MWAZI G’OKUYIGA 41
OLWIMPO 13 Kristu l’Olwiganyo Lwerhu
Bichi Siku 40 z’Obuzinda za Yesu oku Gulu Zakarhuyigiriza?
“Bali mubwene mu siku 40, analiri aderha eju y’Obwami bwa Mungu.”—MDO. 1:3.
EBIRHWAYIGA
Rhwabona gurhe rhwakayiganya omufano gwa Yesu okubilolere siku 40 z’obuzinda amalaga hanola oku gulu.
1-2. Bichi byahikiraga banafunzi babiri ba Yesu amango baliri baja e Emau?
RHULI omu Siku 16, Mwezi gwa Nisani mwaka gwa 33 N.K.Y. Abanafunzi ba Yesu bayunvirhe omugayo n’obuba. Babiri mubo bali barhenga e Yerusalemu n’okuja e Emau, vilaje eli hofi ku bilometre 11 ne Yerusalemu. Abola balume bavunikire omurhima bulala Yesu omulume baliri bakulikira, abaga eyi amamala kufa. Bulala balilangalire oku Masiya akajirire Abayahudi ebintu binja, aliko afire. Naho chintu chilebe barhalilangalire chamarhengerera.
2 Omuntu barhamenyere amababugana bamarhondera kulambagira naye. Abanafunzi bamarhondera kumubalira omugayo gwabo oku bilolere ebyahikire Yesu. Oyola mulume amarhonderesa enganiro haguma nabo yahindamulaga akalamo kabo. “Arhonderera ku Musa n’oku Balebi boshi,” abafasiriya bulagurhe Masiya alikwanene kulibuka n’okufa. Bagerere e Emau, oyola mulume abwira abola banafunzi babiri oku yewe ye Yesu wafukire. Basima bwenene okumenya oku Masiya ali muguma-guma!—Lu. 24:13-35.
3-4. Bichi byalihikire abanafunzi ba Yesu, na bichi rhwayiga mu gunola mwazi? (Matendo 1:3)
3 Yesu alirhengerere abanafunzi bage turu zinene mu siku 40 z’obuzinda amalamaga hanola oku gulu. (Osome Matendo 1:3.) Mw’agola mango, Yesu alihebere abanafunzi bage omurhima baligwerhe akahinda n’obuba. Bagwarha obusime n’obushiru b’okuja kuhubiri n’okuyigiriza emyazi minja y’Obwami. a
4 Okuyiga okubilolere echola chihe chisimisize ch’akalamo ka Yesu, kwakarhulerhera enyungu. Mu gunola mwazi rhwalola gurhe Yesu alikoleseze ebisanzi byage 1) omu kuheba omurhima abanafunzi bage, 2) omu kubarhabala bayunve bwinja Amandiko, n’echa 3) omu kubakoomeza kukola akasi bakakolere omu mango mayinjire. Mu buli hali, rhwabona gurhe rhwakayiganya omufano gwa Yesu.
OHEBE ABANDI OMURHIMA
5. Bulagurhe abanafunzi ba Yesu balikenere kuhebwa omurhima?
5 Abanafunzi ba Yesu balikenere kuhebwa omurhima. Bulagurhe? Bulala baguma balilekere enju zabo, emilala yabo n’amakasi mabo yi bakulikira Yesu amango moshi. (Mt. 19:27) Abandi balikolerwe kubi eju y’okuba banafunzi ba Yesu. (Yoh. 9:22) Balijirire ebyola byoshi bulala baliyemerere oku Yesu yi waliri Masiya walilaganyizwe. (Mt. 16:16) Aliko amango Yesu ayirhwa, obulangalire baligwerhe bwahera banavunika omurhima.
