MWAZI G’OKUYIGA 43
OLWIMPO 90 Muhirane Omurhima
Okuntu Wakahima Engangane
“Musuzume ebintu byoshi.”—1 TE. 5:21.
EBIRHWAYIGA
Rhwabona bichi wakajira akaba orhachizerere oku Yehova aba akulagireko, akaba onachiganya eju y’esimikiro warholere y’okumukolera, changwa akaba orhakachigala kumukolera byoshi walilonzeze.
1-2. a) Ngangane zihe ziguma abakozi ba Yehova bakagwarha? b) Bichi rhwaganirako mu gunola mwazi?
MANGO maguma abantu boshi banagwarha engangane. a Omufano, omusole w’Omuhamirizi akachibaza akaba kweri Yehova anamulagako. Echola chakarhuma agwarha engangane y’okubatizwa. Ogwindi mufano guli gwa mwene-werhu, amango aliri musole alichishogere kuheba enyungu z’Obwami oku nafasi y’oburhanzi ahali h’okulonza furanga zinene. Zene akola ashajire na nta furanga agwerhe zinene z’okushishikala eby’omulala gwage gukenere. Akarhondera kugwarha engangane akaba kweri alirholere esimiriko zinja amango alichili musole. Waza ku mwali-werhu w’omugekulu orhachigwerhe misi minene. Akachiyunva avunikire omurhima bwenene bulala arhakachigala kukola ebyagendaga akola mira. Wachigerere kuchibaza ebibazo bili nk’ebila: ‘Kweri si Yehova anambona? Ebintu byoshi nankolera Yehova, kweri si hali echi biba bimalire? Inchili w’akamaro emwage si?’
2 Nka rhurhachihanganire kulonza ebishubizo by’ebibazo bili nk’ebyola, hakagera amango rhwaheza obwemere mu Yehova n’okuleka kumukolera. Mu gunola mwazi rhwabona gurhe Ebiblia yakarhurhabala akaba rhuli rhwawaza oku Yehova arharhulagako, okw’esimikiro zerhu zamira zirhaliri zinja, n’okurhurhachili b’akamaro emwa Yehova.
OKUNTU WAKAMALA ENGANGANE ZAWE
3. Njira ehe nguma yakarhurhabala kumala engangane zerhu?
3 Njira nguma yakarhurhabala kumala engangane zerhu, kuli kulola ebishubizo by’ebibazo byerhu omu Chinwa cha Mungu. Nka rhujirire ntyo, obwemere bwerhu mu Yehova n’obwira bwerhu haguma naye bwakomera, “rhwanayorha n’omu bwemere buzira kushaganyika.”—1 Ko. 16:13.
4. Gurhe “rhwakasuzuma ebintu byoshi”? (1 Watesalonike 5:21)
4 Osome 1 Watesalonike 5:21. Obwene okwe Biblia erhuhebere omurhima “rhusuzume ebintu byoshi.” Gurhe rhwakajira ntyo? Amango rhugwerhe engangane mu chintu chilebe, rhukwanene kusuzuma bichi Ebiblia ederhere oku bichilolere. Rhuganire oku mufano gwa murhabana muguma waliri achibaza akaba kweri anali w’akamaro omu masu ma Mungu. Akafire chakuyemera konyine oku kweri Yehova aba amulagireko si? Nanga, alikwanene “kusuzuma ebintu byoshi” omu kuyiga Ebiblia y’amenya kweri bichi Yehova awazize oku bimulolere.
5. Gurhe “rhunayunva” Yehova y’ashubiza oku bibazo byerhu?
5 Amango yirhwasoma Echinwa cha Mungu “rhunayunva” Yehova y’aganira nerhu. Aliko rhukwanene kujira binene kulusha okusoma Ebiblia konyine, akaba rhulonzeze kupata ebishubizo birhengere emwa Yehova oku bilolere ebibazo byerhu. Rhukwanene kuchiseza oku mwazi gulolere echibazo cherhu amango rhuli rhwajira obusomi bwerhu bwe Biblia. Rhwakalonza echishubizo okubilolere echibazo cherhu omu kukolesa ebikoleso olubaga lwa Yehova lwarhuhere. (Mez. 2:3-6) Rhukwanene kusalira Yehova n’okumubwira arhurhabale kupata echishubizo ch’echibazo cherhu. Naho rhwanalonza amakanuni me Biblia makarhurhabala omu hali yerhu. Kandi kuli kwinja okusoma engani ze Biblia z’abakozi bemana ba Yehova baliri bachiyunva n’okuwaza kuguma nerhu.
