1-2. Bulagurhe Yehova arhulemaga n’obuhashe b’okugwarha obusime amango rhwamahereza abandi?

 RHUNAYUNVA obusime bunene amango rhwamahaana kulusha amango rhwamahaabwa. (Mdo. 20:35) Echola chiderhere si oku nta busime rhunayunva amango omuntu amarhuha chintu chilebe? Nanga. Rhweshi rhunagwarha obusime amango bamarhuha empano. S’aliko kandi, rhunayunva obusime amango rhwamahaana chintu chilebe. Kweri, kuli kwinja okubona Yehova arhulemere ntyo. Bulagurhe?

² Bulala Yehova arhulemere omu njira eli ntyo, rhunawaza gurhe rhwakaha abandi, n’amango rhwamajira ntyo rhwanagwarha obusime. Kuli kwinja bwenene okubona Yehova arhulemere ntyo.​—Zb. 139:14.

3. Bulagurhe rhwakaderha oku Yehova ali “Mungu w’obusime”?

³ Amandiko mayerekene ok’okuhaana kunalerha obusime, birhanali byakusomeza okubona Ebiblia ederhere oku Yehova ali “Mungu w’obusime.” (1 Ti. 1:11) Yi waliri w’oburhanzi omu kuhaana na nta muntu n’omuguma onahaana kumulusha. Entumwa Paulo aderhere ntya: Kugerera Yehova, “rhugwerhe akalamo, rhuli rhwalambagira, rhunalamire.” (Mdo. 17:28) Nechi, “buli mpano nyinja na buli mpano eshinganene” enarhenga emwa Yehova.​—Yak. 1:17.

4. Bichi byakarhurhabala rhugwarhe busime bunene bwenene?

⁴ Rhweshi nkabaga rhwakasima rhugwarhe busime bunene bunarhengerera omu kuhaana. Rhwakajira ntyo omu kuyiganya okuhaana kwa Yehova. (Efe. 5:1) Mu gunola mwazi rhwayiga oku mifano minja y’okuhaana, kandi rhwashuba kuyiga gurhe rhwakajira akaba rhwamenyere oku bantu balebe barhasimisizwe n’ebi rhwabajiriraga. Ezola nyibuso zarhurhabala rhugenderere kulanga n’okuyongera obusime rhunapata amango rhwamahaana.

 OYIGANYE OKUHAANA KWA YEHOVA

5. Bintu bihe by’omubiri Yehova anarhuha?

⁵ Mu njira zihe zilebe Yehova anayerekanamo okw’ali Mungu onahaana? Rhuganire ku mifano milebe. Yehova anarhuha ebintu by’omubiri. Nkabaga buli mango rhurhakagwarha ebintu by’ebeyi, aliko kugerera Yehova, buli muguma agwerhe eby’akenere. Omufano, anarhurhabala rhupate eby’okulya, emyambaro, n’ah’okulama. (Zb. 4:8; Mt. 6:31-33; 1 Ti. 6:6-8) Rhwerhunaseza Yehova arhujirire ebyola bintu si? Nanga haban’akatyu! Bulagurhe Yehova anarhujirira ntyo?

6. Bichi olwandiko lwa Matayo 6:25, 26 lwakarhuyigiriza?

⁶ Omu binwa bigeke, Yehova anarhuha ebintu by’omubiri rhukenere bulala arhuzigiire. Rhuganire oku binwa bya Yesu bili omu Matayo 6:25, 26. (Osome.) Yesu akoleseze omufano g’obulemi. Omu kuderha oku bilolere enyunyi Yesu aderhere ntya: “Zirhabyala emburho, zirhashalula, changwa mpu zibike omu nguli.” Aliko, rhulole ebindi ayongerere: “Yisho w’embingu anaziha eby’okulya.” Naho, Yesu abazize ntya: “Murhali bakachiro kuzilusha si?” Bichi Yesu alilonzeze kuderha? Yehova anabona abakozi bage oku bali b’akachiro bwenene kulusha enyama alemere. Akaba Yehova anashishikala ntyo eby’enyama zikenere, rhwakachizera oku nerhu arhuha ebi rhukenere! Kuguma n’eshe w’abana, Yehova anashishikala omulala gwage n’obuzigire.​—Zb. 145:16; Mt. 6:32.

