MWAZI G’OKUYIGA 46
OLWIMPO 49 Okusimisa Omurhima gwa Yehova
Bene-berhu—Muli Mwachihangana Si yi Muba Bagwasi b’Akasi?
“Hali busime bunene omu kuhana kulusha obuba omu kuhabwa.”—MDO. 20:35.
EBIRHWAYIGA
Rhwabona gurhe rhwakarhabala bene-berhu babatizwe bayeneze ebihemerwe yi baba bagwasi b’akasi.
1. Gurhe entumwa Paulo aliri achiyunva okubilolere abagwasi b’akasi?
ABAGWASI b’akasi banakola akasi k’akamaro bwenene omu bibaga. Etumwa Paulo aliri abona abola bene-berhu bemana okubali b’akamaro. Omufano, amango ayandikira Abakristu be Filipi alilegereze abagwasi b’akasi n’abashamuka b’echibaga.—Flp. 1:1.
2. Gurhe mwene-werhu oyirikirwe Luis aliri achiyunva okubilolere engabane yage y’okukola nka mugwasi w’akasi?
2 Babe misole changwa bashaja, bene-berhu babatizwe banagwarha busime bunene omu kukola nka bagwasi b’akasi. Omufano, Devan abaga mugwasi w’akasi y’agwerhe myaka 18. Aliko mwene-werhu oyirikirwe Luis yewe abaga mugwasi w’akasi y’agwerhe myaka 50. Luis ayerekene okuntu banene banachiyunva omu kuderha ntya: “Nanyunva luli lukengo lunene bwenene okukola nka mugwasi w’akasi, ahanene amango namawaza oku buzigire bunene echibaga chanyerekere!”
3. Bibazao bihe rhwaganirako mu gunola mwazi?
3 Akaba oli mwene-werhu obatizwe aliko orhaza kuba mugwasi w’akasi, wakachihebera h’omuhigo g’okuba mugwasi w’akasi si? Bichi byakushunika ojire ntyo? Na ngeso zihe ziderherwe omu mandiko okwanene kuyeneza? Mu gunola mwazi rhwashubiza kw’ebyola bibazo. Aliko lekaga rhurhondere omu kuganira oku makasi abagwasi b’akasi banakola.
MAKASI MAHE ABAGWASI BAKASI BANAKOLA?
4. Makasi mahe abagwasi b’akasi banakola? (Olole n’efoto.)
4 Omugwasi w’akasi ali mwene-werhu obatizwe, washimikirwe n’eroho lichesibwa yarhabala abashamuka kushikakala makasi manene m’akamaro omu chibaga. Bagwasi b’akasi baguma banachizera okw’abahubiri bagwerhe e eneo etosheze y’okuhubiri n’oku bagwerhe ebitabu bakolesa. Abandi banarhabala omu kujira obusafi n’okukwiziza Echumbi ly’Obwami. Kandi abagwasi b’akasi banakola oku kasi k’okukaribisa abantu, abandi banakola oku sonorizasiyo n’evideo amango m’embuganano z’echibaga. Orhola rhwasi rhoshi rhuba rhwinja bwenene. Aliko ech’akamaro bwenene, abagwasi b’akasi baba balume bazigire Yehova banalamire nk’okw’amakanuni mage maderhere. Baba bazigire na bene-babo na bali-babo b’Abakristu bwenene. (Mt. 22:37-39) Gurhe mwene-werhu obatizwe akajira y’aba mugwasi w’akasi?
Abagwasi b’akasi yibayiganya Yesu omu kuchihana oku bulonza yi bakolera abandi (Olole echifungo cha 4)
5. Gurhe mwene-werhu akajira y’aba mugwasi w’akasi?
5 Ebiblia erhubwirire eby’abalonzeze kuba bagwasi b’akasi bakwanene kuyeneza. (1 Ti. 3:8-10, 12, 13) Wakahikira kuba mugwasi w’akasi omu kuyiga okubilolere engeso ziderherwe omu Mandiko naho wanaja wakola bwenene y’ohikira eyola ngabane. Aliko okwanene kurhanga kuchibaza bulagurhe olonzeze kuba mugwasi w’akasi.
