MWAZI G’OKUYIGA 37
OLWIMPO 118 “Orhuyongerere Obwemere”
Amaruba Makarhurhabala Kulembera oku Bwimana Kuhika oku Buzinda
“Rhugenderere kufarhirira kuhika oku buzinda obwizere rhwali rhugwerhe kurhenga oku murhondero.”—EBR. 3:14.
EBIRHWAYIGA
Amaruba bayandikiraga Abaebrania mali mw’amahano makarhurhabala rhugenderere kulembera oku bwimana kugera oku buzinda bwa linola gulu libi.
1-2. a) Gurhe akalamo kaliri oku Bakristu be Yudeya amango entumwa Paulo ayandikira Abaebraniya amaruba? b) Bulagurhe amola maruba mali barhabere bwenene?
ABAKRISTU b’Abaebrania balilamire e Yerusalemu ne Yudeya, balihurene ebihe bikomere omu myaka yakulikiraga olufu lwa Yesu. (Mdo. 8:1) Naho, hagerere nka myaka 20 ntya, balibuka bwenene eju y’enzara n’obukene. (Mdo. 11:27-30) Aliko mu kasanzi kalebe nk’omu mwaka gwa 61 N.K.Y, Abakristu baligwerhe omurhula mu mango malebe chiro akaba oku bakahurene n’obupinzani omu mango m’akakulikireho. Mw’agola mango Yehova afuhera entumwa Paulo abarhumire amaruba. Ehano lyaliri mw’amola maruba libanalikenere yi bagala kuchirheganya oku byaliri hofi kubahikira.
2 Amaruba Paulo ayandikiraga Abaebrania malihikire oku kasanzi kakwanene bulala omurhula Abakristu baligwerhe gurhakalegamire. Paulo alihanire ehano lyakarhabere abola Bakristu balembere amalibuko bakahurene amango makakulikire. Yesu alilebere oku bilolere okulimbulwa kwe Yerusalemu ne hekalu lyayo. (Lu. 21:20) Kweri, abe Paulo changwa Abakristu b’omu Yudeya ntaye walimenyere olusiku okola kulimbulwa kwakahikire. Chiro akaba ntyo, abola Bakristu bakakoleseze ebisanzi byaliyorhere omu kukomeza obwemere bwabo n’okulembera.—Ebr. 10:25; 12:1, 2.
3. Bulagurhe Abakristu zene bakwanene kuchiseza oku maruba m’Abaebrania?
3 Rhuli hofi kuhurana amalibuko makomere bwenene kulusha am’Abakristu b’Abaebrania bahuranaga. (Mt. 24:21; Ufu. 16:14, 16) Lekaga rhuganire ku mpanulo ziguma Yehova ahaga abola Bakristu zalibarhabere, zakanarhurhabala nerhu.
“RHUBE BANTU BAKULIRE EKIROHO”
4. Bibazo bihe Abakristu b’Abayahudi balihurene? (Olole n’efoto.)
4 Abayahudi bahindamukaga n’okuba Bakristu, balihurene echibazo chikomere. Mango maguma baliri lubaga Yehova alichishogere. Yerusalemu bwaliri bwikalo b’Obwami bwa Mungu oku gulu, n’ehekalu yaliri santre y’obuharamye buchere. Abayahudi boshi bemana baliri bakulikira Esheria ya Musa nk’oku babaga bayigirizwe n’abakulu babo b’edini. Haliri amarhegeko oku bilolere eby’okulya, okukatwa kw’abana b’oburhabana n’okuntu balikwanene kukolera abantu b’amashanja. Nantyo, enyuma y’olufu lwa Yesu, Yehova arhachiyemeraga enterekero y’Abayahudi. Bobola, birhachiyoroheraga Abayahudi bahindamukaga n’okuba Bakristu kuhindamula okuntu baliri baharamya. (Ebr. 10:1, 4, 10) Chiro n’Abakristu bakulire ekiroho, k’entumwa Petro, byalibakomerere kuhindamula bintu bilebe. (Mdo. 10:9-14; Gal. 2:11-14) Eju y’obola bwemere buhyahya, abola Bakristu balihurene obupinzani burhengere oku bakulu b’edini lye Chiyahudi.
