MWAZI G’OKUYIGA 30
OLWIMPO 36 Rhulange Emirhima Yerhu
Ebintu by’Akamaro Rhwakayiga Kugerera Abami be Izraeli
“Nji mwanabona kandi etofauti ahakagarhi k’omunya-kunali n’omuntu mubi, ahakagarhi k’oli wakolera Yehova n’orhali wamukolera.”—MAL. 3:18.
EBIRHWAYIGA
Okuyiga oku bilolere abami be Izraeli kwarhurhabala rhumenye bichi rhukwanene kujira yi rhusimisa Yehova.
1-2. Bichi Ebiblia ederhere oku bilolere bami baguma be Izraeli?
EBIBLIA ederhere oku bilolere balume barhalukire 40 balirhegekere nka bami be Izraeli. a Enarhubwirire bwinja bwinja ebi buli muguma mubo alijirire. Omufano, chiro n’abami benja balijirire bintu biguma bibi. Rhuganire oku mufano g’Omwami mwinja Daudi. Yehova Aderhere ntya: “Omukozi wani Daudi . . . aliri ankulikira n’omurhima gwage goshi ey’ali akola ebintu binja byonyine omu masu mani.” (1 Fa. 14:8) Aliko, Daudi alijirire obugonyi na mukabene anajira n’emipango y’okuyirhisa eba w’oyola mukazi oku vita.—2 Sa. 11:4, 14, 15.
2 Okubwindi, banene omu bami barhali bemana balijirire bintu biguma binja. Rhuganire oku mufano gwa Rehoboamu. Omu masu ma Yehova Rehoboamu “alijirire ebintu bibi.” (2 Ny. 12:14) Aliko, hali n’ebindi binja alijirire. Omufano, alikengere amango Yehova amubwira okw’amenye alwisa amashanja ekumi me Izraeli, anabaleka bachishoge owindi mwami. Analikomeze n’amavile manene m’omu burhegesi bwage omu kulanga abantu ba Mungu oku banzi babo.—1 Fa. 12:21-24; 2 Ny. 11:5-12.
3. Chibazo chihe ch’akamaro rhwakachibaza na bichi rhwaganirako mu gunola mwazi?
3 Bili by’akamaro okulonza echishubizo ch’echila chibazo. Akaba abami be Izraeli balijirire ebintu binja n’ebintu bibi, bichi Yehova agendaga achisezako y’amenya akaba mwami mulebe ali mwimana omu masu mage? Echishubizo ch’echola chibazo charhurhabala kumenya bichi rhukwanene kujira yi rhusimisa Yehova. Rhwaganira ku bintu bisharhu Yehova aliri achisezako amango aliri alolereza abami be Izraeli: ehali yabo y’omurhima, okuntu baliri bahungama, n’okuntu baliri babona obuharamye b’okuli.
BALIZIGIIRE YEHOVA N’OMURHIMA GWABO GOSHI
4. Tofauti ehe yaliri ahakagarhi k’abami bemana n’abarhali bemana?
4 Yehova aliri asima abami baliri bamuharamya n’omurhima gwabo goshi. b Omwami mwinja Yehoshafati “alilonzeze Yehova n’omurhima gwage goshi.” (2 Ny. 22:9) Ebiblia ederhere ntya oku bilolere mwami Yosiya: “Enyuma yage, nta windi mwami waliri kuguma naye waligalukire Yehova n’omurhima gwage goshi.” (2 Fa. 23:25) Gurhe si oku bilolere Mwami Sulemani, wajiraga ebintu bibi omu myaka yage y’obuzinda? “Omurhima gwage gurhalichiyenere.” (1 Fa. 11:4) N’oku bilolere owindi mwami orhaliri mwimana Abiyamu, Ebiblia ederhere ntya: “Omurhima gwage gurhaliyenere ku Yehova.”—1 Fa. 15:3.
5. Fasiriya okukolera Yehova n’omurhima guyenere k’okuderha gurhe.
5 Okukolera Yehova n’omurhima guyenere k’okuderha gurhe? Omuntu ogwerhe omurhima guyenere, arhaharamya Mungu konyine bulala amenyere okw’akwanene kujira ntyo. Aliko, anakolera Yehova bulala amuzigiire n’okumukenga. Anagenderera kuzigira Yehova bwenene n’okumukenga omu kalamo kage koshi.
