Naburhwaga omu mwaka gwa 1934 n’abazere barhengaga omu chihugo che Swisse, aliko bahamiraga omu Canada balama omu Timmins, evile y’omu Ontario omu Canada egwerhe obuchire bw’omu budaka. Omu mwaka gwa 1939, nyama arhondera kusoma amagazeti m’Omunara g’Omulanzi n’okuja oku mbuganano z’Abahamirizi ba Yehova. Agendaga ampeka haguma n’abandi bana ndarhu rhurhenga ndanguma nabo. Buzira kulegama nyama aba Muhamirizi wa Yehova.

Darha yewe arhasimiswaga n’eyola simikiro, aliko nyama alisimire okuli, analihigirire kugenderera kukolera Yehova. Agenderera ntyo n’amango akasi k’Abahamirizi ba Yehova kalahizwa omu Canada omu mwaka gwa 1940. Na buli mango nyama aliri akolera darha oku bwinja n’oku bukenge chiro akaba oku darha aliri amubwira ebinwa by’obukali. Omufano gwage gwantabere kuyemera okuli haguma n’aba rhuburhwa nabo. Rhwaligwarhire busime bunene amango darha ahindamula amawazo mage n’okurhondera kukolera omulala gwerhu oku bwinja.

Omu mwaka gwa 1950, naja oku mbuganano esimisize omu vile ye New York. Nalichiyunvirhe nshunikirwe kukola binene omu kasi ka Yehova, enyuma y’okubuganana na bene-berhu na bali-berhu barhengere eyi n’eyi omu gulu lyoshi, n’okuyunviriza ebyerekane bya balala bali bamamala Amasomo me Gileyadi! Nalichiyunvirhe gwerhe nyorha nene bwenene kulusha mira y’okuhwanza akasi k’amango moshi. Amango ngera emwerhu, najaza eformilere y’obupainiya b’oku kahunda. Ebiro by’Omurhabi gwe Canada byanshubiza, bambaza akaba ntakarhanga kubatizwa. Nabatizwa omu Lusiku 1, Mwezi gwe 10, mwaka gwa 1950. Mwezi muguma enyuma waho, narhondera obupainiya b’okukahunda, napata n’engabane mphyahya omu vile ye Ontorio, omu Canada. Eyola vile yaliri hale n’emunda omulala gwani gwalilamire.

 Omu mwaka gwa 1951, ebiro by’omurhabi byahamagala Abahamirizi ba Yehova banaganira olulimi lwe Chifaransa eyi bagwerhe omuhigo g’okubahamisiza omu Province ye Quebec omu banaganira Echifaransa. Eyola munda haliri obulagirire bunene bwenene bw’abahubiri. Nakulaga eyi nanganira Echifaransa ne Chingereza, bobola nayemera envitasiyo y’okuja kukolera e Rouyn. Nta muntu nalimenyere eyola munda. Adrese yonyine yinaligwerhe nk’oku nabaga na derhere embere. Aliko, buli chintu chaliri chagenda bwinja. Nyono na Marcel rhwaba bera benja bwenene, na nagwarha olukengo l’okukola haguma naye omu Quebec mu myaka ene yoshi ekulikirene, kugera ahanaberaga painiya ominuzize.

Amango naliri omu vile ye Quebec, nagwarha obusime b’okupata envitasiyo y’okusoma esomo lya 26 ly’Amasomo me Gileadi omu Sud Lansing, y’omu New York. Rhwahabwa amadiplome omu Siku 12, Mwezi gwa 2, mwaka gwa 1956, nahabwa engabane y’okuja kukolera omu Ghana, b Emazikiro me Afrique. Aliko, embere y’okugenda nagaluka e Canada mu “maboso mageke” kugera amango ebiratasi byani by’okubalama byabaga bikala bili tayari.

Nalimalire myezi mushanvu omu Toronto eyindi nalinga ebyola biratasi by’okubalama. Mw’agola mango napanga omu mulala gwa Cripps, napata n’orozo l’okumenya omunyere wabo Sheila. Rhwava rhwazigirana. Akasanzi kagerereho k’okumubaza akaba rhwakashabana, eviza yani yaba eyi ekola eli tayari (ebiratasi by’okubalama). Nyono na Sheila rhwasalira eju y’echola, rhwabona oku bihemere ngende omu ngabane yani. Aliko, rhwabona oku bihemere rhugenderere kuyandikirana amaruba, n’okulinga rhulole akaba nji rhwashabana omu mango mayinjire. Eyola yaliri simikiro erhayorohere, aliko buzinda rhwayinja kubona oku yaliri nyinja bwenene.

