MWAZI G’OKUYIGA 45
OLWIMPO 138 Erhwe Lili mw’Emvi Linakwira
Oyige Kugerera Ebinwa Bizinda by’Abalume Bemana
“Abakala bashajire babagwerhe obwengehe n’abamalama myaka minene babagwerhe obwenge si?”—YOB. 12:12.
EBIRHWAYIGA
Okukenga Yehova kwarhulerhera emigisho zene n’akalamo k’esiku n’amango omu mango mayinjire.
1. Bulagurhe rhwakayiga kugerera abakala bakulire?
RWESHI rhukenere obwerekezi yirhurhola esimikiro z’akamaro omu kalamo. Rhwakapata obola bwerekezi kugerera abashamuka omu chibaga changwa abandi Bakristu bakulire ekiroho. Akaba bakala bashajire rhurhakaderha okw’amahano mabo namo mashajire. Yehova alonzeze oku rhuyige kugerera abakala bakulire. Bagerere mu binene kurhulusha, bamenyere binene, banagwerhe obwengehe.—Yob. 12:12.
2. Bichi rhwayiga mu gunola mwazi?
2 Omu mango Ebiblia yaliri yayandikwa, Yehova alikoleseze abalume bemena bashajire omu kuheba omurhima n’okuyerekeza abantu bage. Rhuganire oku mufano gwa Musa, Daudi, n’entumwa Yohana. Balilamire omu mango n’omu hali zirhali kuguma. Amango baliri hofi kufa, bahereza abachili misole amahano m’obwengehe. Buli muguma mw’abola balume aliyerekene akamaro k’okukenga Mungu. Yehova agenderere kulanga ebinwa byabo by’obwengehe kugera zene. Rhube misole changwa rhukala rhushajire, rhwakayunguka kugerera amola mahano mabo. (Ro. 15:4; 2 Ti. 3:16) Mu gunola mwazi rhwaganira oku binwa bizinda by’abola balume basharhu bashajire, rhwalola na bichi rhwakayiga kugerera ebibaderhaga.
“WAKALEMBERA MUMANGO MANENE”
3. Musa alikolere ngabane zihe?
3 Musa alikolere Yehova bwenene omu kalamo kage koshi. Alikolere nka mulebi, muzuzi, muntu w’okuyerekeza abandi na mubalazi w’engani. Musa aliyigire binene eju y’ebyageragamo omu kalamo! Aliyerekeze eshanja lye Izraeli amango baliri barhenga omu buja Emisri, analibwene binene omu bisomerene bya Yehova. Yehova alimukoleseze omu kuyandika bitabu birhano birhanzi bye Biblia, Ezaburi ya 90 nkabaga n’eya 91. Byakashobokana oku yiwayandikaga n’echitabu cha Yobu.
4. Bande Musa alihebere omurhima na bulagurhe?
4 Kasanzi kageke embere afe ey’agwerhe myaka 120, Musa ahamagala Abaizraeli boshi y’abayibusa ebintu Yehova abajiriraga. Myaka minene enyuma waho, baguma omu Baizraeli balichibwenere ebisomerene Yehova ajiraga na gurhe alihanire abanya Misri. (Kut. 7:4) Balichibwenere gurhe Yehova agabaga Enyanja Ndukula bayambuka, na buzinda bachibonera gurhe Yehova alimbula Farao n’abasoda bage boshi. (Kut. 14:29-31) Yehova alibalangire omu rungu n’okubashishikala. (Kum. 8:3, 4) Abaizraeli baliri hofi kuja omu Chihugo Chilaganano, bobola embere Musa afe alilonzeze kubaheba omurhima. a
5. Ebinwa by’obuzinda bya Musa bili omu chitabu cha Kumbukumbu la Torati 30:19, 20 byalihere Abaizraeli bwizere buhe?
5 Bichi Musa aliderhere? (Osome Kumbukumbu la Torati 30:19, 20.) Eshanja lye Izraeli lyaligwerhe obulangalire bwinja bw’amango mayinjire. Kugerera emigisho ya Yehova, Abaizraeli bakalamire myaka minene omu chihugo alibalaganyize. Kandi chaliri chihugo chinja bwenene chinayera mw’emyaka! Musa abafasiriya ebyola byoshi omu kuderha ntya: “Amavile mazibu-zibu manakwirire murhayumbakaga, enju ziyunjwire mw’ebintu binja bya buli lubero ebi murhakolaga bwenene yimubipata, ebisima by’amenji murhachimbulaga, emirhi y’emizabibu n’eyemizeituni murhabyalaga.”—Kum. 6:10, 11.
