MWAZI G’OKUYIGA 40
OLWIMPO 30 Mungu Wani, Darha Kandi Mwira Wani
Yehova “Anafumya Abavunikire Omurhima”
“Anafumya abavunikire omurhima; anarhuba ebihulu byabo.”—ZB. 147:3.
EBIRHWAYIGA
Yehova analaga bwenene kubalala bavunikire omurhima. Gunola mwazi gwarhuyereka gurhe Yehova anarhurhuliriza, na gurhe nerhu rhwakarhuliriza abandi.
1. Gurhe Yehova anachiyunva okubilolere abakozi bage?
BICHI Yehova anabona amango amalola abakozi bage bali oku gulu? Anarhubona amango rhugwerhe obusime n’amango rhugwerhe emilago. (Zb. 37:18) Anayunva asimisizwe nerhu ey’abona okuntu rhuli rhwajira okwerhu koshi yi rhumukolera chiro akaba rhuli rhwahurana ebibazo! N’ahanene ab’alonzeze kurhurhabala n’okurhurhuliriza.
2. Gurhe Yehova anarhabala balala bavunikire omurhima, na gurhe rhwakayunguka n’obola burhabale bwage?
2 Zaburi ye 147:3 ederhere oku Yehova ‘arhuba ebihulu’ bya balala bavunikire omurhima. Olola lwandiko luyerekene gurhe Yehova anarhabala balala bavunikire omurhima. Gurhe rhwakajira yi rhuyunguka n’obola burhabale bwa Yehova? Rhuganire k’ogula mufano. Dogtere ogwerhe obumenyi akajira okwage koshi y’arhabala muntu mulebe ovunikire afume. Y’oyola muntu afuma, bimuhemere akulikire bwinja bwinja obwerekezi bwa Dogtere. Mu gunola mwazi, rhwabona bichi Yehova aderhere omu Chinwa chage okubilolere balala bavunikire omurhima, rhwabona na gurhe rhwakakolesa amola mahano mage m’obuzigire.
YEHOVA ARHUYIBWISE OKU RHULI B’AKAMARO BWENENE
3. Bulagurhe baguma banawaza oku ntacho bamalire?
3 Rhulamire omu gulu lirhali m’obuzigire, n’echokugayisa, bantu banene banachiyunva oku ntacho bamalire. Mwali-werhu oyirikirwe Helen a aderhere ntya: “Nakuliraga omu mulala gurhali m’obuzigire. Darha aliri mukali bwenene na buli lusiku agendaga ambwira oku ntacho malire.” Nkabaga kuguma na Helen, nawe wachigerere kukolerwa kubi, banazigana kukuhezeza erenge, changwa onachiyunva orhazigiirwe. Akaba ntyo ku bili, nkabaga byakakukomerera kuyemera oku hali muntu mulebe okulagireko.
4. Nk’ok’olwandiko lwa Zaburi ya 34:18 luderhere, bwizere buhe Yehova arhuhere?
4 Chiro abandi bantu bakukolera kubi, okwanene kuchizera oku Yehova akuzigiire anakubwene ok’oli w’akamaro. Ali “hofi na balala bavunikire omurhima.” (Osome Zaburi 34:18.) Akaba oli wachiyunva “ovunikire omurhima,” oyibuke oku Yehova alibwene engeso zawe zinja na yewe yenyine yi wakulerhaga emwage. (Yoh. 6:44) Ali tayari kukurhabala amango moshi, bulala oli w’akamaro emwage.
