1. Mpembo zihe ziguma Yesu arhuhere?

 NTA muntu wachigerere kurhabala abandi kulusha Yesu. Amango Yesu aliri oku gulu alirhabere abantu turu zinene kugerera ebisomerene. (Lu. 9:12-17) Alihanire empembo elushire zoshi omu kuhaana akalamo kage eju yerhu. (Yoh. 15:13) N’amango afuuka arhalekaga kugenderera kurhabala abandi. Nk’okw’abaga alaganyize, alihemere Yehova asheshe eroho lichesibwa lirhuyigirize n’okurhurhuliriza. (Yoh. 14:16, 17, Amahugulo m’eshishi; 16:13) Kugerera embuganano z’echibaga Yesu agenderere kurhuhereza byoshi rhukenere yi rhujira abanafunzi omu gulu lyoshi.​—Mt. 28:18-20.

2. Empembo omu bantu ziganirirwe omu chitabu cha Waefeso 4:7, 8 bali bande?

² Hali eyindi mpembo Yesu arhuhere. Entumwa Paulo ayandikire okw’amango Yesu azamuka embingu, alihaanire “empembo omu bantu.” (Osome Waefeso 4:7, 8.) Paulo afasiriye oku Yesu ahaanaga ezola mpembo yi zirhabala echibaga omu njira zilengene. (Efe. 1:22, 23; 4:11-13) Zene ezola mpembo omu bantu ziheberwe mw’abagwasi b’akasi, abashamuka b’echibaga n’abemangizi b’emizunguluko. a Kweri abola balume barhali bashinganyanya chechirhumire banajira amagosa. (Yak. 3:2) Aliko Waliha werhu Yesu Kristu anabakolesa omu kurhurhabala, zili mpembo arhuhere.

3. Fasiria okuntu rhweshi rhwakashigikira akasi “k’empembo omu bantu.”

³ Yesu ahere ezola “mpembo omu bantu” engabane y’akamaro bwenene y’okukomeza echibaga. (Efe. 4:12) Aliko rhweshi rhwakabarhabala kukola akola kasi k’akamaro. Omufano: Baguma mu rhwabo banakola oku kasi k’okuyumbaka echumbi ly’Obwami. Abandi banarhabala omu kasi k’okurheganya ebilyo, etransporo  n’omu rhwindi rhwasi. Kandi rhweshi rhwakajira okwerhu koshi rhwakagala yi rhurhabala abagwasi b’akasi, abashamuka b’echibaga n’abemangizi b’emizunguluko kugerera ebi rhuli rhwaderha n’ebi rhuli rhwajira. Lekaga rhulole gurhe rhwakayunguka n’akasi kabo kakomere na gurhe rhwakabayereka eshukrani n’okuyiyereka Yesu, warhuhere “empembo omu bantu.”

ABAGWASI B’AKASI BANAKOLA ORHWASI “RHW’AKAMARO”

4. Makasi mahe maguma m’akamaro abagwasi b’akasi bagendaga bakola omu kagana ka burhanzi?

⁴ Omu kagana ka burhanzi, bene-berhu baguma balishimikirwe bakole nka bagwasi b’akasi. (1 Ti. 3:8) Byakashobokana eyi ma m’akasi m’akamaro Paulo aderhereko omu chitabu cha 1 Wakorinto 12:28. Bobola bibonekene okw’abagwasi b’akasi banakola bwenene amakasi m’akamaro, n’abashamuka nabo banaja bachiseza oku kasi k’okuyigiriza na k’obulagizi. Omufano, byakashobokana ey’abagwasi b’akasi baliri barhabala omu kujira amakopi m’Amandiko changwa okugula ebintu bikenerwe yi bajira amakopi.