Namalire omwezi goshi eyindi nabalama omu train, omu chombo ch’okuheka emizigo, n’omu nviyo na gera e Accra, omu Ghana. Eyola munda nalihabirwe engabane y’okukola nka mwimangizi we wilaya. Echola chaliheberwe m’okubalama omu Ghana yoshi n’echihugo chaliri hofi nayo Ivory Coast (zene chiyirikirwe Côte d’Ivoire) n’omu Togoland (zene eyirikirwe Togo). Ahanene naliri nabalama nyenyine omu mutugari gwarhengaga oku biro by’omurhabi. Naliri nasima bwenene kulambagirira bene-berhu na bali-berhu!

 Oku buzinda bw’eboso, nagendaga nazigana kugwarha engabane oku mbuganano y’omuzunguluko. Nta Machumbi me Mbuganano rhwaligwerhe. Bobola, bene-berhu baliri bayumbaka echitribine ch’emirhi y’emilonge (migano) banachishakala n’emirhabi y’engazi yi rhubona aharhwayigama ezuba lyalikalihire bwenene. Bulala nta ma frigo maliri ewa cafetariya, bene-berhu baliri bayinja n’ebirhungano omu kuntu nji babone ebilyo by’okuha abantu bahikire oku mbuganano.

Rhwaliri rhwachibonera ebintu bisimisize kw’ezola mbuganano. Lusiku luguma mwene-werhu Herb Jennings, c owerhu misiyonere aliri ageza ejambo, echirhungano charhenga omu byabo ewa cafetaria. Chalibirha oku estrade n’omufasi abantu baliyikere. Mwene-werhu Herb aleka kuderha n’echola chirhungano chaba nka chahwererwe. Aliko, bene-berhu bane bagala kuchifarha, bachibarhula bachigalula omu cafetaria, n’abantu bahwanza kukubira.

Ahagarhi omu boso embere embuganano zirhondere, naliri nayerekana e filme ya The New World Society in Action omu ma vilaje. Omu kujira ntyo, naliri narhola echitambara nanachishwekera ku mirhi 2 nanaja naprojecte kw’efilme. Amavilaje malisimire bwenene! Ku banene mw’abola, bobwaliri b’oburhanzi babona efilme. Baliri babanda omu magasha bwenene n’okugwarha busime bunene, amango baliri babona gurhe abantu babatizwa. Kweri, eyola filme yalirhabere abayibonaga barhegere oku rhuli omu lubaga l’omu gulu lyoshi lugwerhe obuguma.

Namalire myaka ebiri ntya omu Afrique, nahabwa olukengo l’okuja oku mbuganano nkulu ya bene-berhu na bali-berhu barhengere mu bihugo binene omu mwaka gwa 1958 omu vile ye New York. Naligwerhe busime bunene bwenene b’okubona Sheila warhengereraga omu Quebec, emunda aliri akolera nka painiya ominuzize. Rhwalichili rhwayandikirana amaruba, aliko lero mw’akola kasanzi rhwashuba kubonana masu oku masu, nava namubwira rhushabane naye ayemera. Nayandikira Mwene-werhu Knorr d omu kumubaza akaba Sheila akaja kusoma Amasomo me Gileyadi omu kuntu ambugane omu Afrique. Mwene-werhu Knorr ayemera. Buzinda Sheila ahika omu Ghana. Rhwashabana omu Accra, Siku 3, Mwezi gwe 10, mwaka gwa 1959. Rhwalichibwenere gurhe Yehova arhugisha bulala rhwalimuhebere oku nafasi y’oburhanzi omu kalamo kerhu.

