Ebibazo by’Abanasoma Ebitabu Byerhu
“Omukazi” oderherwe omu Isaya 60:1 ye nde, na gurhe “anayumanga” “n’okumoleka”?
Isaya 60:1 haderhere ntya: “Yumuka, mukazi we , omoleke, bulala omwangaza gwawe gwayinjire. Obukuze bwa Yehova bukumolekeko.” Ebiderherwe ahala, biyerekene ok’oyula “mukazi” aliri Siyoni, changwa Yerusalemu akapitale ke Yuda mw’agola mango. a (Isa. 60:14; 62:1, 2) Eyila vile eyimangire echihugo choshi. Emyazi ya Isaya yakarhuma rhwachibaza bibazo bibiri: Ech’oburhanzi, mangochi na gurhe Yerusalemu “yayumukaga” n’okuhana omwangaza gw’ekiroho? Echa kabiri, ebinwa bya Isaya bili byayeneza echindi chintu chikomere mu zinola siku zerhu si?
Mangochi na nka gurhe Yerusalemu “yayumangaga” n’okuyeneza omwangaza gw’ekiroho? Yerusalemu n’ehekalu lyage, yalipatire ebibazo amango Abayahudi baliri buhungiro e Babiloni mu myaka 70. Aliko, amango Abababiloni bahebwa omu fune zaba Medi na ba Perse, Abaizraeli n’oburhegesi boshi bwe Babiloni balipatire orozo l’okugaluka omu shanja lyabo n’okushuba kugalula obuharamye buchere. (Ezr. 1:1-4) Omu murhondero gw’omwaka gwa 537 M.K.Y., echigusho ch’Abaizraeli bali bemana ch’amoko 12 moshi chagenderera kukola akola kasi k’okugalula obuharamye buchere. (Isa. 60:4) Barhondera kuhereza Yehova enterekero, okujira amafete n’okushuba kuyumbaka ehekalu. (Ezr. 3:1-4, 7-11; 6:16-22) Naho kandi, bashuba kuhwanza kukuuza Yehova omu Yerusalemu, k’okuderha eshanja Mungu achishogere. N’eju yeyola mpanvu, echola chalirhabere amashanja maliri omu mwizimya gw’ekiroho.
Bobola, obulebi bwa Isaya b’okushuba kukwiza obuharamye bwaliyenere omu Yerusalemu mw’agola mango monyine. Abaizraeli boshi ahanene barhagendereraga kukenga Mungu. (Ne. 13:27; Mal. 1:6-8; 2:13, 14; Mt. 15:7-9) Naho, bajahika Masiya, Yesu Kristu. (Mt. 27:1, 2) Omu mwaka gwa 70 N.K.Y, Yerusalemu n’ehekalu lyayo byalimbulwa eturu ya kabiri.
Yehova abaga alebere gurhe ezola hali zakakulikirene. (Da. 9:24-27) Kweri, omuhigo gwa Yehova oku bilolere Yerusalemu ya hanola oku gulu, gurhaliri g’okuyeneza amalebi moshi maderherwe omu chitabu cha Isaya sura ya 60.
Ebinwa bya Isaya bili byayenera bwenene muzinola siku zerhu si? Nechi, aliko oku bilolere owindi mukazi w’omufano, k’okuderha, “Yerusalemu w’enyanya.” Entumwa Paulo aliyandikire oku bimulolere ntya: “Ali nyama.” (Gal. 4:26) Yerusalemu y’enyanya chili chigabi ch’embingu ch’olubaga lwa Mungu lujirirwe n’ebilemwa byemana by’eroho. Omu “bana” bage hali Yesu na balala Bakristu bashigwa 144 000, nk’oku Paulo aderhere bagwerhe obulangalire b’okulama omu mbingu. Abola Bakristu bashigwa bali “shanja lichesibwa,” k’okuderha, “Izraeli wa Mungu.”—1 Pe. 2:9; Gal. 6:16.
Nka gurhe Yerusalemu w’enyanya “ayumangaga” n’oku “moleka”? Yerusalemu ajirire ntyo kugerera abana bage bashigwa bali hanola oku gulu. Ohuzanye ebibagereremo n’obulebi buganirirwe omu Isaya sura ya 60.