6. Bulagurhe Mungu aliyemerere amandi mashanja mahime eshanja lye Izraeli?
6 Musa alihere Abaizraeli omukonge. Yi bagenderera kulama omu chihugo chaliri chayera bwenene, byalibahemere bakenge amarhegeko ma Yehova. Musa alibabwirire “bachishoge akalamo” omu kuyunviriza Yehova “n’okubera bemana kuye.” Aliko Abaizraeli baleka Yehova. Bobola, okw’esiku zanaliri zagera Mungu aleka Abaasiriya bahime Abaizraeli n’enyuma waho Abababiloni nabo babahima n’okubaheka buhungiro.—2 Fa. 17:6-8, 13, 14; 2 Ny. 36:15-17, 20.
7. Bichi ebinwa bya Musa byakarhuyigiriza? (Olole n’efoto.)
7 Bichi birhuyigirize? Okukenga kunayerekeza ew’akalamo. Kuguma n’Abaizraeli baliri hofi kuja omu Chihugo Chilaganano, nerhu rhuli hofi kuja omu gulu lihyahya Mungu arhulaganyize, ahantu rhwabona egulu lyahindamwirwe n’okuba paradizo. (Isa. 35:1; Lu. 23:43) Shetani n’amashetani mage barhakachibaho. (Ufu. 20:2, 3) Harhakachiba amadini manayigiriza obubeshi okubilolere Yehova. (Ufu. 17:16) Nta Guvernema nji zachibaho z’okurhambula abantu kubi. (Ufu. 19:19, 20) Nta bigamba nji byaba omu paradizo. (Zb. 37:10, 11) Abantu boshi nji baba balamire omu paradizo nji bakenga amarhegeko ma Yehova, nantyo nji haba omurhula. Naho, abantu nji bazigirana n’okulangalirana buli muguma n’owindi. (Isa. 11:9) Rhuli rhwalinga akola kasanzi na nyorha nene! Rhukakenga Yehova, nji rhwalama myaka minene, arhali amagana m’emyaka monyine s’aliko esiku n’amango.—Zb. 37:29; Yoh. 3:16.
Nka rhukengere Yehova, rhwakalama omu paradizo oku gulu arhali amagana m’emyaka monyine s’aliko esiku n’amango (Olole echifungo cha 7)
8. Gurhe echilagane ch’akalamo k’esiku n’amango chalirhabere misiyonere muguma? (Yuda 20, 21)
8 Akaba rhulangire omu bwenge echilagane cha Mungu ch’akalamo k’esiku n’amango, rhwagenderera kubera hofi naye chiro rhwahurana ebigeregezo. (Osome Yuda 20, 21.) Echola chilagane kandi chakarhuha n’emisi y’okugenderera kulwisa obuzamba bwerhu. Mwene-werhu waliri wakolera omu Afrique nka misiyonere mu myaka minene, afasiriye oku mango manene aliri ageregezwa kujira chintu chilebe chirhasimisize Yehova. Aderhere ntya: “Okuyibuka oku ntakalama omu paradizo nka ntakengere Yehova, kwalintabere ngenderere kulwisa echibazo chani n’okusalira Yehova buli mango oku bichilolere. Kugerera oburhabale bwage naliyinjire kuhima echola chibazo.”
