MWAZI G’OKUYIGA 44
OLWIMPO 33 Okwebe Yehova Omuzigo Gwawe
Gurhe Wakalembera Okukolerwa Kubi
“Omenye wakaziga wahimwa n’obubi, aliko ogenderere kuhima obubi n’obwinja.”—RO. 12:21.
EBIRHWAYIGA
Rhwayiga gurhe rhwakalwisa okukolerwa kubi buzira kukomeza ebintu.
1-2. Mu njira zihe bakarhukoleramo kubi?
YESU alihanire omufano g’omushumbakazi waliri wahema omuzuzi amurhabale, bulala muntu mulebe aliri amukolera kubi. Abanafunzi ba Yesu bakayunvirhe nka gurhe omukazi oderherwe m’ogola mufano aliri achiyunva, bulala bantu banene mw’agola mango baliri bakolerwa kubi. (Lu. 18:1-5) Ogola mufano gurhugwerhere akamaro nerhu zene, bulala rhweshi rhwachigerere kukolerwa kubi mu njira nguma changwa eyindi.
2 Bantu banene omu gulu zene bagwerhe akabolo, bali bakali, banagwerhe obuhugu. N’eju y’echola, rhumenyere oku rhwakakolerwa kubi. (Muh. 5:8) Aliko rhwakavunika omurhima bwenene amango mwene-werhu changwa mwali-werhu amarhukolera kubi. Kweri bene-berhu na bali-berhu barhapinga okuli. Bali bantu barhashinganene konyine. Rhwakayiga binene okubilolere okuntu Yesu aliri ajira amango aliri akolerwa kubi n’abanzi bage. Akaba rhunalembera amango abanzi berhu bamarhukolera kubi, rhugwerhe mpanvu zinene bwenene z’okulembera bene-berhu na bali-berhu! Gurhe Yehova anachiyunva amango rhwamakolerwa kubi n’aberhu Bakristu changwa n’abarhali Bakristu? Anaba ey’ali abona ehali rhuli rhwageramo si?
3. Bulagurhe Yehova analaga oku kuntu rhunakolerwa kubi?
3 Yehova abalonzeze rhukolerwe bwinja, n’amango abandi bamarhukolera kubi anaba ey’ali abona. “Yehova asima ehaki.” (Zb. 37:28) Yesu arhuyemezeze oku Yehova njajira “okuntu ehaki ekolwe . . . juba juba” omu kasanzi kakwanene. (Lu. 18:7, 8) Na hanola hofi akula amabi moshi rhwahurene, nj’anamala n’okukolerwa kubi koshi barhujirire.—Zb. 72:1, 2.
4. Gurhe Yehova ali arhurhabala zene?
4 Okurhunali rhwalinga akasanzi ehaki yabaho, Yehova arhurhabala rhulwise okukolerwa kubi. (2 Pe. 3:13) Anarhuyigiriza gurhe rhwakayaka bibazo binene amango bamarhukolera kubi. Kugerera Omugala, Yehova arhuhere omufano gushinganene gwakarhuyereka gurhe rhwakajira amango rhwamakolerwa kubi. Yehova anarhuhereza n’ehano lye Biblia rhwakakolesa amango rhuli rhwakolerwa kubi.
OBE MERANGWE OKUBILOLERE OKUNTU ONAJIRA AMANGO BAMAKUKOLERA KUBI
5. Bulagurhe rhukwanene kuba merangwe okubilolere okuntu rhunajira amango bamarhukolera kubi?
5 Rhwakachiyunva rhubabere bwenene n’okuyunva omulago amango bamarhukolera kubi. (Muh. 7:7) Abakozi ba Yehova nka Yobu na Habakuki, nabo balichiyunvirhe ntyo. (Yob. 6:2, 3; Hab. 1:1-3) Biyunvikene okuchiyunva ntyo. Aliko birhuhemere rhube merangwe okubilolere okuntu rhunajira yi rhurhakola chintu chilebe chibi.