Omu mwaka gwa 1961, rhwahabwa engabane y’okuja kukolera omu chihugo che Cameroun. Amango  bambwira oku ntabale omu kushimika omurhabi guhyahya, naligwerhe binene by’okukola. Bulala naliri nakola nka mwimangizi w’omuzunguluko omu Cameroun, naligwerhe binene by’okuyiga. Naho, omu mwaka gwa 1965, rhwarhegera oku Sheila ali bukule. Nabona oku byali bimpere bisanzi binene yi ngala kukoomera gurhe rhwaba bazere. Aliko, amango rhwaligwerhe obusime oku bilolere eyola ngabane yerhu mpyahya y’okulemba omwana, eyi rhunagwerhe omupango g’okugaluka e Canada, rhwahurana echintu chivunire omurhima bwenene.

Omwana werhu afira omunda. Dogtere arhubwira ok’oyola mwana aliri musole. Hamagera myaka erhalukire 50, aliko rhurhakayibagira echola. Chiro akaba oku rhwaliyunvirhe mugayo gunene eju y’ebyola byarhengereraga, rhwaliyorhere omu ngabane yerhu hale n’echihugo cherhu, yali ngambane rhwalisimire bwenene.

Bene-berhu na bali-berhu b’omu chihugo che Cameroun, ahanene baliri balibuzwa eju y’okurhaja kulunda lulebe omu by’epolitike. Ehali yalijire yakomera bwenene amango bajira obuchaguzi bwa prezida. Omu Siku 13, Mwezi gwa 5, mwaka gwa 1970, echintu rhurhalilangalire charhengerera. Oburhegesi bwalahira Abahamirizi ba Yehova. Oburhegesi bwarhola ebiro byerhu by’omurhabi bikwirire bwenene rhwabaga rhwamamala mu myezi erhano yonyine. Okw’eboso lirhanaliza kuhwa, ba misiyonere boshi, kuhebamo nyono na Sheila barhufukuza mw’echola chihugo. Byalirhukomerere bwenene kugenda bulala rhwalizigire bene-berhu na bali-berhu bwenene, rhwanaliyubahire oku bilolere ebyakabahikire.

Naho myezi ndarhu yakulikiraga, rhwayimala oku biro by’omurhabi gwe France. Eyola munda naligenderere kujira byoshi nakagala yi nshishikala ebi bene-berhu na bali-berhu balikenere b’omu Cameroun. Omu Mwezi gwe 12 g’ogola mwaka, barhurhuma kukolera oku murhabi gwe Nigeria, gwabaga gwamarhondera kuyumangira akasi omu Cameroun. Bene-berhu na bali-berhu b’omu Nigeria balirhukaribisize n’obusime bunene, rhwanalisimire kukolera eyola munda mu myaka minene.

Omu mwaka gwa 1973, byalirhuhemere kurhola esimikiro ekomere bwenene. Sheila ahwanza kuhurana ebibazo bikomere by’amagala. Amango rhwaliri e New York oku mbuganano, arhondera kulira n’okubwira ntya: “Ntachigala kugenderera kujira ebindi najira! Emisi yampwerere, inandi nachiyunva ndi mulwala buli mango.” Sheila abaga akolere haguma nani mu myaka erhalukire 14 omu Afrique ye Mazikiro. Naligwerhe eshukrani oku bwimana aliyerekene omu kasi, aliko byalirhuhemere rhuhindamule bintu bilebe. Rhwamalire kuganira n’okusalira bwenene oku bilolere echola, rhwabona oku birhuhere rhugaluke e Canada, emunda bakagalire kushishikala bwinja amagala mage. Okurhenga omu kasi k’obumisiyonere n’akasi k’amango moshi, yaliri simikiro ekomere bwenene enavunire omurhima rhurhaliwazize oku rhwakarholere.

Amango rhugaluka e Canada, mwira wani wamira waliri aguza emitugari ampa akasi. Rhwapanga enju, rhwagula ebintu by’omunju byakolere, naho rhwahama buzira kurhola amadeni. Rhwalilonzeze kulama akalamo kayorohere, eyi rhunachizerere oku lusiku luguma nji rhwashuba kugalukira akasi k’amango moshi. Ech’okusimisa bwenene, echola rhwalilangalire chayenera juba juba chiro n’omu kasanzi rhurhaliwazize.

