MWAZI G’OKUYIGA 29
OLWIMPO 121 Birhuhemere Okuchigala
Ogenderere Kuba Masu y’Orharhogera omu Chigeregezo
“Mugenderere kuyorha muzene, munagenderere kusalira buzira kuleka, yi murharhogera omu chigeregezo.”—MT. 26:41.
EBIRHWAYIGA
Gunola mwazi gwarhuyibusa oku rhukwanene kujira koshi rhugalire yi rhurharhogera omu chaha. Kandi, gwarhuyibusa oku rhukwanene kuba merangwe yi rhurhajira echintu choshi choshi chakarhuma rhwajira echaha chikomere.
1-2. a) Mukonge guhe Yesu alihere abanafunzi bage? b) Bulagurhe abanafunzi balilekere Yesu? (Olole n’efoto.)
“EROHO lilonzeze, si kweri omubiri guzambire.” a (Mt. 26:41b) Kugerera ebyola binwa, Yesu aliyerekene okwaba amenyere ehali yerhu y’okurhashinganana. Aliko kandi, ebyola binwa byalirimo n’omukonge: Murhachilangaliraga kukabya. Enyuma waho omu budufu bukulu, abanafunzi baliderhere n’obwizere oku bahigirira kugenderera kubera haguma na Waliha wabo. (Mt. 26:35) Ebi balilonzeze kujira byaliri binja. Aliko barhaliyinji, ok’omu mango makomere byakashobokere baheze emisi juba juba y’okujira ebinja n’okuhwanza kujira ebibi. Echola checharhumaga Yesu abaha omukonge omu kuderha ntya: “Mugenderere kuyorha muzene muna salire buzira kuleka, yi murharhogera omu chigeregezo.”—Mt. 26:41a.
2 Ech’okugayisa abanafunzi barhayorhaga bazene. Amango bayinja kufarha Yesu, k’abanafunzi bage baliyorhere haguma naye changwa baliyubahire n’okumuleka? Bulala barhaliri merangwe abanafunzi bajira echibaderhaga oku chirhakafa chabahikire haban’akatyu, k’okuderha okuleka Yesu.—Mt. 26:56.
Yesu alibwirire abanafunzi bage oku babe merangwe yi bachilanga oku chigeregezo, aliko bamujahika (Olole echifungo cha 1-2)
3. a) Bulagurhe rhurhakwanene kuchilangalira bwenene yi rhuyorha bemana ku Yehova? b) Bichi rhwaganirako mu gunola mwazi?
3 Rhurhakwanene kuwaza okw’amango moshi rhwagwarha emisi etosheze y’okujira ebili binja. Omu bukweri, rhuhigirire okurhachileka rhujire echintu choshi choshi chakarhuma rhwaleka Yehova. Nechi, rhumenyere oku rhurhashinganene rhwakanashumikwa kujira ebintu bibi. (Ro. 5:12; 7:21-23) Nka nta mukonge rhwahabirwe, rhwakachibugana omu hali yakarhuma rhwabona ebintu bibi nka bili binja. Yi rhugenderera kuba bemana ku Yehova n’oku Mugala, birhuhemere rhukulikire amahano ma Yesu, n’okugenderera kubera rhuzene yi rhurharhogera omu mashumi mabi m’okujira echaha. Gunola mwazi, gwarhurhabala kujira ntyo. Ech’oburhanzi, rhwabona mu hali zihe rhukwanene kugenderera kuyorha rhuzene. Echa kabiri, rhwaganira nka gurhe rhukwanene kuchilanga yi rhurharhogera omu chigeregezo. Echa kasharhu, rhwabona nka gurhe rhwakagenderera kuyorha rhuzene.
MU HALI ZIHE OKWANENE KUYORHA OZENE?
4-5. Bulagurhe bili by’akamaro okurhajira ebyaha bigeke geke?
4 Chiro n’ebyaha bigeke-geke byakaharabisa obwira bwerhu haguma na Yehova. Kandi, byakarhuma chiro rhwajira n’ebyaha bikomere bwenene.
