Nicolas na Céline balihurene ebibazo bilengene. Baliyemerere engabane y’okuja omu chibaga chihyahya omurhabi gwe France gwabahaga. Baderhere ntya: “Burhanzi rhwalisimire bwenene, aliko buzinda rhwahwanza kukumbula bera berhu. Rhurhaliza kugwarha abera omu chibaga chihyahya.” a Bulala birhayorohere, gurhe wakajira y’okoomera omu chibaga chihyahya? Bichi abandi bakajira yi bakurhabala? Na gurhe wakajira y’oheba abandi omurhima nawe bakuhebe omurhima omu chibaga chawe chihyahya?

TALA MAKANUNI MANE MAKAKURHABALA

1. Olangalire Yehova. (Zb. 37:5) Mwali-werhu Kazumi, w’omu Japon, alihamire echibaga ali amamala mu myaka 20 amango eba ahama eju y’akasi. Gurhe “alilekere Yehova [amuchire] enjira”? Aderhere ntya: “Buli mango naliri n’abwira Yehova oku bilolere byoshi byaliri byanyubahisa, okuchiyunva mpugirwe n’omulago naliri nayunva. Amango moshi naliri nasalira, aliri ampa emisi nalikenere.”

Nka gurhe wakalangalira Yehova? Kuguma n’ok’omurhi guba gulagirire amenji n’ezuba yi gukula, obwemere bwerhu bukwanene kuliswa yi bukula. Nicolas, rhwabaga rhwaganirireko, aderhere ok’okukengera oku mufano gw’Abrahamu, ogwa Yesu n’ogwa Paulo boshi balijirire okwabo koshi bagalire yi bajira obulonza bwa Mungu, byalirhumire achizera oku Yehova nj’amurhabala naye. Akaba ogwerhe eprograme y’okuyiga Ebiblia ngasi mango, echola chakurhabala ogale kulwisa buli bintu byahindamukire omu kalamo kawe, wapata n’ebiwakakolesa omu kuheba omurhima abandi omu chibaga chawe chihyahya.

 2. Orhahuzanyaga echibaga warhengagamo n’echokala olimo. (Muh. 7:10) Jules w’omu chihugo che Benin alihurene emicho minene arhakomere amango ahamira omu États-Unis. Aderhere ntya: “Naliri nachiyunva nka bimpemere kubwira buli muntu nabuganene naye oku bilolere ehali yani.” Bulala byaliri bintu arhalikomere, arhalichili ayegera bene-babo na bali-babo. Buzinda amango amenya bwinja bene-babo na bali-babo, ahindamula amawazo mage. Aderhere ntya: “Inkala menyere oku hoshi rhwakaba rhuli oku gulu, abantu boshi babaguma. Intachiderha n’okujira nk’oku naliri najira burhanzi.” Bolala orhahwanzaga wahuzanya echibaga chawe chihyahya n’echiwalirimo embere. Mwali-werhu muguma oli painiya oyirikirwe Anne-Lise, aderhere ntya: “Nahamaga bulala nalilonzeze kuyiga ebintu bihayahya, s’arhali mpu nalishondere buli chintu omu nju yani mpyahya chibe kuguma n’echinaligwerhe omu nju yani ya mira.”

Abashamuka nabo bakwanene kuyaka okuyinja bahuzanya echibaga chabo chihyahya n’echamira. Okukola ebintu omu yindi njira arhali k’okuderha oku byakolerwe kubi. Kuli kwinja okumenya ehali zah’olamire embere ohane amawazo malebe. (Muh. 3:1, 7b) Byakasimisa amango wamayigiriza bene-benyu kugerera omufano gwawe, ahali h’okubaseza bagwarhe amawazo mali kuguma n’amawe.​—2 Ko. 1:24.

3. Ogwarhe binene by’okukola omu chibaga chawe chihyahya. (Flp. 1:27) Chiro kakaba kali kasi kanene okuhama kanakuhemere bisanzi binene, kuli kw’akamaro okuja oku mbuganano omu chibaga chawe chihyahya omala kuhama ntya, n’okuchihangana kuja oku mbuganano ya masu oku masu nk’oku byakanagalikana. Na nka bene-benyu na bali-benyu b’omu chibaga barhakubona changwa banakubona liguma-liguma, gurhe bakakurhabala? Lucinda na bali-bage babiri, bahamiraga omu vile nzibu-zibu ye Afrique du Sud, ayibukire ntya: “Bera bani balimpere ehano ly’okuseza obwenge oku bantu b’omu chibaga chani chihyahya, okuhubiri haguma nabo, n’okuhaana ebishubizo oku mbuganano. Rhwalihanire n’enju yerhu baleme bakolera mw’embuganano y’amahubiri.”

“Okukola chirhugo oku chindi” omu makasi m’echibaga haguma na bene-berhu na bali-berhu kwabarhabala muhebane omurhima buli muguma n’owindi. Anne-Lise rhwabaga rhwashambereko embere, aliri achihangana kuhubiri na buli muntu omu chibaga chage chihyahya. Gurhe byalijire byaba? Aderhere ntya: Eyila y’enjira nyinja y’okuchiyunva ok’oli muguma wa mw’echola chibaga. Kandi, amango oli wachihana y’okola ebintu nk’okukwiza changwa okukola obusafi bwe Chumbi lyenyu ly’Obwami, echola chanayereka bene-benyu na bali-benyu ok’oli wabona eyola fasi nka chibaga chawe chihyahya. Ok’onali wagenderera kuchihana bwenene, kubanagenderera kukuyegera, kandi wachiyunva oli chigabi ch’omulala gwawe guhyahya gw’ekiroho.