5. Makasi mahe m’akamaro abagwasi b’akasi bali bakola zene?

⁵ Rhuganire ku rhwasi rhuguma rhw’akamaro abagwasi b’akasi bali bayeneza omu chibaga chabo. (1 Pe. 4:10) Baguma bakaba eyi bahabirwe engabane y’okuyimangira (ekonte) efuranga z’echibaga, abandi okuyimangira e eneo y’amahubiri, abandi banarhabala oku kasi k’okugabira abahubiri ebitabu, abandi banarhabala oku bikoleso by’okuzamula omulenge (esonorizasiyo), abandi banakola oku rhwasi rh’obusafi bw’Echumbi ly’Obwami, n’abandi oku kasi k’okukaribisa abantu oku mbuganano. Orhola rhwasi rhoshi rhuli rhw’akamaro y’echibaga chigenderera kukola bwinja. (1 Ko. 14:40) Kandi, bagwasi baguma b’akasi banageza ebigabi oku mbuganano y’Akasi n’Akalamo k’Omukristu n’okugeza amajambo m’abantu boshi. Omugwasi w’akasi nkabaga kandi akahabwa engabane y’okurhabala omwimangizi w’echigusho ch’amahubiri. N’amango maguma omushamuka akabwira omugwasi w’akasi amuherekeze omu kasi k’obulagizi.

6. Mpanvu zihe zakarhuma rhwasimiswa n’abagwasi b’akasi banakola bwenene?

⁶ Nyungu zihe echibaga chinapata kugerera akasi k’abagwasi b’akasi? Mwali-werhu Beberly b w’omu chihugo che Bolivie aderhere ntya: “Koko bwenene oku bagwasi berhu b’akasi, banarhuma nasimira embuganano. Bulala kugerera akasi kabo, nakayimpa, nakahana ebishubizo, nakayunviriza ejambo, nakabona evideo n’amafoto. Banarhabala oku kasi k’obulanzi n’okurhabala balala bali bayunviriza embuganano oku video-conference. Enyuma w’embuganano banarhabala oku kasi k’obusafi, ak’ekonte n’okuchizera oku rhwapatire ebitabu rhukenere. Ingwerhe eshukrani oku bibanakola!” Mwali-werhu Leslie olamire omu chihugo che Colombie, eyi eba y’akola nka mushamuka w’echibaga aderhere ntya: “Bani abalagirire oburhabale bw’abagwasi b’akasi. Buzira oburhabale bwabo, akagwarha binene by’okukola, bobola ngwerhe eshukrani oku bushiru bwabo n’okuntu baba tayari kurhabala.” Gurhe onachiyunva okubilolere akasi abagwasi b’akasi banakola omu chibaga chawe?​—1 Ti. 3:13.

7. Gurhe rhwakayerekana eshukrani oku bagwasi b’akasi? (Olole n’efoto.)

⁷ Chiro akaba oku rhwakachiyunva rhugwerhe eshukrani kw’abola bagwasi b’akasi, Ebiblia erhuhanwire ntya: “Muyerekane  eshukrani.” (Kol. 3:15) Mushamuka muguma w’echibaga w’omu chihugo che Finlande oyirikirwe Krzysztof anayerekana eshukrani yage mw’eyila njira: “Inantumira abandi amaruba changwa amamesaje mali m’olwandiko lwe Biblia, n’okuntu omugwasi w’akasi alimpebere omurhima changwa okuntu inansimiswa  n’akasi banakola.” Pascal na Jael b’omu chihugo che Nouvelle-Calédonie banasalirira abagwasi b’akasi bwenene. Pascal aderhere ntya: “Rhuchizindire kusalira bwenene eju y’abagwasi berhu b’akasi, rhwabwira Yehova koko bwenene okurhuhabo, rhwanamuhema abe haguma nabo anabarhabale.” Yehova anayunviriza amasala mali nk’amola, n’echibaga choshi chinapata enyungu.​—2 Ko. 1:11.