5. Bichi rhwakayiga kugerera okuntu Yesu aliri akolera abantu baliri bachiyunva nka ntacho bamalire?
5 Rhwakayiga okubilolere okuntu Yehova anachiyunva omu kuganira oku mufano gwa Yesu. Amango Yesu aliri hanola oku gulu, aliri akolera oku bwinja balala baliri bachiyunva nka ntacho bamalire. (Mt. 9:9-12) Amango omukazi walilwere obulwalala bukomere ahuma oku mukunjo g’omwambaro gwage ey’anagwerhe obulangalire b’okufuma, Yesu amurhuliriza anamusingiza oku bwemere bwage. (Mk. 5:25-34) Yesu aliyerekene bwinja bwinja engeso z’Eshe. (Yoh. 14:9) Bobola ochizere oku Yehova asimisizwe nawe, anabona engeso zawe zinja, kuhebamo n’obwemere bwawe n’obuzigire omuherheko.
6. Gurhe wakajira amango wamachiyunva oku ntacho omalire?
6 Gurhe wakajira akaba buli mango onachiyunva oku ntacho omalire? Osome n’okukengera oku mandiko me Biblia makakurhabala ochizere ok’oli w’akamaro omu masu ma Yehova. b (Zb. 94:19) Orhachihuzanyaga n’abandi, orhanachihandaga oku by’orhakagala kujira. Yehova arhalonzeze ok’ojire ebirhalukire obuhashe bwawe. (Zb. 103:13, 14) Akaba hali omuntu wachigerere kukukolera kubi bwenene, orhachivumagulaga oku liri gosa lyawe! Oyibuke oku Yehova nj’achira olubanja balala banakolera abandi kubi, aliko anarhabala balala bakolerwe kubi. (1 Pe. 3:12) Mwali-werhu Sandra bakoleraga kubi bwenene achili mwana aderhere ntya: “Buli mango naliri nahema Yehova antabale inchibone nk’okuntu anambona.”
7. Nka gurhe ebi rhwagereremo omu kalamo byakarhurhabala omu kasi ka Yehova?
7 Orhagwarhaga engangane oku Yehova akakukolesa omu kurhabala abandi. Akuhere olukengo l’okukola haguma naye omu kasi k’okuhubiri. (1 Ko. 3:9) Nkabaga eju y’ebibazo bikomere wagereremo omu kalamo, byakakuyorohera kuyunva gurhe abali balibuka bali bachiyunva. Wakajira binene y’obarhabala. Helen, rhwabaga rhwaganirireko embere, apatire oburhabale na zene ali tayari kurhabala abandi. Aderhere ntya: “Nagendaga nazigana kuchiyunva oku ntacho malire, aliko Yehova antabere nchiyunve oku nzigirwe n’okunkolesa omu kurhabala abandi.” Helen agwerhe obusime b’okukola nka painiya w’okukahunda.
YEHOVA ALONZEZE RHUYEMERE OBUBABALE BWAGE
8. Bichi Yehova arhubwirire omu Isaya 1:18?
8 Baguma omu bakozi ba Yehova banachiganya bwenene eju y’ebijiro byabo byamira, babe babijiraga embere changwa enyuma y’okubatizwa. Aliko rhurhakwanene kuyibagira oku Yehova aba arhuzigire bwenene, n’okwahanire enchungu eju y’okubabalira ebyaha byerhu. Rhwakachizera okw’alonzeze rhuyemere eyola mpano. Yehova arhubwirire okw’enyuma y’okumala “kugorora ebintu” c haguma naye, ababalira loshi loshi ebyaha byerhu. (Osome Isaya 1:18.) Rhugwerhe shukrani nene ku Darha w’obuzigire Yehova, bulala anayibirira ebyaha berhu bya mira! Aliko, arhayibirira haban’akatyu ebinja rhwajirire.—Zb. 103:9, 12; Ebr. 6:10.