6. Gurhe embuganano zakarhurhabala kuhima engangane zerhu?
6 Kandi “rhunayunva” Yehova y’aganira nerhu amango rhuli oku mbuganano. Akaba rhunaja oku mbuganano oku kahunda, rhwakayunva chintu chilebe omu jambo changwa omu chishubizo cha muntu mulebe eyi chirhwanalikenere yi rhuhima engangane zerhu. (Mez. 27:17) Lekaga rhuje rhwaganira okuntu rhwakahima ngangane zilebe.
AMANGO ORHACHIZERERE OKU YEHOVA ANAKULAGAKO
7. Chibazo chihe chiguma abantu bakachibaza?
7 Wachigerere kuchibaza: ‘Kweri Yehova anambona si?’ Nk’owazize okorhali w’akamaro, wakabona oku birhakagalikana obe mwira w’Omulemi w’egulu lyoshi. Nkabaga ntyo ku Mwami Daudi naye aliri awaza. Aliri awaza oku bili byakusomeza okumenya oku Yehova anabona abantu. Aderhere ntya: “Yehova wee omuntu bili bichi y’omurhegera, omwene-omuntu wakafa bili bichi y’omuseza k’obwenge?” (Zb. 144:3) Inde rhwakalangalira wakashubiza kw’echola chibazo?
8. Nk’ok’olwandiko lwa 1 Samweli 16:6, 7, 10-12 luyerekene, bichi Yehova anabona omu bantu?
8 Ebiblia erhubwirire oku Yehova anabona balala banabonekana nka ntacho bamalire omu masu m’abantu. Omufano, Yehova alirhumire Samweli omu nju ya Yese aje kushiga amavurha mugala muguma wakabere mwami we Izraeli. Yese ahamagala mushanvu mu bagala bage munane babuganane na Samweli, aliko arhahamagala Daudi walichili mudorho. b Nobo Daudi yi Yehova alichishogere. (Osome 1 Samweli 16:6, 7, 10-12.) Yehova alibwene kweri Daudi ali muntu nyabachi. Analimenyere ok’oyola musole alimusimire bwenene.
9. Bulagurhe okwanene kuchizera oku Yehova aba akulagireko? (Olole n’efoto.)
9 Owaze okuntu Yehova ayerekene okw’anakubona. Anakuha amahano menja malolere ehali yawe. (Zb. 32:8) Gurhe akakujirira ebyola byoshi arhanakumenyere bwinja? (Zb. 139:1) Amango wamakolesa amahano ma Yehova n’okubona okuntu y’akurhabala, kweri wachizera okw’aba akulagireko. (1 Ny. 28:9; Mdo. 17:26, 27) Yehova anabona byoshi oliwajira y’omukolera n’okumukenga. Anabona n’engeso zinja ojira analonzeze kuba mwira wawe. (Yer. 17:10) Okayemera kuba mwira wage, asima bwenene.—1 Yo. 4:19.
“Okalonza [Yehova] aleka omubone.”—1 Ny. 28:9 (Olole echifungo cha 9) c
AMANGO ORHACHIZERERE OKW’ESIMIKIRO WARHOLAGA MIRA ZALIRI Z’OBWENGEHE
10. Amango rhwamawaza okubilolere esimikiro zerhu za mira, bibazo bihe rhwakachibaza?
10 Enyuma wa siku zinene omu kalamo, hali abakachibaza akaba esimikiro barholaga zaliri zinja. Nkabaga balilekere akasi ka mushahara gunene, changwa balichishogere okurhajira obuchuruzi yi bakola binene omu kasi ka Yehova. Aliko nkabaga hamagera myaka minene. Hali oku bakawaza ku bantu balebe balimenyere barholaga esimikiro zirhali kuguma n’ezabo, n’azene abola bantu babonekene nka bagwerhe furanga zinene n’akalamo kenja. Nkabaga bakaja bachibaza ntya: ‘Esimikiro narholaga y’okukolera Yehova ye yanaliri y’akamaro si? Changwa nakakolere bwenene yi nani mba eyi gwerhe furanga zinene zene si?’