6. Nka gurhe rhwakagenderera kugwarha omurhima guyenere? (Mezali 4:23; Matayo 5:29, 30)
6 Nka gurhe rhwakayiganya abami bemana balizigiire Yehova n’omurhima guyenere? Rhwakajira ntyo omu kuyaka amashumi mabi. Omufano, ebintu by’okuchisimisa bibihire byakagaba omurhima gwerhu. Intyo kon’oko okubilolere abera babi n’amawazo m’okusima ebintu by’omubiri. Nka rhurhegerere oku chintu chilebe chahwanzize kubihya obwira bwerhu haguma na Yehova, bihemere okujira juba juba rhuchiyake.—Osome Mezali 4:23; Matayo 5:29, 30.
7. Bulagurhe kuli kw’akamaro okuyaka amashumi mabi?
7 Rhurhakwanene kuziga omurhima gwerhu gwachigabamo. Nka rhurhabere merangwe, rhwakawaza oku bulala rhuherhe binene by’okukola omu kasi ka Yehova, rhurhakashiba rhwakabulira amashumi mabi. Omufano, ba nka wawaza oli wenyine embuga amango m’emboho ekalihire, n’omuyaga. Hanola ogera omu nju, wanachana omuliro. Gurhe byakaba nk’orhafungire omulyango? Emboho yakayunjula omu nju yawe juba juba. Bichi ogula mufano gurhuyigirize? Rhurhakwanene kutosheka konyine n’okurhola ebilyo by’ekiroho byakarhuma rhwagwarha obwira bukomere haguma na Yehova. Aliko kandi rhukwanene kuchinga omulyango y’amashumi mabi, k’okuderha, y’omuyaga n’emboho byalinola gulu changwa enyifinjo zirhachere zirhaja omu murhima gwerhu n’oku gugabamo.—Efe. 2:2.
BALIHUNGAMIRE EBYAHA BYABO
8-9. Gurhe Mwami Daudi na Mwami Hezekiya balijirire amango babayereka amagosa mabo? (Olole y’oku chiganda.)
8 Nk’oku rhwabaga rhwaderhere omu chifungo ch’oburhanzi, Mwami Daudi alijirire amagosa makomere. Aliko amango omulebi Natani amubwira okuntu Yehova yachiyunva oku bilolere echola chaha, Daudi ahungama oku bwirhohye. (2 Sa. 12:13) Ebinwa byage bili omu Zaburi ya 51, biyerekene okuntu alihungamire n’omurhima gwage goshi. Daudi arhachijiraga abonekane nk’ogayire omu kubehya Natani kw’ahungamire y’ayaka obuhane.—Zb. 51:3, 4, 17, amahugulo.
9 Mwami Hezekiya naye aligoseze Yehova. Ebiblia ederhere ntya: “Omurhima gwage gwagwarha omwibone, n’echola charhuma Mungu amuyunvira ebisirani, abiyunvira echihugo che Yuda ne Yerusalemu.” (2 Ny. 32:25) Bichi byarhumaga Hezekiya ahwanza kugwarha omwibone? Nkabaga bulala Yehova alimuhere obuchire analimurhabere kuhima aba Asiriya. Changwa nkabaga bulala Yehova alimufumize obulwala bwakamuyirhire. Inkabaga omwibone gogwarhumaga ayereka Abababiloni obuchire bwage, n’echola charhuma omulebi Isaya amukalihira. (2 Fa. 20:12-18) Aliko, kuguma na Daudi, Hezekiya naye alihungamire oku bwirhohye. (2 Ny. 32:26) Gurhe Yehova alijire abona Hezekiya? Alimubwene nka mwami mwimana “waligenderere kujira ebintu binja.”—2 Fa. 18:3.