9. Bulagurhe rhurhakwenene kugenderera kuwaza oku byaha rhwajiraga mira?
9 Akaba oli wayunva omulago eju y’ebyaha wajiraga mira, ochihangane kuwaza oku by’oli wajira zene n’oku by’okwanene kujira omu mango mayinjire. Rhuganire oku mufano gw’entumwa Paulo. Aliri achiyunva kubi bulala alilibwize Abakristu bwenene, aliko alimenyere oku Yehova abaga ey’amubabalire. (1 Ti. 1:12-15) Paulo aligenderere kuwaza okubilolere ebyaha byage bya mira si? Nanga, arhachigendereraga kubiwazako kuguma n’okw’arhaligenderere kuwaza oku by’ajiraga yaba Mufarisayo okengerwe. (Flp. 3:4-8, 13-15) Ahali h’okujirantyo, Paulo agenderera kujira akasi k’okuhubiri n’omwete n’okuseza obwenge bwage oku mango mayinjire. Kuguma na Paulo, rhurhakagala kuhindamula ebyagerere. Aliko zene wakasingiza Yehova n’oku musimisa. Wakawaza n’oku mango menja mayinjire akulaganyize.
10. Gurhe wakajira akaba ebijiro byawe bya mira byalivunire abandi omurhima?
10 Wakachiyunva kubi bwenene akaba ebijiro byawe bilebe bya mira byalivunire abandi omurhima. Bichi byakakurhabala? Ojire koshi wakagala y’okwiza ebintu, kuhebamo n’okuhema obonjo birhengere oku murhima. (2 Ko. 7:11) Oheme Yehova arhabale balala boshi ebijiro byawe byavunire omurhima. Akakurhabala woyo n’abawavunaga omurhima mugenderere kumukolera eyi munagwerhe omurhula.
11. Bichi rhwakayiga kugerera omufano g’omulebi Yona? (Olole n’efoto y’oku chiganda.)
11 Oyige kugerera amagosa mawe ma mira, onabe tayari kuleka Yehova akukolese omu njira alonzeze. Rhuganire oku mufano g’omulebi Yona. Ahali h’okubalamira e Ninawi emunda Mungu amurhumaga, arhola eyindi njira. Yehova aha Yona obuhane, Yona anayiga kugerera egosa lyage. (Yon. 1:1-4, 15-17; 2:7-10) Yehova arhalekaga kukolesa Yona nka mulebi. Mungu ashuba kumuha orozo l’okuja e Ninawi, lero Yona akenga ahohan’aho. Chiro akaba alichiganyize eju y’egosa ajiraga, lero ajira ebi Yehova amubwiraga ajire.—Yon. 3:1-3.
Omulebi Yona amalire kuyokolwa kurhenga omu nda y’olufi luzibu zibu, Yehova ashuba kumubwira aje e Ninawi kutangaza oburhumwa bwage (Olole echifungo che 11)
YEHOVA ANARHURHULIRIZA KUGERERA EROHO LYAGE LICHESIBWA
12. Gurhe Yehova anarhuha omurhula amango rhwamahurana ebintu bivunire omurhima bwenene changwa rhwamaheza omuzigirwa? (Wafilipi 4:6, 7)
12 Kugerera eroho lyage lichesibwa, Yehova anarhurhuliriza amango rhwamahurana ebintu bivunire omurhima bwenene changwa amango rhwamaheza omuzigirwa. Rhuganire oku byahikiraga Ron na Carol. Ech’okugayisa, mugala wabo achiniga. Baderhere ntya: “Rhwali rhwagerere omu bibazo bikomere bwenene, aliko echola chalirhuchubukire. Eyi rhwakabulire ero, rhwaliri rhwasalira na kweri rhwaliri rhwayunva omurhula guderherwe omu Wafilipi 4:6, 7.” (Osome.) Akaba oli wahurana n’echigeregezo chivunire omurhima, wakafungulira Yehova omurhima gwawe omu sala buli kasanzi n’amango moshi olonzeze. (Zb. 86:3; 88:1) Buli mango oheme Yehova eroho lyage lichesibwa. Arhafunda kukuha ebi wamuhemere.—Lu. 11:9-13.