ABASHAMUKA B’ECHIBAGA “BANAKOLA BWENENE AHAGARHI KENYU”

8. Bulagurhe Paulo ayandikaga okw’abashamuka b’echibaga b’omu kagana ka burhazi “baliri bakola bwenene”? (1 Watesalonike 5:12, 13)

⁸ Abashamuka b’echibaga b’omu kagana ka burhanzi baliri bakolera echibaga bwenene. (Osome 1 Watesalonike 5:12, 13; 1 Ti. 5:17) Baliri “bayumangira” echibaga, k’okuderha, okuyumangira embuganano n’okurhola esimikiro bowe nka baraza ly’abashamuka. Baliri “bahanula” bene-babo na bali-babo omu kubahereza amahano mali wazi, aliko m’obuzigire omu kugenderera kulanga echibaga. (1 Te. 2:11, 12; 2 Ti. 4:2) Kweri abola balume baliri bakola kandi bwenene omu kushishikala emilala yabo n’okugenderera kulanga obwemere bwabo y’obwira bagwerhe haguma na Yehova buyorha bukomeere.​—1 Ti. 3:2, 4; Tit. 1:6-9.

9. Ngabane zihe abashamuka bagwerhe zene?

⁹ Zene, abashamuka bagwerhe binene by’okukola. Yibakola akasi k’okuhubiri. (2 Ti. 4:5) Banayerekana omufano gwinja omu kuhubiri n’obushiru, banapanga akasi k’amahubiri omu eneo y’echibaga n’okurhukoomeza kuhubiri n’okuyigiriza bwinja. Banakola nka bazuzi banacha emanja omu njira y’obubabale na buzira kabolo. Amango Omukristu amakola echaha chikomere, abashamuka banajira okwabo koshi yi bamurhabala ashube agalule obwira bwage bukomeere haguma na Yehova. Mw’akola kasanzi kan’ako, banajira okwabo koshi y’echibaga chiyorha chichere. (1 Ko. 5:12, 13; Gal. 6:1) N’echindi ch’akamaro, baba bamenyikene oku baba bangeri. (1 Pe. 5:1-3) Banageza amajambo mayumangire oku Biblia marheganyizwe bwinja, banachihangana kumenya buli muntu bwinja, n’okukola akasi k’obulagizi. Bashamuka baguma banakola omu kasi k’okuyumbaka, na k’okukwiziza Echumbi ly’Obwami, okurheganya embuganano zikulu, omu Komite y’Obunvikane n’Ebitaro, banakola omu Bigusho by’Okurhangula Abalwala, n’omu mandi makasi. Abashamuka banakola bwenene eju yerhu!

10. Mpanvu zihe zinarhuma rhwagwarha eshukrani oku bashamuka banakola bwenene?

¹⁰ Yehova alilebere okw’akarhuhere abangeri b’okurhushishikala bwinja “n’oku rhurhakachiyubahire changwa kudirhimana.” (Yer. 23:4) Mwali-werhu Johanna w’omu chihugo che Finlande, alichibwenere obukweri by’ebyola binwa amango nyina alwala obulwala bukomere. Aderhere ntya: “Chiro akaba oku byalinkomerere kubwira abandi okuntu naliri nachiyunva, mushamuka muguma ntali komerene naye alindembeere amango naliri namubwira ebirhumire nagwarha obuba. Asalira haguma nani, anantabala nchizere oku Yehova anzigiire. Ntachiyibukire bwinja eby’aderhaga, aliko nyibukire okw’echola chalintabere kumala obuba bwani. Nchizerere oku kweri Yehova yi wamurhumaga antabale mw’akola kasanzi kakwanene.” Gurhe abashamuka b’echibaga chawe banakurhabala?