5 Rhweshi, rhunageregezwa kujira echaha. Aliko, rhweshi rhurhajira obuzamba buli kuguma. Bobola bintu bilebe byakarhuma rhwageregezwa n’okujira echintu chibi. Omufano, muntu mulebe akaba yalwisa echigeregezo ch’okujira echaha chikomere nk’obubaraga. Owindi akaba yalwisa ehali ekomere y’okujira ebintu birhachere nk’okuchiyungumula changwa okuchimalira enyorha y’okujira echijiro chobuhya, changwa okulola epornografi. Owindi akaba yalwisa obukali, echiburi, changwa okugambwa kujira ebinja eju y’okuyubaha eby’abandi bawaza. Yakobo aderhere oku, “buli muntu anageregezwa omu kuyemera ashumikwa n’enyifinjo zage.”—Yak. 1:14.
6. Mu bintu bihe rhwakayerekanamo oku rhuli banihirwa?
6 Oba omenyere ebintu binazigana kukugeregeza ahanene si? Guli murhego okuyibagira obuzamba bwerhu changwa okuwaza oku rhugwerhe emisi minene yakarhuma rhurhajira echaha. (1 Yo. 1:8) Oyibuke oku Paulo aliderhere oku na “balala bagwerhe engeso zikwanene z’ekiroho” bakayemera bashumikwa akaba barhabere merangwe, changwa kuba masu. (Gal. 6:1) Kandi rhukwanene kuba banihirwa ku rhwewe rhwenyine n’omu kumenya mu hali zihe rhujira m’obuzamba.—2 Ko. 13:5.
7. Bichi rhukenere yi rhuchilanga? Fasiriya.
7 Amango rhwamarhegera ebintu binarhugeregeza bwenene, gurhe rhwakajira? Birhuhemere rhukole bwenene yirhugala kuhima bwinja amola mashumi! Omufano, omu mango Ebiblia yaliri yayandikwa, ahantu haliri hazigana kuba obuhanya, haliri oku milyango y’olupango lw’evile. Echola ch’echaliri charhuma balanzi banene baba oku mulyango yi balanga evile. Nerhu kon’oko birhuhemere rhube merangwe oku bilore obuzamba bwerhu, yi rhugala kuhima juba juba echigeregezo.—1 Ko. 9:27.
OKUNTU RHWAKACHILANGA YIRHURHAJIRA ECHINTU CHIBI
8-9. Nka gurhe omusole oganirirwe omu chitabu cha Mezali sura ya 7 akayakire kujira echaha chikomere? (Mezali 7:8, 9, 13, 14, 21)
8 Nka gurhe rhwakachilanga yi rhurhajira echaha? Lekaga rhulole echi rhwakayiga oku bilolere omusole oshamberwe omu chitabu cha Mezali sura ya 7. Alijirire obubaraga haguma n’omukazi w’embaraga. Omustari gwa 22 guyerekene gurhe oyola musole amukulikiraga “aho han’aho.” Aliko, nk’okw’emistari erhondere eyerekene, alijirire bintu binene embere waho byarhumaga arhogera mw’echola chaha.
9 Bichi oyola musole alijirire embere y’okukola echola chaha chikomere? Ech’oburhanzi, egolo, “aligerere hofi n’ahebarabara libuganene n’elijire em’oyola [mukazi w’embaraga].” Echa kabiri, aja omu nju yage. (Osome Mezali 7:8, 9.) N’echa kasharhu, amango abona oyola mukazi, arhahindamukaga n’okugaluka. Ahali h’okujira chintu chilebe, aliyemerere amuha ebize, ayunviriza emyazi yage, na nkabaga amola mashumi maliri marhuma awaza ok’oyola mukazi arhali muntu mubi. (Osome Mezali 7:13, 14, 21.) Nk’oyola musole arhajiraga ebyola bintu byoshi birhali by’obwengehe, akachilangire oku mashumi m’okujira chintu chilebe chibi arhakanajirire echaha.
