1-2. Sadoki aliri nde? (1 Mambo ya Nyakati 12:22, 26-28)

 WAZA kw’eyila ngani. Abantu kamama barhalukire 340 000 baliri bakulikira Daudi yi bamujira mwami we Izraeli yoshi. Mu siku esharhu abola balume baliyorhere omu misozi y’amabale hofi ne Hebroni. Baliri basheka, baderha n’okuyimpa enyimpo z’omwishingo z’okukuuza Yehova. (1 Ny. 12:39) Mw’abola bantu mwaliri omusole oyirikirwe Sadoki na nkabaga bantu banene barhakamurhegerere. Aliko, Yehova yewe alimubwene, analilonzeze rhumenye oku Sadoki aliri ahola. (Osome 1 Mambo ya Nyakati 12:22, 26-28.) Sadoki aliri nde?

² Sadoki aliri mudahwa waliri wakola oku bwimana haguma n’Omudahwa Mukulu Abiyatari. Kandi Sadoki aligwerhe obuhashe bw’okugala kurhegera obulonza bwa Mungu. Aligwerhe n’obumenyi busomeze. (2 Sa. 15:27) Abantu baliri bahema Sadoki amahano m’obwengehe amango balikenere oburhabale. Analiri mulume ogwerhe obushiru. Mu gunola mwazi rhwaganira okuntu Sadoki aliyekerene obushiru.

3. a) Bulagurhe abakozi ba Yehova bakenere kugwarha obushiru? b) Bichi rhwaganirako mu gunola mwazi?

³ Mu zinola siku z’obuzinda, Shetani y’agenderera kuchihangana kurhera abantu ba Mungu. (1 Pe. 5:8) Birhuhemere rhugwarhe obushiru oku rhunali rhwalingiriza okuntu Yehova alimbula Shetani na linola gulu lyage libi. (Zb. 31:24) Lekaga rhuganire ku njira esharhu rhwakayiganya m’obushiru bwa Sadoki.

OSHIGIKIRE OBWAMI BWA MUNGU

4. Bulagurhe abantu ba Yehova bakenere kugwarha obushiru yibagala kushigikira Obwami bwa Mungu? (Olole n’efoto.)

⁴ Rhwabo nka bakozi ba Yehova rhunashigikira n’omurhima gwerhu goshi Obwami bwa Mungu, aliko ahanene rhukenere  obushiru yirhugala kujira ntyo. (Mt. 6:33) Omufano, mu linola gulu libi birhuhemere rhugwarhe obushiru yirhulama nk’okw’amakanuni ma Yehova maderhere n’okuhubiri emyazi minja y’Obwami. (1 Te. 2:2) Kandi, byarhuhema rhugwarhe obushiru yirhurhachiheba oku lunda lulebe oku bilolere eby’epolitike mu linola gulu liri mw’akalaba. (Yoh. 18:36) Banene omu bakozi ba Yehova bali balibuka eju y’okubula efuranga, okulibuzwa, okushwekwa omu pirizo eju y’okulahira kuba oku lunda lulebe oku bilolere eby’epolitike changwa okurhaja omu makasi m’echisoda.

5. Bulagurhe Sadoki alikenere kugwarha obushiru y’agala kushigikira Daudi?

⁵ Sadoki arhajaga e Hebroni kulola konyine gurhe Daudi abere mwami. Aliko, alijireyo eyagwerhe entwaro eyanali tayari kulwa evita. (1 Ny. 12:38) Aliri tayari kukulikira Daudi oku vita n’okurhabala Abaizraeli bahime abanzi babo. Nkabaga Sadoki aliri musoda orhalimenyere binene oku bilolere okulwa evita, aliko aliri muntu ogwerhe obushiru bwenene.

6. Mufano guhe g’obushiru Daudi alilekere Sadoki akakulikire? (Zaburi 138:3)

⁶ Ngahe omudahwa Sadoki ayigiraga kugwarha obushiru? Alizungulukirwe n’abalume balikomere banagwerhe obushiru. Buzira ngangane, aliyigire kugerera emifano yabo. Omufano, bulala Daudi aliri muntu mukulu onagwerhe obushiru wanaliri walwa evita, abantu boshi be Izraeli balishondere kumujira mwami. (1 Ny. 11:1, 2) Amango moshi Daudi alilangalire Yehova y’amuhema oburhabale b’okulwisa abanzi bage. (Zb. 28:7; osome Zaburi 138:3.) Sadoki naye kandi, aliyigire kugwarha obushiru kugerera abalume b’omu siku zage nka Yehoyada n’omugala Benaya waliyinji kulwa evita n’abandi bantu 22 baliri bashigikira Daudi. (1 Ny. 11:22-25; 12:26-28) Abola balume boshi balihigirire kujira Daudi mwami wabo, banalilonzeze kumulanga.