“NJI WAHIMA”
9. Bibazo bihe Daudi alihurene omu kalamo kage?
9 Daudi aliri mwami okomere. Kandi aliri muntu onakula emiziki, epoweme, aliri alwa evita, analiri mulebi. Aligerere mu bigeregezo binene. Alimalire myaka minene ey’alamire akalamo k’okuchibisha-bisha bulala Mwami Sauli alilonzeze kumuyirha. Amalire kuba Mwami, Daudi ashuba kulibirha y’ayokola akalamo kage amango omugala Absalomu alilonzeze kumukula oku chirhi ch’obwami. Chiro akaba ebyola bibazo byoshi n’obuzamba bwage, Daudi aligenderere kubera mwimana ku Mungu kuhika oku buzinda bw’akalamo kage. Yehova alimubwene nka “mulume osimisize omurhima [gwage].” Kweri rhukwanene kuyunviriza amahano ma Daudi m’obwengehe!—Mdo. 13:22; 1 Fa. 15:5.
10. Bulagurhe Daudi ahaga omugala Sulemani ehano embere abe mwami?
10 Omufano, rhuganire oku hano Daudi ahaga omugala Sulemani wakamugombwere oku chirhi ch’obwami. Yehova alichishogere oyola musole y’agendereza obuharamye buchere n’okuyumbaka ehekalu likengeseze Mungu. (1 Ny. 22:5) Haliri makasi manene m’okukolwa, analikenere oburhabale bwa Yehova y’ayerekeza olubaga. Bichi Daudi alimubwirire? Lekaga rhulole.
11. Nk’ok’olwandiko lwa 1 Wafalme 2:2, 3 luderhere, bichi Daudi alibwirire Sulemani achizere, na gurhe ebyola byaliyinjire kuba by’obukweri? (Olole n’efoto.)
11 Bichi Daudi aliderhere? (Osome 1 Wafalme 2:2, 3.) Daudi alibwirire omugala okw’akakenga Yehova, akabere murhegesi mwinja na Yehova akamugishire. Mu myaka minene Yehova alihere Sulemani bintu binene binja, analimurhabere mu njira zinene. (1 Ny. 29:23-25) Aliyumbakire ehekalu linja bwenene, aliyandikire bitabu biguma bye Biblia, na binwa byage biguma bili omu bitabu binene bye Biblia. Alimenyikene eju y’obwengehe n’obuchire bwage. (1 Fa. 4:34) Nk’oku Daudi aderhaga, Sulemani akapatire migisho minene amango monyine akakengere Yehova Mungu. Ech’okugayisa oku buzinda bw’akalamo ka Sulemani, arhondera kuharamya abandi ba mungu. Buzinda Yehova amukula kw’efune yage, Sulemani av’aheza obwengehe b’okurhambula oku bwinja n’okuhaki.—1 Fa. 11:9, 10; 12:4.
Ebinwa by’obuzinda Daudi abwiraga omugala Sulemani birhurhabere rhumenye oku nka rhukengere Yehova arhuha obwengehe b’okurhola esimikiro zinja (Olole echifungo che 11-12) b
12. Bichi ebinwa bya Daudi birhuyigirize?
12 Bichi birhuyigirize? Okukenga kunarhulerhera emigisho. (Zb. 1:1-3) Kweri Yehova arharhulaganyize okw’arhuhereza obuchire changwa obukuuze bwa Sulemani. Aliko rhukakenga Mungu werhu, arhuyerekeza n’okurhuha obwengehe b’okurhola esimikiro zinja. (Mez. 2:6, 7; Yak. 1:5) Amahano ma Yehova makarhurhabala amango rhuli rhwarhola esimikiro okubilolere akasi, amasomo, efuranga, n’okubilolere okuchisimisa. Okukulikira amola mahano kwalanga obwira bwerhu haguma na Yehova, nji rhwapata n’akalamo k’esiku n’amango. (Mez. 2:10, 11) Rhwakagwarha abera benja, n’emilala yerhu yagwarha obusime.
