Paul: Rhwaligwerhe busime bunene! Gwaliri Mwezi gwe 11, mwaka gwa 1985, rhwaliri omu njira eyi rhuli rhwaja omu ngabane yerhu y’oburhanzi y’obumisiyonere, k’okuderha, e Liberia, omu Afrique occidentale. Enviyo rhwalirimo yayumanga omu chihugo che Sénégal. Anne aderha ntya: “Enyuma wa saa nguma ntya rhwahika omu chihugo che Liberia!” Naho hava harhengerera etangazo liderhere ntya: “Abagenzi boshi bali omu nviyo baja e Libéria bakwanene bayorhe hanola. Bantu balebe balonzeze kukula Prezida oku chirhi eyola munda, bobola birhashobokana oku rhusike e Libéria.” Mu siku 10 zakulikiragaho rhwayorha na bamisiyonere omu Sénégal, rhwayunva n’emyazi oku bantu banene bayirhirwe n’okw’eguvernema erhali yayemerera abantu bahuluka omu nju, n’abarhakengere bakabalashire!

Anne: Rhwaliri merangwe. Kurhenga nchiri mudorho, nalimenyikene oku zino lya Anxious Annie. Inanyubaha chiro n’okuyambuka ebarabara! Aliko rhwalihigirire kuja e Libéria omu ngabane yerhu.

Paul: Emunda naburhwagwa n’emwabo Anne halekene bilometre munane emazikiro me Angletere. Abazere bani n’aba Anne baliri barhuheba omurhima kukola akasi k’obupainiya, rhwamalire amasomo m’esegondere ntya, rhwarhondera kukola akasi k’obupainiya. Balishigikire omuhigo gwerhu g’okukola omu kasi k’amango moshi. Amango nayenezaga myaka 19, napata olukengo l’okukola oku Beteli na Anne ambugana oku Beteli omu mwaka gwa 1982.

Anne: Rhwalisimire kukola oku Beteli, aliko buli mango rhwaligwerhe enyorha y’okuja kukolera ahali obulagirire bunene. Okukola haguma na bamisiyonere oku Beteli kwalikomeze eyola nyorha. Buli budufu rhwaliri rhwasalira bwenene eju y’echola mu myaka esharhu, bobola rhwaliyunvirhe busime bunene amango barhuhamagala kusoma esomo lya 79 lye Gileadi omu 1985! Barhurhuma kukolera e Liberia, omu Afrique y’emazikiro.

Paul: Rhwagendaga omu nviyo y’oburhanzi bayemereraga kuja e Liberia. Abantu baligwerhe obuba barhanaliza kubayemerera kurhenga ahambuga egolo. Abantu baligwerhe buba bunene, amango bakabwene omutugari banayama bwenene aho han’aho n’okuchibisha! Yirhurhuleza obuba bwerhu rhwaliri rhwasoma ebigabi bye Zaburi haguma. Chiro akaba ebyola byoshi, rhwalisimire engabane yerhu. Anne aliri ahubiri buli lusiku, nani naliri nakola haguma na John  Charuk a oku Beteli. Okukola haguma naye kwalinyigirize bintu binene bulala alilamire omu Liberia mango manene, analimenyere bwinja ebibazo n’ehali ya bene-berhu na bali-berhu b’omu Liberia.

Anne: Bulagurhe rhwaliyinjire kusima e Liberia bwenene? Rhwaliyisimire ntyo eju ya bene-berhu na bali-berhu. Balirhuyerekere buzigire bunene banaliri bemana. Balibere bera-berhu ba hofi, bayinja kuba mulala gwerhu guhyahya. Ebinwa byabo byalirhukomeze ekiroho. Okuhubiri eyola munda byaliri byasimisa. Abantu barhaliri basima nka rhurhaberere nabo okuntu balisimire! Abantu baliri baganira okubilolere Ebiblia eburhambi w’ebarabara. Birhaliri byarhukomerera okurhonderesa enganiro haguma nabo. Rhwagwarha mafunzo manene me Biblia, kugera ahabyaliri byarhukomerera kuyiga nabo boshi. Yaliri eneo nyinja bwenene!