13. Gurhe eroho lichesibwa lyakarhurhabala rhugenderere kuharamya Yehova oku bwimana? (Waefeso 3:16)
13 Wachigerere kuhurana echibazo chikomere chali kulekere ovunikire omurhima si? Eroho lichesibwa lyakakuha emisi y’okugenderera kukolera Yehova oku bwimana. (Osome Waefeso 3:16.) Rhuganire oku mufano gwa mwali-werhu oyirikirwe Flora. Yewe n’eba baliri bakola haguma nka bamisiyonere. Amango eba ajira obugonyi, bashanda obuhya. Mwali-werhu Flora aderhere ntya: “Nalichiyunvirhe kubi bwenene eju y’ebyanjiriraga na nta chindi chintu naliri nawazako. Nalisalirire Yehova omu kumuhema eroho lyage lichesibwa yi ngala kulembera. Yehova alimpere byoshi nalikenere yi chiyunva bwinja, n’okuntabala kulembera ebintu naliri nabona oku birhakagalikana oku murhondero.” Mwali-werhu Flora y’achiyunva oku Mungu amurhabere ashube amulangalire bwenene, n’okuchizera oku nj’amurhabala omu bindi bibazo byage byoshi. Aderhere ntya: “Ebinwa bili omu Zaburi ye 119:32 biyerekene bwinja bwinja oburhabale Yehova ampaga. Olola lwandiko luderhere ntya: ‘Nagenderera omu njira y’amarhegeko mawe, bulala omarheganyize enafasi omu murhima gwani.’”
14. Gurhe rhwakaleka eroho lya Mungu lirhurhabale?
14 Bichi rhukwanene kujira amango rhwamamala kuhema Yehova eroho lyage lichesibwa? Ojire ebintu byakurhabala opate oku bunene eroho lichesibwa lya Mungu. Ebyola bihebere m’okuja oku mbuganano n’okuhubiri abandi. Oyunjuze omu bwenge bwawe amawazo ma Yehova omu kusoma Echinwa chage buli lusiku. (Flp. 4:8, 9) Amango oli wasoma, ochihangane kumenya abantu baganirirwe omu Biblia balihurene ebibazo bikomere, onakengere okuntu Yehova alibarhabere balembere. Sandra rhwabaga rhwaganirireko, aliri alibuka bulala aligwerhe bibazo binene omu kalamo kage. Aderhere ntya: “Engani ya Yosefu yalimpebere omurhima. Arhayemeraga ebigeregezo n’okukolerwa kubi aliri ahurana birhume obwira bwage haguma na Yehova bwazamba.”—Mwa. 39:21-23.
YEHOVA ANARHURHULIRIZA KUGERERA BENE-BERHU NA BALI-BERHU
15. Bande bakarhurhuliriza na nka gurhe bakarhurhabala? (Olole n’efoto.)
15 Amango oli wahurana ebibazo, bene-benyu na bali-benyu bakaba “shoko y’echirhulirizo chinene.” (Kol. 4:11) Bene-berhu na bali-berhu eli njira nguma Yehova anarhuyereka m’obuzigire bwage. Bakarhurhuliriza omu kugeza ebisanzi haguma nerhu n’omu kurhuyunviriza amango rhuli rhwababwira okuntu yirhwachiyunva. Bakarhurhuliriza kugerera olwandiko lwe Biblia changwa bakasalira haguma nerhu. d (Ro. 15:4) Hali amango mwene-werhu changwa mwali-werhu akarhuyibusa amawazo ma Yehova, n’echola chanarhurhabala rhugenderere kulembera. Bene-berhu na bali-berhu banarhurhabala omu yindi njira, omufano nk’okurhuha akalyo k’omubiri yi rhushuba kuchiyunva bwinja.