Abakristu balikwanene kugenderera kuchizera obukweri b’omu Chinwa cha Mungu, n’okukabulira ekengero z’abapinzani b’edini lye Chiyahudi (Olole echifungo cha 4-5)
5. Bichi Abakristu balikwanene kuchilangako?
5 Abakristu b’Abaebrania baliri bahurana obupinzani bwa mbero ebiri. Mu njira nguma, abakulu b’edini lye Chiyahudi baliri babona Abakristu nka bigamba by’obwemere. Na baguma omu chibaga baliri baderha okw’Abakristu balikwanene kugenderera kukulikira Esheria ya Musa. Nkabaga baliri bajira ntyo yi bayaka amalibuko. (Gal. 6:12) Bichi byakarhabere Abakristu bemena bayorhe bananirire omu okuli?
6. Bintu bihe Paulo alihebere ababo Bakristu omurhima bajire? (Waebrania 5:14–6:1)
6 Omu maruba Paulo ayandikiraga Abakristu b’Abaebrania, alibahebere omurhima bahumbe bwenene omu Chinwa cha Mungu. (Osome Waebrania 5:14–6:1.) Paulo alikoleseze bwenene Amandiko m’Echiebrania omu kufasiriya bulagurhe okuntu Abakristu baliri baharamyamo Yehova kwalikwirire bwenene kulusha okuntu Abayahudi baliri bamuharamya. a Paulo alihebere Abakristu omurhima, bamenye banayunve bwinja obukweri burhengere omu mandiko, naho yi bagala kurhegera enyigirizo z’obubeshi n’okulekana nazo.
7. Bigeregezo bihe rhuli rhwahurana nabyo zene?
7 Kuguma n’Abakristu b’Abaebraniya, rhuli rhwahurana n’emyazi, n’enkengero zirhapatene n’amakanuni ma Yehova m’okuli. Bantu baguma banaderha Abahamirizi ba Yehova kubi bulala banakenga amarhegeko me Biblia okubilolere echijiro chʼobuhya. Banaderha oku rhurhaba bantu benja, rhurhanababalira. Okuntu abantu banawaza kuli kwagenderera kupinga okuntu Yehova anawaza. (Mez. 17:15) Bobola, kuli kw’akamaro bwenene okurhegera amawazo mabi n’okumakabulira. Rhurhanakwanene kuyemerera omupinzani yeshi yeshi arhume rhwaheza obushiru bwerhu n’okuleka kukolera Yehova.—Ebr. 13:9.
8. Bichi byakarhurhabala rhugenderere kukula ekiroho?
8 Rhunajira bwinja kubika oku murhima ehano Paulo ahaga Abakristu b’Abaebraniya, ly’okugenderera kukula ekiroho. Echola chiderhere oku rhukenere kuyiga Ebiblia bwinja bwinja yi rhugala kumenya Yehova n’okuntu anawaza. Rhukwanene kugenderera kujira ntyo chiro n’enyuma y’okubatizwa. Chiro akaba oku rhwamalegama omu kuli, rhweshi rhukwanene kugenderera kusoma Echinwa cha Mungu n’okuchiyiga. (Zb. 1:2) Eprograme nyinja y’okusoma Echinwa cha Mungu yarhurhabala rhukomeze obwemere bwerhu, engeso Paulo abwiraga Abakristu b’Abaebraniya oku bakwanene kugwarha.—Ebr. 11:1, 6.