Paul: Omu mwaka gwa 1989 enyuma wa myaka ene y’omurhula, harhengerera ebintu biyubahisize, k’okuderha, evita y’abasivile oku bandi. Abaliri bapinga oburhegesi bafarha eneo yaliri hofi ne Beteli omu Siku 2, Mwezi gwa 7, 1990. Mu myezi esharhu yoshi rhurhaliri rhwaganira n’abantu baliri embuga, kuhebamo n’abantu b’emilala yerhu n’ab’oku biro bikulu. Haliri obubandi, echibula ch’ebilyo, baliri babafarhira n’abakazi banene emisi. Eyola hali ebihire yalimalire myaka 14, yagera na hoshi omu chihugo.

Anne: Abantu ba mobu buko baliri bayirha aba omu bwindi buko. Abasoda bahekere embundi bayambere kubi baliri bagera omu eneo eyi bali basahura mu buli nju choshi balonzeze. Baguma mubo baliri babona okuyirha abantu kuguma “n’okuyirha engoko.” Abola babandi baliri bafunga amabarabara yibasaka abantu, banaliri bayirha abantu baliri balonza kugera. N’enyuma banalyamikiza emifu elugulu w’eyindi mifu. Ebyola byalirhengerere chiro na hofi ne Beteli. Abahamirizi bemana baliyirhirwe, kuhebamo na bamisiyonere berhu babiri bazigirwa.

Abahamirizi balihanyageze akalamo kabo omu kubisha ababo Bahamirizi b’obuko baliri balonza kuyirha. Bamisiyonere n’ab’oku Beteli baliri babisha bene-babo na bali-babo. Oku Beteli, Bahamirizi baguma balibirhaga baliri balyama ahashi, rhwalilamire n’abandi omu byumba byerhu oku etaje. Rhwalilamire n’omulala gwa bantu mushanvu omu chumba cherhu.

Paul: Buli lusiku abola babandi baliri balonza kuyingira omu Beteli omu kuntu balole akaba nta bantu rhubishire. Rhwaligwerhe balanzi bane: babiri oku dirisha na bandi babiri oku mulyango gw’embuga. Nk’abola bene-berhu babiri baliri oku mulyango babezeze efune embere zabo, y’obola ebintu bili binja. Aliko nkabahebere efune enyuma w’omugongo, y’obola  abola babandi bali balonza kuyingira, abola baliri oku dirisha banagenda juba juba kubisha bera-berhu.

Anne: Enyuma wamaboso manene, echigusho ch’abola b’abandi balonza kuja omu Beteli oku chingufu. Rhwalichibishire na mwene-werhu muguma omu dushe ahantu haliri akali ka kabati wakachibishamo. Oyola mwene-werhu aja mw’eyola fasi ngeke achibishamo. Abola basoda bagwerhe embundi bayinja okw’etaje. Bakogorha oku mulyango gwerhu n’ebisirani. Bagerere omu nju Paul ababwira ntya: “Mukani ali omu dushe y’ayoga.” Amango infunga omulyango mwene-werhu alichibishiremo gwajira olwamo. Naho byampema mpebe ebintu byoshi oku etajere. Narhondera kuwaza okw’abola basoda bambaza bichi naliri najira na yubaha bwenene, omubiri gwani goshi gwarhondera kudisimana. Nalimenyere okubihemere ntange ntulere embere infungule omulyango. Nasalira kubuya buya omu kuhema Yehova antabale. Naho nafungula omulyango nagala na kubalegereza eyi ntulerere. Muguma mubo anshunika emburhambi agenda ewakabati akafungula n’okurhondera kusakamo. Arhabonaga oyola mwene-werhu. Oyola musoda n’abandi aliri nabo barhondera kusaka ezindi fasi zoshi. Aliko na mw’ezola fasi nta muntu balibwene.

Paul: Mu myezi minene rhwaliri rhwalama na bilyo bigeke. Aliko ebilyo by’ekiroho kakaliri kalamiro kerhu. Ebirhwaliri “rhwayukula” bwaliri buharamye bw’esezi bwe Beteli bonyine, na rhweshi rhwaliri rhwasimiswa n’emisi ya ndani bwaliri bwarhuha.