7. a) Mifano ehe y’obushiru ya mu zinola siku zerhu rhwakayiganya? b) Nk’okw’evideo eyerekene, bichi omufano gwa mwene-werhu Nsilu gwakarhuyigiriza?

 ⁷ Rhunagwarha emisi n’obushiru amango rhwamayiga oku bilolere emifano ya balala baliyerekene obushiru omu kushigikira oburhegesi bwa Yehova. Omwami werhu Yesu Kristu alilahire loshi loshi kuba chigabi ch’epolitike ya linola gulu lya Shetani, amango aliri hanola oku gulu. (Mt. 4:8-11; Yoh. 6:14, 15) Amango moshi alilangalire Yehova y’amuhereza emisi. Zene naho, rhugwerhe emifano minene y’emisole yalahire kuja omu chisoda changwa kuja omu by’epolitike. Wakalola ebi baguma bagereremo oku jw.org. a

ORHABALE BENE-BENYU NA BALI-BENYU

8. Mangochi abashamuka bakenere obushiru yi bahereza bene-babo na bali-babo oburhabale bakenere?

⁸ Abantu ba Yehova banazigirana n’okurhabalana buli muguma n’owindi. (2 Ko. 8:4) Aliko, bibahemere bagwarhe obushiru yibajira ntyo. Omufano, amango hamarhengerera evita, abashamuka b’omu eneo banaba eyibamenyere oku bene-babo na bali-babo bakenere okuhebwa omurhima, okushigikirwa, n’okubahereza eby’ekiroho bakenere changwa eby’omubiri. Abashamuka baba bazigire bene-babo na bali-babo. Echola che chinarhuma babahereza byoshi bakenere chiro akaba echola chakarhuma baba omu buhanya bwenene amango bamajira ntyo. (Yoh. 15:12, 13) Amango bamajira ntyo banaba eyibali bayiga omufano gwa Sadoki.

9. Nk’oku biyerekenwe omu 2 Samweli 15:27-29, bichi Daudi alibwirire Sadoki ajirage? (Olole n’efoto.)

⁹ Akalamo ka Daudi kaliri omu buhanya. Omugala Absalomu aliri alonza kumukula oku bwami. (2 Sa. 15:12, 13) Daudi arhenga aho han’aho omu Yerusalemu! Ahamagala abakozi bage n’okubabwira ntya: “Muyumuke rhulibirhe bulala ntaye n’omuguma mu rhwabo wafuma Absalomu!” (2 Sa. 15:14) Bobola  amango abakozi bage bagenda, Daudi abona oku bihemere muntu muguma ayorhe y’ahwanza amubwira emipango Absalomu arholere. Nantyo, arhuma Sadoki n’abandi badahwa omu vile yibayinja bamubwira oku myazi. (Osome 2 Samweli 15:27-29.) Byalibahemere babe merangwe bwenene. Akasi k’okuneka Absalomu kaliri m’obuhanya bwenene. Absalomu aliri mulume w’omunizi, w’obwikazize, walenganyaga eshe yenyine. Waza gurhe akajirire Sadoki n’abandi badahwa nk’amenyaga oku bali bamuneka yibalanga Daudi!

10. Gurhe Sadoki n’abandi aliri nabo balijirire yibalanga Daudi?

¹⁰ Daudi abwira Sadoki n’owindi mwira wage mwimana Hushai, bamurhabale kujira ogwindi mupango. (2 Sa. 15:32-37) Omu kujira ogwindi mupango, Hushai alikwanene kuchijirisa nk’oli washigikira Absalomu, n’okumuha amahano oku bilolere okuntu bajira yibarhera Daudi. Echola chakahere Daudi akasanzi k’okuchirheganya kw’eyola ntabala. Naho, Hushai abwira Sadoki n’Abiyatari oku bilolere ogola mupango. (2 Sa. 17:8-16) Baliri bajira okwabo koshi yibamenya emipango y’Absalomu, banaja bayimenyesa Daudi. (2 Sa. 17:17) Okuburhabale bwa Yehova, Sadoki n’ababo balijirire echintu ch’akamaro omu kulanga akalamo ka Daudi.​—2 Sa. 17:21, 22.