“RHUGWARHE OBWEMERE YI RHULANGA AKALAMO KERHU”
9. Bulagurhe Abakristu b’Abaebraniya balikenere obwemere bukomere?
9 Abakristu b’Abaebraniya balikenere kugwarha obwemere bukomere yi bagenderera kulama amango amalibuko makarhengerere omu Yudeya. (Ebr. 10:37-39) Yesu alibwirire abanafunzi bage oku balikwanene kulibirhira oku misozi amango bakabwene Yerusalemu yazungulukwa n’abasoda. Alihanire elila hano oku Bakristu boshi babe balilamire omu vile ye Yerusalemu changwa omu ma vilaje me Yudeya. (Lu. 21:20-24) Amango abasoda bakayinjire kubarhera, abantu balilamire omu ma vilaje bakalibirhiire omu vile bulala ebibambazi byayo byakabalangire. Okulibirhira oku misozi byakabonekene nka ntacho bimalire, byakanahemere obwemere bukomere.
10. Bichi obwemere bukomere bwakashunikire Abakristu bajire? (Waebrania 13:17)
10 Abakristu b’Abaebraniya balikwanene kulangalira kandi balala Yesu aliri akolesa omu kuyerekeza echibaga. Abola baliri bayerekeza, nkabaga baliri bahana obwerekezi buyunvikene oku bilolere mangochi bakalibirhire na nka gurhe bakajirire ntyo. (Osome Waebrania 13:17.) Echinwa che Chigiriki chikolesezwe omu Waebrania 13:17 oku bilolere okukenga, chiderhere ok’omuntu akayunva alonzeze kukenga bulala alangalire owamuhaga obwerekezi. Echola chiheberemo binene olekere okumukenga, bulala agwerhe obuhashe b’okuhaana obwerekezi. Bobola, Abakristu b’Abaebraniya balikenere kukomeza obubwizere bwabo kw’abola baliri bahaana obwerekezi embere amalibuko mayinje. Akaba Abakristu bakengere abashamuka amango ehali ekwirire, nji byabayorohera kubakenga amango ebintu nji byaba bikomere bwenene.
11. Bulagurhe okugwarha obwemere bukomere bili by’akamaro oku Bakristu zene?
11 Kuguma n’Abakristu b’Abaebraniya nerhu rhukenere kugwarha obwemere. Rhulamire omu kasanzi, bantu banene bali balahira n’oku suzagura omukonge gwe Biblia oku bilolere obuzinda bwa linola gulu libi lya Shetani. (2 Pe. 3:3, 4) Okubwindi, chiro akaba okwe Biblia ehanire myazi milebe oku bilolere bichi nji byarhengerera omu mango m’amalibuko makulu, hachili n’ebindi bintu binene rhurhamenyere. Birhuhemere okugwarha obwemere bukomere oku Yehova ahebere h’akasanzi amango obuzinda bwayinja. Rhunakwanene kuchizera oku Yehova nj’arhushishikala mw’akola kasanzi.—Hab. 2:3.
12. Bichi nji byarhurhabala rhufume amalibuko makulu?
12 Birhuhemere kandi rhukomeza obwemere bwerhu omu njira Yehova y’akolesa zene yarhuyerekeza, k’okuderha, “omuja mwimana onakengukire.” (Mt. 24:45) Amango amalibuko makulu nji mahwanza, nkabaga nji rhwahabwa obwerekezi buli wazi b’okuyokola akalamo, buli kuguma n’obw’Abakristu b’Abaebraniya bahabwaga amango abasoda be Roma bazunguluka Yerusalemu. Bili by’akamaro bwenene okuchizera balala bali bayerekeza omu lubaga lwa Yehova. Akaba rhurhachizerere n’okukenga obwerekezi bwabo zene, nji byarhukomerera kukenga obwerekezi nji rhwahabwa amango m’amalibuko makulu.
13. Bulagurhe ehano liyandikirwe omu Waebrania 13:5 lili ly’akamaro?
13 Amango baliri balingiriza echimenyeso ch’okulibirha, Abakristu b’Abaebraniya balikenere kandi kugenderera kulama akalamo kayorohere n’okuleka “kusima efranga.” (Osome Waebrania 13:5.) Baguma mubo, hali amango baliri balwisa ebibazo by’enzara n’obukene. (Ebr. 10:32-34) Chiro akaba oku mu mango maguma baliri tayari kulembera ebibazo baliri bahurana eju y’emyazi minja, baguma mubo bakwanene kuba eyi balirhondere kuchiseza kulonza furanga zinene yi bachilanga oku buhanya n’obukene. Aliko, efuranga zirhakayokwere akalamo kabo amango balimbula Yerusalemu. (Yak. 5:3) Kweri, buli yeshi wakasimire ebintu by’omubiri byakamukomerere kulibirha n’okuleka ahamwababo n’obuchire bwabo.