Mwami Daudi na Mwami Hezekiya balihungamire oku bwirhohye amango babayereka bwinja bwinja ebyaha byabo (Olole echifingo cha 8-9)
10. Gurhe mwami Amaziya alijirire amango agororwa?
10 Tofauti na Daudi na Hezekiya, Mwami Amaziya we Yuda, alijirire ebinja “aliko arhali n’omurhima gwage goshi.” (2 Ny. 25:2) Bintu bihe bibi alijirire? Yehova amalire kumurhabala kuhima Abanya-Edomu, Amaziya ahwanza kuharamya ba mungu babo. c Amango omulebi wa Yehova aganira naye oku bilolere echola chibazo, mwami arhalonzaga kumuyunviriza haban’akatyu anamufukuza.—2 Ny. 25:14-16.
11. Nk’ok’olwandiko lwa 2 Wakorinto 7:9, 11 luyerekene, bichi rhukwanene kujira yi Yehova arhubabalira? (Olole n’efoto.)
11 Bichi eyola mifano erhuyigirize? Rhukwanene kuhungama ebyaha byerhu n’okujira okwerhu koshi yi rhurhachibigalukira. Rhurhakwanene kuwaza oku Yehova changwa abashamuka barharhuzigire. Chiro n’abami benja be Izraeli balikenere amahano n’okukalihirwa. (Ebr. 12:6) Amango rhwamagororwa rhukwanene 1) kuyemera oku bwirhohye, 2) rhwanahindamula ebintu rhukwanene kuhindamula, 3) rhwanagenderera kukolera Yehova n’omurhima gwerhu goshi. Amango rhwamahungama ebyaha byerhu, Yehova arhubabalira.—Osome 2 Wakorinto 7:9, 11.
Amango rhwamagororwa, rhukwanene 1) kuyemera oku bwirhohye, 2) rhwanahindamula ebintu rhukwanene kuhindamula, 3) n’okugenderera kukolera Yehova n’omurhima gwerhu goshi (Olole echifungo che 11) f
BALIRI BAHARAMYA YEHOVA OMU NJIRA EKWANENE
12. Ahanene bichi byaliri byayerekana akaba mwami mulebe ali mwimana changwa arhali mwimana?
12 Abami Yehova aliri abona oku bali bemana, baliri bamuharamya omu njira ekwanene. Banaliri baheba abantu ba Yehova omurhima nabo bajire ntyo. Kweri, nk’oku rhwabwene, baliri bajira amagosa mango maguma. Aliko baliri baharamya Yehova n’omurhima gwabo goshi, n’okujira okwabo koshi yi basisibuliza emparamyo y’ebishushanyo omu chihugo. d
13. Bulagurhe Yehova alibwene Mwami Ahabu kw’arhali mwimana?
13 Bulagurhe Yehova alibwene bami baguma oku barhali bemana? Okuderha okuli, byoshi baliri bajira birhaliri bibi. Chiro n’Omwami mubi Ahabu, aliyerekene obwirhohye mu njira ndebe analichiganyire oku bilolere olufu lwa Naboti. (1 Fa. 21:27-29) Analiyumbakire amavile anarhabala Abaizraeli kulwa mavita manene. (1 Fa. 20:21, 29; 22:39) Aliko hali echintu chibi bwenene Ahabu alijirire. Bulala mukage aliri amushumika, ahwanzisa emparamyo yabamungu b’obubeshi. Arhanahungamaga chiro eju y’echola.—1 Fa. 21:25, 26.
14. a) Bichi byarhumaga Yehova abona Mwami Rehoboamu kw’arhali mwimana? b) Bichi byaliri byarhengerera omu burhegesi bw’abami banene barhaliri bemana?
14 Rhuganire oku mufano g’owindi mwami orhaliri mwimana, k’okuderha Rehoboamu. Nk’oku rhwabonaga omu chifungo cha kabiri, omu mango m’oburhegesi bwage, alijirire bintu binene binja. Aliko amango oburhegesi bwage bukomera, aleka kukenga Esheriya za Yehova n’okuhwanza kuharamya ba mungu b’obubeshi. (2 Ny. 12:1) Enyuma wahola, mango maguma aliri aharamya Yehova amandi mango anaharamya ba mungu b’obubeshi. (1 Fa. 14:21-24) Rehoboamu na Ahabu arhali b’abami bonyine barhaligenderere kuharamya Yehova omu njira nyinja. Kweri, banene omu bami barhaliri bemana baliri baharamya ba mungu b’obubeshi n’okuheba abandi omurhima nabo bajire ntyo. Okuderha okuli, Yehova alibwene ok’okumuharamya omu njira nyinja chechaliri chintu ch’akamaro chaliri chayerekana akaba omwami ali mwinja changwa ali mubi.