7. Gurhe rhwakayiganya okuhaana kwa Yehova? (Olole n’efoto.)

⁷ Kuguma na Yehova, nerhu rhwakaha abandi ebintu by’omubiri bakenere oku buzigire. Omufano, hali mwene-werhu changwa mwali-werhu omenyere okenere eby’okulya changwa emyambaro? Yehova akakukolesa yomuhereza bintu bilebe akenere. Abakozi ba Yehova kandi baba tayari kuhaana oburhabale amango m’ebihe bikomere. Omufano, omu mango m’obulwala b’okuyahukira bwe Korona, bene-berhu na bali-berhu baliri basangira akalyo, emyambaro, n’ebindi bintu haguma na balala baliri omu bulagirire. Kandi, banene balihanire oku bulonza enshololo z’okurhabala oku kasi k’omu gulu lyoshi. Abola bene-berhu na bali-berhu banahaana, bakulikize ebinwa bili omu Waebrania 13:16 biderhere ntya: “Murhayibagiraga kujira amenja n’okusangira haguma n’abandi ebintu mugwerhe, bulala Mungu anasimiswa n’enterekero zili nk’ezola.”

8. Mu njira zihe rhunayunguka n’emisi erhengere emwa Yehova? (Wafilipi 2:13)

⁸ Yehova anahaana emisi. Yehova anasima kuha abakozi bage bemana emisi. (Osome Wafilipi 2:13.) Ka wachigerere kuhema Yehova  omu sala omu kumubwira akuhereze emisi y’okuhima amashumi? Changwa omu ku musalira akuhe emisi y’okuhima echigeregezo chikomere? Nkabaga hali ebintu walikenere kukola omu lusiku naho wahema Yehova emisi y’okubikola. Amango esala lyawe ly’okuhema emisi lishubizwa, wayemera ebinwa entumwa Paulo ayandikaga omu kuderha ntya: “Omu bintu byoshi njira emisi kugerera olala onampa emisi.”​—Flp. 4:13.

9. Mu njira zihe ziguma rhwakayiganya mu Yehova omu kukolesa emisi yerhu yi rhurhabala abandi? (Olole n’efoto.)

⁹ Chiro akaba rhuli bantu barhashinganene, rhwakayiganya okuntu Yehova anakolesa emisi yage omu kuhaana. Rhurhakagala kuhaana emisi, aliko rhwakakolesa emisi yerhu omu kurhabala abandi. Omufano, rhwakarhabala bene-berhu na bali-berhu bakala bashajire changwa balwere kuja kugula ebintu changwa kukola amakasi m’ahambuga. Akaba ehali yerhu erhuyemerere rhwakachihaana kukola obusafi changwa kukwiziza Echumbi ly’Obwami. Bene-berhu na bali-berhu bakayunguka nka rhukoleseze emisi yerhu mw’eyola njira.

10. Nka gurhe rhwakakomeza abandi kugerera emisi y’ebinwa byerhu?

¹⁰ Murhayibiriraga okw’ebinwa bijira emisi. Ka hali omuntu omenyere wakayunguka bulala wamubwirire koko orhengere oku murhima? Hali muntu mulebe omenyere okenere echirhulirizo si? Akaba ntyo kubili, bulagurhe orhakachihebera h’omuhigo g’okurhabala oyola muntu? Wakaja kumulambagirira, wakamuhamagala oku telefone, wakamuyandikira amaruba changwa emesaje. Orhahangayikaga bwenene oku biwaderha. Binwa bigeke byonyine birhengere oku murhima byakaba eyi bi mwene-wenyu changwa mwali-wenyu akenere y’agenderera kuyorha ali mwimana olwindi lusiku changwa y’achiyunva bwinja.​—Mez. 12:25; Efe. 4:29.

11. Gurhe Yehova anahaana obwengehe bwage?

¹¹ Yehova anahaana obwengehe. Omwanafunzi Yakobo ayandikire ntya: “Chechirhumire akaba hali muguma mu mwewe obulire obwengehe, agenderere kuhema Mungu bulala anaha buli yeshi n’omurhima goshi.” (Yak. 1:5; amahugulo m’eshishi.) Nk’okw’ebila binwa biyerekene, Yehova arhayimana obwengehe bwage. Aba tayari kubuha oku bandi. Omwanafunzi Yakobo ashubire kuderha okw’amango Yehova amahaana obwengehe bwage, anajira ntyo “buzira kulonzesa amagosa.” Na nt’amango analonza rhuchiyunve kubi amango rhwamamuhema obwerekezi. S’aliko aba alonzeze rhumuhemebo.​—Mez. 2:1-6.