6. Bichi Yesu alijirire enyuma w’okufuuka?
6 Yesu alimenyere oku biyunvikene abanafunzi bage bachiyunve kubi amango afa. Analimenyere kw’empanvu erhumire bachiyunva kubi kurhali kubula obwemere. Bobola olusiku afuukaga, arhondera kuheba bera bage omurhima. Omufano, alirhengerere Mariya Magdalene amango aliri alirira oku shinda. (Yoh. 20:11, 16) Alirhengerere na banafunzi babiri baganirirwe oku murhondero gwa gunola mwazi. Alirhengerere n’entumwa Petro. (Lu. 24:34) Bichi omufano gwa Yesu gwakarhuyigiriza? Rhuganire oku byabaga amango arhengerera Mariya Magdalene.
7. Nk’okubiyerekenwe omu Yohana 20:11-16, bichi Yesu alibwene Mariya yajira esezisezi omu Siku 16, Mwezi gwa Nisani na bichi echola chalimushunikire ajire? (Olole n’efoto.)
7 Osome Yohana 20:11-16. Esezisezi oku Nisani 16, bakazi baguma bemana balamukira oku shinda ya Yesu. (Lu. 24:1, 10) Lekaga rhuchiseze oku mufano gwa muguma mubo, k’okuderha, Mariya Magdalene. Amango Mariya agera oku shinda abugana omubiri gwa Yesu gurhalimo. Alibirha kuja kubwira Petro na Yohana. Amango balibirhira ewa shinda, naye abakulikira. Amango abola balume babona oku kweri omubiri gwa Yesu gurhachili omu shinda, bagaluka emwabo. Aliko Mariya yewe ayorha oku shinda. Oyorha ahola ey’ali alira. Arhalimenyere oku Yesu ali amubona. Yesu abere abona emiziga y’oyola mukazi mwimana, alonza kumuheba omurhima. Bobola arhengerera Mariya anamukolera chintu chilebe chalimuhebere omurhima bwenene. Aganira naye, amuha n’engabane y’akamaro y’okuja kubwira bene-babo Yesu kw’afukire.—Yoh. 20:17, 18.
Oyiganye Yesu omu kuba muntu w’okulola n’okuyunvira akababaro balala bavunikire omurhima (Olole echifungo cha 7)
8. Gurhe rhwakayiganya Yesu?
8 Gurhe rhwakayiganya Yesu? Rhwakayiganya Yesu amango rhuli rhwaheba bene-berhu na bali-berhu omurhima bagenderere kukolera Yehova. Kuguma na Yesu, rhukwanene kubona ebibazo by’abandi, okuchihangana kuchiyunva nk’oku bali bachiyunva, n’okuja rhwabarhuliriza. Rhuganire oku mufano gwa mwali-werhu oyirikirwe Jocelyn, eyi mwene-wabo afaga omu agsida. Aderhere ntya: “Mu myezi minene naliri nayunva akahinda kanene bwenene.” Aliko mwene-werhu muguma na mukage bamuhamagala emwababo, bamuyunviriza n’obonjo, banamuyereka kangana gurhe ali wakamaro embere za Mungu. Jocelyn aderhere ntya: “Nalichiyunvirhe nka Yehova abakoleseze bankule omu nyanja y’omulaba n’omwizimya gunene, n’okumpeba omu chombo ch’okunyokola. Balintabere kushuba kugwarha enyorha yani y’okugenderera kukolera Yehova.” Nerhu rhwakaheba abandi omurhima omu kubaleka baderhe okuntu bali bachiyunva n’okuyunviriza bwinja bwinja ebi bali baderha. Nka rhujirire ntyo, rhwakabakomeza n’okubarhabala bagenderere kukolera Yehova.—Ro. 12:15.
ORHABALE ABANDI BAYUNVE BWINJA ECHINWA CHA MUNGU
9. Bibazo bihe abanafunzi ba Yesu balihurene na gurhe Yesu alibarhabere?
9 Abanafunzi ba Yesu baliyemerere Echinwa cha Mungu banalichihanganire kuchikolesa omu kalamo kabo. (Yoh. 17:6) Aliko okuntu Yesu afaga oku murhi gw’amalibuko nka munizi, kwarhuma bagwarha engangane. Yesu arhegera okw’abanafunzi bage bagwerhe obwemere banazigiire Yehova, s’aliko abona oku byalichibahemere kumenya bwinja Amandiko. (Lu. 9:44, 45; Yoh. 20:9) Bobola abarhabala kukengera oku Mandiko. Rhulole gurhe alijirire ntyo amango arhengerera banafunzi bage babiri omu njira ejire e Emau.
