1-2. Kasi kahe kenja omushamuka anakola?

 AKABA wamakola nka mugwasi w’akasi mu mango malebe, nkabaga oli hofi kuyeneza ebihemerwe yoba mushamuka. Olonzeze kukola akasi kenja Abashamuka banakola si?​—1 Ti. 3:1.

² Kasi kahe abashamuka banakola? Banayerekeza akasi k’amahubiri, banakola bwenene omu kasi k’obulagizi na k’okuyigiriza, banakomeza echibaga kugerera ebinwa n’omufano gwabo. Rhwakabona bulagurhe Ebiblia eyirikire abashamuka banakola bwenene “mpembo omu bantu.”​—Efe. 4:8.

3. Gurhe mwene-werhu akayeneza ebihemerwe y’akola nka mushamuka? (1 Timoteo 3:1-7; Tito 1:5-9)

³ Gurhe wakayeneza ebihemerwe y’okola nka mushamuka? Eby’okwanene ku yeneza yoba mushamuka, birhali kuguma n’ebyokwanene kuyeneza y’opata akasi k’okukuha efuranga. Y’omuntu apata akasi, ahanene biba bimuhemere agwarhe obumenyi boshi omukulu w’akasi y’alonza. Aliko y’oba mushamuka, bikuhemere binene kulusha okugwarha obumenyi b’okuhubiri n’okuyigiriza. Okwanene kuyeneza engeso zihemerwe y’oba mushamuka ziderherwe omu 1 Timoteo 3:1-7 n’omu Tito 1:5-9. (Osome.) Gunola mwazi gw’aganirira oku by’abashamuka bahemerwe mu hali esharhu: Akwanene kugwarha erenge linja omu chibaga n’embuga w’echibaga, akwanene kuba mufano gwinja yewe nka rhwe ly’omulala, n’okuba tayari kukolera echibaga.

 OGWARHE ERENGE LINJA

4. “Okurhaderhwako kw’echintu chibi” k’okuderha gurhe?

⁴ Y’oyeneza ebihemerwe kukola nka mushamuka, okwanene “kurhaderhwako echintu chibi,” k’okuderha, okwanene kugwarha erenge linja omu chibaga bulala olugenzi lwawe lukwirire. Okubwindi, okwanene kuba eyonaderhwa bwinja n’abantu bembuga w’echibaga. Kweri abantu barhakolera Yehova bakaderha kubi okubilolere obwemere bwerhu, aliko barhakwanene kugwarha empanvu n’enguma y’okukugwarha kw’engangane akaba onaderha okuli changwa akaba oba muntu mwinja (Da. 6:4, 5) Ochibaze ntya, ‘Injira erenge linja omu chibaga n’embuga w’echibaga si?’

5. Gurhe wakayerekana ok’oli muntu onasima amenja”?

⁵ Akaba “onasima amenja,” wabona engeso zinja z’abandi, wababwira na kangana gurhe onasima engeso zabo. Kandi wasima kujirira abandi amenja, chiro na binene kulusha ebi bakenere. (1 Te. 2:8) Bulagurhe ezila ngeso zili zinja oku bashamuka? Bulala banageza ebisanzi byabo binene eyi bali omu kasi k’obulagizi n’okushishikala amakasi m’echibaga. (1 Pe. 5:1-3) Chiro akaba ntyo, obusime banapata omu kukolera abandi buba bunene bwenene kulusha byoshi banaleka yi bachihana mw’akola kasi.​—Mdo. 20:35.

6. “Okukaribisa abandi” k’okuderha gurhe? (Waebrania 13:2, 16; olole n’efoto.)

⁶ Wakayerekana oku oli muntu “onakaribisa abandi” amango oli wabajirira ebintu binja, kuhebamo na balala barhali bera bawe ba hofi. (1 Pe. 4:9) Ereferanse nguma ederhere ntya okubilolere omuntu onakaribisa abandi: “Omulyango gw’enju yage n’og’omurhima gwage, gukwanene kuba guchingwirwe eju y’abahisi.” Ochibaze ntya: ‘Gurhe mbamenyikene okubilolere okukaribisa abahisi?’ (Osome Waebrania 13:2, 16.) Omuntu onakaribisa abahisi anayerekana obwinja oku bantu ba buli lubero. Omufano, anayerekana obwinja oku bakene, oku bahisi bayinjire kugeza ejambo, n’okubandi banakola bwenene yi baheba omurhima bene-berhu na bali-berhu nk’abemangizi b’omuzunguluko.​—Mwa. 18:2-8; Mez. 3:27; Lu. 14:13, 14; Mdo. 16:15; Ro. 12:13.