15. Bulagurhe bili by’akamaro emwa Yehova oku muharamya omu njira y’okuli?
15 Bulagurhe obuharamye chechaliri chintu ch’akamaro bwenene emwa Yehova? Mpanvu nguma yaliri okw’abami baligwerhe engabane y’okurhabala abantu baharamye Yehova omu njira ekwanene. Kandi, amango abantu baliri baharamya ba mungu b’obubeshi, baliri bajira ebindi byaha bikomere n’okukolera abandi kubi. (Ho. 4:1, 2) Okubwindi, abami n’olubaga loshi lwe Izraeli balichihanire emwa Yehova. Bobola, amango baliri babula obwimana ku Yehova n’okuhwanza kuharamya ba mungu b’obubeshi, Ebiblia ederhere oku baliri nk’abali bajira obugonyi. (Yer. 3:8, 9) Amango omuntu amajira obugonyi, anaba y’amabula obwimana oku muntu akwanene kuba mwimana emwage loshi, kandi anababaza eba changwa mukage. Intyo kon’oko, omukozi wachihanire emwa Yehova onaleka kumuharamya n’okuchiheba omu mparamyo y’obubeshi, anaba y’amagomera Yehova bwenene. e—Kum. 4:23, 24.
16. Bichi binayerekana oku Yehova abwene muntu mulebe okw’ali munya-kunali changwa muntu mubi?
16 Bichi eyola mifano yakarhuyigiriza? Kweri, rhukwanene kuhigirira okuyaka echintu choshi choshi chipatene n’emparamyo z’obubeshi. Aliko kandi rhukwanene kugenderera kuharamya Yehova omu njira ekwanene, n’okugenderera kugwarha binene by’okukola omu kasi kage. Omulebi Malaki alifasiriye bwinja bichi binayereka Yehova akaba omuntu ali mwinja changwa mubi. Ayandika ntya: “Nji mwanabona kandi etofauti ahakagarhi k’omunya-kunali n’omuntu mubi, ahakagarhi k’oli wakolera Mungu n’orhali wamukolera.” (Mal. 3:18) Chechirhumire, rhurhakwanene kuleka echintu choshi choshi chiro n’obuzamba bwerhu changwa n’amagosa merhu birhume rhwaleka kukolera Yehova. Okuleka kukolera Yehova chili chaha chikomere.
17. Bulagurhe rhukwanene kuba merangwe amango rhuli rhwachishoga eyi rhwashabana naye?
17 Akaba ochili mulamba onali wawaza kushaba, ebinwa bya Malaki byakakurhabala ochishoge bwinja eyi washabana naye. Waza kw’echila: Omuntu akagwarha ngeso zilebe zinja, aliko nkarhali akolera Mungu w’okuli, ka Yehova akamubona kw’ali mulume changwa mukazi oli munya-kunali si? (2 Ko. 6:14) Nk’oshabene n’omuntu oli nk’oyola, akakurhabala ogenderere kubera mwimana emwa Yehova si? Omufano: Abakazi b’abapagani Mwami Sulemani ashabaga nkabaga baligwerhe ngeso zilebe zinja. Aliko barhaliri baharamya Yehova, na kubuyabuya kubuyabuya bahindamula omurhima gwa Sulemani arhondera kuharamya ba mungu b’obubeshi.—1 Fa. 11:1, 4.
