BINAKUKOMERERA kuyiga Ebiblia buli boso si? Mango maguma onachiyunva nk’orhasimire kuyiga Ebiblia si? Rhweshi rhunachiyunva ntyo mango maguma. Aliko wakawaza ku buli chintu rhunajira buli mango, omufano, nk’okuyoga. Okuyoga kunarhola akasanzi, aliko eyi rhumala rhunachiyunva bwinja bwenene! Okuyiga Ebiblia nako kwakahuzanywa “n’amenji m’okurhuha emisi kugerera echinwa.” (Efe. 5:26) Tala amahano makarhurhabala:

• Opange eprograme y’eboso. Efunzo lye Biblia lili omu “bintu by’akamaro bwenene” Omukristu arhakwanene kusuzagura. (Flp. 1:10) Echakurhabala y’orhayibirira ebisanzi byawe by’okuyiga, kuli kuyandike olusiku n’akasanzi oku karatasi, onakahebe ahantu walema wakabona juba-juba. Changwa nkabaga wakaheba e alarme (omudende) omu telefone yawe y’okukurhabala oyibuke akasanzi k’okuyiga.

• Owaze oku chakakurhabala kuyiga bwinja. Binakuyorohera kugeza bisanzi binene changwa bigeke ey’oli wayiga si? Omenyere ehali yawe bwinja bwinja. Wakaja wapanga bwinja eprogame yawe. Akaba oyunvirhe orhagala kuyiga oku kasanzi wachihereho, bulagurhe orhakayiga mu miniti ekumi yonyine? Okugeza miniti ekumi oli wayiga, bilushire okurhayiga echintu n’echiguma. Hali n’okuntu enyuma w’eyola miniti ekumi, wakayunva binunire wanava wagenderera kuyiga.​—Flp. 2:13.

• Ochishoge ebi wayiga embere w’ebisanzi. Akaba onawaza konyine okubilolere ebi wayiga amango akasanzi kawe k’okuyiga kamahika, waba eyorhali “wakolesa bwinja bwenene ebisanzi byawe.” (Efe. 5:16) Bulagurhe orhakajira eliste y’emyazi changwa engani nji wakasima kuyiga? Omufano, akaba ogwerhe echibazo okubilolere ebintu orhayunvirhe bwinja, wakachishonga kubiheba oku liste yawe. N’oku buzinda bwa buli funzo lyawe, wakashuba kuyongera amandi mawazo wasimire njiwakashuba kuyigako.

• Ojire ebi wahindamula amango byahemereko. Echintu ch’akamaro bwenene kuli kuchihangana kuyiga buli boso. Y’ogala kujirantyo, bikuhemere kupanga olusiku n’akasanzi k’okuyiga, ebisanzi wamala ey’oli wayiga, changwa emyazi wayiga.

Eprograme yawe y’okuyiga oku kahunda y’akulerhera enyungu. Obwira bwawe haguma na Yehova bwakomera, wayiga kurhola esimikiro zinja omu kalamo kawe, wanachiyunva oheberwe omurhima.​—Yos. 1:8.