10. Nka gurhe zene naho omuntu akakola amagosa mali kuguma na m’oyola musole?
10 Engani ya Sulemani eyerekene bichi byakahikira buli mukozi wa Yehova. Akakola echaha chikomere na buzinda anaderha mpu nazindaga yi narhogere omu chaha. Changwa akaderha ntya: “Naligeregezwe n’ebintu ntalimenyere n’aho byamarhuma nakola echaha chikomere buzira kumenya.” Aliko, akayibuka oku nkabaga esimikiro arholaga zirhaliri z’obwengehe, zezarhumaga arhogera omu chaha. Nkabaga alichishogere abera barhazigire Yehova, changwa na nkabaga ebintu by’okuchisimisa alichishogere, esite ze Enternete aliri akolesa, changwa alijire ahantu Omukristu arhakwanene kuja. Nkabaga abaga alekere kusalira, okusoma Ebiblia, okuja oku mbuganano, n’okuhubiri. Kuguma n’oyola musole oganirirwe omu chitabu cha Mezali, rhurhakaderha ok’oyola mukozi wa Yehova naye azindaga ey’arhogere omu chaha chikomere.
11. Bichi rhukwanene kuyaka yi rhurharhogera omu chaha?
11 Bichi ebyola birhuyigirize? Rhurhakwanene kuyaka kujira echaha konyine, s’aliko n’enjira zakarhuma rhwakola echaha. Ebyola bi Sulemani afasiriye bwinja bwinja omu kumala kuderha oku bilolere, omusole n’omukazi w’embaraga. Omu kuderha oku biyerekere oyola mukazi, ahanire linola hano: “Nta kuchigeza-geza omu njira zage.” (Mez. 7:25) Alishubire kuderha ntya oku bilolere oyola mukazi: “Obe hale naye orhanayegeraga chiro n’enjira ejire emwage.” (Mez. 5:3, 8) Nechi, rhunachilanga kujira echaha, n’okuchiyasa n’ehali zakarhuma rhwajira echaha. b Echola chishondere kuderha oku chiro n’echintu chirhali chibi oku Mukristu, rhurhakachijira nka rhumenyere oku chakarhuma rhwageregezwa, n’okurhuma rhwajira echintu chibi.—Mt. 5:29, 30.
12. Simikiro ehe Yobu alirholere, na nka gurhe yalimurhabere kuhima echigeregezo? (Yobu 31:1)
12 Yi rhuyaka ehali zakarhuma rhwajira echaha, birhuhemere rhurhole esimikiro ekwanene. Intyo ku Yobu alijirire. “Alijirire endagano n’amasu [mage]” y’okurhalola abandi bakazi n’enyifinjo y’obubaraga. (Osome Yobu 31:1.) Okukulikira eyola ndagano kwalirhumire arharhogera omu chaha ch’obubaraga. Nerhu rhukwanene kuyaka echintu choshi choshi chakarhuyerekeza ewa chigeregezo.
13. Bulagurhe rhukwanene kuba merangwe oku bilolere ebirhunawaza? (Olole n’efoto.)
13 Rhukwanene kuba merangwe oku bilolere ebirhunawaza. (Kut. 20:17) Baguma banawaza oku kurhali kubi okuwaza yiwajira chintu chilebe chibi, chiro akaba orhachijirire. Aliko, amawazo mali nk’amola mali mabi. Omuntu onagenderera kuwaza oku chintu chibi anaba eyali akuza enyorha yacho, n’okujira ntyo kwakarhuma byamukomerera kuhima amashumi m’okujira echintu chibi. Nechi, mango maguma enkengero zibi zakarhuyinja omu bwenge, amango ebyola byamarhengerera, ech’akamaro kuli kukabulira aho han’aho amola mawazo, n’oku magombola n’amawazo menja. Amango rhwamajira ntyo, rhwanaba eyi rhwamachilanga kujira echaha chikomere bulala rhurhazigire enkengero zibi zarhukulamo.—Flp. 4:8; Kol. 3:2; Yak. 1:13-15.
Birhumere rhuchiyase na buli chintu choshi chakarhuma rhwageregezwa (Olole echifungo che 13)
14. Bichi bindi byakarhurhabala kuchilanga oku chigeregezo?
14 Bichi bindi rhwakajira yi rhuchilanga oku chigeregezo? Rhukwanene kuchizera buli mango oku rhwapata enyungu omu kukenga esheriya za Yehova. Mango maguma byakarhukomerera kugwarha amawazo, n’enyifinjo, bipatene n’obulonza bwa Mungu, aliko omurhula g’omu bwenge rhwapata gwakarhulerhera obusime.