11. Bichi byaliri byahahaza omwandisi we Zaburi ya 73?
11 Akaba oli wachibaza ebibazo bili nk’ebyola, lola gurhe omwandisi we Zaburi ya 73 alichiyunvirhe. Alibwene abantu barhakolera Yehova, aliko eyi bagwerhe amagala menja, bachirire, banabonekene nka nta bibazo bagwerhe. (Zb. 73:3-5, 12) Amango aliri abona obusime bagwerhe, aliri achiyunva nka byoshi ali ajira y’akolera Yehova ntacho bimalire. Aliri “amala olusiku loshi ey’ahahere” eju y’amawazo mavunire omurhima. (Zb. 73:13, 14) Gurhe alijire ajira mw’eyola hali yage yalimuhaheze?
12. Nk’ok’olwandiko lwa Zaburi ya 73:16-18 luderhere, bichi byalijire byarhabala oyola mwandisi alekane n’amawazo mage mabi?
12 Osome Zaburi 73:16-18. Omwandisi we Zaburi aja ahachesibwa ha Yehova. Abere ali haguma n’abakozi ba Yehova, agala kuwaza bwinja. Abona oku chiro bantu baguma barhaliri bakolera Yehova babonekana nka bagwerhe akalamo kenja, nta bulangalire baligwerhe bw’amango mayinjire. Eju y’okola kukengera, apata omurhula g’omu bwenge omu kumenya ok’okukulikira ebintu by’ekiroho ye yaliri simikiro nyinja. Nantyo ahigirira kugenderera kukolera Yehova.—Zb. 73:23-28.
13. Bichi wakajira akaba oli wachiganya eju y’esimikiro zilebe warholaga mira? (Olole n’efoto.)
13 Wakapata omurhula g’omu bwenge guli kuguma n’og’Omwandisi we zaburi apataga kugerera oburhabale bwe Chinwa cha Mungu. Nka gurhe? Oyibuke ebintu binja ogwerhe, kuhebamo n’okuyemerwa na Yehova, onayibuke oku balala barhakolera Yehova nta burhabale bwage bagwerhe. Bakasimiswa n’okulangalira ebintu bagwerhe zene, bulala nta bulangalire bw’amango mayinjire bagwerhe. Aliko rhwabo Yehova arhulaganyize migisho minene bwenene kulusha oku rhwakawaza. (Zb. 145:16) Kandi rhwakawaza kw’echila: Ka rhwakamenya okuntu akalamo kerhu kakabere nka rhwarholaga esimikiro zili tofauti n’ezirhwarholere? Aliko hali chintu chiguma rhukwanene kuchizera: Amango wamarhola esimikiro eju y’obuzigire bwawe ku Yehova n’oku bantu, wapata ebintu byakulerhera obusime amango moshi.
Owaze okubilolere migisho minene Yehova akulaganyize omu mango mayinjire (Olole echifungo che 13) d
AMANGO ORHACHIZERERE OK’OLI WAKAMARO EMWA YEHOVA
14. Hali zihe bantu baguma bali bahurana, n’achibazo chihe bakachibaza?
14 Bantu baguma omu bakozi ba Yehova barhakachigala kukola binene nk’oku balisimire eju y’obushaja, ebibazo by’amagala, n’abandi eju y’obulema. Ebyola byakarhuma bachiyunva oku ntacho bamalire omu masu ma Yehova. Nkabaga bakaja bachibaza ntya: ‘Inchili w’akamaro omu masu ma Yehova si?’
15. Bichi omwandisi we Zaburi ya 71 alichizerere?
15 Omwandisi we Zaburi ya 71 naye aligwerhe amawazo mali nk’amola. Asalira ntya: “Orhandekereraga amango emisi yamampwera.” (Zb. 71:9, 18) Bobola omwandisi we zaburi alichizerere okw’akakolera Mungu wage oku bwimana, Yehova akamuyerekeza n’okumurhabala. Nk’ok’omwandisi we zaburi aliyigire, Yehova anasimiswa na balala banajira okwabo koshi yi bamukolera chiro akaba barhakachigala kukola binene.—Zb. 37:23-25.