11. Nka gurhe rhwakayiganya omufano gwa Sadoki g’obushiru amango rhuli rhwarhabala bene-berhu?

¹¹ Kuguma na Sadoki, amango bene-berhu na bali-berhu bali omu buhanya banakenere n’oburhabale, nka gurhe rhwakayerekana obushiru? 1) Mukulikire obwerekezi. Omu hali zili nk’ezola kuli kw’akamaro rhubere omu buguma. Rhukenge obwerekezi burhengere oku biro by’omurhabi. (Ebr. 13:17) Abashamuka bakwanene kusuzuma buli mango obwerekezi oku bilolere gurhe bakachirheganya amango m’echinjira na gurhe bakajira amango echinjira chamarhengerera. (1 Ko. 14:33, 40) 2) Mugwarhe obushiru aliko mube  merangwe. (Mez. 22:3) Mukengere embere mujire echimwakola. Mube merangwe nk’oku byakanagalikana. 3) Mulangalire Yehova. Oyibuke oku Yehova alonzeze woyo na bene-benyu muyorhe omu bulanzi. Akugwasa y’orhabala bene-benyu na bali-benyu ey’onali omu bulanzi.

12-13. Ebi Viktor na Vitalii bagereremo, bichi byakakuyigiriza? (Olole n’efoto.)

¹² Rhushambale oku mufano gwa Viktor na Vitalii, abola bene-berhu babiri bakulire ekiroho baliri bakola akasi k’okuhereza bene-babo na bali-babo ebilyo n’amenji omu Ukraine. Viktor aderhere ntya: “Rhwaliri rhwazunguluka buli hoshi omu kulonza ebilyo. Baliri bazigana kulasha amasasa eburhambi bwerhu. Mwene-werhu muguma ahana enshololo y’ebilyo by’omu botike yage. Eyola nshololo yalirhabere bahubiri banene bapate ebi bakenere yi bagenderera kulama mu siku zilebe. Amango rhwaliri rhwapakiza ebilyo omu kamiyo kerhu, bashurha ebombe ku metre 20 n’aha rhwaliri. Olusiku loshi, nashiba nasalira omu kuhema Yehova ampereze obushiru nkenere yingenderera kurhabala bene-berhu na bali-berhu.”

¹³ Vitalii aderhere ntya: “Byalimpemere kugwarha bushiru bunene. Olugenzi lwani l’oburhanzi lwalimalire sa 12. Omu njira yoshi naliri nasalira Yehova.” Vitalii aligwerhe obushiru, aliko kandi aliri merangwe. Ayongerere ntya: “Intalekaga kusalira Yehova ampereze obwengehe n’olugero. Naliri natembeza omu mabarabara monyine mayemererwe n’abakulu. Naligwarhire orozo l’okuchibonera gurhe bene-berhu na bali-berhu baliri bakola omu buguma. Baliri bakwiza ebarabara, banapanga n’okupakiza ebintu by’okuja kuhana oburhabale, n’okurhuha ebilyo n’ahokuhumukira amango rhuli omu lugenzi.”

OBERE MWIMANA KU YEHOVA

14. Gurhe wakachiyunva amango muntu mulebe ozigire arhachili mwimana ku Yehova?

¹⁴ Chiguma omu bigeregezo bikomere nkabaga rhurhasaga kuhurana, chili amango omuntu w’omulala changwa mwira werhu w’oku murhima amaleka kukolera Yehova. (Zb. 78:40; Mez. 24:10) Ok’obwira bwerhu bukomere haguma na muntu mulebe, ku byakanarhukomerera kuyemera okw’alekere kukolera Yehova. Akaba wachigerere kuhurana echibazo chili nk’echola chikulumire oku murhima, omufano gwa Sadoki g’obwimana gwakakuheba omurhima.