10. Gurhe Yesu alirhabere abanafunzi bage bayemere oku kweri ye Masiya? (Luka 24:18-27)
10 Osome Luka 24:18-27. Oyibuke oku Yesu arhabwiraga abola banafunzi ahohan’aho yewe alinde. Ahali h’okubabwira alinde, ababaza ebibazo. Bulagurhe? Nkabaga alilonzeze baderhe ebibali omu bwenge n’omu murhima. Nantyo kubalijirire. Bamubwira oku baliri balingiriza Yesu achungule Abaizraeli omu burhegesi bubi bw’Abaroma. Yesu abaleka baderhe okubilolere okuntu baliri bachiyunva, naho akolesa Amandiko omu kurhabala abola balume bamenye oku bulebi bunene bwayenere. b Enyuma waho egolo, Yesu ageza ebisanzi haguma n’abandi banafunzi omu kubayemeza obola bukweri. (Lu. 24:33-48) Bichi eyola ngani erhuyigirize?
11-12. a) Bichi rhwakayiga kugerera okuntu Yesu aliri ayigiriza obukweri bwe Biblia? (Olole n’efoto.) b) Gurhe mwalimu we Biblia wa Nortey alimurhabere?
11 Gurhe rhwakayiganya Yesu? Amango oli wayigiriza abanafunzi be Biblia, obabaze ebibazo byarhuma baderha ebi bali omubwenge n’omu murhima. (Mez. 20:5) Enyuma y’okumenya gurhe bali bachiyunva, obayereke gurhe bakapata Amandiko me Biblia makabarhabala omu hali yabo. Naho, orhababwiraga ebi bakwanene kujira. Ahali h’okujira ntyo obarhabale kukengera oku Mandiko, banamenye okuntu bakakolesa amakanuni me Biblia omu kalamo kabo. Rhuganire oku mufano gwa mwene-werhu Nortey w’omu chihugo che Ghana.
12 Nortey arhonderaga kuyiga Ebiblia y’agwerhe myaka 16. Mw’agola mango abantu b’omulala gwage barhondera kumupinga. Bichi byamurhabalaga yagenderera kuyiga Ebiblia? Mwalimu wage we Biblia akolesa olwandiko lwa Matayo sura 10 omu kumufasiriya okw’Abakristu b’okuli bakwanene kupingwa. Nortey aderhere ntya: “Amango barhondera kundibuza, narhegera ku nabwene okuli.” Mwalimu wage amurhabala kukengera oku lwandiko lwa Matayo 10:16 yagala kuba merangwe n’okugwarha obukenge amango bali baganira oku bilolere eby’edini ahamwabo. Nortey alilonzeze abe painiya enyuma w’okubatizwa, aliko eshe alilonzeze aje soma e iniversite. Ahali h’okubwira Nortey eby’akwanene kujira, mwalimu wage akolesa ebibazo omu kumurhabala akengere oku makanuni me Biblia. Byaja byaba gurhe? Nortey achishoga kuja omu kasi k’amango moshi. Eshe amufukuza ahamwabo. Gurhe Nortey alichiyunvirhe okubilolere ebyola byarhengereraga? Nortey aderhere ntya: “Nyemerere ku narholere esimikiro nyinja.” Amango nerhu rhwamarhola akasanzi k’okurhabala abandi bakengere oku Mandiko, rhwabarhabala babe Bakristu bakomere ekiroho.—Efe. 3:16-19.