7. Gurhe omushamuka anayerekana “okw’arhasima efuranga”?

⁷ “Arhasima efuranga.” Echola chilonzeze  kuderha okw’arhaseza obwenge bwage oku bintu by’omubiri. Obe muchire changwa mukene, okwanene kuheba enyungu z’Obwami oku nafasi y’oburhanzi mu byoshi onajira omu kalamo kawe. (Mt. 6:33) Onakolesa ebisanzi byawe, emisi yawe, n’ebindi bintu by’omubiri omu kuharamya Yehova, okushishikala omulala gwawe n’okukolera echibaga. (Mt. 6:24; 1 Yo. 2:15-17) Ochibaze ntya: ‘Gurhe nambona efranga? Imba ntoshekere n’ebintu by’omubiri ngwerhe si? Inandonza ngwarhe furanga zinene changwa bintu binene by’omubiri si?’​—1 Ti. 6:6, 17-19.

8. Mu njira zihe ziguma wakayerekanamo ok’oli “w’olugero omu ngeso” “n’ok’oli w’okuchigala”?

⁸ Akaba “onachigala” n’okuyerekana engeso “y’olugero omu kalamo kawe,” waba ey’oli wachigala omu bintu byoshi yi wajira omu kalamo kawe. Omufano, orhalya changwa kunywa kukabya, emyambaro n’emyoderi yawe eba y’olugero, kandi onachishoga bwinja eby’okuchisimisa. Orhayiganya akalamo karhakwirire k’abantu barhakolera Yehova. (Lu. 21:34; Yak. 4:4) Onayorha orhulerere chiro n’amango abandi bamakukolera kubi. Orhaba “murhamizi”; orhanaba omenyikene ok’oli luganywa. Ochibaze ntya: ‘Imba menyikene oku njira olugero omu ngeso zani n’okuchigala si?’

9. Okugwarha “obwenge burhulerere” n’okuba muntu “onapanga ebintu bwinja” k’okuderha gurhe?

⁹ Akaba oli muntu ogwerhe “obwenge burhulerere,” onawaza bwinja bwinja okubilolere ebintu biyumangire oku makanuni me Bibila. Wakengerere bwenene kw’amola makanuni, n’echola chakurhabere kugwarha amawazo menja. Orharhola esimikiro juba-juba. Ahali h’okujira ntyo, onachizera ok’ogwerhe emyazi yoshi okenere. (Mez. 18:13) Okubinaja byaba, onarhola esimikiro z’obwengehe zipatene n’amawazo ma Yehova. Akaba oli muntu “onapanga ebintu bwinja,” onachipanga bwinja n’okukenga ebisanzi. Oba omenyikene ok’oba muntu onalangalirwa, onakenga n’obwerekezi. Ezola ngeso zakurhabala ogwarhe erenge linja. Leka rhuganire oku ngeso ziderherwe omu Biblia omushamuka akwanene kugwarha, y’aba mufano gwinja nka rhwe ly’omulala.

OYEREKANE OMUFANO GWINJA WOYO NKA RHWE LY’OMULALA

10. Gurhe omulume akayumangira “omulala gwage omu njira ekwirire”?

¹⁰ Akaba oli mulume onalonzeze kuyeneza ebihemerwe y’oba mushamuka w’echibaga, omulala gwawe nago gukwanene kugwarha erenge linja. Onakwanene “kuyumangira omulala gwawe omu njira ekwirire.” K’okuderha, okwanene kushishikala omulala gwawe oku buzigire n’okugurholera esimikiro zinja. Okwanene kujira obuharamye b’omulala, okuchizera ok’omulala gwawe goshi yi gwahika oku mbuganano ze Chikristu, onabarhabale kuja omu kasi k’amahubiri. Bulagurhe okujira ntyo kuli kw’akamaro? Entumwa Paulo alibazize ntya: “Nk’omuntu arhenji gurhe akayimangira omulala gwage, gurhe akaj’agala kushishikala echibaga cha Mungu?”​—1 Ti. 3:5.