Nahwanza akasi k’obuvolontere buli lw’Eboso oku chantiye y’okuyumbaka Echumbi lye Mbuganano omu  Norval, Ontario. Okw’ebisanzi byanaliri byagera banjira mwimangizi w’Echumbi lye Mbuganano. Amagala ma Sheila mahwanza kukwira, rhwanaliwazize okw’akagalire kukoomera eyola ngabane mphyahya. Naho, rhwahamira omu nju yaliri oku Chumbi lye Mbuganano omu Mwezi gwa 6, mwaka gwa 1974. Rhwaligwerhe obusime by’okushuba kugalukira akasi k’amango moshi!

Ech’okusimisa, amagala ma Sheila maligenderere kukwira. Myaka ebiri enyuma waho, byalirhuyorohere kuyemera engabane y’okukola nka mwimangizi w’omuzunguluko. Omuzunguluko rhwalirimo gwaliri omu province ye Manitoba, y’omu Canada ahantu halimenyikene oku hali emboho nene n’eglase. Aliko rhwalisimire bwenene okuntu bene-berhu na bali-berhu b’eyola munda barhukaribisaga oku buzigire. Echola charhuyigiriza okw’efasi rhuli rhwakolerako arhali ye y’akamaro, s’aliko echakamaro kuli kugenderera kukolera Yehova buli hoshi rhwakaba rhuli.

Enyuma y’okumala kukola myaka minene omu ngabane y’omuzunguluko, rhwahamagalwa kuja kukolera oku Beteli ye Canada omu mwaka gwa 1978. Harhalegamaga nayiga echintu ch’akamaro, aliko chanderheraga malumwa manene. Nahabwa engabane y’okugeza ejambo lya saa nguma n’enusu omu lulimi lwe Chifaransa oku mbuganano eminuzize y’omu Montreal. Ech’okugayisa, abonviriza barhasimiswa n’ejambo lyani, na mwene-werhu w’omu Komite y’Akasi ampa amahano oku bilolere echola. Kweri, narhegeera mw’akola kasanzi oku ntaba mwigiriza mwinja, nk’okunarhulaga menyere. Aliko, ntayemeraga bwinja bwinja ehano. Enganiro yerhu erhageraga bwinja, naliyunvirhe oburhe bulala nalibwene nk’ali aderha-derha kubi ebi nakolere na ntachinja n’echiguma abwirire najirire. Nalikolere amagosa omu kurhayemera ehano bampaga n’okuntu naliri nachiyunva oku bilolere owaliri ampanula.

Siku zigeke enyuma waho, mwene-werhu w’omu Komite y’Omurhabi anganiza oku bilolere echola chibazo. Nabona oku ntaliyemerere bwinja ehano bampaga, na nayerekana oku nta lijirire bwinja. Buzinda, nahema mwene-werhu wampaga ehano obonjo. Av’anyereka okw’ambabalire loshi loshi. Ebyola byanyigiriza kangana gurhe bili by’akamaro okuba mwirhyohye, nta kanafa nayibagire echola. (Mez. 16:18) Nalisalirire Yehova turu zinene eju y’echola chibazo, na nahigirira oku ntakachifa narhuzagwire ehano.

Kugera buno na mamala myaka erhalukire 40 oku Beteli ye Canada, na kurhenga omu mwaka gwa 1985, nahabirwe olukengo l’okukola omu Komite y’Omurhabi. Omu Mwezi gwa 2, mwaka gwa 2021, mukani muzigirwa Sheila afa. Indi nachiyunva imubulire bwenene, inandi nalwisa ebyani bibazo by’amagala. Aliko, akasi ka Yehova kantabere bwenene ngwarhe binene by’okukola eyi nagwerhe obusime, n’omu “kubona binkomerere kurhegera okw’esiku z’akalamo zili zagera.” (Muh. 5:20) Chiro akaba oku nahurene bibazo binene omu kalamo kani, nagerere mu bindi bintu binene byanderhere obusime bunene. Okuheba Yehova oku nafasi y’oburhanzi omu kalamo kani n’okumala myaka 70 omu kasi k’amango moshi, kwarhumire nachiyunva ntoshekere. Indi nasalirira bene-berhu na bali-berhu bachili misole, nabo bagenderere kuheba Yehova oku fasi y’oburhanzi omu kalamo kabo. Bulala nchizerere oku nabo balama akalamo kasimisize kanali k’okutosheka, n’echola chakagalikana amango monyine rhwamachishoga kukolera Yehova.