18. Bichi abazere bakwanene kuyigiriza abana babo?
18 Bazere wee! Mwakakolesa engani z’abami zili omu Biblia, omu kurhabala abana benyu bagwarhe enyorha y’okukolera Yehova. Mubarhabale bamenye okw’abami Yehova aliyemerere, bali balala baliri bamuharamya n’okurhabala abandi nabo bamuharamye. Kugerera ebinwa n’omufano gwenyu, muyigirize abana benyu okw’ebintu by’ekiroho, nk’okuyiga Ebiblia, okuja oku mbuganano, n’okuhubiri bye bintu by’akamaro bwenene omu kalamo. (Mt. 6:33) Nka murhajirire ntyo, abana benyu bakawaza ok’okuba Muhamirizi wa Yehova kuli kufa chakuba omu “dini ly’abazere.” Echola chakarhuma babona ok’okuharamya Yehova arhali ch’echintu ch’akamaro bwenene na chiro bakanaleka kumukolera.
19. Bulangalire buhe buliho k’olala yeshi walekere kukolera Yehova? (Olole n’echisanduku “ Wakagalukira Yehova!”)
19 Akaba muntu mulebe alekere kukolera Yehova, k’okuderha, okw’arhakachiba mwira wage si? Nanga, bulala akahungama n’okushuba kuhwanza kuharamya Yehova. Yajira ntyo, bihemere achirhohye n’okuyemera oburhabale bw’abashamuka be chibaga. (Yak. 5:14) Okushuba kuba mwira wa Yehova, ch’echintu ch’akamaro bwenene kulusha byoshi!
20. Nka rhwamayiganya abami bemana, gurhe Yehova akarhubona?
20 Bichi emifano y’abami be Izraeli yarhuyigirize? Rhwakaba kuguma n’abami bemana, nka rhugenderere kukolera Yehova n’omurhima goshi. Rhujage rhwaleka amagosa merhu marhuyigirize chintu chilebe, rhuhungame, rhuhindamule n’ebintu rhukwanene kuhindamula. Kandi rhurhayibagiraga chiro akamaro k’okugenderera kuharamya olala okwanene obuharamye bwerhu, k’okuderha, Mungu muguma w’okuli. Nk’ogenderere kuyorha mwimana ku Yehova, akubona ok’oli muntu oli wajira ebintu binja omu masu mage.
OLWIMPO 45 Okukengera k’Omurhima Gwani
a Mu gunola mwazi, echinwa “abami be Izraeli” chiganirire oku bami boshi baliri barhambula abantu ba Yehova. Babe balala baliri barhambula m’oko mabiri m’obwami bwe Yuda, changwa balala baliri barhambula m’oko ekumi m’obwami bwe Izraeli changwa amoko moshi 12.
b AMAFASIRIYO M’EBINWA: Ebiblia enazigana kukolesa echinwa “omurhima” omukuderha okuntu rhuli ahakagarhi kerhu. Echola chiheberemo enyifinjo n’amawazo merhu, oborhere bwerhu, echinarhushunika rhujire chintu chilebe, n’emihigo rhushondere kuhikira.
c Mw’agola mango abami barhaliri ba Izraeli baliri bazigana kuharamya ba mungu b’amashanja bahimire.
d Mwami Asa alijirire echaha chikomere. (2 Ny. 16:7, 10) Aliko Ebiblia ederhere oku Mwami Asa alijirire ebinja omu masu ma Yehova. Chiro akaba oku burhanzi ali rhangire kulahira kugororwa, byakashobokana oku buzinda ali yinjire kuhungama. Yehova alibwene okw’engeso zage zinja zaliri zinene kulusha amagosa mage. Bobola, Asa aliri aharamya Yehova yenyine analonza gurhe akasisibuliza emparamyo y’ebishushanyo omu bwami bwage.—1 Fa. 15:11-13; 2 Ny. 14:2-5.
e Rhwakabona ok’obuharamye ch’echintu ch’akamaro bwenene ku Yehova, bulala erhegeko lya kabiri ly’Esheriya ya Musa lyalilahize okuharamya owindi muntu yeshi yeshi changwa echintu choshi choshi olekere Yehova.—Kut. 20:1-6.
f AMAFASIRIYO M’EFOTO: Omushamuka ochili musole yayerekana gurhe alagire oku bilolere mwene-werhu ogwerhe engeso y’okunywa amavu. Mwene-werhu amayemera amahano oku bwirhohye, amahindamula ebihemerwe, anagenderere kukolera Yehova oku bwimana.
