyimpa, aliko bamenya oku e radiyo lyabo lili lyakola, naho babona oku bakala bakahwanza kuyeneza emyazi.

Omu Siku 24, Mwezi gwa 2, mwaka gwa 1924, amango bajira amatangazo m’oburhanzi mayemererwe n’esheriya, Mwene-werhu Rutherford aliderhere okw’eradiyo lya WBBR lyakakolesezwe omu kukola akasi Omwami Kristu alibahere. Aliderhere ok’omuhigo gw’elyola radiyo gwaliri “g’okurhabala abantu bapate omwangaza gwe Biblia, buzira kushiba balaga oku bwemere bw’abantu, changwa emicho yabo “n’okurhabala abantu boshi bayunve Ebiblia n’echihe ch’akamaro rhulamiremo.”

Eyola turu y’oburhanzi rhwakolesaga eyo njira y’okumenyesa emyazi yalilerhere malehe manene. Myaka 33 yakulikiragaho, eradio WBBR lyaba eyi ly’eradio likulu olubaga lwa Yehova lwaliri lwakolesa omu kumenyesa emyazi.

Omu Mwezi gwa 7, mwaka gwa 1924, Abanafunzi be Biblia bakola embuganano nkulu omu Columbus, Ohio. Abanafunzi be Biblia bali rhengere eyi n’eyi omu gulu lyoshi, n’amajambo maliri magera omu lulimi lw’Echiharabu, Echingereza, Echifaransa, Echijermani, Echigiriki, Echihongri, Echiitali, Echilituaniya, Echipolonye, Echirusiya, endimi z’Echiskandinaviya, n’Echiukraine. Abantu bakayunvirhe majambo maguma-maguma oku radiyo na bene-berhu bahema Journaliste wa mw’eyola eneo aleme ayandika buli lusiku emyazi y’aderherwe oku programe y’eyola mbuganano.

Lwakane Siku 24, Mwezi gwa 7, bene-berhu na bali-berhu barhalukire 5 000 balijire omu kasi k’okuhubiri omu vile bajiriragamo eyola mbuganano. Balihaanire hofi bitabu 30 000 banarhonderesa ebihumbi by’amafunzo me Biblia. Omunara g’Omulanzi gwaliyirikire olala lusiku “chigabi chisimisize bwenene ch’eyola mbuganano nkulu.”

Lwakarhano Siku 25, Mwezi gwa 7, amango Mwene-werhu Rutherford aliri ageza ejambo, asoma n’obushiru amaruba m’okusidaka abakulu b’amadini. Aliderhere okw’abarhegesi be politike, abakulu b’amadini, n’abachuruzi, baliri babuza abantu  kuyiga obukweri okubilolere Obwami bwa Mungu, nobo bu Mungu nj’akolesa omu kugisha abantu boshi. Analishubire kuderha okw’abola bantu baliri babi bulala balishigikire Obuguma bw’Amashanja, banayerekana okw’eyola eli njira ya Mungu y’okurhegeka egulu. Abanafunzi be Biblia balikenere kugwarha obushiru yi bahubiri obola burhumwa oku bantu.

Buzinda, mwazi muguma g’Omunara g’Omulanzi gwaliderhere okw’eyola Mbuganano Nkulu ye Columbus yalikomeze obwemere bw’echola chigusho chigeke cha bene-berhu na bali-berhu b’abahubiri bagwerhe obushiru. Echola chalibahere obushiru b’okuhubiri chiro akaba haliri obupinzani. Leo Claus, wahikaga kw’eyola mbuganano ayibukire ntya: “Amango rhumala eyola mbuganano, rhwalichiyunvirhe rhugwerhe obusime b’okuhaana obola burhumwa omu eneo yerhu.”

Omu Mwezi gwe 10, Abanafunzi be Biblia barhondera kugaba amakopi m’amatragte maliri m’oburhumwa Mwene-werhu Rutherford asomaga eju y’abakulu b’amadini. Omu États-Unis omu vile ngeke ye Oklahoma, Frank Johnson aba ey’amamala kugaba amatragte minuti 20 embere ababo bahubiri bamubugane. Kurhakabere kwinja okulingira ababo Banafunzi be Biblia ahola, bulala abantu ba mw’eyola vile barhalisimire akasi kage k’okuhubiri, banaliri bamulonza, n’ahola bakamubwene juba juba. Mwene-werhu Johnson achibisha omu kanisa kaliri hofi naye. Nta muntu waliri mw’akola kanisa, naho aleka amatragte omu Biblia enakoleswa n’abanayigiriza mw’akola kanisa na ku buli chichumbi. Alijirire ebyola juba juba. Bulala aliyorhene bindi bisanzi bigeke, aja omu mandi makanisa mabiri ajira okola kon’oko.

Frank alibirhira ahantu alikwanene kubuganana na bene-berhu. Achibisha enyuma w’estasiyo banaguziza mw’esanse ey’anali aneeka abalume baliri bamuhiga. Abola balume bagera omu mutugari, aliko barhamubonaga. Bamalire kugenda ntya, bene-berhu na bali-berhu, aba Frank aliri alindira baliri bahubiri hofi n’ahola, bahika ah’aliri bamurhola baja omu mutugari bagenda.

Muguma mu bene-berhu aderha ntya “Amango rhwaliri rhwarhenga mw’eyola vile, rhwagerere ku makanisa masharhu. Haliri hofi bantu 50 baliyumangire embere wa buli kanisa. Bantu baguma baliri basoma amatragte, abandi baliri bayereka onabayigiriza omu dini lyabo etragte. Rhwagenda aho han’aho yi rhuyaka echibazo choshi choshi! Aliko rhwalibwirire Yehova Mungu werhu koko oku bulanzi bwage, n’obumenyi arhuhere yi rhugala kuyaka abola banzi b’Obwami.”