15. Gurhe okukuza enyifinjo zinja kwakarhurhabala rhugale kuhima echigeregezo?
15 Birhuhemere rhukuze enyifinjo zinja. Nka rhuyigire “kugaya ebibi, n’okusima ebinja,” rhwakomeza omuhigo gwerhu g’okujira ebili binja n’okuyaka ehali zakarhuma rhwajira echaha. (Amo. 5:15) Amango rhugwerhe enyifinjo zinja, rhwagala kuhima echigeregezo aho han’aho amango chamarhengerera omu hali rhurhaliwazize.
16. Nka gurhe amakasi m’ekiroho makarhurhabala rhugenderere kubera rhukengukire? (Olole n’efoto.)
16 Nka gurhe rhwakakuza enyifinjo zinja? Rhukwanene kugwarha binene by’okukola byakakomeza obuzigire bwerhu ku Yehova. Amango rhuli oku mbungano ze Chikristu changwa omu kasi k’amahubiri, byakaba bikomere oku rhugeregezwe kukola echintu chibi. Bobola, rhunaba eyi rhuli rhwakomeza enyifinjo y’okujira ebintu bisimisize Yehova. (Mt. 28:19, 20; Ebr. 10:24, 25) Omu kuyiga n’okusoma Echinwa cha Mungu n’okuchikengerako, rhunaba eyi rhuli rhwakomeza obuzigire bwerhu b’okujira ebinja n’okushomba ebibi. (Yos. 1:8; Zb. 1:2, 3; 119:97, 101) Oyibuke oku Yesu alibwirire abanafunzi bage ntya: “Mugenderere kusalira, yi murharhogera omu chigeregezo.” (Mt. 26:41) Amango rhuli rhwageza ebisanzi rhuli rhwaganira na Darha w’embingu, rhwayunguka n’oburhabale bwage n’okukomeza omuhigo gwerhu g’okumusimisa.—Yak. 4:8.
Eprograme nyinja y’ekiroho yarhuha emisi y’okuhima ebigeregezo (Olole echifungo che 16) c
OGENDERERE KUBA MASU
17. Buzamba buhe Petro aliri alwisa?
17 Byakashobokana rhuhime buguma omu buzamba bwerhu burhakahwa loshi loshi. Aliko byakarhuhema rhugenderere kulwisa obwindi buzamba mu mango manene. Rhuganire oku mufano gw’entumwa Petro. Eju y’okuyubaha abantu, alilahire Yesu kasharhu koshi. (Mt. 26:69-75) Byalibonekene nka Petro ahimire obola buba amango aliri ayigiriza embere we Sanedrini. (Mdo. 5:27-29) Aliko myaka milebe enyuma w’aho aleka kulya n’Abakristu barhaliri Bayahudi, aliyubahire eby’Abakristu b’Abayahudi bakawazize eju yage. (Gal. 2:11, 12) Obuba bwa Petro bwalishubire kugaluka. Nkabaga arhalizakumala obola buba loshi loshi.
18. Bichi byakarhengerera amango rhwamagwarha enyifinjo zilebe zibi?
18 Rhwakachibugana omu hali zili nk’ezola. Nka gurhe? Enyifinjo rhwaliwazize oku rhwalekere zakashuba kugaluka kubuyabuya. Omufano, mwene-werhu muguma aderhere ntya: “Nalilwisize echibazo ch’okulola epornografi mu myaka ekumi nanalichizerere oku nachihimire. Aliko mu hali ziguma naliri nashuba kurhogera omu mashumi m’okuyilola.” Bisimisize okubona ok’oyola mwene-werhu aligenderere kulwisa obuzamba bwage. Alirhegerere okw’akwanene kujira chintu chilebe buli lusiku y’agala kulwisa obuzamba bwage, byanalimuhemere kujira ntyo omu kalamo kage koshi mu linola gulu libi lya Shetani. Kugerera oburhabale bwa mukage n’abashamuka be chibaga, alirholere emipango ekomere y’ahima echibazo ch’okulola epornografi.