4. Ogwarhe abera bahyahya. (2 Ko. 6:11-13) Nk’abantu barhegerere ok’obalagireko, byakakuyorohera obe mwira wabo. Bobola opange okuntu wakayinja wahika oku Chumbi ly’Obwami embere  w’akasanzi embere embuganano zirhondere, n’okurhagenda ahohan’aho embuganano zimala kuhwa y’opata ebisanzi bitosheze by’okuganira n’abandi. Ochihangane kumenya amazino mabo. Amango oli wayibuka amazino m’abantu, okuchijira mwira wabo n’okuchihangana kuganira nabo, balonza bakumenye, byanagalikana kweri mube bera benja.

Ahali h’okuyubaha oku barhayemera kukola obwira haguma nawe, olekere bene-benyu na bali-benyu b’omu chibaga chihyahya orozo l’okukumenya nk’ok’onali. Oyige kugerera Lucinda waderhaga ntya: “Rhugwerhe abera ba hofi-hofi zene bulala rhwachihanganire kukaribisa abandi bantu ahamwerhu.”

“MUYEGEREZANE BULI MUGUMA N’OWINDI”

Okuja omu Chumbi ly’Obwami lili mu bantu banene barhengere omu bindi bindi bihugo, nkabaga byakalerhera baguma obuba. Bobola, gurhe wakajira y’orhabala abahyahya bahamire omu chibaga chawe? Entumwa Paulo ali rhuhebere omurhima omu kuderha ntya: “Muyegerezane buli muguma n’owindi, nk’oku Kristu naye abayegereze, yi Mungu ahabwa obukuze.” (Ro. 15:7) Omu kuyiganya Kristu, abashamuka bakarhabala abahyahya bachiyunve bayegerezwe. (Olole echisanduku “ Bichi Byakurhabala y’Ogala Kuhama Bwinja?”) Aliko, abantu boshi b’omu chibaga, kuhebamo n’abana bagwerhe echibakwanene kujira yi bapata abera bahyahya.

Okuyegerezana kuheberemo n’okuyegereza abandi ah’amwaberhu, aliko kandi biheberwemo n’okubahereza oburhabale bakenere. Omufano, mwali-werhu muguma alirholere akasanzi kakwanene yalambagiza mwali-werhu muhyahya omu vile n’oku mufasiriya gurhe banalipa amatransiporo omu mutugari. Echola chalisimisize bwenene oyola mwali-werhu muhyahya n’okumurhabala agale kukoomera anachiyunve bwinja eyola munda ahamiraga hahyahya.

OKUGWARHA OROZO L’OKUKULA

Nk’okw’enzige enaba amango eli yakula, enayunuka oluhu turu zinene embere egwarhe obuhashe b’okubalala n’amababa mayo. Intyo konoko, amango wamahamira omu chibaga chihyahya, bikuhemere  ohime buli buba boshi boshi bwakarhuma orhayeneza bintu bilebe omu kasi ka Yehova. Mwene-werhu Nicolas na mukage Céline baderhere ntya: “Okuhamira eyindi fasi zili nyigirizo zinja bwenene. Y’ogala kukoomera abantu bahyahya n’efasi zilengene, bikuhemere okukuza engeso zihyahya. Mwene-werhu Jean-Charles rhwabaga rhwashambereko embere aderhere gurhe omulala gwage gwapatire enyungu: “Omu chibaga cherhu chihyahya, abana berhu bagenderere kukula bwenene ekiroho n’okuba hofi na Yehova. Enyuma wa myezi migeke ntya, mwali-werhu ahwanza kugeza engabane z’abanafunzi za hagarhi-garhi k’eboso. Na mugala werhu ahwanza kukola nka muhubiri orhaza kubatizwa.”

Gurhe wakajira akaba eju y’ehali orhakagala kuhama, omufano nk’okuja ahakenere abahubiri banene? Wakachihebera omuhigo g’okurhondera kukolesa maguma mw’amola mahano rhwaganirireko omu chibaga ch’aholamire. Ok’onalangalire Yehova, ogwarhe binene by’okukola omu chibaga, omu kupanga okuntu wahubiri n’abandi, okulonza abera bahyahya, changwa kuba mwira mwinja kubalala okola omenyere. Ka wakarhabala abahyahya changwa abali omu bulagirire, omu kubahereza ebibakenere? Kurhenga mira obuzigire eli ngeso enayerekana Abakristu b’okuli, okurhabala abandi kwakarhuma wayegera Yehova. (Yoh. 13:35) Wakachizera oku “Mungu asimiswa n’enterekero zili nk’ezola.”​—Ebr. 13:16.

Chiro akaba oku hali ebibazo, Bakristu banene babwene enyungu z’okuhamira omu chibaga chihyahya k’okuderha oku nawe wakajira ntyo! Mwali-werhu oyirikirwe Anne-Lise aderhere ntya: “Okuhama ebibaga kwantabere kujira obwira haguma n’abantu banene.” Mwali-werhu Kazumi ayemerere ok’okuhama echibaga kwakarhuma “wachibonera oburhabale bwa Yehova omu zindi njira orhasaga kuchibonera chiro.” Bichi mwene-werhu Jules naye aderhere? Ashambere ntya: “Obwira nabaga nakolere bwaliri bwarhuma nachiyunva indi eka. Zene yi nachiyunva ndi muguma w’omu chibaga chani chihyahya n’okuyunva nka bikola byakankomerera kuhama mucho.”