11. Gurhe rhwakayereka abashamuka eshukrani? (Olole n’efoto.)

¹¹ Yehova alonzeze rhuyereke abashamuka eshukrani erhengere oku murhima “eju y’akasi kabo.” (1 Te. 5:12, 13) Mwali-werhu Henrietta naye olamire omu chihugo che Finlande, aderhere ntya: “Abashamuka banarhabala abandi oku bulonza, aliko echola chirhalonzeze kuderha oku bajira bisanzi binene n’emisi changwa oku nta bibazo bajira omukalamo. Mango maguma inambabwira konyine: ‘Omenyere  si? Oba mushamuka mwinja. Inchizerere k’omenyere echola.’” Mwali-werhu oyirikirwe Sera w’omu chihugo che Turquie aderhere ntya: “Abashamuka baba bakenere kuhebwa omurhima yi bagenderera kukola akasi kabo. Bobola rhwakabayandikira amaruba, rhwakabahamagala rhusangire akalyo haguma, changwa kuhubiri haguma nabo.” Hali omushamuka ogwerhe kw’eshukrani eju y’akasi kage kakomere anakola omu chibaga si? Olonze enjira wakamuyerekamo ok’ogwerhe eshukrani ku byoshi anakola.​—1 Ko. 16:18.

ABEMANGIZI B’EMIZUNGULUKO BANARHUKOMEZA

12. Chindi chigusho chihe ch’abalume Yesu alihanire yi chikomeza ebibaga? (1 Watesalonike 2:7, 8)

¹² Yesu Kristu alihere echibaga “empembo omu bantu” baliri bakola omu yindi yindi njira. Alikoleseze abashamuka b’omu Yerusalemu barhume Paulo, Barnaba n’abandi nka bemangizi b’emizunguluko. (Mdo. 11:22) Bulagurhe? Eju y’empanvu y’en’eyola enarhuma bashimika abagwasi b’akasi n’abashamuka, k’okuderha, okukomeza echibaga. (Mdo. 15:40, 41) Abola balume banachihaana bwenene yi bakola akola kasi. Mango maguma banaheba akalamo kabo omu buhanya yibayigiriza abandi n’okubaheba omurhima.​—Osome 1 Watesalonike 2:7, 8.

13. Makasi mahe maguma abemangizi b’emizunguluko bajira?

¹³ Abemangizi b’emizunguluko banabalama bwenene. Baguma banabalama amagana m’ebilometre yi bahika emunda ebibaga bili. Buli boso omwimangizi w’omuzunguluko anageza majambo manene, anakola akasi k’obulagizi, embuganano haguma na bapainiya, embuganano haguma n’abashamuka, n’embuganano z’amahubiri. Banarheganya amajambo, okupanga embuganano z’omuzunguluko n’eze eneo. Banayigiriza oku masomo ma bapainiya, banapanga embuganano ziminuzize haguma na  bapainiya omu muzunguluko n’okukola amandi makasi, k’okuderha, amahemerwe kukolwa juba juba, n’ezindi ngabane bahabirwe n’ebiro by’omurhabi.

14. Mpanvu zihe ziguma zakarhuma rhwayereka abemangizi b’emizunguluko eshukrani eju y’akasi kakomere bwenene banakola?

¹⁴ Gurhe ebibaga binayunguka kugerera empembo y’abemangizi b’emizunguluko? Mweme-werhu w’omu chihugo che Turquie aderhere ntya oku bilolere entangulo y’omwimangizi w’omuzunguluko: “Buli ntangulo yage enanshunika ngeze bisanzi binene ey’indi narhabala bene-berhu na bali-berhu. Nabuganene n’abemangizi banene b’emizunguluko, aliko ntaye n’omuguma mubo wachigerere kumbwira okwagwerhe binene by’okukola, changwa ku nta bisanzi agwerhe by’okuganira nani.” Mwali-werhu Johanna rhwabaga rhwaganirireko alijire omu mahubiri n’omwimangizi w’omuzunguluko, aliko nta muntu n’omuguma bali buganire ahamwababo. Naho aderhere ntya: “Buli mango nanyibuka olola lusiku. Bene-berhu babiri babaga eyi bamamala kuhama na naliri nabakumbula bwenene. Omwimangizi w’omuzunguluko alimpebere omurhima anantabala kubona, oku nkabaga mu zinola siku birhakagalikana okurhulame haguma n’abera, abantu b’omulala gwerhu, aliko omu gulu lihyahya nji rhwagwarha orozo l’okugeza bisanzi binene binagenderere haguma nabo.” Banene mu rhwabo bagwerhe bintu binene bikwirire banayibukira kw’abemangizi b’emizunguluko.​—Mdo. 20:37–21:1.