BULAGURHE OLONZEZE KUBA MUGWASI W’AKASI?
6. Mpanvu ehe ekwanene kukushunika kukola buli kasi omu kurhabala bene-benyu na bali-benyu? (Matayo 20:28; olole n’efoto y’oku chiganda.)
6 Omufano gwerhu gukulu Yesu Kristu, alishunikirwe n’obuzigire, k’okuderha, obuzigire kw’Eshe n’obuzigire oku bantu. Obola buzigire bwalimushunikire kukola bwenene n’okukola amakasi m’eshishi eju y’abandi. (Osome Matayo 20:28; Yoh. 13:5, 14, 15) Akaba onashunikwa n’obuzigire, Yehova akugisha, anakurhabala kuhikira omuhigo g’okuyeneza ebihemerwe y’oba mugwasi w’akasi.—1 Ko. 16:14; 1 Pe. 5:5.
Kugerera omufano, Yesu aliyigirize entumwa zage kukolera abandi oku bwirhohye ahali h’okulonza kuchiheba embere (Olole echifungo cha 6)
7. Bulagurhe mwene-werhu arhakwanene kulonza kuba mugwasi w’akasi y’abandi bamusingiza?
7 Mu linola gulu, abantu bagwerhe echeo banasima abandi babasingize. Aliko arhali ntyo ku biba omu lubaga lwa Yehova lowe. Mwene-werhu ogwerhe obuzigire oku bandi kuguma n’oku Yesu aliri, arholanza kurhegeka abandi changwa kulonza bamubone okw’ali w’akamaro. Nk’omuntu analonza okw’abandi bamusingize changwa bamubone okw’ali w’akamaro amashimikwa omu chibaga, nkabaga arhakaziga akola akasi k’eshishi changwa kukola orhwindi rhwasi rhukenerwe kukolwa eju y’entama z’akachiro za Yehova. Akabona amakasi mali ntyo oku mali m’eshishi bwenene. (Yoh. 10:12) Yehova arhakagisha obushiru b’omuntu yeshi yeshi oli wajira ntyo y’abandi bamubona okw’ali w’akamaro changwa yi bamusingiza.—1 Ko. 10:24, 33; 13:4, 5.
8. Hano lihe Yesu alihere entumwa zage?
8 Chiro n’abera ba Yesu ba hofi, nabo mango maguma balilonzeze kupata engabane omu njira erhakwanene. Rhuganire okubilolere eby’entumwa za Yesu zajiraga, k’okuderha, Yakobo na Yohana. Balibwirire Yesu abahereze engabane eli kwago kwago omu Bwami bwage. Yesu arhabasingizaga okubilolere ebi bamuhemaga. Ahali h’okubasingiza abwira entumwa zage 12 ntya: “Buli yeshi olonzeze kuba mukulu ahakagarhi kenyu akwanene kuba mukozi w’ababo, na buli yeshi olonzeze kuba w’oburhanzi ahakagarhi kenyu akwanene kuba muja wa boshi.” (Mk. 10:35-37, 43, 44) Bene-berhu bagwerhe amawazo menja banagwerhe enyorha y’okukolera abandi, banarhabala echibaga mu njira zinene.—1 Te. 2:8.
BICHI BYAKAKOMEZA ENYORHA YAWE Y’OKULONZA KURHABALA ABANDI?
9. Gurhe wakakomeza enyorha yawe y’okulonza kurhabala abandi?
9 Kweri ozigire Yehova, onalonzeze kukolera abandi. Aliko, nkabaga orhakagwarha enyorha y’okukola akasi abagwasi b’akasi banakola. Bichi byakakurhabala kukuza enyorha y’okukola akasi abagwasi b’akasi banakola? Bulagurhe orhakawaza oku busime wagwarha amango oli wakolera bene-benyu na bali-benyu? Yesu aderhere ntya: “Hali busime bunene omu kuhana kulusha obuba omu kuhabwa.” (Mdo. 20:35) Yesu alilamire nk’okw’akola kanuni kaderhere. Alipatire obusime b’okuli omu kukolera abandi, nawe wakabupata.