Nka rhwabulaga ebilyo n’amenji byakarhuhemere kurhenga omu Beteli n’abola bene-berhu barhakachibere omu bulanzi, bakanabayirhire. Mango manene Yehova aliri arhuha ebirhukenere omu kasanzi kakwanene n’omu njira esomeze! Yehova aliri arhushishikala n’oku rhurhabala rhubere rhurhulerere.

Akalamo omu chihugo kaliri kagenderera kubiha aliko obukweri bwaliri bwarhukomeza rhweshi. Banene mu bene-berhu na bali-berhu baliri bazigana kubunga eju y’okuyokola akalamo kabo, aliko obwemere bwabo bwaligenderere kubera bukomere banaliyorhere barhulerere chiro akaba ebibazo baliri bahurana. Baguma baliderhere okw’ebibazo “byaliri byabarheganya oku malibuko makulu.” Abashamuka b’echibaga n’emisole balijirire okwabo koshi bagalire yibarhabala bene-babo na bali-babo. Bene-berhu na bali-berhu bahamiraga omu yindi eneo, baliri barhabalana, barhondera n’okuhubiri mw’eyola eneo. Baliri bakolesa byoshi baliri babona omu chibala omu kuyumbaka Echumbi ly’Obwami n’okujira embuganano. Mw’ebyola bihe bikomere, okuja oku mbuganano n’okuhubiri kwalihere bene-berhu na bali-berhu obulangalire n’okubaheba omurhima bwenene. Amango m’okuhana oburhabale, rhwalihumirwe oku murhima okuyunva bene-berhu yibahema esakoshi z’okuja oku mahubiri ahali h’okuhema emyambaro! Bantu banene balibwene ebintu byoshi byaliri byarhengerera amango m’evita, baliri basimiswa n’emyazi minja. Baliri basomerwa n’okuntu baliri babona obusime bungana Abahamirizi baligwerhe. Bene-berhu na bali-berhu baliri nka mwangaza omu mwizimya! (Mt. 5:14-16) Bulala bene-berhu na bali-berhu baligwerhe bushiru bunene, chiro n’abasoda bali kalihire bwenene baliyinjire kuba Bahamirizi.

Paul: Mu mango maguma byali birhuhemere kurhenga omu chihugo. Turu esharhu rhwalilibirhire mu bisanzi bigeke na turu ebiri rhwalilibirhire omwaka guyenere. Mwali-werhu muguma w’omu misiyonere aliyerekene bwinja bwinja okuntu rhwaliri rhwachiyunva omu kuderha ntya: “Oku masomo me Gileyadi balirhubwirire oku rhukwanene kuzigira bene-berhu na bali-berhu b’omu eneo n’omurhima goshi, na ntyo kurhwanalijirire. Bobola amango rhuleka bene-berhu omu hali zikomere, rhwaliyunvirhe kubi bwenene!” S’aliko rhwaligwerhe obusime bulala rhwakachigalire kurhenga mw’ebyola bihugo bya hofi, yi rhuja kurhabala bene-berhu na bali-berhu n’okushigikira akasi k’amahubiri omu Liberia.

Anne: Omu Mwezi gwa 5, mwaka 1996, bantu bane murhwabo bagenda omu mutugari gwalihekere amadokima m’akamaro me Beteli. Rhwalilonzeze kuja omu fasi eli m’obulanzi, okulwindi lunda lw’evile ku bilometre 16 n’aharhwaliri. Babaga bafarhire e eneo yerhu. Abasonda bakalihire bwenene, bashurha amasasi elugulu, barhuyumanza, barhuhulusya basharhu, bagenda na Paul omu mutugari. Rhwagwarha buba bunene bwenene. Echokugayisa, rhwabona Paul ayinjire alambagira ali n’abandi bantu kamama n’eshagama yiyamuva omu malanga. Eju y’okurhamenya ebyabere rhwawaza oku bamukubirhire, aliko buzinda rhwabona oku nanga bulala nka bamukubirhaga arhakayinjire alambagira! Musoda muguma amukoromesaga omu kumushunika embuga w’omutugari. N’eshokusimisa chirhaliri chihulu chinene.