Oyiganye Yesu omu kurhabala abandi bakengere oku Mandiko (Olole echifungo che 11) e
ORHABALE ABALUME BAYENEZE EBIHEMERWE YI BABA “MPEMBO OMU BANTU”
13. Bichi Yesu alijirire y’achizera okw’akasi k’Eshe kagenderera kukolwa amango agaluka embingu? (Waefeso 4:8)
13 Amango Yesu aliri oku gulu, alikolere bwinja-bwinja akasi Eshe amuhaga. (Yoh. 17:4) ‘Aliko arhawazaga oku yenyine yiwakakolere akola kasi.’ Mu myaka esharhu n’enusu yoshi Yesu alimalire ey’ali ahubiri hanola oku gulu, alikoomeze abandi. Embere y’okugaluka embingu, Yesu alihere abanafunzi bage engabane z’okushishikala entama za Yehova z’akachiro n’okuyerekeza akasi k’okuhubiri n’okuyigiriza. Baguma mubo barhaliyeneze chiro myaka 30. (Osome Waefeso 4:8.) Gurhe Yesu alikoleseze siku zage 40 z’obuzinda omu kurhabala abola balume balichihaanire, bemana, bagwerhe n’omwete babe “mpembo omu bantu”?
14. Bichi Yesu aliyigirize abanafunzi bage mu siku 40 z’obuzinda amalaga oku gulu? (Olole n’efoto.)
14 Yesu alihere abanafunzi bage ehano lili wazi, aliko linali mu buzigire bunene. Omufano, amango arhegera oku baguma omu banafunzi bage bagwerhe engangane, abahanula. (Lu. 24:25-27; Yoh. 20:27) Alibarhabere bamenye akamaro k’okuheba akasi k’obulagizi oku nafasi y’oburhanzi, ahali h’akasi kabo k’omubiri. (Yoh. 21:15) Alibayibwise bamenye bahuzanya ebi bali bakola omu kasi ka Yehova n’eby’abandi bakajira mw’akola kasi. (Yoh. 21:20-22) Analibarhabere kuhindamula amawazo m’obubeshi baligwerhe okubilolere Obwami, anabarhabala bachiseze oku kasi k’okuhubiri emyazi minja. (Mdo. 1:6-8) Bichi omufano gwa Yesu gwakayigiriza abashamuka?
Oyiganye Yesu omu kurhabala abalume bayeneze ebihemerwe yi bakola ezindi ngabane (Olole echifungo che 14)
15-16. a) Mu njira zihe abashamuka bakayiganya Yesu? Fasiriya. b) Gurhe mwene-werhu Patrick aliyungukire n’ehano?
15 Gurhe abashamuka bakayiganya Yesu? Abashamuka bakwanene kukoomeza n’okurhabala abalume kuhebamo na balala bachili misole, yi bakola binene omu chibaga. c Abashamuka bakwanene kumenya okw’abola bene-berhu barhali bashinganyanya. Bakwanene kubahanula oku buzigire y’abola bene-berhu bachili misole bagwarha obumenyi n’okubona akamaro k’okuba berhohye, bemana n’okuba tayari kukolera abandi.—1 Ti. 3:1; 2 Ti. 2:2; 1 Pe. 5:5.
16 Rhuganire gurhe mwene-werhu Patrick ayungukaga n’ehano. Amango alichili musole aligwerhe engeso y’okuganira n’abandi oku bukali, analiri akolera abandi kubi kuhebamo na bali-berhu. Omushamuka okulire ekiroho arhegera obuzamba bwa Patrick, amuhereza ehano linja aliko liri wazi. Patrick aderhere ntya: “Ngwerhe obusime okubona gurhe abashamuka banyerekere aha nalikwanene kujirira amajambere. Nagendaga nayunva nvunikire omurhima amango naliri nabona abandi bene-berhu bapatire engabane nalisimire nani mpate. Aliko ehano ly’abashamuka lyantabere mbone oku nkwanene kuba mwirhohye n’okuyereka bene-berhu na bali-berhu obuzigire ahali h’okuchiseza omu kulonza echeo changwa ngabane zilebe.” Oku byalijire byaba, Patrick ayeneze myaka 23, aba mushamuka w’echibaga.—Mez. 27:9.