6. Bichi omufano gw’Absalomu gurhuyigirize? (Olole n’efoto.)
6 Amango muntu mulebe amarhukolera kubi changwa amakolera kubi omuntu rhuzigire, nkabaga rhwakalonza kuchiholera. Aliko nka rhujirire ntyo, rhwakachilerhera bibazo binene. Rhuganire oku mufano gw’Absalomu mugala wa Mwami Daudi. Absalomu aliyunvirhe bisirani binene amango Amnoni afarhira emisi (abaka) Tamari mwali-wabo Absalomu. Amnoni aliri mwene-wabo Absalomu w’omu mwanyina wage. Nk’okwe Sheriya ya Musa yaliyerekene, Amnoni alikwanene kuyirhwa eju y’ebyajiraga. (Law. 20:17) Absalomu arhalijirire kubi okugwarha ebisirani, aliko echintu chibi ajiraga kuli kuyirha Amnoni.—2 Sa. 13:20-23, 28, 29.
Absalomu aligwarhire bisirani binene bwenene amango bafarhira emisi mwali wabo oyirikirwe Tamari (Olole echifungo cha 6)
7. Gurhe omwandisi we zaburi alichiyunvirhe burhanzi amango abona abantu yi bakolerwa kubi?
7 Amango balala banajira ebintu bibi barhahabirwe obuhane, rhwakarhondera kuchibaza akaba kuli kw’akamaro okujira ebintu binja. Rhuganire okubilolere omwandisi we zaburi waliri wabona nk’abantu babi bagwerhe akalamo kenja aliko ey’abanya-kunali bowe nanga. Aderhere ntya: “Amango moshi abantu babi bajira akalamo kenja.” (Zb. 73:12) Aliyunvirhe mugayo gunene bwenene eju y’okukolerwa kubi, anawaza oku ntacho bimalire okukolera Yehova. Ayongerere ntya: “Amango naliri nachihangana kuyunva echola byaliri byanvuruga.” (Zb. 73:14, 16) Naho ajire aderha wazi ntya: “Aliko nyono, amagulu mani maliri hofi kuhabuka enjira, entambu zani zaliri hofi kunyerera.” (Zb. 73:2) Ebintu bili nk’ebyola byalihikire mwene-werhu oyirikirwe Alberto.
8. Bichi byalihikire mwene-werhu eju y’okukolerwa kubi?
8 Balibehyere mwene-werhu Alberto okw’ayibire efuranga z’echibaga. Oku byalijire byaba, aheza engabane zage n’abantu banene omu chibaga balimenyere echola chibazo barhachigendereraga kumukenga. Aderhere ntya: “Nalinyunvirhe oburhe navunika n’omurhima.” Aliyunvirhe oburhe bwenene, aleka kuhika oku mbuganano, anamala chiro na myaka erhano ey’aholere. Ogola mufano guyerekene bichi byakarhengerera nka rhugenderere kugwarha oburhe amango bamarhukolera kubi.
OYIGANYE OKUNTU YESU ALILWISIZE OKUKOLERWA KUBI
9. Yesu alilembere okukolerwa kubi kwanyabachi? (Olole n’efoto.)
9 Yesu arhulekere omufano gushinganyanya okubilolere okulwisa okukolerwa kubi. Bantu banene balimukolere kubi kuhebamo n’abantu b’omu mulala gwage. Abantu b’omu mulala gwage baderha okw’ali musire, abakulu bamadini baderha okw’emisi agwerhe erhengere oku bazimu, n’abasoda b’Abaroma bamusuzagura, bamulibuza n’okumuyirha. (Mk. 3:21, 22; 14:55; 15:16-20, 35-37) Amango Yesu aliri alembera okola kukolerwa kubi koshi, arhajiraga echaha. Bichi omufano gwage gwakarhuyigiriza?
Yesu arhulekere omufano gushinganyanya g’okuntu rhwakalwisa okukolerwa kubi (Olole echifungo cha 9-10)
10. Gurhe Yesu alilwisize okukolerwa kubi? (1 Petro 2:21-23)
10 Osome 1 Petro 2:21-23. a Yesu arhulekere omufano gushinganene okubilolere okuntu rhwakajira amango abantu bamarhukolera kubi. Alimenyere amango m’okuderha n’amango m’okusira. (Mt. 26:62-64) Mango maguma ey’abandi baliri bamubeshera aliri ayorha asirire. (Mt. 11:19) Amango aliri aderha arhaliri adukanga abaliri bamulibuza changwa kubalwisa. Yesu aliyerekene engeso y’okuchigala bulala “alilangalire olala onacha emanja omu njira y’okunali.” Yesu alimenyere oku Yehova y’abona gurhe ali akolerwa kubi. Alichizerere oku Yehova nj’amala okukolerwa kubi omu kasanzi kakwanene.