11-12. Bulagurhe kuli kw’akamaro bwenene abana ba mwene-werhu oli walonza kuba mushamuka bagwarhe olugenzi lwinja? (Olole n’efoto.)

¹¹ Akaba oli eshe wabana, okwanene kugwarha “abana banachicha bufi nk’oku bikwanene koshi.” Okwanene kubayigiriza n’okubakomeza oku buzigire. Kweri kuguma n’abandi bana boshi, bakasima kusheka n’okusharha. Aliko bulala wabakomeze bwinja, bachicha bufi, bagwarha obukenge n’engeso zinja. Kandi okwanene kujira koshi byakagalikana y’orhabala abana bawe bagwarhe obwira bwinja haguma na Yehova, balame nk’okw’amakanuni me Biblia maderhere, n’okujira amajambere kuhika oku bubatizo.

¹² “Okugwarha abana bemezi barhagwerhe  ebijiro by’obumaguza, bagwerhe n’obukenge.” Nk’omwana w’omwemezi olamire haguma n’abazere bage amajira echaha chikomere, gurhe ebyola byakahuma kw’eshe? Akaba eshe aliri amulekerera omu kurhamuyigiriza n’okumuha obuhane, akaba ey’arhachiyeneze ebihemerwe kukola nka mushamuka.​—Olole Omunara g’Omulanzi gwa Siku 15, Mwezi gwe 10, 1996, bukurasa 21, chifungo cha 6-7.

OKOLERE ECHIBAGA

13. Gurhe wakayerekana ok’oli “w’olugero,” “s’arhali w’ebihage”?

¹³ Mwene-wehu oli wayerekana engeso ze Chikristu akarhabala echibaga bwenene. Omuntu “w’olugero” anagendereza omurhula. Akaba olonzeze kuba muntu w’olugero, oyunvirize abandi onabe tayari kuyemera amawazo mabo. Amango oli n’abandi oba tayari kuyemera amawazo mabo nka nta sheriya changwa akanuni ke Biblia bavunire? Omuntu “orhali w’ebihage” ali muntu orhaseza abandi bayemere amawazo mage. Amenyere oku bili by’akamaro kuyemera amawazo m’abandi. (Mwa. 13:8, 9; Mez. 15:22) “Orhali munyabuhaka” changwa “orhanagaya juba-juba.” Ahali h’okuba mukali changwa orhayemera amawazo m’abandi, oli mwirhonzi. Woyo nka muntu onalonza omurhula, onajira okwawe koshi y’olerha omurhula haguma n’abandi chiro akaba bikomere kujira ntyo. (Yak. 3:17, 18) Ebinwa byawe binja byakarhuleza abandi, kuhebamo na balala banarhupinga.​—Amu. 8:1-3; Mez. 20:3; 25:15; Mt. 5:23, 24.

14. Echinwa “muntu ochizindire kuba mwemezi hano hofi hofi . . . ” na “mwimana” k’okuderha gurhe?

¹⁴ Mwene-werhu oli wachihangana kuyeneza ebihemerwe yaba mushamuka w’echibaga “arhakwanene kuba muntu ochizindire kuba mwemezi hano hofi hofi.” Chiro akaba oku birhakuhemere okumala myaka minene obatizwe, okenere ebisanzi y’oba Mukristu okulire ekiroho. Kuguma na Yesu, embere obe mushamuka w’echibaga okwanene kuyerekana ok’oli mwirhohye n’okutosheka omu kulingiriza okuntu Yehova akuhereza engabane zoshi zoshi omu chibaga.  (Mt. 20:23; Flp. 2:5-8) Wakayerekana ok’oli “mwimana” omukugenderera kukulikira Yehova n’amakanuni mage m’ehaki, n’omukukulira obwerekezi burhengere oku lubaga lwage.​—1 Ti. 4:15.

