MWAZI G’OKUYIGA 28
OLWIMPO 123 Rhukenge Omupango gwa Mungu
Warhegerere Okuli Si?
“Muyorhe buzira kushaganyika . . . eyi muchishwekere omukaba g’okunali omu mankinya.”—EFE. 6:14.
EBIRHWAYIGA
Rhwayiga etofauti eli ahakagarhi k’obukweri rhwayigire kurhenga emwa Yehova, n’enyigirizo z’obubeshi Shetani n’abanzi berhu bali bayeneza.
1. Gurhe onachiyunva oku bilolere okuli?
ABANTU ba Yehova banasima enyigirizo z’okuli zili omu Chinwa cha Mungu. Obwemere bwerhu buba buyumangire kw’ezola nyigirizo. (Ro. 10:17) Rhuba rhuyemerere kweri oku Yehova ashimikire echibaga che Chikristu nka “nkingi n’enjagu (echisigiko) ch’okuli.” (1 Ti. 3:15) Kandi, rhunachicha bufi eyi rhunagwerhe obusime “kubalala bali bayerekeza ahakagarhi kerhu,” amango bali barhufasiriya enyigirizo z’obukweri ze Biblia n’okurhuhereza obwerekezi bufarhene n’obulonza bwa Mungu.—Ebr. 13:17.
2. Nk’ok’olwandiko lwa Yakobo 5:19 luderhere, bichi byakarhengerera amango rhwamamenya okuli?
2 Aliko, enyuma w’okuyiga enyigirizo z’okuli n’okuyemera kukulikira obwerekezi b’olubaga lwa Mungu, hali oku rhwakachihehulwa. (Osome Yakobo 5:19.) Shetani akasima bwenene rhuleke kulangalira Ebiblia, changwa rhuleke kukulikira obwerekezi burhengere oku lubaga lwa Mungu.—Efe. 4:14.
3. Bulagurhe birhuhemere okunanira bwenene enyigirizo z’okuli? (Waefeso 6:13, 14)
3 Osome Waefeso 6:13, 14. Hanola hofi-hofi, Shetani akolesa amayeri omu kushumika amashanja moshi machihebe haguma omu kulwisa Yehova. (Ufu. 16:13, 14) Kandi rhumenyere oku Shetani ajira okwage koshi yahabula abantu ba Yehova. (Ufu. 12:9) Bobola, bili by’akamaro rhewe rhwenyine rhuchikoomeze kubona etofauti eli ahakagarhi k’enyigirizo z’obubeshi n’ez’okuli, n’okukenga ezola nyigirizo. (Ro. 6:17; 1 Pe. 1:22) Okujira ntyo, kuli kw’akamaro bwenene yi nji rhufuma amalibuko makulu!
4. Bichi rhwaganirako mu gunola mwazi?
4 Mu gunola mwazi, rhwaganira ku ngeso ebiri rhukenere zarhurhabala kurhegera enyigirizo z’okuli zirhengere omu Biblia, n’okuyemera obwerekezi burhengere oku lubaga lwa Mungu. Na buzinda rhwaganira ku bintu bisharhu rhwakajira yi rhugenderera kunanira enyigirizo z’okuli.
ENGESO RHUKENERE KUGWARHA YI RHURHEGERA ENYIGIRIZO Z’OKULI
5. Nka gurhe okuyubaha Yehova kunarhurhabala kurhegera enyigirizo z’okuli?
5 Okuyubaha Yehova. Amango rhwamakuza engeso y’okuyubaha Yehova omu njira ekwanene, rhwanamuzigira bwenene. N’echola charhuma rhurhajira chiro n’echintu choshi choshi chakamugayisa. Rhugwerhe enyorha y’okumenya etofauti eli ahakagarhi k’ebinja n’ebibi, obukweri n’obubeshi, n’echola chanarhuma Yehova arhuyemera. (Mez. 2:3-6; Ebr. 5:14) Rhurhakwanene kuleka chiro okuyubaha omuntu kube kw’elugulu bwenene kulusha obuzigire rhugwerhe ku Yehova, bulala ahanene ebinasimisa abantu binaba eyi bigayisize Yehova.