10. Gurhe Yesu aliyerekene okw’aligwerhe obusime omu kukolera abandi? (Marko 6:31-34)
10 Rhuganire oku mufano guyerekene gurhe Yesu aligwerhe obusime omu kukolera abandi. (Osome Marko 6:31-34.) Lusiku luguma Yesu n’entumwa zage balichokere. Baliri omu njira eyi bali baja ahali bwihunze yi bahumuka. Aliko abantu kamama babarhanga eyola munda eyi balangalire oku Yesu abayigiriza. Akababwirire ntabayigiriza. Bulala yewe n’entumwa zage “barhaligwerhe chiro n’ebisanzi by’okulya.” Changwa akabayigirize wazo liguma changwa mabiri naho anababwira, mujage mwagenda. Aliko bulala alishunikirwe n’obuzigire “arhondera kubayigiriza bintu binene.” Analigenderere kubayigiriza kuhika “esa z’egolo bwenene.” (Mk. 6:35) Ajiraga ntyo arhali mpu bulala alikwanene kujira ntyo, s’aliko bulala “alibayunvirhire obonjo.” Alilonzeze kubayigiriza bulala alibazigire. Okukolera abandi kwalilerhere Yesu busime bunene bwenene.
11. Gurhe Yesu alirhabere abonviriza bage omu njira ebonekene? (Olole n’efoto.)
11 Amango Yesu aliri ahubiri abola bantu kamama, arhabayigirizaga konyine. Alibahere n’ebintu by’omubiri bakenere. Alibahere n’ebilyo kugerera echisomerene anabwira abanafunzi bage babagabirebyo. (Mk. 6:41) Omu kujira ntyo, ayigiriza abanafunzi bage kukolera abandi. Alishubire kubayereka okw’amakasi mali kuguma na m’abagwasi b’akasi banajira, mali m’akamaro. Waza oku busime entumwa zalipatire, amango bakola haguma na Yesu omu kugaba ebilyo kugera aha “boshi balya banayugurha”! (Mk. 6:42) Kweri amala arhali m’amango m’oburhanzi Yesu alihebere enyungu z’abandi oku nafasi y’oburhanzi ahali h’ezage. Omukalamo kage koshi hanola oku gulu, Yesu aliri akolera abandi. (Mt. 4:23; 8:16) Yesu alipatire obusime n’okutosheka amango aliri ayigiriza abantu analiri ashishikala ebi bakenere oku bwirhohye. Kweri nawe wakagwarha busime bunene akaba oli tayari kukolera abandi omu kuba mugwasi w’akasi.
Amango ozigire Yehova onagwerhe n’enyorha y’okukolera abandi, wajira byoshi wakagala y’orhabala bene-benyu na bali-benyu (Olole echifungo che 11) a
12. Bulagurhe ntaye n’omuguma murhwewe okwanene kuwaza oku nta buhashe agwerhe b’okurhabala echibaga?
12 Akaba ochiyunvirhe ku nta buhashe ogwerhe b’okurhabala abandi omenye wavunika omurhima. Kweri ogwerhe engeso zakarhuma waba w’akamaro oku chibaga. Wakapata enyungu omu kusalira bwenene n’okusoma amawazo ma Paulo mabonekene omu 1 Wakorinto 12:12-30. Ebinwa bya Paulo biyerekene wazi oku woyo kuguma n’abandi bakozi ba Yehova boshi, mukenerwe munali b’akamaro omu chibaga. Akaba orhali mugwasi w’akasi bulala hali ngeso ziguma zikenerwe orhazayeneza, omenye wavunika omurhima. Aliko si, bulagurhe orhakajira koshi ogalire y’okolera Yehova na bene-benyu? Echizere okw’abashamuka bakuwazako banakuhereza n’orhwasi wakagala kuyeneza.—Ro. 12:4-8.
