ABAIZRAELI balisimire omuziki bwenene. Ebiblia ederhere turu zinene oku bantu baligwerhe ebikoleso by’omuziki n’okuyimpa enyimpo. Chigabi chinene che Biblia chikolerwe n’enyimpo. Omufano, e Zaburi, Olwimpo lwa Sulemani, echitabu cha Maombolezo byayandikwaga yi bayinja babiyimpa. Echitabu chiderhere okubilolere akalamo k’amango Ebiblia yaliri yayandikwa, chiderhere okwe Biblia eyerekene bwinja bwinja okw’Abaizraeli baliri bakolesa omuziki omu rhwasi rhwabo rhunene omu kalamo kabo.

Omuziki omu kalamo ka buli lusiku. Abaizraeli baliri baziha omuziki yi bayerekana okuntu yibachiyunva. (Isa. 30:29) Abakazi baliri bashurha engoma, bayimpa enyimpo z’omwishingo, n’okuzina amango m’efete, nk’amango bamashimika omwami muhyahya, amango abasoda bahimene oku vita, n’amango m’efete z’obuharamye. (Amu. 11:34; 1 Sa. 18:6, 7; 1 Fa. 1:39, 40) Abaizraeli nabo baliri bayimpa enyimpo omu kuyerekana amalumwa mabo amango muntu mulebe akafire. (2 Ny. 35:25) Biyunvikene okw’Abaizraeli balisimire omuziki bwenene.

Abami be Izraeli balisimire omuziki. Abami be Izraeli baliri basima kuyunva omuziki. Mwami Sauli ahamagala Daudi oku bwami akole kw’akasi k’okuziha omuziki. (1 Sa. 16:18, 23) Buzinda amango Daudi aba mwami, akola ebikoleso by’okuziha omuziki, atunga enyimpo zinja bwenene, apanga n’ekorale yaliri yayimpa oku hekalu. (2 Ny. 7:6; Amo. 6:5) Mwami Sulemani aligwerhe abayimpaji b’abalume n’ab’abakazi oku bwami.​—Muh. 2:8.

Abaizraeli baliri bakolesa omuziki omu kuharamya Yehova. Echintu chaliri ch’akamaro bwenene oku Baizraeli, kwaliri kukolesa omuziki omu kuharamya Yehova. Haliri balume 4 000 baliri baziha omuziki omu hekalu e Yerusalemu. (1 Ny. 23:5) Baliri bashurha e sembale, echidari, olunanga n’empaanda. (2 Ny. 5:12) Aliko abola bayimpaji bagwerhe obufundi arhali bowe bonyine babaliri baharamya Yehova omu kukolesa omuziki. Baizraeli banene baliri bayimpa eyi bali babalama baja e Yeruslemu oku fete yabo ya buli mwaka. (Zb. 120-134) N’okubilorere eby’Abayahudi bayandikaga, Abaizraeli baliri bayimpa Ezaburi ziyirikirwe Haleli a amango baliri balya ebilyo bye Pasaka.

Chiro na zene, Omuziki guli gw’akamaro oku bantu ba Mungu. (Yak. 5:13) Rhunayimpira Yehova enyimpo z’okumusingiza. (Efe. 5:19) Omuziki gunarhuma rhwachiyunva rhuli omu buguma na bene-berhu na bali-berhu. (Kol. 3:16) Amango rhuli rhwayimpa, rhwaziha, changwa kuyunviriza enyimpo ziderhere okubilolere Yehova, binarhuheba omurhima n’okurhurhabala kulembera ebibazo byerhu. (Mdo. 16:25) Okuyimpa eli njira nyinja bwenene y’okuyerekana obwemere n’obuzigire bwerhu ku Yehova.