15. a) Nk’ok’olwandiko lwa 3 Yohana 5-8 luderhere, gurhe rhwakayereka abemangizi b’emizunguluko eshukrani? (Olole n’efoto.) b) Bulagurhe rhukwanene kuyerekana eshukrani ku baka bene-berhu bali bakola binene omu chibaga, na gurhe rhwakajira ntyo? (Olole echisanduku “ Oyibuke Bakabo.”)

¹⁵ Entumwa Yohana alihebere Gayo omurhima, ayerekane engeso y’okuhana ku bene-babo babalambagirire, “anashishikale olugenzi lwabo omu njira esimisize Mungu.” (Osome 3 Yohana 5-8.)  Njira nguma rhwakajiramo ntyo, kuli kuhamagala omwimangizi w’omuzunguluko rhusangire naye akalyo. Eyindi njira rhwakajiramo ntyo, kuli kushigikira emipango yoshi y’amahubiri amango m’entagulo. Mwali-werhu Leslie rhwabaga rhwaganirireko anayerekana eshukrani yage omu yindi njira. Aderhere ntya: “Inambwira Yehova abahereze byoshi bakenere. Nyono na bani, rhunabayandikira amaruba omu kubabwira kangana gurhe entangulo zabo zinarhurhabala.” Oyibuke okw’abemagizi b’emizunguluko bajira ebibazo n’okuchoka kuguma nerhu. Mango maguma banalwala, banayunva omulago n’okuvunika omurhima. Nkabaga ebinwa byawe binja changwa oluhembo lugeke, chakaba chishubizo ch’eby’omwimangizi wawe w’omuzunguluko aliri ahema omu sala!​—Mez. 12:25.

RHUKENERE “EMPEMBO OMU BANTU”

16. Nk’ok’olwandiko lwa Mezali 3:27 luderhere, bibazo bihe bene-berhu bakachibaza?

¹⁶ Omu gulu lyoshi, rhukenere bene-berhu banene b’okukola nka “mpembo omu bantu.” Akaba oli mwene-werhu obatizwe, wakakolesa “emisi yawe y’orhabala”? (Osome Mezali 3:27.) Ogwerhe omuhigo g’okukola bwenene si, y’oba mugwasi w’akasi? Akaba okala oli mugwasi w’akasi, oli tayari kukola bwenene y’ohikira omuhigo g’okukolera bene-benyu nka mushamuka w’echibaga si? c Oli tayari kujira ebi wahindamula omu kalamo kawe y’ojaza eformilere y’okuja kusoma Amasomo m’Abaeneza Enjili y’Obwami si? Amola masomo makukoomeza n’okukurhabala yi Yesu ashuba ku kukolesa bwenene. Akaba oli wachiyunva ok’orhakagala kukola ebyola byoshi, osalire Yehova. Omuheme okurhabale n’eroho lyage lichesibwa, y’ogala kukola akasi koshi koshi wakahaabwa.​—Lu. 11:13; Mdo. 20:28.

17. Bichi “empembo omu bantu” ziyerekene okubilolere Omwami werhu Yesu Kristu?

¹⁷ Bene-berhu Yesu ashimikire nka “mpembo omu bantu” chili chintu chiyerekene oku y’eli arhuyerekeza mu zinola siku z’obuzinda. (Mt. 28:20) Rhugwerhe shukrani nene okubona rhugwerhe Omwami ogwerhe obuzigire, onahaana, omenyere byoshi rhukenere, warhuhere na bene-berhu b’okurhurhabala. Bobola rhulonze orozo l’okuyerekana eshukrani kw’abola balume banakola bwenene. Rhurhanahira rhukabula eshukrani ku Yehova oli shoko ya “buli mpembo nyinja na buli mpano eshinganene.”​—Yak. 1:17.