13. Bukweri buhe buliho okubilolere engeso zoshi abalume banashimikwa banayeneza?
13 Rhuganire oku yindi mpanvu eyerekene bulagurhe okwanene kuyeneza ebihemerwe y’okola nka mugwasi w’akasi. Hofi engeso zoshi zihemerwe oku bagwasi b’akasi, Abakristu boshi bakaziyeneza. Bobola Abakristu boshi bakwanene kuyegera Yehova n’okugwarha obusime b’okuhana n’omu kuyerekena omufano gwinja omu kalamo kabo k’Echikristu. Ahanene bichi mwene-werhu akajira y’ahikira kuba mugwasi wakasi?
EBIWAKAJIRA Y’OBA MUGWASI W’AKASI
14. “Okuba muntu okwanene” k’okuderha gurhe? (1 Timoteo 3:8-10, 12)
14 Lekaga rhuganire ku ngeso ziguma zibonekene omu lwandiko lwa 1 Timoteo 3:8-10, 12. (Osome.) Omugwasi w’akasi akwanene “kuba muntu okwanene.” Echola chinwa chakashuba kutafsiribwa “kukengwa” changwa muntu “okwanene obukenge.” Echola chirhalonzeze kuderha ok’orhakasheka changwa kuchisimisa haguma n’abandi. (Muh. 3:1, 4) S’aliko bilonzeze kuderha ok’oli wakola bwenene y’oyeneza engabane zawe zoshi. Akaba buli mango onakola bwinja n’okumala engabane wahabirwe, bene-benyu na bali-benyu b’omu chibaga babona oku bakakulangalira n’okukukenga.
15. Ebinwa “barhajira rhulimi rhubiri” na “barhajira buhugu bw’enyungu burhakwanene” bichi bilonzeze kuderha?
15 Echinwa “Barhajira rhulimi rhubiri” chilonzeze kuderha oku bali bantu banaderha okuli, banali bakulangalirwa. Banayeneza ebibaderhere, barhanabehya abandi. (Mez. 3:32) “Barhajira buhugu bw’enyungu burhakwanene” k’okuderha oku banaderha okuli amango bali bajira eby’obuchuruzi haguma n’abandi n’omukuntu banakolesa efuranga. Barhakakolesa bera babo b’omu chibaga omu njira y’obuhugu omukulonza bapate efuranga konyine.
16. a) Echinwa “okurhachidohera edivayi” k’okuderha gurhe? b) Echinwa okugwarha “ezamiri echere” k’okuderha gurhe?
16 “Okurhachidohera edivayi” kuli kurhanywa mavu manene n’okurhamenyikana nka luganywa. Okugwarha “ezamiri echere” kuli kulama nk’okw’amakanuni ma Yehova maderhere. Chiro akaba orhali mushinganyanya ogwerhe obwira bukomere haguma na Mungu n’echola chinakulerhera omurhula gwa ndani.