Abera bakulire ekiroho bakanalangalirwa, bakarhuhereza echirhulirizo chinene, n’oburhabale (Olole echifungo che 15)
16. Bichi rhukwanene kujira yi rhupata oburhabale bw’abandi?
16 Y’abandi barhurhabala, birhuhemere nkabaga rhubaheme oburhabale. Bene-berhu na bali-berhu barhuzigire banalonzeze kurhurhabala. (Mez. 17:17) Aliko nkabaga barhakamenya gurhe rhuli rhwachiyunva na bichi rhukenere. (Mez. 14:10) Akaba oli wachiyunva ovunikire omurhima, wakaganira n’abera benja n’oku babwira gurhe oli wachiyunva. Obabwire bichi okenere. Wakachishoga kuganira na mushamuka muguma changwa babiri b’echibaga ab’obwene oku wakachiyunva huru kuganira nabo. Bali-berhu baguma banachiyunva barhulerere amango bamaganira na mwali-werhu okulire ekiroho.
17. Bibazo bihe byakarhuma abandi barharhuheba omurhima, na gurhe rhwakabihima?
17 Orhachikulaga haguma na bene-benyu na bali-benyu. Eju y’ebibazo bikomere yi rhwahurana, hali oku rhwakachiyunva rhurhalonzeze kugeza ebisanzi haguma n’abandi. Mango maguma bene-benyu changwa bali-benyu byakabakomerera kumenya gurhe yi wachiyunva changwa bakaderha echintu chikuvunire omurhima. (Yak. 3:2) Orhayemeraga ebibazo bili nk’ebyola byarhuma orhapata oburhabale okenere. Omushamuka w’echibaga oyirikirwe Gavin, walilwere obulwala b’omulago g’omubwenge, aderhere ntya: “Mango manene ntaliri nalonza kuganira na bera-bani changwa okugeza ebisanzi nabo.” Aliko Gavin alijirire okwage koshi yaba haguma na bene-babo. N’amango moshi aliri ajira ntyo, aliri achiyunva bwinja. Mwali-werhu oyirikirwe Amy aderhere ntya: “Eju y’ebi nagereremo, binankomerera kulangalira abantu. Aliko indi nayiga kuzigira n’okulangalira bene-berhu na bali-berhu nk’oku Yehova anajira. Okujira ntyo kwansimisa kunasimise na Yehova.”
EBILAGANE BYA YEHOVA BY’AMANGO MAYINJIRE BYAKARHURHULIRIZA
18. Bichi rhwakalangalira by’amango mayinjire, na bichi rhwakajira zene?
18 Rhwakalangalira amango mayinjire omu kumenya oku hanola hofi-hofi Yehova arhufumya amalumwa merhu moshi m’omubwenge na m’omubiri. (Ufu. 21:3, 4) Mw’agola mango, ebintu bivunire omurhima rhwagereremo “birhakachiyinja omu murhima.” (Isa. 65:17) Nk’oku rhwabwene, chiro na zene Yehova ‘anarhuba ebihulu byerhu.’ Yehova ahebere h’ebintu binene by’okurhurhuliriza n’okurhurhabala. Ojire okwawe koshi y’oyemera oburhabale bwage. Orhahira okagwarha engangane haba n’eliguma “okw’aba akulagireko.”—1 Pe. 5:7.
OLWIMPO 7 Yehova ye Misi Yani
a Mazino maguma mahindamwirwe.
b Olole echisanduku “ Yehova Anakubona ok’Oli Wakamaro.”
c Yi “rhugorora ebintu” haguma na Yehova, rhukwanene kuyerekana ku rhwahungamire omu kumuhema arhubabalire ebyaha byerhu n’okuhindamula olugenzi lwerhu. Akaba rhwajirire echaha chikomere, rhukwanene kuhema abashamuka b’omu chibaga oburhabale.—Yak. 5:14, 15.
d Omufano, olole amandiko mayerekenwe omu chigabi “Mahangaiko” (Omulago) na “Kitulizo” (Echirhulirizo) omu chitabu Maandiko ya Kutusaidia mu Maisha ya Kikristo. (Amandiko m’Okurhurhabala omu Kalamo ke Chikristu)