17. Gurhe Yesu aliyerekene okw’alilangalire abanafunzi bage?
17 Yesu arhahaga abanafunzi bage engabane y’okuhubiri yonyine, s’alibahere n’ey’okuyigiriza. Nkabaga abanafunzi bakachiyunvirhe oku barhakagalire eyola ngabane Yesu ababwiraga bakole. Aliko Yesu alichizerere oku bayigala. Omu kuyerekana okw’alibanihire bwenene, ababwira ntya: “Nk’oku Darha antumaga nani imbarhumire.”—Yoh. 20:21.
18. Gurhe abashamuka bakayiganya Yesu?
18 Gurhe abashamuka bakayiganya Yesu? Abashamuka bagwerhe obwengehe, banakoomeza abandi omu kubahereza makasi balebe bamayumangire. (Flp. 2:19-22) Omufano, abashamuka bakabwira emisole ekole omu kasi k’okujira obusafi na k’okukwiziza Echumbi ly’Obwami. Abashamuka bakaha bene-berhu akasi, banabakoomeza okuntu bakakola, n’okuchizera oku bakakola bwinja. Mwene-werhu Matthew ochiri mushamuka muhyahya, agwerhe shukrani nene oku bashamuka bagerere mu binene, okuntu baliri bamukoomeza kukola amakasi malengene n’okuntu balichizerere okw’akamakolere bwinja. Aderhere ntya: “Amango naliri nakola amagosa, baliri bantabala kuyiga chintu chilebe kugerera amola magosa, n’ebyola byanantabala inkole ebinja amandi mango.” d
19. Bichi rhukwanene kuhigirira kujira?
19 Yesu alikoleseze siku 40 z’obuzinda oku gulu ey’ali aheba omurhima, ayigiriza, n’okukoomeza abandi. Rhwakahigirira kukulikira omufano gwa Yesu bwinja-bwinja. (1 Pe. 2:21) Arhurhabala kujira ntyo. N’echakamaro ku byoshi arhulaganyize ntya: “Ndi haguma nenyu esiku zoshi kugera oku buzinda bw’egulu.”—Mt. 28:20.
OLWIMPO 15 Singiza Efula ya Yehova!
a Ebitabu bye Enjili n’ebindi bitabu biyerekene eturu Yesu alirhengerere mw’abanafunzi bage enyuma w’okufuuka: Alirhengerere Mariya Magdalene (Yoh. 20:11-18); abandi bakazi (Mt. 28:8-10; Lu. 24:8-11); banafunzi bage babiri (Lu. 24:13-15); Petro (Lu. 24:34); entumwa zage, olekere Tomasi (Yoh. 20:19-24); entumwa zage kuhebamo na Tomasi (Yoh. 20:26); banafunzi mushanvu (Yoh. 21:1, 2); banafunzi barhalukire 500 (Mt. 28:16; 1 Ko. 15:6); Yakobo mwene-wabo (1 Ko. 15:7); entumwa zage zoshi (Mdo. 1:4); n’entumwa hofi ne Betaniya. (Lu. 24:50-52) Ezindi turu zirhayandikagwa omu Biblia.—Yoh. 21:25.
b Y’opata eliste ederhere okubilolere obulebi bwa Masiya, olole oku jw.org omwazi, “Maunabii Juu ya Masiya Inaonyesha Kabisa Kama Yesu Alikuwa Masiya?” (Obulebi Okubilolere Masiya Buyerekene oku Kweri Yesu Aliri Masiya?)
c Mu hali ziguma, abashamuka bachili misole bagwerhe myaka 25 changwa 30, bakaba bemangizi b’emizunguluko. Aliko abola balume bakwanene kuba eyi bagerere mu binene omu kukola nka bashamuka.
d Y’opata amandi mawazo makarhabala bene-berhu bachili misole bayeneze ebihemerwe yi bakola ezindi ngabane, olole egazeti y’Omunara g’Omulanzi, Mwezi gwa 8, 2018, bukurasa 11-12, chifungo che 15-17, n’Omunara g’Omulanzi gwa Siku 15, Mwezi gwa 4, 2015, bukurasa 3-8, 9-13.
e AMAFASIRIYO M’EFOTO: Enyuma w’okumurhabala kukengera oku Mandiko, omwanafunzi we Biblia amachishoga kukabula amapambo malolere eby’Enoweri.