6. Nka gurhe okuyubaha abantu kwalirhumire bakulu 10 Babaizraeli bahindamula obukweri?
6 Nka rhuyubahire abantu kulusha okuntu rhuyubahire Mungu, rhwakahehwa n’okurhenga omu kuli. Rhuganire oku mufano gwa bakulu 12 bajaga kuperereza echihugo Yehova alaganyaga Abaizraeli. Bapererezi 10 mw’abola 12 baligwerhe obuba bunene bwenene oku Banyakanaani kulusha obuzigire baligwerhe ku Yehova. Babwira ababo Baizraeli ntya: “Rhurhakagala kuja kulwisa abola bantu, bulala bagwerhe misi minene kurhulusha.” (Hes. 13:27-31) Oku mawazo m’abantu, Abanyakanaani baligwerhe misi minene kulusha Abaizraeli, n’obola bwaliri bukweri. Aliko, buli yeshi wakaderhere okw’Abaizraeli barhakagalire kuhima abanzi babo, arhaliri awaza oku bilolere Yehova. Abola bapererezi 10, balikwanene kuseza obwenge bwabo oku bilolere ebi Yehova alilonzeze Abaizraeli bajirage. Kandi balikwanene kukengera bwenene oku bi Yehova abaga abajirire mukasanzi kageke enyuma waho. Naho bakajire barhegera oku abanya Kanaani barhaligwerhe misi minene omu kuhuzanya n’emisi ya Yehova Ogala byoshi. Yoshua na Kalebu balilonzeze kuyemerwa na Yehova, bobola barhaliri kuguma n’abola bandi bapererezi barhaliri bemana. Babwira olubaga ntya: “Akaba Yehova asimisizwe nerhu, kweri arhuheka mw’echola chihugo n’okurhuhacho.”—Hes. 14:6-9.
7. Nka gurhe rhwakakomeza obuba bwerhu ku Yehova? (Olole n’efoto.)
7 Yi rhukomeza obuba bwerhu ku Yehova, birhuhemere rhuseze obwenge bwerhu omu kumusimisa mu buli simikiro rhunarhola. (Zb. 16:8) Amango oli wasoma engani ze Biblia, ochibaze ntya: ‘Nka nyenaliri mw’eyila hali, simikiro ehe nakarholere?’ Omufano, ba nka wawaza oli wachiyunvira wenyine gurhe abola bakulu 10 be Izraeli bali bahana eraporo evunire omurhima. Ka wakayemerere eyola raporo n’okuhwanza kuyubaha abantu changwa obuzigire bwawe ku Yehova n’enyorha yawe y’oku musimisa yakahimire obola buba? Olubaga loshi lwe Izraeli lwaligambirwe kurhegera obukweri Yoshua na Kalebu baliri baderha. Echola charhuma baheza orozo l’okuja omu Chihugo Chilaganano.—Hes. 14:10, 22, 23.
Bande oba ochizerere? (Olole echifungo cha 7)
8. Rhukwanene kukola bwenene yi rhugwarha ngeso ehe, na bulagurhe?
8 Obwirhohye. Yehova anabishulira aberhohye obukweri. (Mt. 11:25) Rhwaliyemerere oku bwirhohye oburhabale bw’abandi yi rhuyiga obukweri. (Mdo. 8:30, 31) Aliko, rhukwanene kuba merangwe yi rhurhagwarha omwibone. Omwibone gwakarhuma rhwawaza ok’wamawazo merhu mamenja kulusha amakanuni me Biblia n’obwerekezi burhengere oku lubaga lwa Yehova.
9. Nka gurhe rhwakagenderera kuyorha berhohye?
9 Yi rhugenderera kuyorha berhohye, birhuhemere rhugenderere kuyibuka oku rhuli b’eshishi bwenene omu kuchihuzanya na Yehova. (Zb. 8:3, 4) Kandi rhukwanene kuhema Yehova omu sala yi rhukuza engeso y’obwirhohye, n’okuyemera rhuyigirizwe. Yehova arhurhabala rhubone okw’amawazo mage rhunayiga omu Biblia n’amanarhenga oku lubaga lwage, m’amenja bwenene kulusha amerhu. Omu busomi bwawe bwe Biblia, ochihangane kumenya nka gurhe Yehova anazigira balala bali berhohye, n’okuntu anashomba balala bajira omwibone, n’echiburi. Onachihangane kugenderera kuba mwirhohye amango wamahabwa engabane ebonekene nk’eli y’akamaro.