11. Njira zihe ziguma rhwakagererezamo ebi rhunaderha? (Olole n’efoto.)
11 Rhwakayiganya Yesu omu kugerereza ebi rhunaderha, amango bamarhukolera kubi. Amango bamarhujirira chintu chilebe chirhakomere, hali oku birhakarhuhema kuderha changwa kujira echintu choshi choshi. Changwa hali oku byakarhuhema rhuve rhwasira bulala nka rhuderhere chintu chilebe byakarhuma ebintu byakomera bwenene. (Muh. 3:7; Yak. 1:19, 20) Amandi mango byakarhuhema kuderhera muntu mulebe bali bakolera kubi changwa kuderha obukweri okubilolere obwemere bwerhu. (Mdo. 6:1, 2) Akaba byahemere okurhuderhe, rhukwanene kujira okwerhu koshi rhuderhe eyi rhurhulerere n’oku bukenge.—1 Pe. 3:15. b
Amango rhuli rhwakolerwa kubi, rhwakayiganya Yesu bwinja bwinja omu kuchishoga mangochi na gurhe rhwaderha (Olole echifungo che 11-12)
12. Gurhe rhunalangalira “Olala onacha emanja omu njira y’okunali”?
12 Kandi rhwakayiganya Yesu omu kulangalira “Olala onacha emanja omu njira y’okunali.” Amango abandi bamarhuchira olubanja kubi changwa bamarhukolera kubi, rhuba rhulangalire oku Yehova aba amenyere byoshi bili byaba. Obola bwizere bwakarhurhabala kulembera amango bamarhukolera kubi bulala rhumenyere oku Yehova akwiza ebintu omu kasanzi kakwanene. Nka rhulangalire Yehova n’okulinga okw’amala ebibazo byoshi, rhurhagenderera kugwarha oburhe changwa mpu rhubike omujinya omu murhima. Okuyorha rhubikire omuntu omujinya kwakarhuma rhwakola chintu chilebe chibi, changwa rhwaheza obusime bwerhu n’okuheza obwira bwerhu haguma na Yehova.—Zb. 37:8.
13. Bichi byakarhurhabala rhugenderere kulembera kukolerwa kubi?
13 Kweri rhurhakagala kukulikira omufano gwa Yesu oku bushinganyanya. Mango maguma rhwakajira changwa kuderha ebintu byakarhuma rhwachiganya buzinda. (Yak. 3:2) N’amango maguma okuntu abandi barhukolere kubi kwakarhulerhera amalumwa n’emilago omu kalamo kerhu koshi mu linola gulu libi. Akaba ntyo ku bili, ochizere oku Yehova amenyere eby’oli wageramo. Kandi Yesu naye amenyere okuntu oli wachiyunva bulala naye alilibukire eju y’okukolerwa kubi. (Ebr. 4:15, 16) Okubwindi, kugerera omufano gwa Yesu gushinganyanya, Yehova arhuhere ehano omu Chinwa chage lyakarhurhabala amango rhuli rhwakolerwa kubi. Lekaga rhuganire ku mifano ebiri eli omu chitabu cha Baroma yakarhurhabala.
“OLEKERE EBISIRANI AKASANZI”
14. Okulekera “ebisirani akasanzi k’okuderha gurhe”? (Waroma 12:19)
14 Osome Waroma 12:19. Amango entumwa Paulo abwira Abakristu oku bakwanene “kulekera ebisirani akasanzi,” bisirani byanyabachi aliri alonza kuderha? Nk’ok’olwandiko luyerekene, bili bisirani bya Yehova. Rhunalekera ebisirani bya Yehova akasansi amango rhwamaleka yenyine achishoge mangochi na gurhe alerha ehaki. Mwene-werhu oyirikirwe John amalire kukolerwa kubi, aderha ntya: “Byalimpemere ngerereze ebisirani byani yintajira echintu chibi, aliko okujira ntyo birhaliyorohere. Olwandiko lwa Waroma 12:19 lwantabere ndembere inandangalire Yehova.”