17. Echinwa “bagererezwe omu kulola obuhashe bwabo” k’okuderha gurhe? (1 Timoteo 3:10; olole n’efoto.)
17 “Bagererezwe omu kulola obuhashe bwabo” kuli kuderha oku wayerekene ok’oli wakola amakasi mawe bwinja n’oku bakakulangalira. Bobola amango abashamuka bamakuhereza akasi, ochihangane kukulikira bwinja bwinja amahano mabo n’obwerekezi burhengere oku lubaga. Ochizere oku wayunvirhe bwinja akasi bakuhere na mangochi okwanene kuba eyiwakamalire. Nk’onali wakola buli kasi bakuhere n’omwete, abandi omu chibaga bakubona n’okusimiswa n’amajambere mawe. Bashamuka, muchizere oku muli mwakomeza bene-benyu babatizwe. (Osome 1 Timoteo 3:10.) Hali bene-benyu bachili misole babatizwe bali omu chibaga chawe si? Banajira efunzo lyabo-lyabo oku kahunda n’okurheganya bwinja embuganano si? Buli mango banahana ebishubizo omu mbuganano n’okuja oku mahubiri si? Akaba banajira ntyo, mubahereze engabane zikwanene emyaka yabo n’ezibakagala. Mukajira ntyo, abola bene-berhu bayerekana oku bakagala kukola ezindi ngabane bwinja. Naho, nji bakaba eyi bakala bayeneze ebihemerwe yi baba bagwasi b’akasi. Hanola nji baba barhachili omu myaka y’olubiruko, nji bakaba eyi bakala bayeneze ebihemerwe yi baba bagwasi b’akasi.
Abashamuka bakagerereza bene-berhu babatizwe omu kubahereza engabane yibalola “obuhashe bwabo” (Olole echifungo che 17)
18. “Okurhaderhwako kubi” k’okuderha gurhe?
18 “Okurhaderhwako kubi” k’okuderha okw’arhamenyikene kw’engeso zibihire bwenene. Okuderha okuli, bakabeshera Abakristu. Yesu naye balimubeshere, aderha oku bakabeshere n’abanafunzi bage nabo. (Yoh. 15:20) Aliko nk’ogenderere kulanga olugenzi lwawe lubere luchere kuguma n’oku Yesu ajiraga, wagwarha erenge linja omu chibaga.—Mt. 11:19.
19. “Omulume wa mukazi muguma” k’okuderha gurhe?
19 “Omulume wa mukazi muguma.” Akaba oshabire, okwanene kukenga amakanuni ma Yehova okubilolere okushaba, k’okuderha, mulume wa mukazi muguma. (Mt. 19:3-9) Omulume w’Omukristu arhakwanene kujira obugonyi haban’akatyu. (Ebr. 13:4) Kandi echola chiderhere okw’amango moshi akwanene kuba mwimana ku mukage, arhakayerekana kwasimizwe n’owindi mukazi haban’akatyu.—Yob. 31:1.
20. Gurhe mwene-werhu “akayumangira omulala gwage bwinja”?
20 “Oyimangire bwinja omulala gwage goshi, onalembere abana bage bwinja.” Akaba oli rhwe ly’omulala, okwanene kukola engabane zawe bwinja bwinja. Ojire obuharamye b’omulala oku kahunda. Ohubiri na mukawe n’abana bawe boshi nk’okubyakagalikana. Orhabale buli mwana wawe akuze obwira bwa hofi haguma na Yehova. (Efe. 6:4) Omulume onashishikala omulala gwage anayerekana okw’akagala kushishikala n’echibaga.—Ohuzanye na 1 Timoteo 3:5.
21. Akaba orhaza kuba mugwasi w’akasi, bichi okwanene kujira?
21 Mwene-werhu, akaba orhaza kuba mugwasi wakasi, wekalamawe osalire emwa Yehova, olole n’ebirhwaganirireko mu gunola mwazi. Oyige okubilolere eby’okwanene kuyeneza y’oba mugwasi wakasi, onakole bwenene y’obihikira. Okengere kangana gurhe ob’ozigire Yehova na bene-benyu na bali-benyu. Okuze enyorha yawe y’okubakolera. (1 Pe. 4:8, 10) Oyerekane obusime bunarhengerera n’okukolera omulala gwawe gw’ekiroho. Yehova ajage agisha byoshi oli wajira y’oba mugwasi w’akasi!—Flp. 2:13.
OLWIMPO 17 “Ndonzeze”
a AMAFASIRIYO M’EFOTO: Ekulembe, Yesu y’akolera abanafunzi bage oku bwirhohye; ekulyo, omugwasi w’akasi yarhabala mwene-werhu ok’ala ashajire w’omu chibaga.