Abanafunzi be Biblia b’omu bindi bihugo, baligenderere kuhubiri n’obwizere. Omu noro ye France, Józef Krett aliri ahubiri abana bali omu myaka y’olubiruko barhengereraga omu chihugo che Pologne. Alipangire kugeza ejambo liderhere ntya: “Obufuuke bw’Abafire Buli Hofi.” Amango bene-berhu na bali-berhu baliri bahaana amaenvitasiyo oku bantu ba mw’eyola vile, padiri naye abwira Abakristu bage oku barhajaga kuyunviriza elyola jambo. Barhayunvaga eby’ababwiraga. Bantu barhalukire 5 000 baja kuyunviriza elyola jambo, kuhebamo na padiri! Mwene-werhu Krett ahamagala padiri ayinje aderhere obwizere bwage, aliko alahira. Enyuma w’ejambo, Mwene-werhu Krett aha abantu ebitabu byoshi aligwerhe, bulala kweri abantu balilonzeze kumenya binene oku bilolere Echinwa cha Mungu.​—Amo. 8:11.

Mwene-werhu Claude Brown aja omu Afrike omu Gold Coast zene chiyirikirwe chihugo che Ghana, aja kuhubiri emyazi minja. Bantu banene bayunvirhe obukweri bulala Mwene-werhu Claude Brown aligezeze yi majambo manene, anaha abantu bitabu binene mw’echola chihugo. John Blankson, waliri  wayiga ebilolere eby’efarmasi, ayinja kuyunviriza liguma omu majambo ma Mwene-werhu Brown. Aho han’ahola arhegeera okw’abwene obukweri. John ayibukire ntya: “Obukweri bwarhumire nagwarha obusiime, na naliri nabwira aba rhwaliri rhwasoma nabo eby’efarmasi okubilolere obola bukweri.”

John aliyigire okwe Biblia erhayigiriza oku Mungu buli Busharhu, naho lusiku luguma aja omu kanisa k’Abaanglika kubaza padiri okubilolere echola. Padiri amufukuza anaderha ntya n’omulenge gw’enyanya: “Orhali Mukristu; oli muntu wa Shetani. Huluka muno juba!”

Agerere eka, John ayandikira oyala padiri amaruba, amuhema ayinje babuganane embere z’abantu banene baganire oku bilolere Obusharhu. Padiri ashubiza John omu kumurhuma omu biro bya mwalimu mukulu w’eby’efarmasi. Agereremo oyola mwalimu amubaza akaba kweri aliyandikire padiri.

John amushubiza: “Nechi Waliha.”

Oyola mwalimu mukulu aseza John okw’ayandikire padiri amaruba m’okumuhema obonjo. Naho John ayandika ntya:

“Waliha, mwalimu wani ampemere inkuyandikire omu kukuhema obonjo, nyono indi tayari kukubwira ombabalire, aliko nawe orhange oyemere oku munayigiriza enyigirizo z’obubeshi.”

Mwalimu ababala bwenene abaza ntya: “Blankson, kweri si ebila by’onalonzeze kuyandika?”

“Nechi Waliha. Kweri, ebyola binanalilonzeze kuyandika.”

“Bakufukuza ku manola masomo. Orhakayorha ku manola masomo okagenderera kuderha kubi padiri w’edini e guvernema eshigikire.”

“Aliko si Waliha, . . . amango oli warhuyigiriza hali ebi rhurhayunva bwinja, rhurhakubaza ebibazo si?”

“Nechi munabibaza.”

“Nechi waliha, na mw’eyila hali ntyo ku bihemere. Padiri aliri arhuyigiriza Ebiblia naho namubaza echibazo. Akaba arhakagala kushubiza oku chibazo chani, bulagurhe wakambwira imuheme obonjo?”

Blankson arhafukuzwagwa oku masomo, na nta maruba m’okuhema obonjo ali chirhumire.

Omu kuderha oku bugeke okubilolere akasi kakolerwe omu mwaka, Omunara g’Omulanzi gwalirhondere omu kuderha ntya: “Kweri rhwakaderha ntya kuguma na Daudi: ‘Wampa emisi y’okulwa evita.’ (Zb. 18:39) Haliri bintu binene bihebere omurhima m’ogola mwaka, bulala rhwabwene okuboko kwa Waliha. . . . Abakozi bage bemana baligwerhe obusime omu kasi k’okuhubiri.”

Oku buzinda b’omwaka, bene-berhu baheba h’omupango g’okugwarha elindi radiyo. Bayumbaka elyola radiyo omu vile ye Chicago omu États-Unis. Elyola radiyo lihyahya lyayirikwa CHINWA bulala lyakakolesezwe omu kuyigiriza Echinwa cha Mungu. Eyila turu lero, bakolesa ebikoleso bikomere byakarhumire abantu bakulikira oburhumwa b’Obwami chiro n’oku balala baliri hale, n’omu noro ye Canada.

Omu mwaka gwa 1925, Yehova arhabala bene-berhu bayunve omwazi gusimisize bwenene oku bilolere Ufunuo sura ye 12. Amola mafasiriyo mahyahya marhuma baguma baleka kugenderera kukolera Yehova. Aliko hali abandi banene balisimire kumenya bwinja ebyarhengereraga embingu na gurhe ebyola bihumire oku bantu ba Mungu hanola oku gulu.