14. Gurhe obwemere bukomere bwakahuma oku simikiro zerhu zene oku bilolere ebintu by’omubiri?
14 Akaba rhugwerhe obwemere bukomere oku Yehova alimbula hanola hofi hofi linola gulu libi, rhurhawaza ok’okugwarha efuranga changwa ebintu by’omubiri che chintu ch’akamaro bwenene. Omu mango m’amalibuko makulu, efuranga nji zirhagwarha akachiro. Ebiblia ederhere okw’abantu nji “bakabula e arja yabo omu barabara” bulala nji barhegeera oku “ebe e arja changwa e oro nji birhagala kuyokola akalamo kabo oku lusiku lw’ebisirani bya Yehova.” (Eze. 7:19) Ahali h’okulonza efuranga bwenene, birhuhemere rhurhole esimikiro za rhurhabala rhugale kuchishishikala rhwewe rhwenyine, omulala gwerhu, zakanarhuma rhwagenderera kukolera Yehova. Echola chiheberwe m’okuhima amashumi m’okurhola amadeni marhali m’akamaro changwa okuchilundira ebintu binene by’omubiri. Rhwaba merangwe kandi yi rhugala kuyaka kusima ebintu by’omubiri bwenene rhukala rhugwerhe. (Mt. 6:19, 24) Obwemere bwerhu nji bwageregezwa oku bilolere ebintu by’omubiri changwa oku bilolere ebindi bintu, amango rhwaba rhuli rhwalingiriza obuzinda bwa linola gulu libi buhike.
“BIRHUHEMERE OKULEMBERA”
15. Bulagurhe Abakristu b’Abaebraniya balikenere ahanene okulembera?
15 Abakristu b’Abaebraniya balikwanene kulembera ebigeregezo by’obwemere bwabo, bulala ehali yaliri yagenderera kubiha omu Yudeya. (Ebr. 10:36) Chiro akaba oku baguma mubo balihurene amalibuko makomere omu mango magerere, banene mubo ntamo balihurene. Bobola, Paulo alibayibusye oku bihemere bachirheganye oku malibuko manene n’okuba tayari kuba bemana kuhika oku lufu, nk’oku Yesu ajiraga. (Ebr. 12:4) Bayahudi banene baligwarhire burhe bunene bwenene n’okuba babandi bulala bantu banene balibere Bakristu. Myaka migeke enyuma waho, echigusho ch’ababandi charhera Paulo amango aliri ahubiri omu Yerusalemu. Abayahudi barhalukire 40 “bachishwekera kw’echilapo omu kuderha oku barhalya changwa kunywa akaba barhaza kuyirha Paulo.” (Mdo. 22:22; 23:12-14) Chiro akaba oku balibagayire n’okubalibuza, byalihemere Abakristu bagenderere kubuganana haguma yi bajira obuharamye, okuhubiri emyazi minja, n’okugenderera kukomeza obwemere bwabo.
16. Nka gurhe amaruba Paulo ayandikiraga Abaebraniya makarhurhabala rhugwarhe amawazo m’enja oku bilolere amalibuko? (Waebrania 12:7)
16 Bichi byakarhabere Abakristu b’Abaebraniya bagale kulembera obupinzani baliri bahurana? Paulo alimenyere oku balikenere kugwarha amawazo menja oku bilolere amalibuko. Paulo alifasiriye okw’amango Abakristu bamahurana echigeregezo Mungu akachikolesa yi chibayigiriza chintu chilebe. (Osome Waebrania 12:7.) Bakayiga changwa kukuza engeso zisimisize Yehova. Okumenya okw’amalibuko baliri bageramo makahikire obuzinda, abola Bakristu b’Abaebraniya bakabwene oku bibayorohere bagenderere kulembera.—Ebr. 12:11.