13. Bichi byalilerhere Carmen emigisho omu kalamo kage?
13 Carmen, olamire omu chihugo che Mozambique, alimenyere ok’okusoma e iniverisite k’okwakamulerhere emigisho omu kalamo kage. Naho av’aja oku iniverisite arhondera kusoma ebilolere eby’okuyumbaka. Ayandikire ntya: “Nalisimire ebinaliri nasoma. Aliko byaliri byantola emisi n’ebisanzi byani byoshi. Naliri narhondera amasomo sa nguma nenusu y’esezi (7h:30) kuhika sa kumi n’ebiri z’egolo (6h:00). Byalinkomerere okuhika oku mbuganano, n’ehali yani y’ekiroho yaliri yaharabika. Nayinja kurhegera oku naliri nalonza kukolera bami babiri.” (Mt. 6:24) Asalira analonza emyazi ederhere okubilolere ehali yage omu bitabu byerhu. Ayongerere ntya: “Namalire kupata amahano ma bene-berhu bakulire ekiroho n’ama nyama, nachishoga kurhenga oku iniverisite yinkolera Yehova akasi k’amango moshi. Nanchiyunva oku nachishogere bwinja inangwerhe obusime eju y’eyola simikiro narholaga.”
14. Mwazi guhe gw’akamaro Musa na Daudi balihanire?
14 Musa na Daudi balisimire Yehova bwenene banalimenyere oku kuli kw’akamaro bwenene okujira ntyo. Omu binwa byabo by’obuzinda, balihebere ab’onviriza babo omurhima bayorhe bemena ku Yehova Mungu wabo. Bombi bashuba kubabwira oku bakaleka kukolera Yehova abalahira, baheza n’emigisho abaga abalaganyize. Amola mahano mabo mali m’akamaro emwerhu zene. Enyuma w’amagana memyaka, owindi mukozi wa Yehova aliyerekene akamaro k’okubera mwimana emwa Mungu.
“OBUSIME BUNENE”
15. Bichi entumwa Yohana alihurene omu kalamo kage?
15 Yohana aliri ntumwa Yesu alizigire bwenene. (Mt. 10:2; Yoh. 19:26) Aligezeze bisanzi binene ali ahubiri, alibwene gurhe Yesu y’ajira ebisomerene, analiberere mwimana ku Yesu amango m’ebihe bikomere. Alimubwene amango afa n’amango afuka. Analibwene gurhe echibaga ch’Echikristu chaluga. Yohana alilamire siku zinene y’abona emyazi minja “yahubiribwa oku bilemwa byoshi bilamire oku gulu.”—Kol. 1:23.
16. Bande baliyungukire n’amaruba ma Yohana?
16 Amango Yohana alikala ashajire bwenene, alipatire olukengo l’okuyandika echitabu chisomeze bwenene cha Ufunuo. (Ufu. 1:1) Yohana aliyandikire echitabu che Enjili chiherhe ezino lyage. Analiyandikire na maruba masharhu mafuhererwe. Amaruba mage makasharhu amayandikiraga Omukristu mwimana Gayo, ey’aliri abona nka mwana wage muzigirwa. (3 Yo. 1) Mw’agola mango byakashobokana eyi hali bantu banene Yohana aliri abona nka bana bage b’ekiroho. Eby’oyola mulume mwimana walikala ashajire ayandikaga, byahebere omurhima abanafunzi ba Yesu boshi kuhika na zene.
17. Nk’ok’olwandiko lwa 3 Yohana 4 luderhere, bichi binalerha busime bunene?
17 Bichi Yohana aliyandikire? (Osome 3 Yohana 4.) Omu maruba mage makasharhu, Yohana aderhere ok’okubona bene-babo na bali-babo bakengere Mungu kwaliri kwamulerhera obusime. Amango Yohana aliri ayandika amaruba mage makasharhu, bantu baguma baliri bayeneza emyazi y’obubeshi n’okulonza kugaba echibaga. Aliko abandi baligenderere “kulambagira omu bukweri.” Balikengere Yehova banaliri “balambagira nk’okw’amakanuni mage maderhere.” (2 Yo. 4, 6) Abola Bakristu bemana barhalisimisize Yohana yenyine s’aliko na Yehova.—Mez. 27:11.