OKUNTU RHWAKAYORHA RHUNANIRIRE OMU KULI
10. Bande Yehova alikoleseze omu kuyigiriza n’okuyerekeza olubaga lwage?
10 Ogenderere kulangalira obwerekezi burhengere oku lubaga lwa Yehova. Omu Izraeli ya mira, Yehova alikoleseze Musa n’abuzinda akolesa Yoshua yi bayerekeza abantu bage. (Yos. 1:16, 17) Abaizraeli bali patire emigisho amango baliri babona abola balume nka barhumwa ba Yehova Mungu. Amagana m’emyaka enyuma waho amango echibaga che Chikristu chirhondera, entumwa 12 zarhondera kuhana obwerekezi. (Mdo. 8:14, 15) Nabuzinda echola chigusho chajamo n’abandi bashamuka b’omu Yerusalemu. Omu kukulikira obwerekezi baliri bapata burhengere kw’abola balume bemana, “ebibaga byagenderera kusera omu bwemere n’oluganjo lwabyo lwagenderera kuluga lusiku oku lwindi.” (Mdo. 16:4, 5) Na mu zinola siku zerhu, Yehova yarhugisha amango yi rhwakulikira obwerekezi burhengere oku lubaga lwage. Aliko si, gurhe Yehova akachiyunva nka rhulahire kukenga balala achishogere yi barhuyerekeza? Rhwashubiza kw’echola chibazo omu kuganira oku byarhengereraga amango Abaizraeli baja omu Chihugo Chilaganano.
11. Bichi byahikiraga abantu b’omu Izraeli ya mira balahiraga Musa eyi Mungu abaga achishogere y’abayerekeza? (Olole n’efoto.)
11 Omu mango Abaizraeli baliri omu lugenzi l’okuja omu Chihugo Chilaganano, abalume bagwerhe oburhwali bapinga Musa n’engabane Yehova alimuhere y’okubayerekeza. Baderha ntya: “Olubaga loshi luli luchesibwa, abantu boshi [arhali Musa yenyine], na Yehova ali ahagarhi kabo.” (Hes. 16:1-3) Bwaliri bukweri omu masu ma Mungu “ok’olubaga loshi” luli luchesibwa na Yehova achishoga Musa yayerekeza abantu bage. (Hes. 16:28) Omu kusuzagura Musa, kweri Yehova y’ebyola bigamba byaliri byasuzagura. Barhalichisezeze oku bulonza bwa Yehova si balichisezeze oku bulonza bwabo, k’okuderha, obukulu n’okumenyikana. Mungu ahana abakulu bahwanzisaga obola bugamba, n’ebihumbi byabandi bantu bali bashigikire. (Hes. 16:30-35, 41, 49) Zene, rhwakachizera oku Yehova anashomba balala banalahira kukenga obwerekezi b’olubaga lwage.
Bande onashigikira? (Olole echifungo che 11)
12. Bulagurhe rhukwanene kugenderera kulangalira olubaga lwa Yehova?
12 Rhwakagenderera kulangalira olubaga lwa Yehova. Amango byamahema oku bahindamule chintu chilebe oku bilolere obukweri burhengere omu Biblia, changwa oku bilolere okuntu akasi k’Obwami kanakolwa, balala bali bayerekeza barhagangana kuhindamula chintu chilebe akaba ntyo ku byahemere. (Mez. 4:18) Banajira ntyo bulala embere wabyoshi banalonza kusimisa Yehova. Kandi, banajira okwabo koshi yi barhola esimikiro ziyumangire oku Chinwa cha Mungu, omu kuba mufano gwinja abandi bakozi boshi ba Yehova bakayiganya.
13. Omufano “gw’ebinwa bigwerhe enyungu” by’ebichi, na bichi rhukwanene kujira oku bilolere ebyola binwa?
13 “Ogenderere kukulikira omufano gw’ebinwa bigwerhe enyungu.” (2 Ti. 1:13) “Omufano gw’ebinwa bigwerhe enyungu” zili nyigirizo ze Chikristu zibonekene omu Biblia. (Yoh. 17:17) Enyigirizo zili nk’ezola y’eshoko ya buli chintu rhuba rhuyemerere. Olubaga lwa Yehova lwarhuyigirize rhuyorhe rhunanirire kw’ezola nyigirizo. Amango moshi rhugenderere kujira ntyo, rhwagishwa.