19. Nka gurhe rhwakahima obuzamba bugenderere?
19 Akaba rhugwerhe obuzamba bugenderere rhuli rhwalwisa, gurhe rhwakajira yi burharhuma rhwajira echintu chibi? Rhukwanene kukulikira elila hano lya Yesu oku bilolere echigeregezo: “Muyorhe muzene,” k’okuderha, rhuchilange oku mashumi. Chiro n’amango ochiyunvirhe ogwerhe emisi, ogenderere kuchilanga oku hali zakarhuma warhogera omu mashumi. (1 Ko. 10:12) Ogenderere kujira ebintu byalikurhabere kuhima obuzamba bwawe. Mezali 28:14 ederhere ntya: “Ogwerhe obusime ali muntu onayorha merangwe amango moshi.” —2 Pe. 3:14.
EMIGISHO RHWAKAPATA NKA RHUYORHERE MERANGWE
20-21. a) Migisho ehe nji rhwasimira rhukagenderera kuchilanga oku chigeregezo? b) Nka rhujirire okwerhu koshi yi rhuhima echigeregezo, bichi Yehova nj’arhujirira? (2 Wakorinto 4:7)
20 Okuba merangwe oku chigeregezo kwakarhulerhera nyungu zinene bwenene. Amango rhwamajira echaha “rhwakagwarha obusime bw’akasanzi kageke.” Aliko nka rhugenderere kulama nk’okw’amakanuni ma Yehova maderhere, rhwagwarha obusime bugenderere. (Ebr. 11:25; Zb. 19:8) Bulala rhwalemerwe yi rhulama nk’okw’amakanuni mage maderhere. (Mwa. 1:27) Amango rhwamalama akalamo kasimisize Yehova, rhwayunva rhugwerhe ezamiri zichere, n’amango mayinjire nji rhwagwarha akalamo k’esiku n’amango.—1 Ti. 6:12; 2 Ti. 1:3; Yud. 20, 21.
21 Kweri, “omubiri guzambire.” Aliko arhali k’okuderha oku rhurhakajira chintu chilebe oku bilolere obuzamba bwerhu. Yehova ali tayari kurhuhereza emisi rhukenere. (Osome 2 Wakorinto 4:7.) Aliko oyibuke okw’emisi Mungu anahaana erhalukire obuhashe bwerhu. Aliko ech’oburhanzi birhuhemere rhukolese emisi yerhu, nka rhujirire ntyo rhwakachizera oku Yehova ashubiza oku masala merhu n’okurhuhereza misi minene amango rhuyikenere. (1 Ko. 10:13) Nechi, kugerera oburhabale bwa Yehova, rhwakagala kugenderera kuchilanga oku chigeregezo.
OLWIMPO 47 Salira Buli Mango
a AMAFASIRIYO M’EBINWA: Amango Yesu aderha echinwa “Roho” omu Matayo 26:41 ashondaga kuderha oku rhujira enyorha y’okujira ebintu binja. Amango aderha echinwa “Omubiri” alonzaga kuderha oku bulala rhurhashinganene rhunali banya-byaha, ahanene rhunawaza n’okujira ebintu bibi. Bobola chiro n’amango rhulonzeze kujira ebintu binja, nka rhurhabere merangwe rhwakayemera amawazo merhu marhashinganene marhushumika kujira ebintu bibi.
b Omuntu wajirire echaha chikomere akapata oburhabale omu chitabu Siimira Akalamo Esiku N’amango!, somo lya 57 ngingo ya 1-3 n’omu mwazi guderhere “‘Oseze Amasu Mawe Embere’ oku Siku Zayinja” omu Munara g’Omulanzi gwa Mwezi gwe 11, 2020, bukurasa 27-29, chifungo che 12-17.
c AMAFASIRIYO M’EFOTO: Mwene-werhu y’asuzuma olwandiko l’olusiku esezi, yasoma Ebiblia amango m’okulya akalyo k’emidi, kandi ali oku mbuganano y’ahagarhi k’eboso egolo.