Omutugari gw’abasoda gwaliri eburhambi bwerhu guyujwire mw’abantu bayubahire. Rhwava rhwabona oku rhujemo, aliko bulala nta fasi yalichirimo, rhwafa chakugushuberako ntyo! Shofere atembeza n’ebitensi alibisya omutugari bwenene rhwabwira rhwarhoga. Rhwamurhebereza ayumange rhushonoke alahira. Rhwachihangana kugugundira bwenene, aliko rhwagera emunda rhwajaga ey’obwenge bwachokere n’emisi y’omu mubiri yiyadirhimana eju y’obuba.

Paul: Rhwalolere okuntu emyambaro yerhu ezingire n’okuntu eberekere oku mugongo, rhwachibaza nka gurhe rhuchili bagumaguma. Rhwalyama omushwa emburhambi bw’enviyo balibashurhire amasasi, eyakarhuheka e Sierra Leone omu lusiku lwakulikiragaho. Rhwaligwerhe busime bunene okubona rhwalichili bagumaguma, aliko rhwaliri rhwayubahira bene-berhu na bali-berhu.

Anne: Rhwagerere oku Beteli ye Freetown, omu Sierra Leone, rhwaba omu bulanzi, banarhushishikala bwenene. Aliko halirhengerere ebi ntalilangalire oku byakarhengerere. Buli mango naliri nazigana kuchapa omu bwenge ebintu bibi rhwageragamo omu Liberia. Buli lusiku naliri nazigana kuwaza oku hakarhengerere ebindi bintu bibi bwenene, nantyo nta lichiri nagala kuwaza bwinja. Buli chintu chaliri emburhambi bwani chaliri chabonekana nka bilorho. Buli budufu, naliri nazuka eyi ndinadirhimana n’okuyubaha oku hali echintu chibi chakarhengerera. Byaliri byakomerera kuyisa. Paul aliri anfarha n’okusalira haguma nani. Rhwaliri rhwayimpa enyimpo z’Obwami kugera ahanarhulerera. Naliri nachiyunva nka nasireha n’oku nta kachigalire kugenderera kukola nka misiyonere.

Ntakayibirira ebyarhengereraga. Mw’elyola boso rhwapata gazeti ebiri. Inguma yaliri Amukeni! ya Siku 8, Mwezi gwa 6, 1996. Mwaliri omwazi guderhere ntya: “Kukabiliana na Mishiko ya Hofu ya Ghafula.” Naho narhegera bulagurhe ndi nachiyunva ntyo. Egazeti ya kabiri yaliri Munara g’Omulanzi gwa Siku 15, Mwezi gwa 5, 1996, mwaliri omwazi guderhere ntya “Wao Hupata Wapi Nguvu Zao?” M’ogola Munara mwaliri efoto y’echihwihwiri chigwerhe echibaba chivunikire. Ogola mwazi gwalirhuhuzenye n’echihwihwiri chikwanene kugenderera kubalala chiro akaba amababa macho mavunikire. Gwafasiriya oku chiro rhwazamba eju y’ebintu bibi byarhengerere omu kalamo kerhu, Yehova akarhurhabala rhugenderere kurhabala abandi. Ogola mwazi byaliri bilyo by’okumpeba emisi birhegere emwa Yehova byayinjaga omu kasanzi kakwanene. (Mt. 24:45) Nalonza eyindi myazi eli kuguma n’eyola, nayiheba haguma. Yalintabere bwenene. Okw’esiku zanaliri zagera, okuntu naliri nachiyunva kwahwa.

Paul: Buli mango rhwaliri rhwagaluka emwerhu e Liberia, rhwaliri rhwagwarha busime bunene. Oku buzinda b’omwaka gwa 2004, rhwaba yirhwamamala hofi myaka 20 omu ngabane yerhu. Evita lyabaga lyahwere. Haliri omupango g’okuyumbaka Ebeteli. Aho han’aho barhuhema rhuyemere engabane mpyahya.