16. Mu njira zihe abakala bashajire bali b’akamaro emwa Yehova? (Zaburi 92:12-15)
16 Akaba okola oshashajire ochibone nk’oku Yehova anakubona. Akakurhabala omukolere oku bwimana chiro akaba ok’orhakachigala kukola binene eju y’amagala. (Osome Zaburi 92:12-15.) Ahali h’okuchiseza ku binene orhakagala kukola, ochiseze oku biwakagala. Omufano, wakarhabala abandi kugerera omufano gwawe g’obwimana n’okuntu onayerekana ok’obalagireko. Wakabwira abandi gurhe Yehova akurhabere mu myaka minene, n’ebilagane binene bye Biblia oli walindira omu kulembera gurhe byayenera. Kandi, orhayibiriraga okw’amasala onasalira eju y’abandi maba m’akamaro. (1 Pe. 3:12) Koshi koshi ehali yerhu yakaba eli, rhugwerhe chintu chilebe rhwakaha Yehova n’abandi.
17. Bulagurhe rhurhakwanene kuchihuzanya n’abandi?
17 Akaba oli wachiyunva kubi eju y’okuba orhakachigala kukola binene omu kasi ka Yehova, ochizere okw’anasimisizwa na byoshi wakagala kuyeneza. Hali amango wakahuzanya ebyoli wakola n’eby’abandi bali bakola. Aliko orhajiraga ntyo! Bulagurhe? Bulala Yehova naye arhajira ntyo. (Gal. 6:4) Omufano, Mariya alihere Yesu empano y’amavurha mamarashi m’ebeyi linene. (Yoh. 12:3-5) Aliko omushumbakazi w’omukene yewe, alihanire entulo ya bicheri bibiri by’akachiro kageke bwenene omu hekalu. (Lu. 21:1-4) Aliko Yesu arhahuzanyaga abola bakazi bombi. Ahali h’okujira ntyo, aliyerekene oku Mariya n’oyola mushumbakazi w’omukene boshi baliyerekene obwemere. Yesu aliyiganyize Eshe oku bwimana. Bobola wakachizera oku Yehova anabona byoshi onajira bulala omuzigire onagwerhe obwemere muye, n’ebyola bye by’akamaro emwage. Binamusimisa chiro akaba oku woyo onabona oku bili bigeke bwenene.
18. Bichi byakarhurhabala rhuhime engangane zerhu? (Olole n’echisanduku “ Echinwa cha Yehova Chakakurhabala Kuhima Engangane.”)
18 Rhweshi rhunagwarha engangane mango maguma. Aliko nk’oku rhwayigire, Ebiblia yakarhurhabala rhuhime ezola ngangane. Bobola ochihangane kuhima engangane zawe, n’okuleka obwizere bugombole obuba bwawe. Kweri Yehova aba akuyinji bwawe bwawe. Anasimiswa na byoshi onamukolera, anakulaganyize oku nj’akuhemba. Yehova anazigira n’okushishikala buli muguma omu bakozi bage bemana.
OLWIMPO 111 Empanvu z’Omwishingo Gwerhu
a AMAFASIRIYO M’ECHINWA: Engangane rhwaganirako mu gunola mwazi, mali mawazo makarhuma rhwachibona oku rhurhali b’akamaro omu masu ma Yehova changwa okugwarha engangane okubilolere esimiko zerhu z’obwengehe z’omu mango magerere. Ezola ngangane zirhali kuguma n’eziderherwe omu Biblia zakayerekana ok’omuntu arhagwerhe bwemere mu Yehova n’omu bilagane byage.
b Chiro akaba Ebiblia erharhubwirire Daudi aligwerhe myaka enga amango Yehova achishogaye, bibonekene okw’alichili omu myaka y’olubiruko.—Olole Omunara g’Omulanzi gwa Lusiku 1, Mwezi gwa 9, 2011, bukurasa 29, chifungo cha 2.