Abakristu bashigwa balikwanene “kuyumanga” bulala baliri omu mwizimya g’omufano amango obugamba buyenera enyuma y’okufa kw’entumwa. (Mt. 13:37-43) Naho baba bashwekwa omu burhegesi b’omu gulu loshi bwe dini ly’obubeshi kokuderha Babiloni Mukulu. Abashigwa bayorha buhungiro kugera “oku buzinda bwalinola gulu libi,” chihe charhonderaga omu mwaka gwa 1914. (Mt. 13:39, 40) Bisanzi bigeke enyuma waho, omu mwaka gwa 1919, bashwekulwa n’okuhwanza kuyeneza omwangaza gw’ekiroho omu kuchihana omu kasi k’amahubiri. b Enyuma w’emyaka, abantu b’amashanja moshi bayinja m’ogola mwangaza kuheba mu nabalala bali Izraeli wa Mungu k’okuderha “abami” Ebiblia eganirireko omu chitabu cha Isaya 60:3.—Ufu. 5:9, 10.
Omu mango mayinjire, Abakristu bashigwa bayerekana omwangaza gwa Mungu omu njira nzibu zibu bwenene kulusha zene. Nka gurhe? Amango nji bamala olugenzi lwabo hanola oku gulu, nji baba chigabi cha “Yerusalemu Mpyahya,” changwa muhya wa Kristu, k’okuderha balala 144 000 ababo bami n’abadahwa.—Ufu. 14:1; 21:1, 2, 24; 22:3-5.
Yerusalemu Mpyahya ashamberwe bwenene oku binj’ayeneza omu Isaya 60:1. (Ohuzanye Isaya 60:1, 3, 5, 11, 19, 20 na Ufunuo 21:2, 9-11, 22-26.) Kuguma n’oku Yerusalemu wahanola oku gulu b’obwaliri bwikalo b’oburhegesi omu Izraeli ya mira, konakuguma Yerusalemu Mpyahya haguma na Kristu, nji bwaba burhegesi buhyahya. Nka gurhe Yerusalemu Mpyahya “[nja] chima kurhenga embingu hofi na Mungu”? Nj’ajira ntyo omu kuseza obwenge bwage oku gulu. Abantu banayubaha Mungu b’amashanja moshi “nji balambagira omu mwangaza gwage.” Nachiro nji bakulwa omu buja bw’echaha n’olufu. (Ufu. 21:3, 4, 24) Oku nji byaja byaba “ebintu byoshi nji byajirwa bihyahya,” nk’oku Isaya n’abandi balebi babaga balebere. (Mdo. 3:21) Okola kujira ebintu buhyahya kwahwanzaga amango Kristu aba Mwami, nji kwahwa oku buzinda b’Oburhegesi bwage bwa Myaka Chihumbi.
a Omu Isaya 60:1, e Tafsiri ya Ulimwengu Mupya ekoleseze echinwa “mukazi” ahali ah’okuderha “Sayuni,” changwa “Yerusalemu,” bulala echinwa che chiebraniya “kuyumanga” “n’okumoleka” mali mazino m’echikazi, nk’oku byakaba eyi yeli akubwira mpu “woyo.” Echinwa “mukazi” chinarhabala abanaderha Echingereza barhegere oku mukazi w’omufano yi bali baganirako.
b Ebintu by’ekiroho byajirwaga buhyahya omu mwaka gwa 1919 bishamberwe omu Ezekieli 37:1-14 n’omu Ufunuo 11:7-12. Ezekieli alilebere okujirwa buhyahya kw’Abakristu bashigwa boshi, enyuma y’okumala myaka minene bwenene omu buhungiro eyi bali bashwekwa. Obulebi buli omu Ufunuo bunaderhera oku bilolere okurhondera kw’echigusho ch’ekiroho, k’okuderha, chigusho chigeke cha bene-berhu babashigwa baliri bayerekeza akasi amango balilahizwe kukolera Yehova mu bisanzi bigeke bulala baliheberwe omu pirizo buzira magosa. Omu mwaka gwa 1919, bashimikwa nka “muja mwimana onakengukire.”—Mt. 24:45; olole echitabu Ibada Safi ya Yehova Inarudishwa Tena!, bukurasa 118.