18. Bichi rhwakayiga kugerera ebinwa bya Yohana?
18 Bichi birhuyigirize? Obwimana bunayerekeza ewa busime. (1 Yo. 5:3) Omufano, rhugwerhe obusime okumenya oku rhuli rhwasimisa Yehova. Yehova anagwarha obusime amango amabona rhwalahira kujira ebibi n’okukenga amarhegeko mage. (Mez. 23:15) Bamalayika bali embingu nabo banayunva obusime. (Lu. 15:10) Nerhu rhunagwarha obusime amango rhwamabona bene-berhu na bali-berhu bagenderere kubera bemana chiro akaba bali bapingwa changwa kugeregezwa bajire echintu chibi. (2 Te. 1:4) Naho amango linola gulu libi nji lyaba lirhachiliho, nji rhwagwarha obusime b’okumenya oku rhwaliyerekene obwimana ku Yehova chiro n’omugulu lyalirhegekerwe na Shetani.
19. Bichi mwali-werhu oyirikirwe Rachel aderhere okubilolere okuyigiriza abandi obukweri? (Olole n’efoto.)
19 Rhunagwarha obusime amango rhuli rhwayigiriza abandi obukweri. Rachel olamire omu chihugo che Republique Dominicaine, anachiyunva oku luli lukengo lunene okuyigiriza abandi obukweri okubilolere Mungu werhu Yehova. Rachel aderhere ntya okubilolere amafunzo mage me Biblia: “Birhayorohere okufasiriya obusime nanyunva amango ndi nabona abananyigiriza bali bakuza obuzigire bwabo ku Yehova, okumulangalira, n’okuhindamula akalamo kabo yi bamusimisa. Obola busime buli bunene bwenene kulusha byoshi nakaba najirire changwa kuhana yi mbayigiriza.”
Rhunapata obusime amango rhuli rhwayigiriza abandi kukenga n’okuzigira Yehova (Olole echifungo che 19)
OYUNGUKE KUGERERA EBINWA BIZINDA BY’ABALUME BEMANA
20. Mu njira zihe rhuli kuguma na Musa, Daudi, na Yohana?
20 Musa, Daudi, na Yohana, balilamire omu hali n’omu bihe birhali kuguma n’ebyerhu. Aliko rhuli kuguma nabo mu njira zinene. Balikolere Mungu w’okuli, nerhu rhuli rhwamukolera. Kuguma nabo rhunasalira Yehova, rhunamulangalira, rhunalonza n’obwerekezi bwage. Na kuguma n’abola balume ba mira, rhuchizerere oku Yehova anagisha bwenene abanamukenga.
21. Migisho ehe abanayunviriza amahano m’abalume ba mira nka Musa, Daudi na Yohana nji bapata?
21 Rhujage rhwahigirira kukulikira amahano mabola balume bashajire n’okukenga amarhegeko ma Yehova. Nji rhwayunguka mu byoshi rhuli rhwajira. Nji rhwalama esiku n’amango! (Kum. 30:20) Nji rhwanagwarha n’obusime b’okusimisa Darha muzigirwa w’embingu, onayeneza ebilagane byage bwinja omu njira rhurhalilangalire n’omu kuntu rhurhaliwazize chiro.—Efe. 3:20.
OLWIMPO 129 Rhwagenderera Kulembera
a Banene omu Baizraeli babonaga ebisomerene bya Yehova oku Nyanja Ndukula, barhalamaga siku zinene omukuntu babone Echihugo Chilaganano. (Hes. 14:22, 23) Yehova aliderhere oku boshi baligwerhe myaka 20 kugenderera, bakafirire omu rungu. (Hes. 14:29) Aliko, Yoshua, Kalebu na banene barhaliza kuyeneza myaka 20 n’abandi banene b’omubuko bwa Lawi, bagenderera kulama yi babona okuyenezwa kw’echilagane cha Yehova amango Abaizraeli bayambuka Olwinji Yordani n’okuja omu Chihugo Chilaganano.—Kum. 1:24-40.
b AMAFASIRIYO M’EFOTO: Ekulembe: Daudi ali ahereza Omugala Sulemani mahano malebe m’obuzinda m’obwengehe. Ekulyo: Abanafunzi bali bayunguka n’enyigirizo z’Echiteokrasi oku Masomo Mabapainiya.