12. Rozo luhe rhuherhe l’okuha abandi oku bwengehe Yehova arhuhere?

¹² Gurhe si oku birhulolere? Rhwakayiganya  Yehova si omu kuha abandi oku bwengehe bwerhu? (Zb. 32:8) Abantu ba Yehova bagwerhe rozo lunene l’okubwira abandi oku bibayigire. Omufano, mango manene rhunakoomeza abahyahya omu kasi k’amahubiri. Abashamuka b’echibaga banayerekana engeso y’okulembera amango bali bakoomeza abagwasi b’akasi na bene-berhu babatizwe yi bayiga okuntu bakayeneza engabane zabo omu chibaga. Na bene-berhu na bali-berhu bagwerhe obufundi omu kasi k’okuyumbaka n’ak’okukwiziza, banakoomeza abandi kukola akasi oku maju mali makoleswa omu kasi ka Yehova.

13. Amango rhuli rhwakoomeza abandi, nka gurhe rhwakayiganya enjira Yehova anayerekana m’obwengehe?

¹³ Ochihangane kuyiganya Yehova amango oli wakoomeza abandi. Yehova anahaana obwengehe bwage oku bulonza. Intyo kon’oko, nerhu rhunahaana oku bulonza obumenyi bwerhu ku balala bali bayiga. Rhurhafunda kuyigiriza abandi eju y’okuwaza oku hanola bamenya banarhugombola. Rhurhakwanene kuwaza ntya: ‘Nta muntu walinyigirize! Leka naye achiyigirize.’ Nta mukozi wa Yehova okwanene kugwarha amawazo mali nk’amola. Ahali h’okujira ntyo, rhunagwarha obusime omu kubwira abandi byoshi rhuyinji n’okujira koshi rhugalire yirhukoomeza abandi. (1 Te. 2:8) Rhuba rhugwerhe obulangalire, “oku nabo nji bagwarha obuhashe bukwanene b’okuyigiriza abandi.” (2 Ti. 2:1, 2) Akaba rhunahaana obumenyi bwerhu oku bulonza, rhweshi rhwaba bengehe rhwagwarha n’obusime.

AMANGO ABANTU BARHASIMISIZWE N’EBIRHWABAHAGA

14. Gurhe bantu baguma banajira amango rhwamabakolera chintu chilebe?

¹⁴ Amango rhwamaha bene-berhu na bali-berhu, ahanene banarhubwira koko. Bakarhuyandikira amaruba omu kurhubwira koko changwa bakayerekana eshukrani yabo omu yindi njira. (Kol. 3:15) Ebinwa bili nk’ebyola binarhuyongerera obusime.

15. Bichi rhukwanene kuyibuka amango bantu balebe barhayerekene eshukrani?

¹⁵ Aliko, hali amango abantu barhayerekana eshukrani oku birhwabajirire. Hali n’amango rhwakahaana ebisanzi byerhu, emisi yerhu n’ebikulo byerhu, aliko oku buzinda rhwanachibaza akaba aba rhuli rhwabikolera bali basimiswa nabyo. Nk’ebyola byamarhengerera, gurhe rhwakachilanga yirhurhaheza obusime bwerhu changwa yi rhurhachiyunva kubi? Oyibuke ebinwa by’olwandiko lwerhu l’omusinji, Matendo 20:35. Obusime bwerhu omu kuhaana burhayumangire oku binwa barhubwira. Rhwakachishoga kugenderera kugwarha obusime omu kuhaana chiro byabonekana okw’abandi barhasimisizwe n’ebirhuli rhwabakolera. Nka gurhe? Rhuganire ku njira zigeke.

16. Bichi rhukwanene kuchisezako amango rhuli rhwahaana?

¹⁶ Oyibuke okw’amango wamaha abandi onaba eyi oli wayiganya Yehova. Anaha abantu ebintu binja babe babisimire changwa nanga. (Mt. 5:43-48) Yehova alaganyize okw’amango nerhu rhwamahaana “buzira kulangalira oku hali echi barhugalulira,” ‘oluhembo lwerhu lwaba lunene.’ (Lu. 6:35) Bobola, orhavunikaga omurhima akaba buli mango abantu barhakubwira koko. Oyibuke oku buli mango Yehova nj’akuhemba ku byoshi oli wajira omu kurhabala abandi bulala oba muntu “onahaana oku busime.”​—Mez. 19:17; 2 Ko. 9:7.

17. Mpanvu ehe y’akamaro bwenene enarhuma walonza kuhaana? (Luka 14:12-14)

¹⁷ Echindi chintu rhwakajira yi rhuyiganya Yehova amango rhuli rhwahaana, kuli kukolesa ebinwa bya Yesu bili omu Luka 14:12-14. (Osome.) Kurhali kubi okuyerekana engeso y’okuhaana ku balala nabo bagwerhe obuhashe b’okurhugalulira chintu chilebe. Aliko si, gurhe byakaba nka rhwamarhegera oku  mango manene rhunazigana kuha abantu eyi rhulangalire oku nabo nji barhugalulira? Akaba ntyo ku bili, ochihangane kujira ebi Yesu aderhere. Rhwakaha na balala rhumenyere oku ntacho bakabona barhugalulira. Nantyo, rhwagwarha obusime bulala rhuli rhwayiganya Yehova. N’akaba rhurhalangalire oku hali echi barhugalulira, rhwagenderera kugwarha obusime amango rhwamaha abandi, chiro akaba barhayerekene eshukrani.