15. Bulagurhe bili by’akamaro bwenene okulindira oku Yehova akwiza echibazo?
15 Rhunapata enyungu amango rhwamalindira oku Yehova akwiza echibazo. Rhukajirantyo, rhwachilanga oku muzigo n’omulago g’okulonza kuchimalira echibazo rhwewe rhwenyine. Yehova arhulaganyize okw’arhurhabala. Arhubwirire rhumulindire n’okw’ahebere h’akasanzi k’okumala okukolerwa kubi. Nkarhuyemerere echilagane cha Yehova ch’okuchira olubanja balala bali bakolera abandi kubi, ntampanvu rhugwerhe y’okugendera kugwarha ebisirani bulala rhumenyere oku nj’ajira ebili binja. Echola ch’echarhabalaga John rhwabaga rhwashambereko. Aderhere ntya: “Nka ndingirize oku Yehova amala echibazo chani, ebintu byakakwira kulusha okuntu nakalonzeze kuchimaliracho nyenyine.”
“OGENDERERE KUHIMA ECHIBI KUGERERA ECHINJA”
16-17. Gurhe esala lyakarhurhabala “kugenderera kuhima echibi kugerera echinja”? (Waroma 12:21)
16 Osome Waroma 12:21. Kandi Paulo alibwirire Abakristu oku “bagenderere kuhima echibi kugerera echinja.” Yesu aliderhere ntya omu mahubiri mage m’oku musozi: “Ogenderere kuzigira abanzi bawe n’okusalirira balala bali bakulibuza.” (Mt. 5:44) Intyo kw’analijirire. Nkabaga rhunawaza oku malibuko Yesu alemberaga amango abasoda b’Abaroma bamumanika oku murhi. Rhwakarhondera kuwaza konyine oku malumwa aliri ayunva, okusuzagurwa n’okukolerwa kubi alemberaga.
17 Yesu aligenderere kuzigira Yehova n’okubera mwimana emwage chiro akaba aliri alibuka bwenene. Ahali h’okuvuma abola basoda, asalira ntya: “Darha obababalire bulala barhamenyere ebi bali bajira.” (Lu. 23:34) Amango rhwamabwira Yehova omu sala arhabale abali barhukolera kubi, byarhurhabala rhurhulere rhurhanagwarhaga ebisirani, kwanarhurhabala chiro rhuhindamule amawazo rhubagwerheko.
18. Gurhe esala lyalirhabere Alberto na John bagale kulwisa okukolerwa kubi?
18 Esala lyalirhabere bene-berhu babiri rhwabaga rhwashambereko mu gunola mwazi, bagale kulwisa okukolerwa kubi baliri bahurana. Alberto aderhere ntya: “Naliri nasalirira abola bene-berhu bankoleraga kubi. Naliri nahema Yehova buli mango antabale ndeke kugenderera kugwarha ebisirani eju y’ebyampikiraga.” Ech’okusimisa, Alberto agenderere kukolera Yehova oku bwimana. John aderhere ntya: “Turu zinene naliri nasalirira mwene-werhu waliri wambabaza, amasala mali nk’amola mantabere ndeke kumugwarhako amawazo mabi n’okuleka kumuchira olubanja. Amola masala kandi mampere omurhula g’omu bwenge.”
19. Bichi rhukwanene kujira kuhika oku buzinda bwa linola gulu libi? (1 Petro 3:8, 9)
19 Amango moshi rhwaba rhulamire kulinola gulu libi, nkabaga barhukolera kubi. Chiro harhengerera ebibazo bili gurhe, rhurhahira rhukaleka kugenderera kuhema Yehova oburhabale. Birhuhemere rhuyiganye okuntu Yesu aliri ajira amango abandi baliri bamukolera kubi, binarhuhemere okugenderera kukolesa amakanuni me Biblia. Rhukajirantyo, rhwachizera oku rhwapata emigisho erhengere emwa Yehova.—Osome 1 Petro 3:8, 9.
OLWIMPO 38 Aguha Emisi
a Omu sura ya 2 n’eya 3 y’amaruba marhanzi m’entumwa Petro, afasiriye ehali Bakristu baguma b’omukagana ka burhanzi balirimo amango baliri bakolerwa kubi n’abakulu babi changwa n’abeba barhaliri Bakristu.—1 Pe. 2:18-20; 3:1-6, 8, 9.
b Olole oku jw.org evideo ederhere Obuzigire Bunalerha Omurhula g’Okuli.