17. Bichi Paulo aliyigire oku bilolere okulembera amalibuko?
17 Paulo alibwirire Abakristu b’Abaebraniya oku bagwarhe obushiru, barhanavunikaga omurhima amango bali bahurana ebigeregezo. Paulo aliyerekene olwiganyo lwinja oku bilolere okulembera amalibuko. Embere Paulo abe Mukristu alilibwize Abakristu, analibwene kangana gurhe balikolerwe kubi. Kandi, alimenyere gurhe akalembera amalibuko. N’olekere n’ebyola, alihurene mbero zinene z’obupinzani amala kuba Mukristu. (2 Ko. 11:23-25) Paulo alimenyere bwinja bwinja bichi alikenere yalembera. Aliyibusize abola Bakristu okw’amango bali balembera amalibuko barhakwanene kuchilangalira bowe bonyine, s’aliko bali kwanene kulangalira Yehova. Ebyola byebyahaga Paulo obushiru b’okuderha ntya: “Yehova ali murhabazi wani; ntacho nayubaha.”—Ebr. 13:6.
18. Bichi byarhuhikira rhweshi omu mango mayinjire na gurhe rhwakachirheganya?
18 Baguma mu bene-berhu na bali-berhu bali balembera amalibuko. Njira nguma rhwakabayereka m’obuzigire kuli kubasalirira. N’amango maguma rhwakabarhabala omu kubahereza bintu bilebe bakenere. (Ebr. 10:33) Bobola, Ebiblia ederhere bwinja bwinja oku “balala boshi balonzeze kulama omu bushwekerezi na Mungu n’omu buguma haguma na Kristu nabo nji balibuzwa.” (2 Ti. 3:12) Eju y’echola, rhweshi rhukwanene kuchirheganya oku bilolere ebirhulingirize. Kurhenga zene, rhukwanene kulangalira Yehova bwenene n’okuchizera okw’akarhurhabala kulembera buli chigeregezo choshi choshi chakarhuhikira. Omu kasanzi kakwanene, alerhera abakozi bage boshi bemana echirhulirizo.—2 Te. 1:7, 8.
19. Bichi rhwakajira yi rhuchirheganya oku malibuko makulu? (Olole n’efoto.)
19 Nta ngangane, amaruba Paulo ayandikiraga Abakristu b’Abaebrania, malirhabere Abakristu b’omu kagana ka burhanzi bachirheganye oku malibuko maliri hofi kubahikira. Paulo alihanwire bene-babo na bali-babo bayige Echinwa cha Mungu, banachiyunve bwinja bwinja. Okujira ntyo kwakabarhabere barhegeere amawazo mabi n’oku makabulira bulala makabihize obwemere bwabo. Alibahebere omurhima bakomeze obwemere bwabo, n’echola ch’akarhumire bagala kukulikiza juba juba obwerekezi bwa Yesu na balala baliri bayerekeza omu chibaga. Analirhabere Abakristu balembere ebigeregezo, banabibone nka luli rozo l’okuyigirizwa n’Eshe muzigirwa. Nerhu, rhukwanene kukolesa elila hano lirhengere omu Biblia. Naho, rhwagala kulembera oku bwimana kuhika oku buzinda.—Ebr. 3:14.
Abakristu bemana baligishirwe eju y’okulembera kwabo. N’enyuma y’okulibirha barhenga e Yudeya, baligenderere kubuganana haguma omu kujira emparamyo. Bichi echola chakarhuyigiriza? (Olole echifungo che 19)
OLWIMPO 126 Muyorhe Eyi Muzene, Musimike bwinja, Munakomere
a Paulo aderhere turu mushanvu omu maruba m’Abaebrania omu kuyerekana okw’enjira y’Abakristu y’okuharamya yeyaliri nyinja bwenene kulusha ey’Abayahudi.—Ebr. 1:5-13.