18. Bichi rhukwanene kujira na bulagurhe?

¹⁸ Orhawazaga kw’abandi barhajira shukrani. (1 Ko. 13:7) Akaba abandi barhayerekene eshukrani rhwakachibaza ntya: ‘Bafundire kuyerekena eshukrani, changwa kuli kuyibagira kuyiyerekana?’ Nkabaga hali ezindi mpanvu zarhumire barhayerekana eshukrani nk’oku rhwalilangalire. Baguma banayunva basimisizwe bwenene n’ebibabajirire, aliko byanabakomerera kuyerekana eshukrani. Bakayunva bagwerhe eshoni z’okuhabwa oburhabale ahanene akaba omu mango magerere babaliri bahereza abandi oburhabale. Aliko, akaba kweri rhuzigiire bene-berhu na bali-berhu, rhurhakwanene kubagwarha kw’amawazo mabi, rhwanagenderera kuhaana eyi rhugwerhe obusime.​—Efe. 4:2.

19-20. Bichi bindi byakarhurhabala rhugwarhe obusime omu kuha abandi? (Olole n’efoto.)

¹⁹ Obe muntu onalembera. Omwami mwengehe Sulemani ayandikire ntya oku bilolere okuhaana: “Okabule omugati gwawe oku menji bulala enyuma wa siku zinene washuba kugupata.” (Muh. 11:1) Ebyola binwa birhuyigirize okw’abantu bakarhubwira koko “enyuma wasiku zinene.” Echola ch’echahikiraga mwali-werhu muguma.

²⁰ Hamagera myaka minene muka omwimangizi w’omuzunguluko ayandikiire mwali-werhu amaruba ochizinda kubatizwa, mamubwirire okw’agenderere kubera mwimana. Hagerere hofi nka myaka munane ntya, oyola mwali-werhu ashubiza kw’amola maruba omu kuderha ntya: “Nchiyunvirhe nka bihemere nkuyandikire omu kukubwira kangana gurhe wantabere mw’eyila myaka yoshi, chiro akaba oku woyo orhakamenya oku wantabere.” Agenderere kuderha ntya: “[Ebinwa wanyandikiraga]  byaliri binja bwenene, ntakanafa nayibagire olwandiko lwalirimo lwampumaga oku murhima.” a Enyuma w’okuderha oku bilolere bibazo bilebe alihurene, mwali-werhu aderhere ntya: “Mango maguma naliri nachiyunva nka ndeke buli chintu choshi choshi, chiro n’okuleka kukolera Yehova. Aliko buli mango naliri nayibuka olwandiko wanyandikiraga n’echola chaliri cha mpa emisi y’okugenderera kuyorha mwimwana.” Ayongerere ntya: “Mw’eyola myaka munane yoshi, nta chintu chalimpebere omurhima nk’amola maruba wantumiraga n’olwandiko lwalirimo.” Ba nka wawaza busime bungana gurhe muka omwimangizi alipatire amango aliri asoma amola maruba “enyuma wa siku zinene”! Nerhu bakarhubwira ebinwa by’eshukrani enyuma wa siku zinene rhumalire kukolera muntu mulebe echintu chinja.

21. Bulagurhe ohigirire kugenderera kuyiganya okuhaana kwa Yehova?

²¹ Nk’oku rhwabaga rhwabwene, Yehova arhulemere n’obuhashe buli kwago kwago. Chiro akaba oku rhunasima amango bamarhuha, rhunapata busime bunene amango rhwamaha abandi. Rhunachiyunva bwinja amango rhugwerhe obuhashe b’okurhabala bene-berhu na bali-berhu b’Abakristu. Rhunagwarha obusime amango bamayerekana eshukrani oku birhwabajirire. Kweri, omuntu ayerekane eshukrani changwa afunde kuyiyerekana, rhwakagwarha obusime bulala rhwajirire echintu chinja. Orhayibagiraga oku choshi choshi wakahaana, “Yehova agwerhe obuhashe b’okukuha binene kulusha.” (2 Ny. 25:9) Orhakafa wahaanire binene kulusha ebi Yehova akakuha! Na nta busime bunene buliho kulusha okuhaabwa na Yehova. Rhujage rhwahigirira kugenderera kuyiganya Darha w’embingu onahaana.