15. Omushamuka akwanene mpaka abe mwigiriza mwinja si? Fasiriya.

¹⁵ Amandiko mayerekene bwinja bwinja ok’omushamuka akwanene kuba “mwigiriza mwinja.” K’ebyola biderhere okw’akwanene kuba mwigiriza ominuzize si? Nanga. Banene omu bashamuka banashimikwa, chiro akaba oku barhaba begiriza baminuzize, banayigiriza bwinja omu mahubiri n’omu kasi k’obulagizi. (ohuzanye na 1 Wakorinto 12:28, 29; Waefeso 4:11.) Chiro akaba ntyo, okwanene kujira okwawe koshi y’okuza obuhashe bwawe b’okuba mwigiriza mwinja. Gurhe wakajira y’oba mwigiriza mwinja?

16. Gurhe wakajira y’ohikira kuba mwigiriza mwinja? (Olole n’efoto.)

¹⁶ “Akwanene kuchishwekera oku chinwa ch’okunali.” Y’oba mwigiriza mwinja, enyigirizo zawe zikwanene kuyumangira oku Chinwa cha Mungu. Okwanene kuba musomi mwinja w’Echinwa cha Mungu n’ebitabu byerhu. (Mez. 15:28; 16:23; “ogundirire bwenene echinwa oku bwimana” olole amahugulo m’okuyiga ma Tito 1:9.) Amango oli wayiga, olole bwinja bwinja okuntu wakakolesa amawazo m’amandiko. N’amango oli wayigiriza, ochihangane kuhuma oku mirhima y’abonviriza bawe. Wakaba mwigiriza mwinja nk’oli wahema n’okukolesa amahano m’abashamuka bagerere mu binene. (1 Ti. 5:17) Abashamuka bakwanene kuba bantu “bakagala . . . kuheba omurhima” bene-babo na bali-babo, aliko n’amango maguma abashamuka bakwanene kubahanula chiro “n’okubakalihira.” Aliko mw’ezola hali zombi, abashamu bakwanene kujira ntyo oku bwinja buli mango. Akaba oli mwinja, ogwerhe obuzigire, n’enyigirizo zawe ziyumangire oku Biblia, waba mwalimu mwinja bulala waba ey’oli wayiganya Mwalimu Mukulu Yesu.​—Mt. 11:28-30; 2 Ti. 2:24.

 OGENDERERE KUJIRA AMAJAMBERE

17. a) Bichi byakarhabala omugwasi w’akasi agenderere kujira amajambere? b) Bichi abashamuka bakwanene kuyibuka amango bali basuzuma bene-berhu yi babahereza engabane? (Olole echisanduku “ Ogwarhe Olugero Amango oli Wasuzuma Abandi.”)

¹⁷ Omukumala kuganira oku bihemerwe y’omuntu aba mushamuka w’echibaga, bagwasi b’akasi baguma bakawaza oku ntamango nji bakafa bayeneze ebihemerwe. Aliko oyibuke okw’abe Yehova changwa olubaga lwage, barhalangalire oku wayeneza ezola ngeso zoshi oku bushinganyanya. (1 Pe. 2:21) Eroho lichesibwa lya Yehova lyakurhabala oyeneze ebyola bihemerwe. (Flp. 2:13) Hali ngeso ndebe ogwerhe oli walonza kukwiza si? Osalire Yehova okubiyilolere. Olonze omu bitabu byerhu omwazi guyiderhereko, onaheme mushamuka mulebe akurhabale n’amawazo m’okuntu wakayijirira amajambere.

18. Bichi abagwasi b’akasi boshi bahemerwe kujira?

¹⁸ Rhweshi na balala bali bakola nka bashamuka, rhuhigirire kugenderera kuyeneza engeso ziderherwe mu gunola mwazi. (Flp. 3:16) Oli mugwasi w’akasi si? Ogenderere kujira amajambere! Oheme Yehova akukomeze okole binene omu kasi kage, okolere n’echibaga. (Isa. 64:8) Yehova agishe byoshi oli wajira y’oyeneza ebihemerwe kukola nka mushamuka.