15. Bulagurhe Sadoki alikenere obushiru y’agenderera kubera mwimana emwa Yehova? (1 Wafalme 1:5-8)

¹⁵ Sadoki aligenderere kubera mwimana ku Yehova amango mwira wage w’okumurhima Abiyatari achishoga kurhagenderera kubera mwimana ku Yehova. Ebyola byabaga oku buzinda b’oburhegesi bwa Daudi. Amango Daudi ashaja ey’anali hofi kufa, omugala Adoniya alonza kurhola obwami chiro akaba oku Yehova alilonzeze Sulemani yebage mwami. (1 Ny. 22:9, 10) Abiyatari achishoga kushigikira balala baliri oku lunda lwa Adoniya. (Osome 1 Wafalme 1:5-8.) Omu kujira ntyo, Abiyatari aba eyamachijira chigamba arhali ku Daudi yenyine s’aliko n’emwa Yehova! Ba nka wawaza okuntu Sadoki alichiyunvirhe kubi n’okuvunika omurhima! Sadoki na Abiyatari balikolere haguma nka badahwa mu myaka erhalukire 40. (2 Sa. 8:17) Banaliri bashishikala “Esanduku ya Mungu w’okuli” bombi. (2 Sa. 15:29) Oku murhondero, balikolere haguma omu kushigikira omwami wabo Daudi, banalikolere bintu binene haguma omu kasi ka Yehova.​—2 Sa. 19:11-14.

16. Bichi byakaba eyi by’ebyarhabalaga Sadoki abere mwimana?

¹⁶ Sadoki aligenderere kubera mwimana ku  Yehova chiro akaba oku Abiyatari arhalijirire ntyo. Daudi arhachigeraga agwarha engangane oku bilolere obwimana bwa Sadoki. Amango omupango gwa Adoniya gumenyikana, Daudi ahamagala Sadoki, Natani, na Benaya bashiige Sulemani amavurha y’aba mwami. (1 Fa. 1:32-34) Okuba haguma n’abakozi bemana ba Yehova, nka Natani n’abandi baliri bashigikira Mwami Daudi, kukwanene kuba eyi kwalikomeze Sadoki n’okumuheba omurhima. (1 Fa. 1:38, 39) Amango Sulemani aba mwami, “ashimika Sadoki abe mudahwa oku fasi ya Abiyatari.”​—1 Fa. 2:35.

17. Nka gurhe wakayiganya Sadoki amango muntu mulebe walizigire amaleka kukolera Yehova?

¹⁷ Nka gurhe wakayiganya Sadoki? Amango muntu mulebe ozigire amachishoga kuleka kukolera Yehova, omuyereke bwinja bwinja oku woyo olonzeze kugenderera kukolera Yehova. (Yos. 24:15) Yehova akuhereza emisi n’obushiru okenere. Oyerekane ok’omulangalire kugerera esala, onayorhe hofi n’abakozi ba Yehova. Yehova asimisizwe n’obwimana bwawe, nj’anakuhemba eju y’echola.​—2 Sa. 22:26.

18. Bichi rhwakayiga kugerera ebi Marco na Sidse bagereremo?

¹⁸ Rhuganire oku mufano gwa Marco na mukage Sidse, aba banyere babo babiri balekaga kukolera Yehova. Marco aderhere ntya: “Omuntu anaba azigire bwenene abana bage kurhenga ababurha. Anajira okwage koshi y’abalanga yi barhapatwa n’echintu chibi. Bobola, amango bamachishoga kuleka Yehova, binaluma oku murhima bwenene.” Agenderere kuderha ntya: “Aliko Yehova arhurhabere bwenene rhugale kulembera. Alijirire okuntu amango nzambire eyi mukani agwerhe emisi, n’amango naye azambire eyi nani ngwerhe emisi.” Sidse ayongerere ntya: “Rhurhakagalire kulembera nka Yehova arharhuhaga emisi rhwalikenere. Naligwerhe mugayo gunene nanaliri nachiyunva oku mali magosa mani okubona bali-bani balekere kukolera Yehova. Bobola, naliri nabwira Yehova okuntu naliri nachiyunva. Hagerere kasanzi kageke, mwali-werhu muguma rhwaligwerhe myaka minene rhurhabonana, anyegera, ampeba efune oku birhugo, andola omu masu ambwira ntya: ‘Sidse, oyibuke, lirhali gosa lyawe!’ Kugerera oburhabale bwa Yehova nagenderera kulanga omwishingo g’okumukolera.”

19. Bichi ohigirire kujira?

¹⁹ Yehova alonzeze abakozi bage boshi bagwarhe obushiru nka Sadoki. (2 Ti. 1:7) Aliko, arhalonzeze rhukalangalira emisi yerhu. Alonzeze rhumulangalire. Bobola amango nji wachibugana oli omu hali okenere m’obushiru, wanabuhema Yehova. Ochizere okw’akurhabala ogwarhe obushiru kuguma na Sadoki!​—1 Pe. 5:10.