14. Nka gurhe Bakristu baguma balilekere kukulikira “omufano gw’ebinwa bigwerhe enyungu”?
14 Bichi byakarhengerera nka rhwamaleka kukulikira “omufano gw’ebinwa bigwerhe enyungu?” Rhuganire k’ogula mufano. Omu kagana ka burhanzi myazi miguma ya ba mpu-mpu yaliyenere ku Bakristu baguma ederhere ok’olusiku lwa Yehova lwahikire. Nkabaga halirhengerere amaruba abantu baliri bawaza okw’entumwa Paulo ye wamayandikaga mayemezeze echola. Buzira kurhola akasanzi k’okusuzuma eyola myazi, Bakristu baguma b’omu chibaga che Tesalonika bayemera eyola myazi ya ba mpu-mpu, n’okuhwanza kuyiyeneza oku bandi. Nka bayibukaga ebi Paulo abayigirizaga amango aliri haguma nabo, barhakajirire ntyo. (2 Te. 2:1-5) Paulo alihanwire bene-babo oku barhalemaga bayemera buli chintu choshi bayunvirhe. Kandi n’omu kubarhabala oku bilolere amango mayinjire, Paulo amaliriza amaruba mage makabiri ayandikiraga Abatesalonika na binola binwa: “Nyono Paulo imbalegereze, amala maruba imayandikire n’efune yani nyono nyenyine, chinali chimenyeso mu buli maruba mani; intyo kunanyandika.”—2 Te. 3:17.
15. Nka gurhe rhwakachilanga oku bubeshi bubonekene nka bukweri? Lerha omufano. (Olole n’efoto.)
15 Bichi ebinwa Paulo ayandikiraga Abatesalonika byakarhuyigiriza? Amango rhwamayunva chintu chilebe chirhapatene n’ebirhwayigire birhengere omu Biblia, changwa amango rhwamayunva emyazi ya ba mpu-mpu, birhuhemere rhugwarhe obwirhegerezi. Omu Union Soviétique ya mira, abanzi berhu baliyeneze amaruba mayerekene oku marhengere oku biro bikulu. Amola maruba malihebere bene-berhu baguma omurhima bachihebe olwabo lunda, barhanachibaga oku lunda l’olubaga lwa Yehova. Amola maruba malibonekene nka mali m’obukweri. Aliko, bene-berhu bemana barhazigaga bahehwa. Barhegera ok’oburhumwa bwaliri mw’amola maruba burhalipatene n’ebibabaga bayigire. Zene, abanzi b’obukweri mango maguma banakolesa Enternete omu kushonda rhugwarhe engangane, rhunabe mw’akalaba. Ahali “h’okuyemera obwenge [bwerhu] bwavurugwa juba-juba,” rhukwanene kuchilanga n’okuchibaza akaba kweri ebirhuli rhwayunva n’okusoma bipatene n’obukweri rhwayigire.—2 Te. 2:2; 1 Yoh. 4:1.
Omenye wakaziga warhebekwa n’enyigirizo z’obubeshi zibonekene nka bukweri (Olole echifungo che 15) a
16. Nk’ok’olwandiko lwa Waroma 16:17, 18 luderhere, gurhe rhwakajira nka muntu mulebe amaleka okuli?
16 Rhuyorhe omu buguma haguma na balala bali bemana ku Yehova. Mungu alonzeze rhumuharamye omu njira y’obuguma, haguma na bene-berhu na bali-berhu. Amango moshi rhunanirire omu kuli rhwayorha omu buguma. Balala boshi banachikula omu kuli, banalerha akalaba omu chibaga. Bobola Mungu arhubwirire “rhuchiyase bo.” Nka rhurha jirire ntyo, nerhu rhwakachikula omu kuli.—Osome Waroma 16:17, 18.
17. Nyungu zihe rhunapata bulala rhumenyere enyigirizo z’okuli n’okuzinanira?
17 Amango rhwamayorha rhumenyere okuli, n’okuyorha buzira kushaganyika, rhwayorha hofi na Yehova n’obwemere bwerhu bwagenderera kukomera. (Efe. 4:15, 16) Rhwalangwa oku nyigirizo z’obubeshi, n’oku myazi Shetani yayeneza. Nji rhwanagenderera kuyorha omu bulanzi bwa Yehova omu mango m’amalibuko makulu. Rhuyorhe rhunanirire okuli, ‘na Mungu w’omurhula aba haguma nerhu.’—Flp. 4:8, 9.
OLWIMPO 122 Musere, Buzira Kushaganywa!
a AMAFASIRIYO M’EFOTO: Masharha mayerekene ebyabaga hamagera amakumi m’emyaka, amango bene-berhu b’omu Union Soviétique ya mira bapata amaruba malibonekene nka marhengere oku biro bikulu, nobo eyi marhengere oku banzi babo. Na mu zinola siku, abanzi berhu bakakolesa Enternete omu kuyeneza emyazi y’obubeshi oku bilolere olubaga lwa Yehova.