 Ebyola byalirhukomerere. Rhwalizigire bwenene bene-berhu na bali-berhu b’omu Liberia. Rhwaliri mulala muguma, rhurhalilonze kulekana nabo. Okuyibuka okuntu Yehova arhugishaga amango rhuleka abantu b’omulala gwerhu rhwaja soma amasomo me Gileadi, kwarhuma rhwayemera eyola ngabane mpyahya. Barhurhuma omu Ghana, chihugo chihanene omupaka n’echerhu.

Anne: Amango rhurhenga e Liberia rhwaliririre bwenene. Rhwalisomerwe amango Frank, musheja-werhu ogwerhe obwengehe onashajire arhubwira ntya: “Mukwanene kurhuyibirira!” Naho afasiriya ntya: “Rhumenyere oku murhakafa mwarhuyibirire, aliko mukwanene kuseza omurhima gwenyu goshi oku ngabane yenyu mpyahya, erhengere emwa Yehova, bobola muchiseze ku bene-berhu na bali-berhu b’eyola munda.” Ebyola Frank aderhaga, byalirhurhabere kujira abera bahyahya omu chihugo bantu bageke babalirhuyinji, omu n’ebintu byoshi byaliri bihyahya.

Paul: Aliko birharhurholaga siku zinene embere rhuzigire ogola mulala gwerhu guhyahya gw’ekiroho g’omu chihugo che Ghana. Eyola munda, haliri Bahamirizi banene! Rhwaliyigire binene kugerera obwimana n’obwemere bukomere bw’abola bera-berhu bahyahya. Naho rhwamalire kukolera e Ghana mu myaka 13, rhwapata omwazi guhyahya. Barhubwira rhuje kolera oku murhabi gw’emasheshukiro me Afrique omu chihugo che Kenya. Kweri rhwalilekene na bene-berhu na bali-berhu b’omu Ghana na b’omu Liberia, aliko rhurhalegama kushuba kujira obwira na bene-berhu na bali-berhu bazigirwa b’omu Kenya. Rhwanaliri rhwakolera omu eneo nzibu-zibu emunda haliri bulagirire bunene bwenene.

Anne: Omu kalamo kani nahurene n’ehali zikomere bwenene, hali n’amango naliri nayunva n’obuba bunene. Amango rhulamire omu bihe bikomere n’omu eneo eli m’obuhanya, ebyola byakarhuma rhwalwala, rhwachiyunva rhuyubahire n’okuyunva rhuhwererwe. Rhurhakalagalira oku Yehova arhulaga kw’ebyola kugerera echisomerene. Chiro nazene, yinyunva amasasi nanayunva omusisi omunda nanayunva nka n’efune zani zamahola. Aliko nayigire kulangalira buli burhabale Yehova arhuha omu kurhukomeza, kuhebamo n’oburhabale bwa bene-berhu na bali-berhu. Nabwene ku n’amango rhugenderere kuyiga Ebiblia, okusalira, kuja oku mbuganano n’okuhubiri, Yehova akarhurhabala rhubere omu ngabane yerhu.

Paul: Mango maguma abantu baliri barhubaza ntya: “Musimire engabane yenyu?” Ebihugo byakaba bikwirire, aliko kandi ebintu byakahindamuka mwanaba obuhanya. Bobola, bichi rhuzigire bwenene kulusha echihugo? Rhuzigire omulala gwerhu, bene-berhu na bali-berhu. Chiro akaba rhwakuliraga omu micho erhali kuguma, rhugwerhe amawazo mali kuguma. Rhwaliri rhwawaza oku barhurhumire rhuje kubaheba omurhima, aliko okuderha okuli babaliri barhuheba emisi.

Obuguma bwerhu b’omu gulu lyoshi, chili chisomerene kurhenga emwa Yehova! Rhugwerhe omulala buli fasi. Amango moshi rhuli omu lubaga lwa Yehova, rhurhakabula omulala n’ah’okulama. Rhuchizerere oku nka rhugenderere kulangalire Yehova, arhuheba emisi omu kurhuha ebirhukenere.​—Flp. 4:13.